ಒಂದೇ ಪಂದ್ಯದಲ್ಲಿ ಮಾರ್ಕೊ ಯಾನ್ಸೆನ್ ‘ಡಬಲ್’ ಅರ್ಧಶತಕ

ಟಿ20 ವಿಶ್ವಕಪ್​ನ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಸೌತ್ ಆಫ್ರಿಕಾ ವಿರುದ್ಧ ನ್ಯೂಝಿಲೆಂಡ್ ತಂಡ ಭರ್ಜರಿ ಜಯ ಸಾಧಿಸಿದೆ. ಕೊಲ್ಕತ್ತಾದ ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಸೌತ್ ಆಫ್ರಿಕಾ ಪರ ಅರ್ಧಶತಕ ಬಾರಿಸಿದ್ದು ಮಾರ್ಕೊ ಯಾನ್ಸೆನ್ ಮಾತ್ರ.

ಆರಂಭಿಕ ಆಘಾತಕ್ಕೆ ಒಳಗಾಗಿದ್ದ ಸೌತ್ ಆಫ್ರಿಕಾ ಪರ 7ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಮಾರ್ಕೊ ಯಾನ್ಸೆನ್ 30 ಎಸೆತಗಳಲ್ಲಿ 5 ಭರ್ಜರಿ ಸಿಕ್ಸ್ ಹಾಗೂ 2 ಫೋರ್​ಗಳೊಂದಿಗೆ 55 ರನ್​ ಬಾರಿಸಿದ್ದರು. ಯಾನ್ಸೆನ್ ಬಾರಿಸಿದ ಈ ಅರ್ಧಶತಕದ ನೆರವಿನೊಂದಿಗೆ ಸೌತ್ ಆಫ್ರಿಕಾ ತಂಡವು 20 ಓವರ್​ಗಳಲ್ಲಿ 169 ರನ್ ಕಲೆಹಾಕಿತು.

ಈ ಗುರಿ ಬೆನ್ನತ್ತಿದ ನ್ಯೂಝಿಲೆಂಡ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ್ದರು. ಅದರಲ್ಲೂ ಮಾರ್ಕೊ ಯಾನ್ಸೆನ್​ನನ್ನು ಟಾರ್ಗೆಟ್ ಮಾಡಿದ ಟಿಮ್ ಸೈಫರ್ಟ್ ಹಾಗೂ ಫಿನ್ ಅಲೆನ್ ಸಿಕ್ಸ್​-ಫೋರ್​ಗಳ ಸುರಿಮಳೆಗೈದರು. ಪರಿಣಾಮ ಕೇವಲ 2.5 ಓವರ್​ಗಳಲ್ಲಿ ಮಾರ್ಕೊ ಯಾನ್ಸೆನ್ ನೀಡಿದ್ದು ಬರೋಬ್ಬರಿ 53 ರನ್​ಗಳು.

ಅಂದರೆ 30 ಎಸೆತಗಳಲ್ಲಿ 55 ರನ್ ಬಾರಿಸಿದ್ದ ಮಾರ್ಕೊ ಯಾನ್ಸೆನ್ ಕೇವಲ 17 ಎಸೆತಗಳಲ್ಲಿ 53 ರನ್​ ಚಚ್ಚಿಸಿಕೊಂಡಿದ್ದರು. ಪರಿಣಾಮ ಸೌತ್ ಆಫ್ರಿಕಾ ತಂಡ ನೀಡಿದ 170 ರನ್​ಗಳ ಗುರಿಯನ್ನು ನ್ಯೂಝಿಲೆಂಡ್ ಕೇವಲ 12.5 ಓವರ್​ಗಳಲ್ಲಿ ಚೇಸ್ ಮಾಡಿ 9 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು.