ಅಪಾಯಕಾರಿ ಆಗಬಹುದು.. ಕೈಗೆ ಸಿಕ್ಕಿದ ಮಾಸ್ಕ್​ ಧರಿಸುವ ಮುನ್ನ ಒಮ್ಮೆ ಯೋಚಿಸಿ!

ಕೊವಿಡ್​ ಶುರವಾದ ಮೇಲೆ ಮಾಸ್ಕ್ ನಮ್ಮ ದೈನಂದಿನ ಜೀವನದ ಅವಿಭಾಜ್ಯ ಅಂಗವಾಗಿಬಿಟ್ಟಿದೆ. ಕೊರೊನಾ ವೈರಸ್​ ಭಯಕ್ಕೆ ಅಲ್ಲದಿದ್ದರೂ ದಂಡ ಕಟ್ಟುವ ಭಯಕ್ಕಾದರೂ ಜನ ಮಾಸ್ಕ್​ ಧರಿಸುತ್ತಿದ್ದಾರೆ. ಆದರೆ, ಎಷ್ಟೋ ಜನ ಮಾಸ್ಕ್ ಬಗ್ಗೆ ಉಡಾಫೆ ತೋರಿಸಿ ತಮಗರಿವಿಲ್ಲದಂತೆಯೇ ಅಪಾಯಕ್ಕೆ ಆಹ್ವಾನ ನೀಡುತ್ತಿದ್ದಾರೆ ಎಂದು ಅಮೆರಿಕಾದ ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ.

ನಾಮಕಾವಸ್ತೆಗೆ ಎಂಬಂತೆ ಮಾಸ್ಕ್​ ಧರಿಸುವ ಹೆಚ್ಚಿನ ಮಂದಿ ಅದರ ಸ್ವಚ್ಛತೆಯ ಕುರಿತು ಕಾಳಜಿಯನ್ನೇ ವಹಿಸುತ್ತಿಲ್ಲ. ಬಹುತೇಕರು ಒಮ್ಮೆ ಧರಿಸಿದ ಮಾಸ್ಕನ್ನೇ ತಿರುಗಾಮುರುಗಾ ಮಾಡಿ ಧರಿಸುತ್ತಾರೆ. ಆದರೆ, ಹೀಗೆ ಬಳಕೆ ಮಾಡಿದ ಮಾಸ್ಕ್​ ಧರಿಸುವುದು ಹಾಗೆಯೇ ಓಡಾಡುವುದಕ್ಕಿಂತಲೂ ಅಪಾಯಕಾರಿ ಎನ್ನುವುದು ತಜ್ಞರ ಅಭಿಪ್ರಾಯ.

ಜನರು ಮಾಸ್ಕ್​ ಕೊಳ್ಳುವಾಗ ಅದರ ಗುಣಾವಗಳ ಕುರಿತು ಅವಲೋಕಿಸುತ್ತಿಲ್ಲ. ಮಾಸ್ಕ್​ಗಳಲ್ಲಿ ಹಲವು ವಿಧವಿದ್ದು ಕೆಲವಷ್ಟು ಮಾಸ್ಕ್​ಗಳು ಅತಿಸಣ್ಣ ಕಣಗಳನ್ನು ತಡೆದು ನಿಲ್ಲಿಸಲಾರವು. ಅಂತಹ ಮಾಸ್ಕ್​ಗಳನ್ನು ಪುನರ್​ಬಳಕೆ ಮಾಡಿದಷ್ಟೂ ಅಪಾಯ ಹೆಚ್ಚುತ್ತಲೇ ಇರುತ್ತದೆ. 3 ಪದರದ ಹೊಸಾ ಸರ್ಜಿಕಲ್​ ಮಾಸ್ಕ್​ ಶೇ.65ರಷ್ಟು ಪರಿಣಾಮಕಾರಿ ಆಗಿದ್ದರೆ ಬಳಕೆಯ ನಂತರ ಅದು ಶೇ.25ರಷ್ಟು ಮಾತ್ರ ಪರಿಣಾಮಕಾರಿ. ಇಂತಹ ಮಾಸ್ಕ್​ಗಳನ್ನು ಜನರು ಮತ್ತೆ ಮತ್ತೆ ಬಳಸುವುದರಿಂದ ಅದು ಮತ್ತಷ್ಟು ಅಪಾಯ ತಂದೊಡ್ಡಲಿದೆ ಎಂದು ಅಮೆರಿಕಾದ ತಜ್ಞರು ತಿಳಿಸಿದ್ದಾರೆ.

ಮಾಸ್ಕ್​ ಧರಿಸಿದಾಗ ಉಸಿರಾಟ ಪ್ರಕ್ರಿಯೆಯಲ್ಲೂ ಕೆಲ ಬದಲಾವಣೆ ಆಗುತ್ತದೆ. ಗಾಳಿಯು ನೇರವಾಗಿ ಮೂಗು ಮತ್ತು ಬಾಯಿಯನ್ನು ಪ್ರವೆಶಿಸದೇ ಮಾಸ್ಕ್​ ಮೂಲಕ ಸುತ್ತಲಿಂದ ಒಳಹೊಗ್ಗುತ್ತದೆ. ಈ ಸಂದರ್ಭದಲ್ಲಿ ಮಾಸ್ಕ್​ ಕೆಲ ಕಣಗಳನ್ನು ತಡೆಗಟ್ಟಿದರೂ ಸಣ್ಣ ಕಣಗಳು ಒಳ ನುಸುಳುತ್ತವೆ.

ಆದ್ದರಿಂದ ಮಾಸ್ಕ್​ ಕುರಿತು ಜನಸಾಮಾನ್ಯರು ನಿರ್ಲಕ್ಷ್ಯ ತೋರಿಸುವುದು ಆಘಾತಕಾರಿ. ಆರೋಗ್ಯ ಸಿಬ್ಬಂದಿಗಳು ಇದನ್ನು ಗಂಭೀರವಾಗಿ ಪರಿಗಣಿಸಿ ಜನರಲ್ಲಿ ಅರಿವು ಮೂಡಿಸಬೇಕಿದೆ. ಕೊರೊನಾ ತಡೆಗಟ್ಟಲು ನಿರ್ದಿಷ್ಟವಾಗಿ ಯಾವ ರೀತಿಯ ಮಾಸ್ಕ್ ಬಳಸಬೇಕು ಎಂದು ಹೇಳಬೇಕಾದ ಅವಶ್ಯಕತೆ ಇದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.