Italy consulate: ಬೆಂಗಳೂರಿನಲ್ಲಿ ಇಟಲಿ ಕಾನ್ಸುಲೇಟ್ ಕಾರ್ಯಾರಂಭ, ವರ್ಷಕ್ಕೆ 30,000 ವೀಸಾಗಳನ್ನು ಪ್ರಕ್ರಿಯೆಗೊಳಿಸುವ ಗುರಿ
ಬೆಂಗಳೂರಿನಲ್ಲಿ ದೂತಾವಾಸವನ್ನು ಸ್ಥಾಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಕಾನ್ಸುಲ್ ಜನರಲ್ ಅಲ್ಫೊನ್ಸೊ ಟ್ಯಾಗ್ಲಿಯಾಫೆರಿ, ಕಚೇರಿಯು ವರ್ಷಕ್ಕೆ ಕನಿಷ್ಠ 20,000-30,000 ವೀಸಾಗಳನ್ನು ಪ್ರಕ್ರಿಯೆಗೊಳಿಸುವ ಗುರಿಯನ್ನು ಹೊಂದಿದೆ ಎಂದಿದ್ದಾರೆ. ಇದು ಸಂಕೀರ್ಣವಾದ, ಆದರೆ ಚಂದದ ಪ್ರಯಾಣವಾಗಿದೆ ಎಂದು ಹೇಳಿದ್ದಾರೆ.
Updated on:Oct 23, 2023 | 12:50 PM
ಬೆಂಗಳೂರು ಅಕ್ಟೋಬರ್ 23 : ಇಟಲಿಯ (Italy) ಹೊಸ ಕಾನ್ಸುಲೇಟ್(Consulate General) ಜನರಲ್ ಶನಿವಾರ ಬೆಂಗಳೂರಿನಲ್ಲಿ ತನ್ನ ಹೊಸ ಕಚೇರಿಯನ್ನು ರಿಚ್ಮಂಡ್ ರಸ್ತೆಯಲ್ಲಿ ಔಪಚಾರಿಕವಾಗಿ ತೆರೆಯುವ ಮೂಲಕ ತನ್ನ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು.ಇಟಲಿಯ ಉನ್ನತ ರಾಜತಾಂತ್ರಿಕರು ಉದ್ಘಾಟನಾ ಸಮಾರಂಭದಲ್ಲಿ ಭಾಗವಹಿಸಿದ್ದರು.”ಈ ಕಚೇರಿಯು ಇಟಲಿ ಮತ್ತು ದಕ್ಷಿಣ ಭಾರತ ನಡುವಿನ ಅಂತರವನ್ನು ಕಡಿಮೆ ಮಾಡುತ್ತದೆ” ಎಂದು ಇಟಾಲಿಯನ್ ವಿದೇಶಾಂಗ ವ್ಯವಹಾರಗಳು ಮತ್ತು ಅಂತರರಾಷ್ಟ್ರೀಯ ಸಹಕಾರ ಸಚಿವಾಲಯದ ಪ್ರಧಾನ ಕಾರ್ಯದರ್ಶಿ, ರಾಯಭಾರಿ ರಿಕಾರ್ಡೊ ಗೌರಿಗ್ಲಿಯಾ ಹೇಳಿದರು.
ಈ ಹೊಸ ಕಾನ್ಸುಲೇಟ್‌ನೊಂದಿಗೆ, ನಾವು ದೊಡ್ಡ ಮಹತ್ವಾಕಾಂಕ್ಷೆಗಳನ್ನು ಹೊಂದಿದ್ದೇವೆ. ನಾವು ಎರಡು ದಿಕ್ಕುಗಳಲ್ಲಿ ವ್ಯಾಪಾರ ಅವಕಾಶಗಳನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದ್ದೇವೆ, ಸಮರ್ಥ ಮತ್ತು ವೇಗದ ವೀಸಾ ವಿತರಣೆ ಮಾಡಲಿದ್ದು, ಸಾಂಸ್ಕೃತಿಕ ಮತ್ತು ವೈಜ್ಞಾನಿಕ ಸಹಯೋಗಗಳನ್ನು ಉತ್ತೇಜಿಸುತ್ತೇವೆ ಎಂದು ಅವರು ಹೇಳಿದ್ದಾರೆ.
ಭಾರತಕ್ಕೆ ಇಟಲಿಯ ರಾಯಭಾರಿ ವಿನ್ಸೆಂಜೊ ಡಿ ಲುಕಾ, ಎರಡೂ ದೇಶಗಳು ಸಹಯೋಗದಲ್ಲಿ ಐತಿಹಾಸಿಕ ಕ್ಷಣವನ್ನು ಅನುಭವಿಸುತ್ತಿವೆ. ಕಳೆದ ಮಾರ್ಚ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರ ಆಹ್ವಾನದ ಮೇರೆಗೆ ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರು ರೈಸಿನಾ ಸಂವಾದವನ್ನು ಉದ್ಘಾಟಿಸಿದ ಸಂದರ್ಭದಲ್ಲಿ ಇದನ್ನು ಕಾರ್ಯತಂತ್ರದ ಪಾಲುದಾರಿಕೆಗೆ ಏರಿಸಲಾಗಿದೆ ಎಂದು ಹೇಳಿದ್ದಾರೆ.
ಬೆಂಗಳೂರಿನಲ್ಲಿ ದೂತಾವಾಸವನ್ನು ಸ್ಥಾಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಕಾನ್ಸುಲ್ ಜನರಲ್ ಅಲ್ಫೊನ್ಸೊ ಟ್ಯಾಗ್ಲಿಯಾಫೆರಿ, ಕಚೇರಿಯು ವರ್ಷಕ್ಕೆ ಕನಿಷ್ಠ 20,000-30,000 ವೀಸಾಗಳನ್ನು ಪ್ರಕ್ರಿಯೆಗೊಳಿಸುವ ಗುರಿಯನ್ನು ಹೊಂದಿದೆ ಎಂದಿದ್ದಾರೆ. ಇದು ಸಂಕೀರ್ಣವಾದ, ಆದರೆ ಚಂದದ ಪ್ರಯಾಣವಾಗಿದೆ. 2022 ರಲ್ಲಿ, ನಾವು ಈಗಾಗಲೇ ನಮ್ಮ ಆಗಿನ ವಿದೇಶಾಂಗ ಸಚಿವರೊಂದಿಗೆ ಸಾಂಕೇತಿಕ ಉದ್ಘಾಟನೆಯನ್ನು ಹೊಂದಿದ್ದೇವೆ, ಆದರೆ ಅದು ಮೂಲತಃ ಮೊದಲ ಶಂಕು ಸ್ಥಾಪನೆ. ಈಗ, ಒಂದು ವರ್ಷದ ಕೆಲಸದ ನಂತರ, ನಾವು ಸುಂದರವಾದ ಮತ್ತು ಅತ್ಯಂತ ಕ್ರಿಯಾತ್ಮಕ ಕಚೇರಿಯನ್ನು ಹೊಂದಿದ್ದೇವೆ.
ದೂತಾವಾಸವು ಇಟಾಲಿಯನ್ ಟ್ರೇಡ್ ಏಜೆನ್ಸಿ (ITA), ಇಂಡೋ-ಇಟಾಲಿಯನ್ ಚೇಂಬರ್ ಆಫ್ ಕಾಮರ್ಸ್ ಮತ್ತು ಇಂಡಸ್ಟ್ರಿ (IICCI) ಮತ್ತು ವಿದೇಶಿ ವಿದ್ಯಾರ್ಥಿಗಳಿಗೆ ಶೈಕ್ಷಣಿಕ ಪ್ರಚಾರ ಮತ್ತು ದೃಷ್ಟಿಕೋನಕ್ಕಾಗಿ ಇಟಾಲಿಯನ್ ಕೇಂದ್ರವಾದ ಯುನಿ-ಇಟಾಲಿಯಾವನ್ನು ಸಹ ಆಯೋಜಿಸುತ್ತದೆ.
ಇದನ್ನೂ ಓದಿ: ಸೆಕ್ಸಿಸ್ಟ್ ಹೇಳಿಕೆ; ಸಂಗಾತಿಯಿಂದ ದೂರವಾದ ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ
ಭಾರತದ ಸಿಲಿಕಾನ್ ವ್ಯಾಲಿಯಲ್ಲಿ ಪ್ರಮುಖ ಪಾತ್ರವನ್ನು ವಹಿಸಬಹುದಾದ ‘ವೈಜ್ಞಾನಿಕ ಅಟ್ಯಾಚೆ’ ಅನ್ನು ಆಯೋಜಿಸಲು ಚಿಂತಿಸಿರುವುದಾಗಿ ಟ್ಯಾಗ್ಲಿಯಾಫೆರಿ ಹೇಳಿದ್ದಾರೆ.
ಮತ್ತಷ್ಟು ವಿದೇಶ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 12:39 pm, Mon, 23 October 23
