Donald Trump: ಡೊನಾಲ್ಡ್ ಟ್ರಂಪ್ ಮೇಲಿನ ಟ್ವಿಟರ್ ನಿರ್ಬಂಧ ವಾಪಸ್: ಎಲಾನ್ ಮಸ್ಕ್ ಘೋಷಣೆ

ಅಮೇರಿಕಾದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಅವರನ್ನು ಟ್ವಿಟರ್​ನಿಂದ ನಿಷೇಧಿಸಿರುವ ನಿರ್ಧಾರವನ್ನು ಮರಳಿ ಪಡೆಯುವುದಾಗಿ ಟೆಸ್ಲಾ ಮುಖ್ಯಕಾರ್ಯನಿರ್ವಾಹಕ ಎಲಾನ್ ಮಸ್ಕ್ (Elon Musk) ಹೇಳಿದ್ದಾರೆ. ಫೈನಾನ್ಷಿಯಲ್ ಟೈಮ್ಸ್​ನ ‘ಫ್ಯೂಚರ್ ಆಫ್ ದಿ ಕಾರ್ ಕಾನ್ಫರೆನ್ಸ್‌’ನಲ್ಲಿ ಮಾತನಾಡುತ್ತಾ ಮಂಗಳವಾರ ಈ ವಿಚಾರವನ್ನು ಅವರು ಘೋಷಿಸಿದ್ದಾರೆ. ತಮ್ಮನ್ನು ತಾವು ನಿರಂಕುಶ ಸ್ವಾತಂತ್ರ್ಯವಾದಿ ಎಂದು ಕರೆದುಕೊಂಡಿರುವ ಮಸ್ಕ್, ಇತ್ತೀಚೆಗಷ್ಟೇ ಟ್ವಿಟರ್​ ಖರೀದಿಸುವ 44 ಶತಕೋಟಿ ಡಾಲರ್ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಕೆಲ ಸಮಯಗಳ ಮೊದಲು ಸುಮಾರು 88 ಮಿಲಿಯನ್‌ಗಿಂತಲೂ ಹೆಚ್ಚು ಅನುಯಾಯಿಗಳನ್ನು ಹೊಂದಿದ್ದ ಡೊನಾಲ್ಡ್​​ ಟ್ರಂಪ್‌ ಖಾತೆಯನ್ನು ಟ್ವಿಟರ್​ನಿಂದ ತೆಗೆದುಹಾಕಲಾಗಿತ್ತು. ಟ್ವಿಟರ್​ನಲ್ಲಿ ಪ್ರಭಾವಿಗಳ ಖಾತೆಗಳನ್ನು ಮಾಡರೇಟ್ ಮಾಡುವ ವಿಚಾರಕ್ಕೆ ಸಂಬಂಧಿಸಿದಂತೆ ಮೊದಲಿನಿಂದ ಚರ್ಚೆಗಳು ನಡೆಯುತ್ತಿವೆ.

ಜನವರಿ 6 ರಂದು ಅಮೇರಿಕಾ ರಾಜಧಾನಿಯಲ್ಲಿ ನಡೆದ ಗಲಭೆಯ ನಂತರ ಟ್ರಂಪ್ ಅವರನ್ನು ಟ್ವಿಟರ್‌ನಿಂದ ಶಾಶ್ವತವಾಗಿ ಅಮಾನತುಗೊಳಿಸಲಾಯಿತು. ‘ಹಿಂಸಾಚಾರವನ್ನು ಮತ್ತಷ್ಟು ಪ್ರಚೋದಿಸುವ ಅಪಾಯವಿದೆ’ ಎಂದು ಕಾರಣವನ್ನು ನೀಡಿದ್ದ ಟ್ವಿಟರ್, ಟ್ರಂಪ್ ಖಾತೆಯನ್ನು ಬ್ಯಾನ್ ಮಾಡಿತ್ತು. ಟ್ವಿಟರ್​ನ ಈ ನಿರ್ಧಾರ ಜನರಲ್ಲಿ ಅವರ ಬಗೆಗಿನ ರಾಜಕೀಯ ಅಭಿಪ್ರಾಯಗಳನ್ನು ಹೆಚ್ಚಿಸಿತು ಎಂದಿರುವ ಎಲಾನ್ ಮಸ್ಕ್, ನೈತಿಕವಾಗಿ ಅದು ತಪ್ಪಾದ ನಿರ್ಧಾರ ಎಂದಿದ್ದಾರೆ.

ಎಲಾನ್ ಮಸ್ಕ್ ಖರೀದಿಸಿದ್ದ ನಂತರವೂ ಟ್ವಿಟರ್​ಗೆ ವಾಪಸ್ ಬರಲ್ಲ ಎಂದಿದ್ದ ಟ್ರಂಪ್:

ಇದನ್ನೂ ಓದಿ

ವಿವಾದ ಸೃಷ್ಟಿಸಿದ ‘ದಿ ಕಾಶ್ಮೀರ್ ಫೈಲ್ಸ್’ ಕುರಿತ ಶಶಿ ತರೂರ್ ಟ್ವೀಟ್; ಸುನಂದಾ ಪುಷ್ಕರ್ ಹೆಸರು ಉಲ್ಲೇಖಿಸಿದ ಅನುಪಮ್ ಖೇರ್

Karnataka Rain: ಕರ್ನಾಟಕದಲ್ಲೂ ಅಸಾನಿ ಚಂಡಮಾರುತದ ಎಫೆಕ್ಟ್​; ಕರಾವಳಿಯಲ್ಲಿ ಹಳದಿ ಅಲರ್ಟ್​ ಘೋಷಣೆ

Sri Lanka Crisis ಶ್ರೀಲಂಕಾ: ಸಾರ್ವಜನಿಕ ಆಸ್ತಿಗೆ ಹಾನಿ ಮಾಡಿದವರಿಗೆ ಕಂಡಲ್ಲಿ ಗುಂಡಿಕ್ಕಲು ರಕ್ಷಣಾ ಸಚಿವಾಲಯ ಆದೇಶ

ಇತ್ತೀಚೆಗಷ್ಟೇ ಎಲಾನ್ ಮಸ್ಕ್ ಮೈಕ್ರೋ ಬ್ಲಾಗಿಂಗ್ ಸೈಟ್ ಟ್ವಿಟರ್​ಅನ್ನು ಖರೀದಿಸಿದ್ದರು. ಅದಾಗ್ಯೂ ತಾವು ಟ್ವಿಟರ್​ಗೆ ಮರಳುವುದಿಲ್ಲ ಎಂದು ಡೊನಾಲ್ಡ್ ಟ್ರಂಪ್ ನುಡಿದಿದ್ದರು. ಈ ಬಗ್ಗೆ ಫಾಕ್ಸ್ ನ್ಯೂಸ್​ಗೆ ತಿಳಿಸಿದ್ದ ಅವರು, ಫೆಬ್ರವರಿ ಅಂತ್ಯದಲ್ಲಿ ಆಪಲ್ ಆಪ್ ಸ್ಟೋರ್‌ನಲ್ಲಿ ಪ್ರಾರಂಭವಾಗಿರುವ ‘ಟ್ರೂತ್ ಸೋಶಿಯಲ್’ ಎಂಬ ತಮ್ಮದೇ ಹೊಸ ಸಾಮಾಜಿಕ ಮಾಧ್ಯಮ ಅಪ್ಲಿಕೇಶನ್ ಅನ್ನು ಬಳಸುವುದಾಗಿ ಹೇಳಿದ್ದರು. ಆದರೆ ಆ ಆಪ್​ ಗ್ಲಿಚ್​ಗಳನ್ನು ಹೊಂದಿತ್ತು. ಇತ್ತೀಚಿಗಷ್ಟೇ ಬಳಕೆದಾರರ ಪ್ರವೇಶಕ್ಕೆ ಅದು ಲಭ್ಯವಾಗಿದೆ.

ಆದರೆ ಇದೀಗ ಎಲಾನ್ ಮಸ್ಕ್ ಟ್ರಂಪ್ ಮೇಲಿನ ನಿಷೇಧ ಮರಳಿ ಪಡೆಯುವುದಾಗಿ ಹೇಳಿದ್ದರಿಂದ ಅವರ ಮುಂದಿನ ನಿರ್ಧಾರದ ಬಗ್ಗೆ ಕುತೂಹಲ ಮನೆಮಾಡಿದೆ. ಆದರೆ ಇದುವರೆಗೆ ಟ್ರಂಪ್ ಆಗಲಿ ಅಥವಾ ಅವರ ವಕ್ತಾರರಾಗಲಿ ಈ ಬಗ್ಗೆ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.

ಮತ್ತಷ್ಟು ವಿದೇಶ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 7:13 am, Wed, 11 May 22