ಅಪ್ಪ-ಅಮ್ಮನನ್ನು ಕೊಂದ ತಾಲಿಬಾನ್​ ಉಗ್ರರನ್ನೇ ಹೊಡೆದುರುಳಿಸಿದ ಈ ಪೋರಿ ಯಾರು ಗೊತ್ತಾ?

ಅಫ್ಘಾನಿಸ್ತಾನದ ಗಲ್ಲಿಗಲ್ಲಿ, ನಗರ-ಗ್ರಾಮದಲ್ಲಿ ಅಟ್ಟಹಾಸ ಮೆರೆದಿರುವ ತಾಲಿಬಾನ್​ ಉಗ್ರರ ದುಷ್ಕೃತ್ಯಗಳಿಗೆ ಕೊನೆಯೇ ಇಲ್ಲದಂತಾಗಿದೆ. ಇದಕ್ಕೆ ಸಾಕ್ಷಿಯೆಂಬಂತೆ ಇಂದು ಬೆಳಗ್ಗೆ ಕೂಡ ಆತ್ಮಾಹುತಿ ಬಾಂಬ್​ ದಾಳಿಯಲ್ಲಿ 8 ಅಫ್ಘಾನ್​ ಸೈನಿಕರನ್ನ ಕೊಂದಿದ್ದಾರೆ ಈ ರಕ್ತಪಿಪಾಸುಗಳು. ಹೀಗಾಗಿ, ಇವರನ್ನ ಕಂಡು ಇಡೀ ದೇಶವೇ ಗಡಗಡ ಅಂತಾ ನಡುಗುತ್ತದೆ. ಆದರೆ, ಇಷ್ಟು ಭೀತಿಯ ನಡುವೆಯೂ 16 ವರ್ಷದ ಪೋರಿಯೊಬ್ಬಳು ಇಬ್ಬರು ತಾಲಿಬಾನ್​ ಉಗ್ರರನ್ನು ಹೊಡೆದುರುಳಿಸಿದ್ದಾಳೆ ಅಂತಾ ಹೇಳಿದ್ರೆ ನೀವು ನಂಬ್ತೀರಾ? ನೀವು ನಂಬಲೇ ಬೇಕು.

ಅಂದ ಹಾಗೆ, ಕಳೆದ ವಾರ ಅಫ್ಘಾನಿಸ್ತಾನದ ಘೋರ್​ ಪ್ರಾಂತ್ಯದಲ್ಲಿ ನಡೆದಿರೋ ಈ ಘಟನೆ ಇದೀಗ ಬೆಳಕಿಗೆ ಬಂದಿದೆ. ಹೌದು, ಇದೇ ಪ್ರಾಂತ್ಯದ ಗ್ರಾಮವೊಂದರ ನಿವಾಸಿಯಾಗಿರುವ 16 ವರ್ಷದ ಖಮರ್​ ಗುಲ್​ ತನ್ನ ಪುಟ್ಟ ಕುಟುಂಬದೊಂದಿಗೆ ಸಂತೋಷವಾಗಿ ವಾಸವಿದ್ದಳು. ಗ್ರಾಮದ ಮುಖ್ಯಸ್ಥನಾಗಿದ್ದ ಖಮರ್​ ತಂದೆ ಸರ್ಕಾರದ ಅಭಿವೃದ್ಧಿಪರ ಚಿಂತನೆಯ ಬೆಂಬಲಿಗರಾಗಿದ್ದರು. ಹೀಗಾಗಿ, ಸರ್ಕಾರದ ಯೋಜನೆಗಳಿಗೆ ಅವರ ಪ್ರೋತ್ಸಾಹವಿತ್ತು.

ಖಮರ್​ ಗುಂಡಿನ ದಾಳಿಗೆ ಇಬ್ಬರು ಉಗ್ರರು ಮಟ್ಯಾಷ್!
ಖಮರ್ ತಂದೆಯ ಆ​ ನಿಲುವು ಅಲ್ಲಿನ ತಾಲಿಬಾನ್​ ಉಗ್ರರಿಗೆ ಅರಗಿಸಿಕೋಳ್ಳೋಕೆ ಆಗಲಿಲ್ಲ. ಹಾಗಾಗಿ, ಖಮರ್​ ತಂದೆಗೆ ತಕ್ಕ ಶಾಸ್ತಿ ಮಾಡಬೇಕು ಅಂತಾ ಗ್ರಾಮಕ್ಕೆ ಬಂದ ಉಗ್ರರು ಖಮರ್​ ತಂದೆ ಮತ್ತು ತಾಯಿಯನ್ನ ಗುಂಡಿಕ್ಕಿ ಕೊಂದೇಬಿಟ್ಟರು. ಈ ವೇಳೆ, ತಂದೆ ತಾಯಿಯ ಕಳೆದುಕೊಂಡರೂ ಧೃತಿಗೆಡದ ಬಾಲಕಿ ಕೂಡಲೇ ತನ್ನ ಮನೆಯೊಳಗಿದ್ದ AK-47 ಗನ್​ ತಂದು ಉಗ್ರರ ಮೇಲೆ ಗುಂಡಿನ ಸುರಿಮಳೆಯನ್ನೇ ಸುರಿಸಿದಳು. ಹುಡುಗಿಯ ಗುಂಡೇಟಿಗೆ ನಲುಗಿಹೋದ ಇಬ್ಬರು ಉಗ್ರರು ಅಲ್ಲೇ ಮಟ್ಯಾಷ್​. ಉಳಿದವರು ಹಣ್ಣುಗಾಯಿ ನೀರುಗಾಯಿಯಾಗಿ ಪ್ರಾಣ ಉಳಿದರೇ ಹೆಚ್ಚು ಅಂತಾ ಅಲ್ಲಿಂದ ಕಾಲ್ಕಿತ್ತರಂತೆ.

ಇನ್ನು ಈ ಪ್ರಕರಣ ಸರ್ಕಾರದ ಗಮನಕ್ಕೆ ಬರುತ್ತಿದ್ದಂತೆ ಖಮರ್​ ಮತ್ತು ಅವಳ ತಮ್ಮನನ್ನು ಸುರಕ್ಷಿತ ಜಾಗಕ್ಕೆ ಸ್ಥಳಾಂತರಿಸಿದ್ದಾರೆ. ಜೊತೆಗೆ, ಪುಟ್ಟ ಪೋರಿಯ ಸಾಹಸಕ್ಕೆ ಪ್ರಶಂಸೆಯ ಮಹಾಪೂರವೇ ಹರಿದುಬಂದಿದೆ. ಹೆಣ್ಣುಮಗಳೆಂದರೆ ಹೀಗಿರಬೇಕು ಅಂತಾ ಹಾಡಿಹೊಗಳಿದ್ದಾರೆ.