ಉಕ್ರೇನ್​​ಗೆ ನ್ಯಾಟೋ ಸದಸ್ಯತ್ವ ಕೊಡಿ ಎಂದು ಇನ್ನೆಂದೂ, ಯಾರೆದುರೂ ಮಂಡಿಯೂರುವುದಿಲ್ಲ; ಅಧ್ಯಕ್ಷ ವೊಲೊಡಿಮಿರ್​ ಝೆಲೆನ್ಸ್ಕಿ ನಿರ್ಧಾರ

ಉಕ್ರೇನ್​ಗೆ ನ್ಯಾಟೋ ಸದಸ್ಯತ್ವ (NATO Members) ನೀಡುವಂತೆ ಇನ್ನುಮುಂದೆ ನಾನು ಒತ್ತಾಯಿಸುವುದಿಲ್ಲ ಎಂದು ಉಕ್ರೇನ್​ ಅಧ್ಯಕ್ಷ ವೊಲೊಡಿಮಿರ್​ ಝೆಲೆನ್ಸ್ಕಿ ಹೇಳಿದ್ದಾರೆ. ಅಷ್ಟೇ ಅಲ್ಲ, ರಷ್ಯಾದ ಪರವಾಗಿರುವ ಪೂರ್ವ ಉಕ್ರೇನ್​​ನ ಎರಡು ಪ್ರದೇಶಗಳಾದ ಡೊನೆಟ್ಸ್ಕ್ ಮತ್ತು ಲುಗಾನ್ಸ್ಕ್ ಸ್ಥಿತಿ ಬಗ್ಗೆ ಸಂಧಾನ ಮಾಡಿಕೊಳ್ಳಲು ಸಿದ್ಧರಿರುವುದಾಗಿಯೂ ತಿಳಿಸಿದ್ದಾರೆ. ಈ ಎರಡೂ ಪ್ರದೇಶಗಳು ಉಕ್ರೇನ್​ನಲ್ಲಿದ್ದರೂ ಕೂಡ ಇಲ್ಲಿರುವ ಬಂಡುಕೋರರು ರಷ್ಯಾ ಪರವಾಗಿಯೇ ಇದ್ದಾರೆ. 2014ರಿಂದಲೂ ಕೀವ್​ ವಿರುದ್ಧವೇ ಬಡಿದಾಡಿಕೊಂಡು ಬಂದಿದ್ದಾರೆ. ಹಾಗೇ, ಫೆ.24ರಂದು ಉಕ್ರೇನ್​ ಮೇಲೆ ರಷ್ಯಾ ಸೇನಾ ಕಾರ್ಯಾಚರಣೆ ಘೋಷಿಸುವುದಕ್ಕೂ ಮೊದಲು ಇವೆರಡೂ ಭೂಪ್ರದೇಶಗಳು ಸ್ವತಂತ್ರ ಎಂದು ಪುಟಿನ್​ ಘೋಷಿಸಿದ್ದಾರೆ.ಇದೀಗ ಈ ಭೂಪ್ರದೇಶಗಳ ಕುರಿತಂತೆ ರಷ್ಯಾದ ಜತೆ ಹೊಂದಾಣಿಕೆ ಮಾಡಿಕೊಳ್ಳಲು ಸಿದ್ಧನಿದ್ದೇನೆ ಎಂದು ಹೇಳುವ ಮೂಲಕ ಝೆಲೆನ್ಸ್ಕಿ ಮಾಸ್ಕೋವನ್ನು ಸಮಾಧಾನ ಪಡಿಸುವ ಮಾತುಗಳನ್ನಾಡಿದ್ದಾರೆ.

ರಷ್ಯಾ ಉಕ್ರೇನ್​ ವಿರುದ್ಧ ಸಮರ ಸಾರಲು ಹಲವು ಕಾರಣಗಳಿದ್ದರೂ, ಉಕ್ರೇನ್​ಗೆ ನ್ಯಾಟೋ ಸದಸ್ಯತ್ವ ಕೊಡಲು ಮುಂದಾಗಿದ್ದು ಬಹುಮುಖ್ಯ ಕಾರಣ. ನ್ಯಾಟೋ ಕೂಡ ರಷ್ಯಾದ ಮನವಿಯನ್ನು ತಿರಸ್ಕರಿಸುತ್ತಲೇ ಬಂತು. ಹೀಗಾಗಿ ರಷ್ಯಾ ಪುಟ್ಟ ರಾಷ್ಟ್ರ ಉಕ್ರೇನ್​ ವಿರುದ್ಧ ಸಮರವನ್ನೇ ಸಾರಿತು. ಆದರೆ ರಷ್ಯಾ ಪಡೆ ಆಕ್ರಮಣ ಮಾಡುತ್ತಿದ್ದಂತೆ ನ್ಯಾಟೋ ಅಂತರ ಕಾದುಕೊಂಡಿದೆ. ಝೆಲೆನ್ಸ್ಕಿ ಬಹಿರಂಗವಾಗಿಯೇ ಸಹಾಯ ಕೇಳಿದರೂ ನ್ಯಾಟೋ ಅದಕ್ಕೆ ಸರಿಯಾಗಿ ಸ್ಪಂದಿಸುತ್ತಿಲ್ಲ. ಇದರ ಬಗ್ಗೆಯೇ ಝೆಲೆನ್ಸ್ಕಿ ಮಾತನಾಡಿದ್ದಾರೆ.

ಸುದ್ದಿವಾಹಿನಿಯೊಂದಕ್ಕೆ ಸಂದರ್ಶನ ನೀಡಿದ ಅವರು, ಉಕ್ರೇನ್​ಗೆ ನ್ಯಾಟೋ ಸದಸ್ಯತ್ವ ಕೊಡಿ ಎಂದು ಕೇಳುವ ವಿಚಾರದಲ್ಲಿ ನಾನಿನ್ನು ಮೌನ ವಹಿಸುತ್ತೇನೆ. ಉಕ್ರೇನ್​​ಗೆ ಸದಸ್ಯತ್ವ ನೀಡಲು ನ್ಯಾಟೋ ಸಿದ್ಧತೆ ಮಾಡಿಕೊಂಡಿರಲಿಲ್ಲ. ಬಾಯ್ಮಾತಲ್ಲಿ ಕೊಡುತ್ತೇವೆ ಎಂದು ಹೇಳುತ್ತಿತ್ತು. ಈ ನ್ಯಾಟೋ ಒಕ್ಕೂಟಕ್ಕೆ ರಷ್ಯಾ ವಿರುದ್ಧ ಹೋರಾಡಲು, ಆ ದೇಶವನ್ನು ಎದುರು ಹಾಕಿಕೊಳ್ಳಲು ಭಯ ಎಂದು ಉಕ್ರೇನ್​ ಅಧ್ಯಕ್ಷರು ಹೇಳಿದ್ದಾರೆ.  ನಾನೊಂದು ದೇಶದ ಅಧ್ಯಕ್ಷನಾಗಿ ಯಾವುದೇ ವಿಚಾರಕ್ಕೂ ಇನ್ನೊಬ್ಬರ ಎದುರು ಮೊಣಕಾಲೂರಿಗೆ ಕುಳಿತು ಬೇಡಿಕೊಳ್ಳಲಾರೆ ಎಂದೂ ಸ್ಪಷ್ಟಪಡಿಸಿದ್ದಾರೆ.

ಉಕ್ರೇನ್​ಗೆ ನ್ಯಾಟೋ ಸದಸ್ಯತ್ವ ಕೊಡುವ ವಿಚಾರದಲ್ಲಿ ತನ್ನದು ಸ್ಪಷ್ಟ ವಿರೋಧ ಎಂದು ರಷ್ಯಾ ಈಗಾಗಲೇ ಸ್ಪಷ್ಟಪಡಿಸಿದೆ. ಯುರೋಪ್​​ನಲ್ಲಿ ಶೀತಲ ಸಮರ ಎದ್ದಾಗ, ಸೋವಿಯತ್​ ಒಕ್ಕೂಟದಿಂದ ಯುರೋಪ್​​ನ್ನು ರಕ್ಷಣೆ ಮಾಡುವ ಸಲುವಾಗಿ ಈ ನ್ಯಾಟೋ (ಉತ್ತರ ಅಟ್ಲಾಂಟಿಕ್ ಒಪ್ಪಂದ ಸಂಸ್ಥೆ) ರಚಿಸಲಾಗಿತ್ತು. ಈ ಹಿಂದೆ ಸೋವಿಯತ್​ ಒಕ್ಕೂಟದಲ್ಲಿದ್ದು ಬೇರ್ಪಟ್ಟ ದೇಶಗಳಿಗೆ ಸದಸ್ಯತ್ವ ನೀಡುವ ಮೂಲಕ ನ್ಯಾಟೋ ಪೂರ್ವ ಯುರೋಪ್​​ನಲ್ಲಿ ಮತ್ತಷ್ಟು ಪ್ರಾಬಲ್ಯ ವಿಸ್ತರಿಸುತ್ತಿದೆ. ಇದು ಸಹಜವಾಗಿಯೇ ರಷ್ಯಾವನ್ನು ಕೆರಳಿಸಿದೆ. ಇಷ್ಟು ದಿನ ನ್ಯಾಟೋವನ್ನು ನಂಬಿಕೊಂಡಿದ್ದ ಝೆಲೆನ್ಸ್ಕಿ ಈಗ ನ್ಯಾಟೋ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: Ukraine Russia War Live: ನ್ಯಾಟೊ ಸಹವಾಸ ಸಾಕು ಎಂದ ಉಕ್ರೇನ್ ಅಧ್ಯಕ್ಷ ಝೆಲೆನ್​ಸ್ಕಿ: ರಷ್ಯಾ ಷರತ್ತುಗಳಿಗೆ ಒಪ್ಪಿಗೆ

Published On - 8:09 am, Wed, 9 March 22