Russia Ukraine War: ಉಕ್ರೇನ್​ ಯುದ್ಧದಲ್ಲಿ ರಷ್ಯಾಕ್ಕೆ ಹಿನ್ನಡೆ, ಹಲವು ವರ್ಷಗಳವರೆಗೆ ಸಂಘರ್ಷ; ನ್ಯಾಟೊ ಭವಿಷ್ಯ

ಫ್ರಾಂಕ್​ಫರ್ಟ್​: ಉಕ್ರೇನ್-ರಷ್ಯಾ ಸಂಘರ್ಷ ಶೀಘ್ರದಲ್ಲಿ ಕೊನೆಗೊಳ್ಳುವ ಯಾವುದೇ ಲಕ್ಷಣಗಳು ಇಲ್ಲ. ಹಲವು ವರ್ಷಗಳವರೆಗೆ ಎರಡೂ ದೇಶಗಳ ನಡುವಣ ಸಂಘರ್ಷ ಮುಂದುವರಿಯುವ ಸಾಧ್ಯತೆಯಿದೆ ಎಂದು ನ್ಯಾಟೊ (North Atlantic Treaty Organization – NATO) ಭವಿಷ್ಯ ನುಡಿದಿದೆ. ಜರ್ಮನಿಯ ನಿಯತಕಾಲಿಕೆಗೆ ನೀಡಿರುವ ಸಂದರ್ಶನದಲ್ಲಿ ಈ ಕುರಿತು ಪ್ರತಿಕ್ರಿಯಿಸಿರುವ ನ್ಯಾಟೊ ಪ್ರಧಾನ ಕಾರ್ಯದರ್ಶಿ ಜೆನ್ಸ್ ಸ್ಟೋಲ್​ಟೆನ್​ಬರ್ಗ್​, ಮುಂದಿನ ದಿನಗಳಲ್ಲಿ ಉಕ್ರೇನ್​ಗೆ ಮತ್ತಷ್ಟು ಸುಧಾರಿತ ಶಸ್ತ್ರಾಸ್ತ್ರಗಳನ್ನು ನ್ಯಾಟೊ ಒದಗಿಸಲಿದೆ. ಯುದ್ಧದಲ್ಲಿ ರಷ್ಯಾಕ್ಕೆ ಹಿನ್ನಡೆಯಾಗಲಿದೆ, ಮುಂದೊಂದು ದಿನ ಡೊನ್​ಬಾಸ್ ಪ್ರದೇಶದಿಂದ ರಷ್ಯಾ ಹಿಂದಕ್ಕೆ ಸರಿಯಬೇಕಾಗಬಹುದು ಎಂದು ವಿಶ್ಲೇಷಿಸಿದ್ದಾರೆ.

‘ಈ ಸಂಘರ್ಷವು ಹಲವು ವರ್ಷಗಳವರೆಗೆ ಮುಂದುವರಿಯಲಿದೆ ಎನ್ನುವ ವಾಸ್ತವವನ್ನು ನಾನು ಒಪ್ಪಿಕೊಳ್ಳಬೇಕು. ಇಂಧನ, ಆಹಾರದ ಬೆಲೆ ಹೆಚ್ಚಾದರೂ ನಾವು ಉಕ್ರೇನ್​ಗೆ ನೀಡುತ್ತಿರುವ ಬೆಂಬಲ ನಿಲ್ಲಿಸಲು ಸಾಧ್ಯವಿಲ್ಲ’ ಎಂದು ಹೇಳಿದರು. ಸ್ಪೇನ್ ರಾಜಧಾನಿ ಮಾಡ್ರಿಡ್​ನಲ್ಲಿ ಇದೆ ಮಾಸಾಂತ್ಯದಲ್ಲಿ ನಡೆಯಲಿರುವ ನ್ಯಾಟೊ ಸಮಾವೇಶದಲ್ಲಿ ರಷ್ಯಾ-ಉಕ್ರೇನ್ ಸಂಘರ್ಷದ ಬಗ್ಗೆ ವಿಸ್ತೃತ ಚರ್ಚೆ ನಡೆಯುವ ಸಾಧ್ಯತೆಯಿದೆ. ಸೊವಿಯತ್ ಕಾಲದ, ರಷ್ಯಾ ನಿರ್ಮಿತ ಶಸ್ತ್ರಾಸ್ತ್ರಗಳ ಯುಗದಿಂದ ಉಕ್ರೇನ್​ನ ಶಸ್ತ್ರಾಗಾರ ಸುಧಾರಿಸಲು ಅಗತ್ಯವಿರುವ ನೆರವು ಈ ವೇಳೆ ಘೋಷಣೆಯಾಗುವ ಸಾಧ್ಯತೆಯಿದೆ. ನ್ಯಾಟೊ ಸದಸ್ಯ ದೇಶಗಳಲ್ಲಿ ಬಳಕೆಯಲ್ಲಿರುವ ಶಸ್ತ್ರಾಸ್ತ್ರಗಳನ್ನು ಉಕ್ರೇನ್​ಗೂ ಒದಗಿಸಲು ಅಮೆರಿಕ ಮುಂದಾಗಬಹುದು ಎಂದು ಅವರು ಭವಿಷ್ಯ ನುಡಿದರು.

ಉಕ್ರೇನ್ ವಿರುದ್ಧದ ದಾಳಿಯ ಮೊದಲ ಹಂತದಲ್ಲಿ ರಷ್ಯಾ ಹಿನ್ನಡೆ ಅನುಭವಿಸಿತು. ಉಕ್ರೇನ್ ರಾಜಧಾನಿ ಕೀವ್ ನಗರ ವಶಪಡಿಸಿಕೊಳ್ಳಲು ಯತ್ನಿಸಿದ್ದ ರಷ್ಯಾ ತೀವ್ರ ಪ್ರತಿರೋಧದ ಕಾರಣದಿಂದ ತನ್ನ ಸೇನಾಪಡೆಗಳನ್ನು ಹಿಂದಕ್ಕೆ ಕರೆಸಿಕೊಂಡು, ಬೇರೆಡೆಗೆ ಮರುನಿಯೋಜಿಸಬೇಕಾಯಿತು. ಇದೀಗ ಉಕ್ರೇನ್​ನ ಪೂರ್ವ ಭಾಗದಲ್ಲಿ ರಷ್ಯಾ ತನ್ನ ದಾಳಿಯನ್ನು ಕೇಂದ್ರೀಕರಿಸಿದೆ. ಉಕ್ರೇನ್​ನ ಹಲವು ನಗರಗಳ ಮೇಲೆ ಶೆಲ್ ಮತ್ತು ಕ್ಷಿಪಣಿ ದಾಳಿಯನ್ನೂ ರಷ್ಯಾ ತೀವ್ರಗೊಳಿಸಿದೆ. ಡೊನ್​ಬಾಸ್ ಪ್ರದೇಶವನ್ನು ರಷ್ಯಾ ತನ್ನ ಸುಪರ್ದಿಗೆ ತೆಗೆದುಕೊಂಡ ನಂತರ ಈ ದಾಳಿ ನಿಲ್ಲಬಹುದು ಎಂದು ಹೇಳಲಾಗಿದೆ.

ಕರ್ನಾಟಕದ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ. ದೇಶದ ಇತರ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ ಪ್ರಮುಖ  ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ