ಮತ್ತೊಮ್ಮೆ ಲಾಕ್ಡೌನ್ ಆತಂಕದಲ್ಲಿ ಶಾಂಘೈ, ಉಪನಗರ ಮಿನ್ಹಾಂಗ್ನಲ್ಲಿ ಕೋವಿಡ್-19 ಪ್ರಕರಣಗಳಲ್ಲಿ ಹೆಚ್ಚಳ
ಸುಮಾರು 27 ಲಕ್ಷ ಜನಸಂಖ್ಯೆ ಹೊಂದಿರುವ ಮಿನ್ಹಾಂಗ್ ನಗರದಲ್ಲಿ ಸಮೂಹಿಕ ಟೆಸ್ಟಿಂಗ್ ಗಳನ್ನು ನಡೆಸಿದ ಬಳಿಕವೇ ನಿರ್ಬಂಧಗಳನ್ನು ಕ್ರಮೇಣ ತೆರವುಗೊಳಿಸಲಾಗುವುದೆಂದು ವರದಿ ತಿಳಿಸುತ್ತದೆ.
Updated on: Jun 10, 2022 | 5:03 PM
Shanghai: ಜನಸಂಖ್ಯೆಯ ದೃಷ್ಟಿಯಿಂದ ಜಗತ್ತಿನ ಮೂರನೇ ಅತಿದೊಡ್ಡ ಮತ್ತು ಚೀನಾದ ಅತ್ಯಂತ ದೊಡ್ಡ ನಗರವನಿಸಿಕೊಂಡಿರುವ ಶಾಂಘೈ (Shanghai) ವಿಶ್ವದ ಪ್ರಮುಖ ಆರ್ಥಿಕ ವಹಿವಾಟಿನ ಕೇಂದ್ರವೂ ಆಗಿದೆ. ಮೊನ್ನೆಯಷ್ಟೇ ಚೀನಾ ಸರ್ಕಾರ (Chinese Government) ಸುಮಾರು ಎರಡು ತಿಂಗಳು ಅವಧಿಯ ಕೋವಿಡ್-19 ಸಂಬಂಧಿತ ಲಾಕ್ ಡೌನ್ ಅನ್ನು (Lockdown) ತೆರವುಗೊಳಿಸಿತ್ತು. ಆದರೆ ಲಾಕ್ಡೌನ್ ಕರಿನೆರಳು ಈ ಮಹಾನಗರವನ್ನು ಪುನಃ ಆವರಿಸಿಕೊಳ್ಳುವ ಲಕ್ಷಣಗಳು ದಟ್ಟವಾಗುತ್ತಿವೆ. ಶಾಂಘೈ ಜಿಲ್ಲೆಯ ಉಪನಗರವಾಗಿರುವ ಮಿನ್ಹಾಂಗ್ ನಲ್ಲಿ (Minhang) ಕೋವಿಡ್-19 ಪ್ರಕರಣಗಳು ಮತ್ತೇ ಕಾಣಿಸಿಕೊಳ್ಳುತ್ತಿರುವುದರಿಂದ ಸರ್ಕಾರ ಈ ಉಪನಗರದ ಮೇಲೆ ಕಠಿಣ ನಿರ್ಬಂಧಗಳನ್ನು ಹೇರಲು ಆದೇಶಿಸಿದೆ ಎಂದು ರಾಯಿಟರ್ ಸುದ್ದಿಸಂಸ್ಥೆ ವರದಿ ಮಾಡಿದೆ.
ಸುಮಾರು 27 ಲಕ್ಷ ಜನಸಂಖ್ಯೆ ಹೊಂದಿರುವ ಮಿನ್ಹಾಂಗ್ ನಗರದಲ್ಲಿ ಸಮೂಹಿಕ ಟೆಸ್ಟಿಂಗ್ ಗಳನ್ನು ನಡೆಸಿದ ಬಳಿಕವೇ ನಿರ್ಬಂಧಗಳನ್ನು ಕ್ರಮೇಣ ತೆರವುಗೊಳಿಸಲಾಗುವುದೆಂದು ವರದಿ ತಿಳಿಸುತ್ತದೆ.
ಚೀನಾದ ಮಹಾನಗರ ಶಾಂಘೈ ಕಟ್ಟುನಿಟ್ಟಿನ ಎರಡು-ತಿಂಗಳ ಕೋವಿಡ್-19 ಲಾಕ್ಡೌನ್ ತೆರವುಗೊಂಡ ನಂತರ ಚೇತರಿಸಿಕೊಳ್ಳುವ ಹಂತದಲ್ಲಿರುವಾಗಲೇ ಪುನಃ ನಿರ್ಬಂಧಗಳನ್ನು ಹೇರುವ ಅನಿವಾರ್ಯತೆ ಸರ್ಕಾರಕ್ಕೆ ಬಂದೊದಗಿದೆ.
ಎರಡು ತಿಂಗಳ ಕಠಿಣ ನಿರ್ಬಂಧಗಳ ಬಳಿಕ ಚೈನೀಸ್ ಸರ್ಕಾರ ಇತ್ತಿಚಿಗಷ್ಟೇ ಅದನ್ನು ತೆರವುಗೊಳಿಸಿತ್ತು. ನಮಗೆಲ್ಲ ಗೊತ್ತಿರುವ ಹಾಗೆ, ಇಡೀ ವಿಶ್ವಕ್ಕೆ ಮಹಾಮಾರಿಯನ್ನು ಹಬ್ಬಿದ ಚೀನಾ, ಶೂನ್ಯ-ಕೋವಿಡ್ ನೀತಿ ಅಡಿ ಮಿನ್ಹಾಂಗ್ ನಲ್ಲಿ ಹೊಸದಾಗಿ ಲಾಕ್ಡೌನ್ ಹೇರುತ್ತಿದೆ.
ಮಿನ್ಹಾಂಗ್ ಜಿಲ್ಲಾಧಿಕಾರಿಗಳ ಪ್ರಕಾರ ಶನಿವಾರದಿಂದ ಆರಂಭಗೊಳ್ಳುವ ಲಾಕ್ಡೌನ್ ಸಂದರ್ಭದಲ್ಲಿ ಎಲ್ಲ ಜನರ ಮೇಲೆ ತೀವ್ರ ನಿಗಾ ಇಡಲಾಗುವುದು ಮತ್ತು ಪ್ರತಿಯೊಬ್ಬ ವ್ಯಕ್ತಿಯ ಕೋವಿಡ್ ಟೆಸ್ಟ್ ನಡೆಸಲಾಗುವುದು.
ಲಾಕ್ಡೌನ್ ಯಾವಾಗ ತೆರವುಗೊಳಿಸಲಾಗಬಹುದು ಎನ್ನುವ ಬಗ್ಗೆ ಸ್ಪಷ್ಟನೆ ಸೂಚನೆ ನೀಡದ ಅಧಿಕಾರಿಗಳು, ಪ್ರತಿಯೊಬ್ಬ ವ್ಯಕ್ತಿಯ ಸ್ಯಾಂಪಲ್ ಸಂಗ್ರಹಿದ ನಂತರ ತೆರವುಗೊಳಿಸಲಾಗುವುದು ಅಂತ ಹೇಳಿರುವರೆಂದು ರಾಯಿಟರ್ ವರದಿ ಮಾಡಿದೆ.
ಶೂನ್ಯ-ಕೋವಿಡ್ ಪಾಲಿಸಿ ಅಡಿಯಲ್ಲಿ ಚೀನಾ ಸರ್ಕಾರವು ಕೋವಿಡ್ ವೈರಾಣು ಸಮುದಾಯಗಳ ನಡುವೆ ಹಬ್ಬದಂತೆ ಎಚ್ಚರವಹಿಸುತ್ತಿದೆ. ಈ ಕಾರಣಕ್ಕಾಗೇ ಅದು ಅತ್ಯಂತ ಕಠೋರ ಮತ್ತು ಬಿಗಿ ಕ್ರಮಗಳನ್ನು ಅನುಸರಿಸುತ್ತಿದೆ. ಕಟ್ಟುನಿಟ್ಟಿನ ಲಾಕ್ಡೌನ್ ಮತ್ತು ಸಾಮೂಹಿಕ ಟೆಸ್ಟಿಂಗ್ ಅದರ ಭಾಗವಾಗಿವೆ.
ಮಾರ್ಚ್ ತಿಂಗಳಲ್ಲಿ ಏಕಾಏಕಿ ಕೋವಿಡ್ ಪ್ರಕರಣಗಳು ಆತಂಕ ಹುಟ್ಟಿಸುವ ರೀತಿಯಲ್ಲಿ ಹೆಚ್ಚಲಾರಂಭಿಸಿದ ನಂತರ ಚೀನಾದ ವಾಣಿಜ್ಯ ರಾಜಧಾನಿ ಮತ್ತು ವಿಶ್ವದ ಅತ್ಯಂತ ಬ್ಯೂಸಿ ಬಂದರು ಪಟ್ಟಣವಾಗಿರುವ ಶಾಂಘೈನಲ್ಲಿ ಸರ್ಕಾರ ಎರಡು ತಿಂಗಳು ಅವಧಿಗೆ ಲಾಕ್ಡೌನ್ ಹೇರಿತ್ತು ಮತ್ತು ಕೆಲವೇ ದಿನಗಳ ಹಿಂದೆ ಅದನ್ನು ತೆರವುಗೊಳಿಸಲಾಗಿತ್ತು. ಆ ಲಾಕ್ಡೌನ್ ಚೀನಾದ ಆರ್ಥಿಕತೆಯ ಮೇಲೆ ಭಾರಿ ಪರಿಣಾಮ ಬೀರಿತ್ತಲ್ಲದೆ ಜಾಗತಿಕ ಉತ್ಪಾದನೆ ಹಾಗೂ ವಹಿವಾಟನ್ನು ಬುಡಮೇಲು ಮಾಡಿತ್ತು.
ರಾಜ್ಯದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ. ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
