US Winter Storm: ಅಮೆರಿಕದಲ್ಲಿ ಶತಮಾನದಲ್ಲೇ ಭೀಕರ ಹಿಮಪಾತ; 60 ಜನ ಸಾವು, ಹಲವು ವಿಮಾನಗಳ ಸಂಚಾರ ಸ್ಥಗಿತ
ಹಿಮಪಾತ ಮತ್ತು ಶೀತಗಾಳಿಯಿಂದ ಅಮೆರಿಕದಲ್ಲಿ ಅನೇಕ ವಿಮಾನಗಳು ರದ್ದಾಗಿವೆ. ಬಫಲೋದಲ್ಲಿ ವಾಹನ ಚಲಾಯಿಸುವುದನ್ನು ನಿಷೇಧಿಸಲಾಗಿದೆ.
ನ್ಯೂಯಾರ್ಕ್: ಅಮೆರಿಕದಲ್ಲಿ ಉಂಟಾಗಿರುವ ಭಾರೀ ಹಿಮಪಾತ (winter storm) ಇದುವರೆಗೆ 60ಕ್ಕೂ ಹೆಚ್ಚು ಜೀವಗಳನ್ನು ಬಲಿ ತೆಗೆದುಕೊಂಡಿದೆ. ದೇಶದ ವಿವಿಧ ಭಾಗಗಳಲ್ಲಿ ಒಟ್ಟು 62 ಜನರು ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ. ಮುಖ್ಯವಾಗಿ ಬಫಲೋ ಹೆಚ್ಚು ಹಾನಿಗೊಳಗಾದ ನಗರವಾಗಿದೆ. ಹಿಮವನ್ನು ತೆರವುಗೊಳಿಸುವ ಕಾರ್ಯಾಚರಣೆ ನಡೆಯುತ್ತಿದ್ದು, ಇನ್ನಷ್ಟು ಶವಗಳು ಪತ್ತೆಯಾಗುವ ಸಾಧ್ಯತೆಯಿದೆ.
ಹಿಮಪಾತ ಮತ್ತು ಶೀತಗಾಳಿಯಿಂದ ಅಮೆರಿಕದಲ್ಲಿ ಅನೇಕ ವಿಮಾನಗಳು ರದ್ದಾಗಿವೆ. ಬಫಲೋದಲ್ಲಿ ವಾಹನ ಚಲಾಯಿಸುವುದನ್ನು ನಿಷೇಧಿಸಲಾಗಿದೆ. ಈ ಹಿಮಪಾತವನ್ನು ಈ ಶತಮಾನದಲ್ಲೇ ಅತಿ ಭೀಕರ ಹಿಮಪಾತ ಎಂದು ಹೇಳಲಾಗಿದೆ. ಬಫಲೋ ಪ್ರದೇಶದಲ್ಲಿ 30ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಶೀತ ಚಂಡಮಾರುತವು ನ್ಯೂಯಾರ್ಕ್ನಲ್ಲಿ ದಕ್ಷಿಣಕ್ಕೆ ಹರಡಿದ್ದರಿಂದ ರಸ್ತೆ ಮಾರ್ಗದ ಪ್ರವಾಹಗಳು, ಮರಗಳು ಮತ್ತು ಕೊಂಬೆಗಳು ಉರುಳಿಬಿದ್ದಿರುವ ಹಲವಾರು ಘಟನೆಗಳು ನಡೆದಿವೆ ಎಂದು ರಾಷ್ಟ್ರೀಯ ಹವಾಮಾನ ಸೇವೆ ತಿಳಿಸಿದೆ. ಹಿಮಪಾತದಿಂದ ಅಮೆರಿಕದ ಜನಜೀವನ ಅಸ್ತವ್ಯಸ್ತವಾಗಿದೆ. ಇದುವರೆಗೂ ನ್ಯೂಯಾರ್ಕ್ನಲ್ಲಿ ಕನಿಷ್ಠ 27 ಮಂದಿ ಬಿರುಗಾಳಿಗೆ ಬಲಿಯಾಗಿದ್ದಾರೆ. ಒಟ್ಟಾರೆ ಅಮೆರಿಕದಲ್ಲಿ ಶೀತ ಮಾರುತಗಳ ಆರ್ಭಟಕ್ಕೆ ಸುಮಾರು 60ಕ್ಕೂ ಹೆಚ್ಚು ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ.
ಬಫಲೋ ನಗರದ ಸುತ್ತಲೂ ಬೆಟ್ಟಗಳಂತೆ ಆವರಿಸಿರುವ ಹಿಮಗಡ್ಡೆಗಳನ್ನು ತೆರವುಗೊಳಿಸುವ ರಕ್ಷಣಾ ಕಾರ್ಯ ನಡೆಯುತ್ತಿದೆ. ಕಾರುಗಳು, ಬಸ್, ಆಂಬುಲೆನ್ಸ್‌ಗಳು, ಟ್ರಕ್‌ಗಳು ಹಿಮದ ಅಡಿ ಹೂತುಹೋಗಿವೆ. ಅಮೆರಿಕದಲ್ಲಿ ಹಿಮಪಾತ ಶುರುವಾದ ಬಳಿಕ ಸುಮಾರು 15,000 ವಿಮಾನಗಳ ಸಂಚಾರ ರದ್ದುಗೊಂಡಿದೆ. ಸೋಮವಾರ ಒಂದೇ ದಿನ 3,800 ವಿಮಾನಗಳ ಹಾರಾಟ ರದ್ದಾಗಿವೆ.