ಡೊನಾಲ್ಡ್​ ಟ್ರಂಪ್​ ಮೇಲೆ ಗುಂಡಿನ ದಾಳಿ ನಡೆಸಿರುವ ರಿಯಾನ್ ಉಕ್ರೇನ್​ ಬೆಂಬಲಿಗ

ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಹಾಗೂ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್(Donald Trump)​ ಮೇಲೆ ನಡೆದಿದ್ದು ಉದ್ದೇಶಿತ ಹತ್ಯೆ ಯತ್ನ ಎಂದು ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ ಸ್ಪಷ್ಟಪಡಿಸಿದೆ. ಹಾಗೆಯೇ 58 ವರ್ಷದ ಗನ್​ಮ್ಯಾನ್ ರಿಯಾನ್ ರೌತ್ ಉಕ್ರೇನ್​ ಬೆಂಬಲಿಗ ಎನ್ನುವ ಮಾಹಿತಿ ಲಭ್ಯವಾಗಿದೆ.

ರಷ್ಯಾದ ವಿರುದ್ಧ ನಡೆಯುತ್ತಿರುವ ಯುದ್ಧದಲ್ಲಿ ಹೋರಾಡಲು ಕೈವ್‌ಗೆ ಹೋಗಿದ್ದಾಗಿ ಆತ ಒಪ್ಪಿಕೊಂಡಿದ್ದಾನೆ. ಘಟನಾ ಸ್ಥಳದಲ್ಲಿ ಅಧಿಕಾರಿಗಳು AK-47-ಶೈಲಿಯ ಆಕ್ರಮಣಕಾರಿ ರೈಫಲ್, ಸ್ಕೋಪ್, ಎರಡು ಬ್ಯಾಕ್‌ಪ್ಯಾಕ್‌ಗಳು ಮತ್ತು ಕೆಲವು ಸಾಧನವನ್ನು ವಶಪಡಿಸಿಕೊಂಡಿದ್ದಾರೆ.

ಘಟನೆಯ ಸಮಯದಲ್ಲಿ ಬಂದೂಕುಧಾರಿ ಟ್ರಂಪ್‌ನಿಂದ ಸುಮಾರು 300 ರಿಂದ 500 ಗಜಗಳಷ್ಟು ದೂರದಲ್ಲಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪೆನ್ಸಿಲ್ವೇನಿಯಾದ ಬಟ್ಲರ್​ನಲ್ಲಿ ನಡೆದ ಹತ್ಯೆ ಪ್ರಯತ್ನದ ಎರಡು ತಿಂಗಳ ಬಳಿಕ ಈ ಘಟನೆ ಸಂಭವಿಸಿದೆ. ಆ ಸಂದರ್ಭದಲ್ಲಿ ಡೊನಾಲ್ಡ್​ ಟ್ರಂಪ್ ಕಿವಿಗೆ ಗಾಯವಾಗಿತ್ತು.

ಮತ್ತಷ್ಟು ಓದಿ: Donald Trump: ಅಮೆರಿಕ ಮಾಜಿ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಮೇಲೆ ಮತ್ತೆ ಗುಂಡಿನ ದಾಳಿ

ರೌತ್ ಉಕ್ರೇನಿಯನ್ನರನ್ನು ಬೆಂಬಲಿಸಲು ರಷ್ಯಾದೊಂದಿಗೆ ಯುದ್ಧ ಮಾಡಲು ಆರಂಭದಲ್ಲಿ ಉಕ್ರೇನ್​ಗೆ ಹೋಗಿದ್ದರು. ಕೈವ್ ತಲುಪಿದ ನಂತರ ಅವರು ರಷ್ಯಾ-ಉಕ್ರೇನ್ ಯುದ್ಧದಲ್ಲಿ ಭಾಗವಹಿಸಲು ಜನರನ್ನು ನೇಮಿಸಿಕೊಳ್ಳುವಲ್ಲಿ ಸಹಾಯ ಮಾಡಿದರು ಎಂದು ಅವರು ಹೇಳಿದ್ದಾರೆ.

ಉತ್ತರ ಕರೆಲಿನಾ ಕೃಷಿ ಮತ್ತು ತಾಂತ್ರಿಕ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡಿದರು. 2018 ರ ಸುಮಾರಿಗೆ ಹವಾಯಿಗೆ ಸ್ಥಳಾಂತರಗೊಂಡರು. 58 ವರ್ಷ ವಯಸ್ಸಿನವರು ಮುಂಬರುವ ಚುನಾವಣೆಯಲ್ಲಿ ವಿವೇಕ್ ರಾಮಸ್ವಾಮಿ ಮತ್ತು ನಿಕ್ಕಿ ಹ್ಯಾಲೆ ಅವರನ್ನು ಕೈಬಿಡಲು ನಿರ್ಧರಿಸುವ ಮೊದಲು ಅವರ ಬೆಂಬಲಿಗರಾಗಿದ್ದರು.

2024 ರ ಅಧ್ಯಕ್ಷೀಯ ಸ್ಪರ್ಧೆಯಿಂದ ತಮ್ಮ ಹೆಸರನ್ನು ಕೈಬಿಡಬೇಡಿ ಎಂದು ಒತ್ತಾಯಿಸಿದ್ದರು. ಯಾವುದೇ ಕಾರಣಕ್ಕೂ ಚುನಾವಣಾ ರೇಸ್​ನಿಂದ ಹಿಂದೆ ಸರಿಯಬೇಡಿ ಎಂದು ಮನವಿ ಮಾಡಿದ್ದರು. ಮತ್ತೊಂದು ಪೋಸ್ಟ್​ನಲ್ಲಿ ಅಮೆರಿಕನ್ನರನ್ನು ಗುಲಾಮರನ್ನಾಗಿ ಮಾಡಲು ಟ್ರಂಪ್ ಪ್ರಯತ್ನಿಸುತ್ತಿದ್ದಾರೆ ಎಂದು ಬರೆದಿದ್ದರು.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 10:00 am, Mon, 16 September 24