Price Hike: ಟಿವಿಯಿಂದ ಎಸಿ, ಫ್ರಿಜ್‌ವರೆಗೆ ಬೆಲೆ ಏರಿಕೆ; ಹಬ್ಬದ ಖರೀದಿಗೂ ಮುನ್ನ ಈ ವಿಷಯ ತಿಳಿಯಿರಿ

ಹಬ್ಬದ ಸೀಸನ್‌ನಲ್ಲಿ (Festival Season) ಮನೆಗೆ ಹೊಸ ಎಸಿ, ಟಿವಿ, ಫ್ರಿಜ್ ಅಥವಾ ವಾಷಿಂಗ್ ಮೆಷಿನ್ ಖರೀದಿಸಲು ಯೋಜಿಸುತ್ತಿದ್ದೀರಾ? ಹಾಗಾದರೆ ಖರೀದಿಯ ಸಮಯದ ಬಗ್ಗೆ ಸ್ವಲ್ಪ ಗಮನಹರಿಸುವುದು ಅಗತ್ಯ. ಅಕ್ಟೋಬರ್ 1ರಿಂದ ಹಲವು ಗೃಹೋಪಯೋಗಿ ಎಲೆಕ್ಟ್ರಾನಿಕ್ ವಸ್ತುಗಳ ಬೆಲೆ ಏರಿಕೆಯಾಗುವ ಸಾಧ್ಯತೆಯಿದೆ. ಕೆಲವು ಕಂಪನಿಗಳು ಉತ್ಪಾದನಾ ವೆಚ್ಚ ಹೆಚ್ಚಾದ ಹಿನ್ನೆಲೆಯಲ್ಲಿ ಶೇಕಡಾ 5ರಿಂದ 8ರಷ್ಟು ಬೆಲೆ ಹೆಚ್ಚಳಕ್ಕೆ ಸಿದ್ಧತೆ ನಡೆಸಿವೆ. ಆದರೆ ಎಲ್ಲಾ ಕಂಪನಿಗಳ ಉತ್ಪನ್ನಗಳ ಮೇಲೂ ಒಂದೇ ಪ್ರಮಾಣದ ಪರಿಣಾಮ ಬೀರುವುದಿಲ್ಲ.

ಯಾವೆಲ್ಲ ವಸ್ತುಗಳ ಬೆಲೆ ಹೆಚ್ಚಾಗಬಹುದು?

ಎಸಿ ಬೆಲೆಯಲ್ಲಿ ಹೆಚ್ಚಿನ ಏರಿಕೆ ಕಂಡುಬರುವ ಸಾಧ್ಯತೆಯಿದೆ. ಕೆಲವು ಕಂಪನಿಗಳು ಎಸಿ ಬೆಲೆಯನ್ನು ಶೇಕಡಾ 5ರಿಂದ 8ರಷ್ಟು ಹೆಚ್ಚಿಸಲು ಮುಂದಾಗಿವೆ. ಎಲ್‌ಇಡಿ ಟಿವಿ ಮತ್ತು ವಾಷಿಂಗ್ ಮೆಷಿನ್‌ಗಳ ಬೆಲೆಯಲ್ಲಿ ಕೆಲವು ಕಂಪನಿಗಳಿಂದ ಶೇಕಡಾ 2ರಿಂದ 3ರಷ್ಟು ಹೆಚ್ಚಳದ ನಿರೀಕ್ಷೆಯಿದೆ. ಕೆಲವು ಟಿವಿ ಕಂಪನಿಗಳು ಸುಮಾರು ಶೇಕಡಾ 7ರಷ್ಟು ಬೆಲೆ ಹೆಚ್ಚಿಸುವ ಯೋಜನೆಯಲ್ಲಿವೆ. ಫ್ರಿಜ್ ಮತ್ತು ಇತರ ಗೃಹೋಪಯೋಗಿ ಸಾಧನಗಳ ಬೆಲೆಯಲ್ಲೂ ಶೇಕಡಾ 3ರಿಂದ 4ರಷ್ಟು ಏರಿಕೆಯಾಗುವ ಸಾಧ್ಯತೆಯಿದೆ.

ಹಳೆಯ ಬೆಲೆಗೆ ಈಗಲೂ ಖರೀದಿಸಬಹುದೇ?

ಬೆಲೆ ಏರಿಕೆಯಾದರೂ ಹಬ್ಬದ ಸಂದರ್ಭದಲ್ಲಿ ಕೆಲವು ಉತ್ಪನ್ನಗಳು ಹಳೆಯ ಬೆಲೆಯಲ್ಲೇ ಸಿಗುವ ಸಾಧ್ಯತೆಯಿದೆ. ಇದಕ್ಕೆ ಕಾರಣ ಈಗಾಗಲೇ ಡೀಲರ್‌ಗಳು ಮತ್ತು ಚಿಲ್ಲರೆ ವ್ಯಾಪಾರಿಗಳ ಬಳಿ ಇರುವ ಹಳೆಯ ದರದ ಉತ್ಪನ್ನಗಳ ಸಂಗ್ರಹ. ಗೋದ್ರೇಜ್ ಎಂಟರ್‌ಪ್ರೈಸಸ್ ಗ್ರೂಪ್ ಪ್ರಕಾರ, ಡೀಲರ್‌ಗಳ ಬಳಿ ಸುಮಾರು ಒಂದು ತಿಂಗಳಿಂದ ಒಂದೂವರೆ ತಿಂಗಳವರೆಗೆ ಸಾಕಾಗುವಷ್ಟು ಹಳೆಯ ದರದ ಸ್ಟಾಕ್ ಇರಬಹುದು. ಹೀಗಾಗಿ ದೀಪಾವಳಿಯವರೆಗೂ ಕೆಲವು ಉತ್ಪನ್ನಗಳನ್ನು ಹಿಂದಿನ ಬೆಲೆಯಲ್ಲೇ ಖರೀದಿಸುವ ಅವಕಾಶ ಗ್ರಾಹಕರಿಗೆ ಸಿಗಬಹುದು.

ಬ್ಯಾಂಕುಗಳಲ್ಲಿ ಬಲ್ಕ್ ಡೆಪಾಸಿಟ್ ನಿಯಮಗಳಲ್ಲಿ ಮಹತ್ವದ ಬದಲಾವಣೆ; ಹೊಸ ನಿಯಮಗಳು ಅ. 1ರಿಂದ ಜಾರಿ

ಎಸಿ ಬೆಲೆ ಏರಿಕೆಗೆ ತಾಮ್ರವೂ ಕಾರಣ

ಎಸಿ ತಯಾರಿಕೆಯಲ್ಲಿ ಬಳಸುವ ತಾಮ್ರದ ಬೆಲೆ ಹೆಚ್ಚಾಗಿರುವುದು ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ಹೈಯರ್ ಇಂಡಿಯಾದ ಮಾಹಿತಿಯ ಪ್ರಕಾರ, ಕಳೆದ ವರ್ಷ ಪ್ರತಿ ಮೆಟ್ರಿಕ್ ಟನ್ ತಾಮ್ರದ ಬೆಲೆ ಸುಮಾರು 8,000-9,000 ಡಾಲರ್‌ನಷ್ಟಿದ್ದರೆ, ಈಗ ಅದು ಸುಮಾರು 14,500 ಡಾಲರ್‌ಗೆ ಏರಿಕೆಯಾಗಿದೆ. ಸಾಮಾನ್ಯವಾಗಿ ಒಂದು ಎಸಿಯಲ್ಲಿ ಸುಮಾರು 3ರಿಂದ 4 ಕೆ.ಜಿ. ತಾಮ್ರ ಬಳಸಲಾಗುತ್ತದೆ. ಹೀಗಾಗಿ ತಾಮ್ರದ ಬೆಲೆ ಏರಿಕೆಯು ಎಸಿ ತಯಾರಿಕಾ ವೆಚ್ಚದ ಮೇಲೆ ನೇರ ಪರಿಣಾಮ ಬೀರುತ್ತಿದೆ.

ಕಚ್ಚಾ ವಸ್ತು ಮತ್ತು ಸಾಗಣೆ ವೆಚ್ಚವೂ ಹೆಚ್ಚಳ

ತಾಮ್ರ ಮಾತ್ರವಲ್ಲದೆ ಉಕ್ಕು, ಅಲ್ಯೂಮಿನಿಯಂ, ಪ್ಲಾಸ್ಟಿಕ್ ಮತ್ತು ಕಚ್ಚಾ ತೈಲಕ್ಕೆ ಸಂಬಂಧಿಸಿದ ವಸ್ತುಗಳ ಬೆಲೆಯೂ ಹೆಚ್ಚಾಗಿದೆ. ಇದರ ಜೊತೆಗೆ ಸರಕು ಸಾಗಣೆ ವೆಚ್ಚ ಮತ್ತು ರೂಪಾಯಿ ಮೌಲ್ಯದಲ್ಲಿನ ಬದಲಾವಣೆಗಳು ಆಮದು ಮಾಡಿಕೊಳ್ಳುವ ಬಿಡಿಭಾಗಗಳ ವೆಚ್ಚವನ್ನೂ ಹೆಚ್ಚಿಸಿವೆ.

ಖರೀದಿಸುವವರು ಏನು ಮಾಡಬಹುದು?

ಹಬ್ಬದ ಆಫರ್‌ಗಾಗಿ ಕಾಯುತ್ತಿರುವವರು ಅಕ್ಟೋಬರ್ ನಂತರದ ಬೆಲೆಯನ್ನೂ ಗಮನದಲ್ಲಿಟ್ಟುಕೊಳ್ಳಬೇಕು. ಖರೀದಿಸಲು ಈಗಾಗಲೇ ನಿರ್ಧರಿಸಿದ್ದರೆ, ವಿವಿಧ ಅಂಗಡಿಗಳು ಮತ್ತು ಆನ್‌ಲೈನ್ ವೇದಿಕೆಗಳಲ್ಲಿನ ಹಳೆಯ ಸ್ಟಾಕ್, ರಿಯಾಯಿತಿ ಮತ್ತು ಬ್ಯಾಂಕ್ ಕೊಡುಗೆಗಳನ್ನು ಹೋಲಿಕೆ ಮಾಡುವುದು ಉಪಯುಕ್ತ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ