Wipro Q3 Results: ವಿಪ್ರೋಗೆ ಮೂರನೇ ತ್ರೈಮಾಸಿಕದಲ್ಲಿ ರೂ. 2970 ಕೋಟಿ ಲಾಭ

ಮಾಹಿತಿ ತಂತ್ರಜ್ಞಾನ ಪ್ರಮುಖ ಕಂಪೆನಿಯಾದ ವಿಪ್ರೋ ಲಿಮಿಟೆಡ್ ಜನವರಿ 12ರಂದು 2021-22ನೇ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ (Q3 2021-22) ರೂ. 2,970 ಕೋಟಿ ನಿವ್ವಳ ಲಾಭವನ್ನು ವರದಿ ಮಾಡಿದೆ. ಸೆಪ್ಟೆಂಬರ್ 30, 2021ಕ್ಕೆ ಕೊನೆಗೊಂಡ ತ್ರೈಮಾಸಿಕದಲ್ಲಿ ವರದಿ ಮಾಡಲಾದ ರೂ. 2,931 ಕೋಟಿ ಲಾಭಕ್ಕಿಂತ ಇದು ಹೆಚ್ಚಾಗಿದೆ. ಹಿಂದಿನ ಹಣಕಾಸು ವರ್ಷದ ಇದೇ ತ್ರೈಮಾಸಿಕಕ್ಕೆ ಹೋಲಿಸಿದರೆ ನಿವ್ವಳ ಲಾಭವು ಬಹುತೇಕ ಒಂದೇ ಆಗಿತ್ತು. ಕಂಪೆನಿಯು ಹಿಂದಿನ ವರ್ಷದ ಅವಧಿಯಲ್ಲಿ 2,968 ಕೋಟಿ ರೂಪಾಯಿ ಲಾಭ ಗಳಿಸಿತ್ತು. FY22 Q3 ರಲ್ಲಿ ಆದಾಯವು 20,432.3 ಕೋಟಿ ರೂಪಾಯಿ ಬಂದಿದ್ದು, ಇದು ಹಿಂದಿನ ತ್ರೈಮಾಸಿಕದಲ್ಲಿ ವರದಿಯಾದ 19,667 ಕೋಟಿ ರೂಪಾಯಿಗಿಂತ ಹೆಚ್ಚಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ವಿಪ್ರೋ ರೂ. 15,670 ಕೋಟಿ ಆದಾಯವನ್ನು ವರದಿ ಮಾಡಿದ್ದರಿಂದ ಈ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಶೇ 30ರ ಬೆಳವಣಿಗೆಯನ್ನು ಸೂಚಿಸುತ್ತವೆ.

CNBC-TV18 ಸಮೀಕ್ಷೆಯಲ್ಲಿ ಅಂದಾಜಿಸಲಾದ 3,560 ಕೋಟಿ ರೂಪಾಯಿಗಳಿಗೆ ಹೋಲಿಸಿದರೆ, FY22ರ Q3ಗಾಗಿ ಬಡ್ಡಿ ಮತ್ತು ತೆರಿಗೆಗಳಿಗೆ (EBIT) ಮೊದಲು ಗಳಿಕೆಯು 3,553.5 ಕೋಟಿ ರೂಪಾಯಿಯಾಗಿದೆ. “Wipro ಆದಾಯ ಮತ್ತು ಮಾರ್ಜಿನ್​ ಎರಡರಲ್ಲೂ ಸತತ ಐದನೇ ತ್ರೈಮಾಸಿಕದಲ್ಲಿ ಬಲವಾದ ಕಾರ್ಯಕ್ಷಮತೆಯನ್ನು ನೀಡಿದೆ. ಆರ್ಡರ್ ಬುಕಿಂಗ್ ಕೂಡ ಪ್ರಬಲವಾಗಿದೆ ಮತ್ತು ಕಳೆದ 12 ತಿಂಗಳಲ್ಲಿ 100 ಮಿಲಿಯನ್‌ ಡಾಲರ್​ಗಿಂತಲೂ ಹೆಚ್ಚು ಆದಾಯದ ಲೀಗ್‌ನಲ್ಲಿ ನಾವು ಏಳು ಹೊಸ ಗ್ರಾಹಕರನ್ನು ಸೇರಿಸಿದ್ದೇವೆ,” ಎಂದು ಕಂಪೆನಿಯ ಸಿಇಒ ಮತ್ತು ನಿರ್ದೇಶಕ ಥಿಯೆರಿ ಡೆಲಾಪೋರ್ಟೆ ಹೇಳಿದ್ದಾರೆ.

ರೆಗ್ಯುಲೇಟರಿ ಫೈಲಿಂಗ್‌ನಲ್ಲಿ ತಿಳಿಸಿರುವಂತೆ, ವಿಪ್ರೋ ತನ್ನ ಮಂಡಳಿಯು ಪ್ರತಿ ಈಕ್ವಿಟಿ ಷೇರಿಗೆ 1 ರೂಪಾಯಿಯ ಮಧ್ಯಂತರ ಲಾಭಾಂಶವನ್ನು ಘೋಷಿಸಿದೆ. “ಕಾರ್ಯನಿರ್ವಹಣೆಯ ಮೆಟ್ರಿಕ್‌ಗಳಲ್ಲಿ ಮುಂದುವರಿದ ಸುಧಾರಣೆಯಿಂದಾಗಿ ನಾವು ಸಂಬಳ ಹೆಚ್ಚಳದ ಮೇಲೆ ಗಣನೀಯ ಹೂಡಿಕೆಗಳನ್ನು ಮಾಡಿಕೊಳ್ಳುವ ನಂತರ ದೃಢವಾದ ಕಾರ್ಯಾಚರಣೆ ಮಾರ್ಜಿನ್​ಗಳನ್ನು ತಲುಪಿಸಿದ್ದೇವೆ. ನಮ್ಮ ದಿನದ ಮಾರಾಟದ ಬಾಕಿಯನ್ನು ಕಡಿಮೆ ಮಾಡುವ ಮೂಲಕ ಕಾರ್ಯ ಬಂಡವಾಳವನ್ನು ಸುಧಾರಿಸಿದ್ದೇವೆ. ಇದು ನಿವ್ವಳ ಆದಾಯದ ಶೇ 101.3ರಷ್ಟು ಬಲವಾದ ಕಾರ್ಯಾಚರಣೆಯ ನಗದು ಹರಿವಿನ ಪರಿವರ್ತನೆಗೆ ಕಾರಣವಾಗಿದೆ. ” ಎಂದು ವಿಪ್ರೋದ ಮುಖ್ಯ ಹಣಕಾಸು ಅಧಿಕಾರಿ ಜತಿನ್ ದಲಾಲ್ ಹೇಳಿದ್ದಾರೆ.

Q4 ರ ದೃಷ್ಟಿಕೋನದಲ್ಲಿ, ಐಟಿ ಸೇವೆಗಳ ವ್ಯವಹಾರದಿಂದ ಆದಾಯವು 2,692 ಮಿಲಿಯನ್‌ ಡಾಲರ್​ನಿಂದ 2,745 ಮಿಲಿಯನ್‌ ಡಾಲರ್​ಗಳವರೆಗೆ ಇರುತ್ತದೆ ಎಂದು ವಿಪ್ರೋ ಹೇಳಿದೆ. ಇದು ಶೇಕಡಾ ಎರಡರಿಂದ ಶೇಕಡಾ ನಾಲ್ಕರಷ್ಟು ಅನುಕ್ರಮ ಬೆಳವಣಿಗೆಗೆ ಅನುವಾದಿಸುತ್ತದೆ.

ಇದನ್ನೂ ಓದಿ: Wipro: ನವೀಮುಂಬೈನಲ್ಲಿ ತಿಂಗಳಿಗೆ 56 ರೂ. ಬಾಡಿಗೆಯಂತೆ 3.5 ಲಕ್ಷ ಚದರಡಿ ಕಚೇರಿ ಸ್ಥಳವನ್ನು ಭೋಗ್ಯಕ್ಕೆ ಪಡೆದ ವಿಪ್ರೋ!