Byjus Valuation: ಬೈಜುಸ್ಗೆ ಬ್ಲ್ಯಾಕ್ರಾಕ್ ಹೊಡೆತ; ಶೇ. 95ರಷ್ಟು ಮೌಲ್ಯ ಕುಸಿತ; 22ರಿಂದ 1ಕ್ಕೆ ಕುಸಿದ ಬೈಜೂಸ್
Blackrock Cuts Byju's Valuation: ಸಾಕಷ್ಟು ವಿವಾದ, ಕಾನೂನು ಸಮಸ್ಯೆಗಳನ್ನು ಎದುರಿಸುತ್ತಿರುವ ಬೈಜುಸ್ ಸಂಸ್ಥೆಯ ಮೌಲ್ಯವನ್ನು ಗಣನೀಯವಾಗಿ ತಗ್ಗಿಸಲಾಗಿದೆ. ಬೈಜುಸ್ನಲ್ಲಿ ಹೂಡಿಕೆ ಮಾಡಿರುವ ಬ್ಲ್ಯಾಕ್ರಾಕ್ ಇದೀಗ ಬೈಜುಸ್ನ ಮೌಲ್ಯ ಪರಿಷ್ಕರಿಸಿದೆ. 2022ರಲ್ಲಿ 22 ಬಿಲಿಯನ್ ಡಾಲರ್ ಇದ್ದ ಬೈಜುಸ್ ಮೌಲ್ಯವನ್ನು 1 ಬಿಲಿಯನ್ ಡಾಲರ್ಗೆ ಇಳಿಸಲಾಗಿದೆ.
ನವದೆಹಲಿ, ಜನವರಿ 11: ಒಂದು ಕಾಲದಲ್ಲಿ ಸ್ಟಾರ್ಟಪ್ ಲೋಕದ ಲಿವಿಂಗ್ ಲೆಜೆಂಡ್ ಎನಿಸಿದ್ದ, ಹಾಗೂ ಸ್ಟಾರ್ಟಪ್ ಎಂದರೆ ಹೀಗಿರಬೇಕಪ್ಪ ಎಂದು ಎಲ್ಲರೂ ಬೊಟ್ಟು ಮಾಡುತ್ತಿದ್ದ ಬೈಜುಸ್ ಸಂಸ್ಥೆ (Byju’s) ಈಗ ಬಹಳ ದುರ್ಗತಿಗೆ ಬಂದಿದೆ. ಸಾಲು ಸಾಲು ವಿವಾದಗಳು, ಕಾನೂನು ಸಮಸ್ಯೆಗಳನ್ನು ಎದುರಿಸುತ್ತಾ ಬಂದಿರುವ ಬೈಜುಸ್ನ ಮೌಲ್ಯ ಈಗ ಗಣನೀಯವಾಗಿ ಕುಸಿತ ಕಂಡಿದೆ. 2022ರಲ್ಲಿ ಅದರ ಮೌಲ್ಯ 22 ಬಿಲಿಯನ್ ಡಾಲರ್ ಇತ್ತು. ಅದು ಬೈಜೂಸ್ ಉಚ್ಛ್ರಾಯ ಸ್ಥಿತಿಯಲ್ಲಿ ಇದ್ದ ಸಂದರ್ಭ. ಆದರೆ, ಒಂದೇ ವರ್ಷದಲ್ಲಿ ಅದರ ಹಣೆಬರಹ ತಿರುವು ಮುರುವಾಗಿ ಹೋಗಿದೆ. ಬೈಜುಸ್ನಲ್ಲಿ ಹೂಡಿಕೆ ಮಾಡಿರುವ ಬ್ಲ್ಯಾಕ್ರಾಕ್ ಎಂಬ ಅಸೆಟ್ ಮ್ಯಾನೇಜಿಂಗ್ ಸಂಸ್ಥೆ ಬೈಜುಸ್ನ ಮೌಲ್ಯಮಾಪನ ಮಾಡಿದ್ದು, ಒಂದು ಷೇರಿಗೆ 209.6 ರೂ ಮೌಲ್ಯ ಮಾತ್ರ ನೀಡಿದೆ. ಇದರೊಂದಿಗೆ ಬೈಜುಸ್ನ ಒಟ್ಟಾರೆ ಮೌಲ್ಯ 1 ಬಿಲಿಯನ್ ಡಾಲರ್ ಎಂದು ಪರಿಗಣಿತವಾಗುತ್ತದೆ.
2022ರಲ್ಲಿ 22 ಬಿಲಿಯನ್ ಡಾಲರ್ ಮೌಲ್ಯದ ಕಂಪನಿ ಎಂದು ರೇಟಿಂಗ್ ಪಡೆದಿದ್ದ ಬೈಜುಸ್ ಈಗ 1 ಬಿಲಿಯನ್ ಡಾಲರ್ಗೆ ಇಳಿದಿದೆ. ಶೇ. 95ಕ್ಕೂ ಹೆಚ್ಚು ಮೌಲ್ಯ ಕುಸಿತ ಆಗಿದೆ.
ಆದರೆ, ಬ್ಲ್ಯಾಕ್ರಾಕ್ ಸಂಸ್ಥೆ ಬೈಜುಸ್ನ ರೇಟಿಂಗ್ ಅಥವಾ ಮೌಲ್ಯ ಇಳಿಸಲು ಯಾವ ಮಾನದಂಡ ಅನುಸರಿಸಿದೆ ಎಂಬುದು ಗೊತ್ತಿಲ್ಲ. ಬೈಜುಸ್ ಇನ್ನೂ ಲಿಸ್ಟೆಡ್ ಕಂಪನಿಯಾಗಿಲ್ಲ. ಷೇರು ಮಾರುಕಟ್ಟೆಯಲ್ಲಿ ಇನ್ನೂ ಲಿಸ್ಟ್ ಆಗಿಲ್ಲ.
ಬ್ಲ್ಯಾಕ್ರಾಕ್ ಸಂಸ್ಥೆ ಬೈಜುಸ್ನಲ್ಲಿ ಹೊಂದಿರುವ ಪಾಲು ಶೇ. 1ಕ್ಕಿಂತಲೂ ಕಡಿಮೆ. ಹೂಡಿಕೆ ಸಂಸ್ಥೆಗಳು ತನ್ನ ಪಾಲಿನ ಆಸ್ತಿಯ ಮೌಲ್ಯವನ್ನು ಆಗಾಗ ಪರಿಶೀಲನೆ ಮಾಡುತ್ತಿರುತ್ತವೆ. 2022ರಲ್ಲಿ ಬೈಜುಸ್ನ ಒಂದು ಷೇರಿಗೆ 4,660 ರೂ ಬೆಲೆ ಇರಬಹುದು ಎಂದು ಅಂದಾಜಿಸಲಾಗಿತ್ತು. 2023ರ ಅಕ್ಟೋಬರ್ನಲ್ಲಿ ಅದರ ಮೌಲ್ಯವನ್ನು 209.6 ರುಪಾಯಿಗೆ ಇಳಿಸಲಾಯಿತು. ಇದರಿಂದ ಬೈಜುಸ್ನ ಒಟ್ಟಾರೆ ಮೌಲ್ಯ 1 ಬಿಲಿಯನ್ ಡಾಲರ್ ಆಗುತ್ತದೆ.
2023ರ ಮೇ ತಿಂಗಳಲ್ಲಿ ಬ್ಲ್ಯಾಕ್ರಾಕ್ ಮಾಡಿದ ಮೌಲ್ಯಮಾಪನದ ಪ್ರಕಾರ ಬೈಜುಸ್ ಮೌಲ್ಯ 8.4 ಬಿಲಿಯನ್ ಡಾಲರ್ ಇತ್ತು. ಕೆಲವೇ ತಿಂಗಳಲ್ಲಿ ಅದರ ಮೌಲ್ಯವನ್ನು 1 ಬಿಲಿಯನ್ ಡಾಲರ್ಗೆ ಇಳಿಸಿದೆ.
ಇದನ್ನೂ ಓದಿ: ಶತ್ರು ಆಸ್ತಿ, 2.91 ಲಕ್ಷ ಷೇರುಗಳನ್ನು ಮಾರಲು ಮುಂದಾದ ಭಾರತ ಸರ್ಕಾರ; ಎನಿಮಿ ಪ್ರಾಪರ್ಟಿಗಳೆಂದರೆ ಯಾವುವು?
ಬ್ಲ್ಯಾಕ್ರಾಕ್ ಮಾತ್ರವಲ್ಲ, ಮತ್ತೊಂದು ಹೂಡಿಕೆ ಸಂಸ್ಥೆಯಾದ ಪ್ರೋಸಸ್ ಎನ್ವಿ ಕೂಡ ಬೈಜುಸ್ ಮೌಲ್ಯವನ್ನು ತಗ್ಗಿಸಿದೆ. ಪ್ರೋಸಸ್ ಮಾಡಿದ ವ್ಯಾಲ್ಯುವೇಶನ್ ಪ್ರಕಾರ ಬೈಜುಸ್ನ ಮೌಲ್ಯ 3 ಬಿಲಿಯನ್ ಡಾಲರ್ಗಿಂತಲೂ ಕಡಿಮೆ ಆಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
