ಬೈಜುಸ್ ಮಾಲೀಕರ ಭರ್ಜರಿ ಅಸ್ತ್ರ; ಹೂಡಿಕೆದಾರರಿಗೆ ಮಾಡು ಇಲ್ಲ ಮಡಿ ಸ್ಥಿತಿ?
Byjus vs Investors: ಬೈಜುಸ್ ತನ್ನ ಅಧಿಕೃತ ಷೇರು ಹೆಚ್ಚಳಕ್ಕೆ ಇಜಿಎಂ ಸಭೆಯಲ್ಲಿ ಸಮ್ಮತಿ ಸಿಕ್ಕಿದೆ. ಅದರ ರೈಟ್ಸ್ ಇಷ್ಯೂ ಪ್ರಸ್ತಾಪಕ್ಕೆ ಶೇ. 50ಕ್ಕೂ ಹೆಚ್ಚು ಷೇರುದಾರರಿಂದ ವೋಟಿಂಗ್ ಮೂಲಕ ಒಪ್ಪಿಗೆ ಸಿಕ್ಕಿದೆ. ಬೈಜುಸ್ನ ಗರಿಷ್ಠ ಮೌಲ್ಯದ ಶೇ. 99ರಷ್ಟು ರಿಯಾಯಿತಿ ದರದಲ್ಲಿ ರೈಟ್ಸ್ ಇಷ್ಯೂ ಆಫರ್ ಮಾಡಲಾಗಿದೆ. ಹಾಲಿ ಇರುವ ಷೇರುದಾರರು ತಮ್ಮ ಷೇರುಪಾಲಿನ ಸಂಖ್ಯೆಯನ್ನು ಉಳಿಸಿಕೊಳ್ಳಬೇಕಾದರೆ ಹೆಚ್ಚುವರಿ ಷೇರು ಖರೀದಿಸುವುದು ಅನಿವಾರ್ಯ. ಇಲ್ಲದಿದ್ದರೆ ಅವರ ಷೇರುಪಾಲು ಕುಸಿಯುತ್ತದೆ.
Updated on: Mar 29, 2024 | 2:30 PM
ನವದೆಹಲಿ, ಮಾರ್ಚ್ 29: ಬೈಜುಸ್ನ ಮಾಲೀಕರು ಮತ್ತು ಹೂಡಿಕೆದಾರರ ಮಧ್ಯೆ ನಡೆಯುತ್ತಿರುವ ಜಂಗೀ ಕುಸ್ತಿಗೆ ಹೊಸ ಟ್ವಿಸ್ಟ್ ಸಿಕ್ಕಿದೆ. ರೈಟ್ಸ್ ಇಷ್ಯೂ ಎಂಬ ಅಸ್ತ್ರ ಬಿಟ್ಟು ಹೂಡಿಕೆದಾರರನ್ನು ಅಡಕತ್ತರಿಗೆ ಸಿಲುಕಿಸಿದ್ದಾರೆ ಬೈಜುಸ್ ಸಿಇಒ ಬೈಜು ರವೀಂದ್ರನ್. ಹೂಡಿಕೆದಾರರು ಈಗ ಬೈಜುಸ್ಗೆ ಫಂಡಿಂಗ್ ಮಾಡದಿದ್ದರೆ ತಮ್ಮ ಷೇರುಪಾಲು ನಗಣ್ಯ ಮಟ್ಟಕ್ಕೆ ಕುಸಿಯುವುದನ್ನು ನೋಡಬೇಕಾಗುತ್ತದೆ. ಆ ಮಟ್ಟಿಗೆ ಇದು ಚೆಸ್ ಆಟದಂತೆ ಮುಂದುವರಿಯುತ್ತಿದೆ. 200 ಮಿಲಿಯನ್ ಡಾಲರ್ ಮೊತ್ತಕ್ಕೆ ಹೆಚ್ಚುವರಿ ಷೇರು ಹಂಚಿಕೆಗೆ ಬೇಕಾದ ಅಧಿಕೃತ ಷೇರು ಬಂಡವಾಳವನ್ನು (Authorised share capital) ಹೆಚ್ಚಿಸಲು ಇಜಿಎಂ ಸಭೆ ನಡೆಸಲಾಯಿತು. ಈ ಸಭೆಯಲ್ಲಿ ಪಾಲ್ಗೊಂಡಿದ್ದ ಯಾವ ಹೂಡಿಕೆದಾರರು ತಕರಾರು ಎತ್ತಲಿಲ್ಲ.
ಹೆಚ್ಚುವರಿ ಷೇರುಗಳ ವಿತರಣೆಗೆ (Rights Issue) ಅನುಮತಿಸಲು ಮಾರ್ಚ್ 7ರಂದು ಅಂಚೆ ಮೂಲಕ ಮತದಾನ ಘೋಷಿಸಲಾಗಿತ್ತು. ಇದರಲ್ಲಿ ಅನುಮತಿ ನೀಡಿ ಶೇ. 50ಕ್ಕಿಂತಲೂ ಹೆಚ್ಚು ವೋಟುಗಳು ಬಂದಿರುವ ವಿಷಯವನ್ನು ಬೈಜು ರವೀಂದ್ರನ್ ಅವರು ಎಲ್ಲಾ ಷೇರುದಾರರಿಗೂ ತಿಳಿಸಿದ್ದಾರೆ. ಈ ವೋಟಿಂಗ್ನ ಅಂತಿಮ ಫಲಿತಾಂಶ ಏಪ್ರಿಲ್ 6ರಂದು ಗೊತ್ತಾಗುವ ಸಾಧ್ಯತೆ ಇದೆ.
ಇದನ್ನೂ ಓದಿ: ಅದಾನಿ ಅಡ್ಡಾಗೆ ಅಂಬಾನಿ ಎಂಟ್ರಿ; 50 ಕೋಟಿ ರೂಗೆ ಪವರ್ ಕಂಪನಿಯ ಶೇ. 26 ಪಾಲು ಪಡೆದ ರಿಲಾಯನ್ಸ್
ಶೇ. 99ರಷ್ಟು ರಿಯಾಯಿತಿಯಲ್ಲಿ ಹೆಚ್ಚುವರಿ ಷೇರು
ಬೈಜೂಸ್ ಸಂಸ್ಥೆಯ ಗರಿಷ್ಠ ಮೌಲ್ಯದ ಶೇ. 99ರಷ್ಟು ರಿಯಾಯಿತಿ ದರದಲ್ಲಿ ರೈಟ್ಸ್ ಇಷ್ಯೂ ಆಫರ್ ಮಾಡಿದೆ. 2022ರಲ್ಲಿ ಬೈಜುಸ್ 22 ಬಿಲಿಯನ್ ಡಾಲರ್ ಮೌಲ್ಯ ಪಡೆದಿತ್ತು.
ರೈಟ್ಸ್ ಇಷ್ಯೂ ಮಾಡುವುದೆಂದರೆ, ಹಾಲಿ ಇರುವ ಷೇರುದಾರರಿಗೆ ಕಡಿಮೆ ಬೆಲೆಗೆ ಹೆಚ್ಚುವರಿ ಷೇರುಗಳನ್ನು ಖರೀದಿಸುವ ಅವಕಾಶ ಕಲ್ಪಿಸುವುದು. ಇದು ಕಂಪನಿಯು ಹೆಚ್ಚುವರಿ ಬಂಡವಾಳ ಸಂಗ್ರಹಿಸುವ ಒಂದು ವಿಧಾನ.
ಬೈಜುಸ್ನಲ್ಲಿ ಅದರ ಸಂಸ್ಥಾಪಕರು ಹಾಗೂ ಅವರ ಕುಟುಂಬದ ಸದಸ್ಯರ ಒಟ್ಟು ಷೇರುಪಾಲು ಶೇ. 26.30ರಷ್ಟಿದೆ. ಪ್ರೋಸಸ್, ಪೀಕ್ ಎಕ್ಸ್ವಿ ಪಾರ್ಟ್ನರ್ಸ್, ಜನರಲ್ ಅಟ್ಲಾಂಟಿಕ್, ಸೋಫಿನಾ ಸಂಸ್ಥೆಗಳು ತಲಾ ಶೇ. 5ಕ್ಕಿಂತಲೂ ಹೆಚ್ಚು ಷೇರುಪಾಲು ಹೊಂದಿವೆ. ಚಾನ್ ಜುಕರ್ಬರ್ಗ್ ಇನಿಷಿಯೇಟಿವ್, ಟೈಗರ್ ಗ್ಲೋಬಲ್, ಇಸೋಪ್, ಓಲ್ ವೆಂಚರ್ಸ್ ಮೊದಲಾದ ಹೂಡಿಕೆ ಸಂಸ್ಥೆಗಳು ಪ್ರಮುಖ ಷೇರುಪಾಲು ಹೊಂದಿವೆ. ಇತರ ಸಣ್ಣ ಹೂಡಿಕೆದಾರರು ಹೊಂದಿರುವ ಷೇರುಪ್ರಮಾಣ ಶೇ. 36.10ರಷ್ಟಿದೆ.
ಈಗ ಬೈಜುಸ್ ವಿರುದ್ಧ ಸೆಟೆದು ನಿಂತಿರುವ ಹೂಡಿಕೆದಾರರಲ್ಲಿ ಪ್ರಮುಖವಾದವು ಪ್ರೋಸಸ್, ಪೀಕ್ ಎಕ್ಸ್ವಿ ಪಾರ್ಟ್ನರ್ಸ್. ಪ್ರೋಸಸ್ ತನ್ನ ಶೇ. 9ರಷ್ಟು ಷೇರುಪಾಲನ್ನು ಉಳಿಸಿಕೊಳ್ಳಬೇಕಾದರೆ 18 ಮಿಲಿಯನ್ ಡಾಲರ್ ಹೂಡಿಕೆ ಮಾಡಬೇಕಾಗುತ್ತದೆ. ಒಂದು ವೇಳೆ ಹೆಚ್ಚುವರಿ ಷೇರು ಖರೀದಿಸದೇ ಹೋದರೆ, ಒಟ್ಟಾರೆ ಹೆಚ್ಚಾಗುವ ಷೇರು ಮೊತ್ತದಲ್ಲಿ ಅದರ ಷೇರುಪಾಲು ಕುಂಠಿತಗೊಳ್ಳುತ್ತದೆ.
ಹಾಗೆಯೇ, ಪೀಕ್ ಎಕ್ಸ್ವಿ ಪಾರ್ಟ್ನರ್ಸ್ (Peak XV Partners) ಸಂಸ್ಥೆ ಬೈಜುಸ್ನಲ್ಲಿರುವ ತನ್ನ ಷೇರುಪಾಲನ್ನು ಉಳಿಸಿಕೊಳ್ಳಲು 14 ಮಿಲಿಯನ್ ಡಾಲರ್ಗೆ ಹೆಚ್ಚುವರಿ ಷೇರುಗಳನ್ನು ಖರೀದಿಸುವುದು ಅನಿವಾರ್ಯವಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
