Semiconductor: ಬೆಂಗಳೂರಲ್ಲಿ 3nm ಚಿಪ್ ಡಿಸೈನ್ ಸೆಂಟರ್ ಆಯ್ತು, ಈಗ 6ನೇ ಸೆಮಿಕಂಡಕ್ಟರ್ ಘಟಕಕ್ಕೆ ಸಂಪುಟ ಒಪ್ಪಿಗೆ
India's sixth semiconductor unit to come at Jewar, UP: ಭಾರತದಲ್ಲಿ ಆರನೇ ಸೆಮಿಕಂಡಕ್ಟರ್ ಸ್ಥಾಪನೆಗೆ ಕೇಂದ್ರ ಸಂಪುಟ ಇಂದು ಮೇ 14, ಒಪ್ಪಿಗೆ ನೀಡಿದೆ. ಎಚ್ಸಿಎಲ್ ಟೆಕ್ನಾಲಜೀಸ್ ಮತ್ತು ಫಾಕ್ಸ್ಕಾನ್ ಸಂಸ್ಥೆಗಳು ಜಂಟಿಯಾಗಿ ಉತ್ತರಪ್ರದೇಶದ ಜೇವರ್ನಲ್ಲಿ ಈ ಘಟಕ ಸ್ಥಾಪಿಸಲಿವೆ. ಬೆಂಗಳೂರು ಮತ್ತು ನೋಯ್ಡಾದಲ್ಲಿ ಜಪಾನ್ನ ರಿನಿಸಾಸ್ ಸಂಸ್ಥೆಯಿಂದ 3 ಎನ್ಎಂ ಚಿಪ್ ಡಿಸೈನ್ ಸೆಂಟರ್ಗಳ ಉದ್ಘಾಟನೆ ಆಗಿತ್ತು.
Updated on: May 14, 2025 | 4:15 PM
ನವದೆಹಲಿ, ಮೇ 14: ಎಚ್ಸಿಎಲ್ ಟೆಕ್ನಾಲಜೀಸ್ ಮತ್ತು ಫಾಕ್ಸ್ಕಾನ್ ಸಂಸ್ಥೆಗಳು ಜಂಟಿಯಾಗಿ ಸ್ಥಾಪಿಸಬೇಕೆಂದಿರುವ ಸೆಮಿಕಂಡಕ್ಟರ್ ಘಟಕಕ್ಕೆ (semiconductor unit) ಕೇಂದ್ರ ಸಂಪುಟ ಇಂದು ಬುಧವಾರ ಅನುಮೋದನೆ ನೀಡಿದೆ. ಈ ವಿಷಯವನ್ನು ಕೇಂದ್ರ ಐಟಿ ಮತ್ತು ಎಲೆಕ್ಟ್ರಾನಿಕ್ಸ್ ಸಚಿವ ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ. ಉತ್ತರಪ್ರದೇಶ ಜೇವರ್ನಲ್ಲಿ (Jewar, UP) 3,076 ರೂ ಹೂಡಿಕೆಯಲ್ಲಿ ಸೆಮಿಕಂಡಕ್ಟರ್ ಘಟಕ ನಿರ್ಮಾಣವಾಗಲಿದೆ. ಕೇಂದ್ರ ಅನುಮತಿಸಿರುವ ಆರನೇ ಸೆಮಿಕಂಡಕ್ಟರ್ ಘಟಕ ಇದಾಗಿದೆ. ಈ ಹಿಂದೆ ಅನುಮೋದನೆ ನೀಡಿರುವ ಐದು ಘಟಕಗಳು ಅಂತಿಮ ನಿರ್ಮಾಣ ಹಂತದಲ್ಲಿವೆ ಎನ್ನುವ ಮಾಹಿತಿಯನ್ನು ಎ ವೈಷ್ಣವ್ ನೀಡಿದ್ದಾರೆ.
2027ಕ್ಕೆ ಕಾರ್ಯಾರಂಭಿಸುವ ಉದ್ದೇಶ ಇರುವ ಎಚ್ಸಿಎಲ್ ಮತ್ತು ಫಾಕ್ಸ್ಕಾನ್ನ ಈ ಘಟಕದಲ್ಲಿ ಡಿಸ್ಪ್ಲೇ ಇರುವಂತಹ ಮೊಬೈಲ್ ಫೋನ್, ಲ್ಯಾಪ್ಟಾಪ್, ಆಟೊಮೊಬೈಲ್, ಕಂಪ್ಯೂಟರ್ ಹಾಗೂ ಇತರ ಸಾಧನಗಳಿಗೆ ಡಿಸ್ಪ್ಲೇ ಡ್ರೈವರ್ ಚಿಪ್ಗಳನ್ನು ತಯಾರಿಸಲಾಗುತ್ತದೆ. ಒಂದು ತಿಂಗಳಲ್ಲಿ 20,000 ವೇಫರ್ಗಳು ಹಾಗೂ 3.6 ಕೋಟಿ ಚಿಪ್ಗಳನ್ನು ತಯಾರಿಸುವ ಸಾಮರ್ಥ್ಯ ಈ ಘಟಕಕ್ಕೆ ಇರಲಿದೆ. ಉತ್ತರಪ್ರದೇಶದ ಜೇವರ್ ವಿಮಾನ ನಿಲ್ದಾಣ ಸಮೀಪವೇ ಇರುವ ಕೈಗಾರಿಕಾ ಪ್ರದೇಶದಲ್ಲಿ ಸ್ಥಾಪನೆಯಾಗಲಿರುವ ಈ ಘಟಕದಲ್ಲಿ 2,000 ಉದ್ಯೋಗಸೃಷ್ಟಿಯಾಗುವ ನಿರೀಕ್ಷೆ ಇದೆ.
ಇದನ್ನೂ ಓದಿ: ಪಾಕಿಸ್ತಾನಕ್ಕೆ ಡ್ರೋನ್ ಜೊತೆಗೆ ಜನರನ್ನೂ ಕಳುಹಿಸಿದ್ದ ಟರ್ಕಿ; ಈ ದೇಶದ ಜೊತೆ ಭಾರತದ ವ್ಯಾಪಾರ ಸಂಬಂಧ ಎಷ್ಟಿದೆ?
ಅನುಮೋದನೆಗೊಂಡಿರುವ ಇತರ ಐದು ಸೆಮಿಕಂಡ್ಟರ್ ಘಟಕಗಳು
- ಮೈಕ್ರಾನ್ ಟೆಕ್ನಾಲಜಿ, (ಸಾನಂದ್, ಗುಜರಾತ್)
- ಟಾಟಾ ಎಲೆಕ್ಟ್ರಾನಿಕ್ಸ್ ಮತ್ತು ಪವರ್ಚಿಪ್ ಸೆಮಿಕಂಡಕ್ಟರ್, (ಧೊಲೇರಾ ಗುಜರಾತ್)
- ಟಾಟಾ ಸೆಮಿಕಂಡಕ್ಟರ್ ಅಸೆಂಬ್ಲಿ ಅಂಡ್ ಟೆಸ್ಟ್, (ಅಸ್ಸಾಮ್)
- ಸಿಜಿ ಪವರ್, ರಿನಿಸಾಸ್ ಎಲೆಕ್ಟ್ರಾನಿಕ್ಸ್ ಮತ್ತು ಸ್ಟಾರ್ಸ್ ಮೈಕ್ರೋ ಎಲೆಕ್ಟ್ರಾನಿಕ್ಸ್ (ಸಾನಂದ್, ಗುಜರಾತ್)
- ಕೇನೆಸ್ ಸೆಮಿಕಾನ್ (ಸಾನಂದ್, ಗುಜರಾತ್)
ಭಾರತದಲ್ಲಿ ಅನುಮೋದನೆಗೊಂಡಿರುವ ಆರು ಸೆಮಿಕಂಡಕ್ಟರ್ ಘಟಕಗಳಲ್ಲಿ ನಾಲ್ಕು ಗುಜರಾತ್ನಲ್ಲಿ ನಿರ್ಮಾಣವಾಗುತ್ತಿರುವುದು ವಿಶೇಷ.
ಬೆಂಗಳೂರು ಮತ್ತು ನೋಯ್ಡಾದಲ್ಲಿ ಭಾರತದ ಮೊದಲ 3 ಎನ್ಎಂ ಚಿಪ್ ಡಿಸೈನ್ ಸೆಂಟರ್
ಬಹಳ ಮುಖ್ಯವಾದ ಮತ್ತು ಕ್ಲಿಷ್ಟಕರಾದ 3 ನ್ಯಾನೋಮೀಟರ್ ಚಿಪ್ ಡಿಸೈನ್ ಸೌಲಭ್ಯ ಭಾರತದಲ್ಲಿ ಲಭ್ಯ ಇರಲಿದೆ. ನಿನ್ನೆ ಮಂಗಳವಾರ ಸಚಿವ ಎ ವೈಷ್ಣವ್ ಅವರು ಬೆಂಗಳೂರು ಮತ್ತು ನೋಯ್ಡಾದಲ್ಲಿ ಈ ಚಿಪ್ ಡಿಸೈನ್ ಸೆಂಟರ್ಗಳನ್ನು ಉದ್ಘಾಟನೆ ಮಾಡಿದ್ದಾರೆ.
ಜಪಾನ್ ಮೂಲದ ರೆನಿಸಾಸ್ ಎಲೆಕ್ಟ್ರಾನಿಕ್ಸ್ ಸಂಸ್ಥೆಯು ಈ ಎರಡು ಕಡೆ 3 ಎನ್ಎಂ ಚಿಪ್ ಸಿಸೈನ್ ಸೆಂಟರ್ ಸ್ಥಾಪಿಸುತ್ತಿದೆ. ಅಮೆರಿಕದ ಅಪ್ಲೈಡ್ ಮೆಟೀರಿಯಲ್ಸ್, ಲ್ಯಾಮ್ ರಿಸರ್ಚ್ ಸಂಸ್ಥೆಗಳೂ ಕೂಡ ಈ ಭಾರತದ ಸೆಮಿಕಂಡಕ್ಟರ್ ಉದ್ಯಮ ಬೆಳವಣಿಗೆಗೆ ಸಹಾಯಕವಾಗಿವೆ.
ಇದನ್ನೂ ಓದಿ: ಅಮೆರಿಕ, ಚೀನಾ ನೆರಳಲ್ಲಿರುವ ದೇಶಗಳಿಂದ ಭಾರತದ ಬ್ರಹ್ಮೋಸ್ ಕ್ಷಿಪಣಿ ಪಡೆಯಲು ಆಸಕ್ತಿ
ಭಾರತದಲ್ಲಿ 5 ನ್ಯಾನೋಮೀಟರ್ ಮತ್ತು 7 ನ್ಯಾನೋಮೀಟರ್ ಚಿಪ್ ಡಿಸೈನ್ ಸೆಂಟರ್ಗಳಿವೆ. ಈಗ ಮೊದಲ ಬಾರಿಗೆ 3 ಎನ್ಎಂಗೆ ಅಪ್ಗ್ರೇಡ್ ಆಗಲಾಗುತ್ತಿದೆ. ಇಲ್ಲಿ ನ್ಯಾನೋಮೀಟರ್ ಅಂಕಿಯು ಚಿಪ್ನಲ್ಲಿರುವ ಟ್ರಾನ್ಸಿಸ್ಟರ್ ಗಾತ್ರವನ್ನು ಸೂಚಿಸುತ್ತದೆ. 5 ಎನ್ಎಂ ಚಿಪ್ಗಿಂತ 3 ಎನ್ಎಂ ಚಿಪ್ ಗಾತ್ರದಲ್ಲಿ ಚಿಕ್ಕದಾಗಿರುತ್ತದೆ, ಹೆಚ್ಚು ಟ್ರಾನ್ಸಿಸ್ಟರ್ಗಳನ್ನು ಹೊಂದಿರುತ್ತದೆ.
ಸದ್ಯ, ಉದ್ಯಮ ವಲಯದಲ್ಲಿ 3 ಎನ್ಎಂ ಚಿಪ್ಗಳು ಸ್ಟ್ಯಾಂಡರ್ಡ್ ಎನಿಸಿವೆ. 2 ಎನ್ಎಂ ಮತ್ತು 1 ಎನ್ಎಂ ಚಿಪ್ಗಳು ಇನ್ನೂ ಪ್ರಯೋಗ ಹಂತದಲ್ಲಿದ್ದು, ಕಮರ್ಷಿಯಲ್ ಬಿಡುಗಡೆ ಆಗಿಲ್ಲ. ಈ ಹಿನ್ನೆಲೆಯಲ್ಲಿ ಭಾರತದಲ್ಲಿ 3 ಎನ್ಎಂ ಚಿಪ್ ಡಿಸೈನ್ ಸೆಂಟರ್ ಆರಂಭವಾಗಿರುವುದು ಸ್ವಾಗತಾರ್ಹದ ಸಂಗತಿ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
