LPG Cylinder Price Hike: ಹೋಟೆಲ್‌, ರೆಸ್ಟೋರೆಂಟ್‌ಗಳಿಗೆ ಹೆಚ್ಚಿದ ಹೊರೆ, ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್ ದರ ಭಾರೀ ಹೆಚ್ಚಳ

ನವದೆಹಲಿ, ಅಕ್ಟೋಬರ್ 01: ಇನ್ನೇನು ನವರಾತ್ರಿ, ದೀಪಾವಳಿ ಹೀಗೆ ಸಾಲು ಸಾಲು ಹಬ್ಬಗಳು ಹತ್ತಿರವಿರುವಾಗ ತೈಲ ಮಾರುಕಟ್ಟೆ ಕಂಪನಿಗಳು ವಾಣಿಜ್ಯ ಸಿಲಿಂಡರ್ ಬೆಲೆಯನ್ನು ಹೆಚ್ಚಿಸಿ ಶಾಕ್ ನೀಡಿವೆ. ಅಕ್ಟೋಬರ್ 1ರಿಂದ 19 ಕೆಜಿ ತೂಕದ ವಾಣಿಜ್ಯ ಸಿಲಿಂಡರ್ ಬೆಲೆ ಬರೋಬ್ಬರಿ 62.50 ರೂ.ನಷ್ಟು ಹೆಚ್ಚಾಗಿದೆ. ನವದೆಹಲಿಯಲ್ಲಿ ಪ್ರತಿ ಸಿಲಿಂಡರ್ ದರ 2,810ರೂ.ಗೆ ತಲುಪಿದೆ.

ಸೆಪ್ಟೆಂಬರ್ ತಿಂಗಳಲ್ಲಿ 9.50 ರೂ. ಏರಿಕೆಯಾಗಿದ್ದ ಬೆಲೆ, ಇದೀಗ ಅಕ್ಟೋಬರ್ ಆರಂಭದಲ್ಲೇ ಭಾರಿ ಪ್ರಮಾಣದಲ್ಲಿ ಜಿಗಿದಿದೆ. ದಸರಾ ಮತ್ತು ದೀಪಾವಳಿ ಹಬ್ಬಗಳ ಸಡಗರದ ಹೊಸ್ತಿಲಲ್ಲಿ ಹೋಟೆಲ್‌ಗಳು, ರೆಸ್ಟೋರೆಂಟ್‌ಗಳು, ಬೇಕರಿಗಳು ಹಾಗೂ ಬೀದಿಬದಿಯ ತಿನಿಸು ಕೇಂದ್ರಗಳಿಗೆ ಈ ಬೆಲೆ ಏರಿಕೆ ದೊಡ್ಡ ಹೊರೆಯಾಗಿ ಪರಿಣಮಿಸಲಿದೆ.

ಪ್ರಮುಖ ನಗರಗಳಲ್ಲಿ ನೂತನ ವಾಣಿಜ್ಯ ದರಗಳು (19 ಕೆಜಿ):

ದೆಹಲಿ: 2,747.50 ರೂ.ನಿಂದ 2,810 ರೂ. (62.50 ರೂ. ಏರಿಕೆ)

ಮುಂಬೈ: 2,701 ರೂ.ನಿಂದ 2,764 ರೂ. (63 ರೂ. ಏರಿಕೆ)

ಚೆನ್ನೈ: 2,916.50 ರೂ.ನಿಂದ 2,983 ರೂ. (66.50 ರೂ. ಏರಿಕೆ)

ಪಾಟ್ನಾ: ದೇಶದಲ್ಲೇ ಅತಿ ಹೆಚ್ಚು ಅಂದರೆ 71.50 ರೂ. ಏರಿಕೆಯಾಗಿದ್ದು, ಹೊಸ ದರ 3,100.50 ರೂ.ಗೆ ಮುಟ್ಟಿದೆ.

ಇತರ ನಗರಗಳು: ಅಹಮದಾಬಾದ್‌ನಲ್ಲಿ 2,831.50 ರೂ. ಕನ್ಯಾಕುಮಾರಿಯಲ್ಲಿ 3,046 ರೂ. ಹಾಗೂ ಅರುಣಾಚಲ ಪ್ರದೇಶದ ತವಾಂಗ್‌ನಲ್ಲಿ 3,073.50 ರೂ.ಗೆ ತಲುಪಿದೆ. ಇಂದಿನಿಂದ ದೇಶಾದ್ಯಂತ ಸಿಲಿಂಡರ್ ಪಡೆಯಲು ಹೊಸ ನಿಯಮಗಳು ಜಾರಿಗೆ ಬಂದಿವೆ. ಎಲ್​ಪಿಜಿ ಸಬ್ಸಿಡಿ ಪಡೆಯಲು ಬಯೋಮೆಟ್ರಿಕ್ ಪರಿಶೀಲನೆ ಕಡ್ಡಾಯವಾಗಿದೆ. ಎಸ್​ಬಿಐ ವಹಿವಾಟಿನ ನಿಯಮದಲ್ಲೂ ಬದಲಾವಣೆಯಾಗಿದೆ.

ಮತ್ತಷ್ಟು ಓದಿ: ಹೋಟೆಲ್, ರೆಸ್ಟೋರೆಂಟ್​​ಗಳಿಗೆ ಗುಡ್​​ ನ್ಯೂಸ್​​ ನೀಡಿದ ಕೇಂದ್ರ: ಸೋಮವಾರದಿಂದ ರಾಜ್ಯಗಳಿಗೆ ಹೆಚ್ಚುವರಿ ಸಿಲಿಂಡರ್ ಪೂರೈಕೆ

ಗೃಹಬಳಕೆ ಸಿಲಿಂಡರ್ ದರ ಯಥಾಸ್ಥಿತಿ

ಸಾಮಾನ್ಯ ಕುಟುಂಬಗಳು ಬಳಸುವ 14.2 ಕೆಜಿ ಗೃಹಬಳಕೆಯ ಎಲ್‌ಪಿಜಿ ಸಿಲಿಂಡರ್ ಬೆಲೆಯಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ. ದೆಹಲಿಯಲ್ಲಿ 942 ರೂ., ಮುಂಬೈನಲ್ಲಿ 941.50 ರೂ., ಚೆನ್ನೈನಲ್ಲಿ 957.50 ರೂ., ಲಕ್ನೋದಲ್ಲಿ 979.50 ರೂ. ಹಾಗೂ ಪಾಟ್ನಾದಲ್ಲಿ 1,031.50 ರೂ. ದರ ಮುಂದುವರಿದಿದ್ದು, ಗೃಹಿಣಿಯರಿಗೆ ಹಾಗೂ ಜನಸಾಮಾನ್ಯರಿಗೆ ಸದ್ಯಕ್ಕೆ ಬೆಲೆ ಏರಿಕೆಯ ಬಿಸಿ ತಟ್ಟಿಲ್ಲ.

ಹೊರಗಿನ ಆಹಾರ ಪದಾರ್ಥಗಳ ಬೆಲೆ ಹೆಚ್ಚಳದ ಭೀತಿ: ವಾಣಿಜ್ಯ ಸಿಲಿಂಡರ್ ದರಗಳು ನಿರಂತರವಾಗಿ ಏರಿಕೆಯಾಗುತ್ತಿರುವುದರಿಂದ ಹೋಟೆಲ್ ಮತ್ತು ರೆಸ್ಟೋರೆಂಟ್‌ಗಳ ಮಾಸಿಕ ನಿರ್ವಹಣಾ ವೆಚ್ಚ ಹೆಚ್ಚಾಗಲಿದೆ. ಈ ಹೊಣೆಯನ್ನು ಸರಿದೂಗಿಸಲು ಮುಂಬರುವ ದಿನಗಳಲ್ಲಿ ಟೀ, ಕಾಫಿ, ತಿಂಡಿ ಮತ್ತು ಊಟದ ದರಗಳನ್ನು ಹೆಚ್ಚಿಸಲು ಹೋಟೆಲ್ ಮಾಲೀಕರ ಸಂಘಗಳು ಮುಂದಾಗುವ ಸಾಧ್ಯತೆಯಿದೆ.

ಎಲ್‌ಪಿಜಿ ದರ ನಿಗದಿ ಪ್ರಕ್ರಿಯೆ: ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಮತ್ತು ಸೌದಿ ಅರಾಮ್ಕೊದ ಎಲ್‌ಪಿಜಿ ಬೆಂಚ್‌ಮಾರ್ಕ್ ದರಗಳು ಹಾಗೂ ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿಯ ವಿನಿಮಯ ಮೌಲ್ಯವನ್ನು ಆಧರಿಸಿ ಪ್ರತಿ ತಿಂಗಳ 1 ನೇ ತಾರೀಖಿನಂದು ಭಾರತೀಯ ತೈಲ ಕಂಪನಿಗಳು (IOCL, BPCL, HPCL) ಇಂಧನ ದರಗಳನ್ನು ಪರಿಷ್ಕರಿಸುತ್ತವೆ.

ಗೃಹಬಳಕೆ ದರ ನಿಯಂತ್ರಣ ನೀತಿ: ವಾಣಿಜ್ಯ ಸಿಲಿಂಡರ್‌ಗಳ ದರ ಸಂಪೂರ್ಣವಾಗಿ ಮಾರುಕಟ್ಟೆಯ ಏರಿಳಿತಗಳಿಗೆ ಒಳಪಟ್ಟಿದ್ದರೆ, ಗೃಹಬಳಕೆಯ ಸಿಲಿಂಡರ್‌ಗಳ ಮೇಲೆ ಕೇಂದ್ರ ಸರ್ಕಾರವು ಸಾರ್ವಜನಿಕ ಹಿತದೃಷ್ಟಿಯಿಂದ ನಿಗಾ ಇರಿಸುತ್ತದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ದುಬಾರಿಯಾದರೂ, ಹಣದುಬ್ಬರ ನಿಯಂತ್ರಣ ಮತ್ತು ಜನಸಾಮಾನ್ಯರ ಮೇಲಿನ ಹೊರೆ ತಪ್ಪಿಸಲು ಸರ್ಕಾರ ದೇಶೀಯ ಸಿಲಿಂಡರ್ ದರಗಳನ್ನು ಬಹುತೇಕ ಸ್ಥಿರವಾಗಿರಿಸುತ್ತದೆ.

ವಾಣಿಜ್ಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ