ಕ್ರಿಪ್ಟೋಕರೆನ್ಸಿ ಮತ್ತು ಅಧಿಕೃತ ಡಿಜಿಟಲ್ ಕರೆನ್ಸಿ ನಿಯಂತ್ರಣ ಮಸೂದೆ ಬಗ್ಗೆ ಸುಳಿವು ನೀಡಿದ ಹಣಕಾಸು ಸಚಿವೆ

ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಸಂದರ್ಶನವೊಂದರಲ್ಲಿ ಮಾತನಾಡುತ್ತಾ, ಕ್ರಿಪ್ಟೋಕರೆನ್ಸಿ ಮತ್ತು ಅಧಿಕೃತ ಡಿಜಿಟಲ್ ಕರೆನ್ಸಿ ಮಸೂದೆ ನಿಯಂತ್ರಣ, 2021ರ ಬಗ್ಗೆ ಸುಳಿವು ನೀಡಿದ್ದಾರೆ. ಮಸೂದೆಗೆ ಸಂಪುಟದ ಟಿಪ್ಪಣಿ ಸಿದ್ಧವಾಗಿದೆ. ಆದರೆ ಅದನ್ನು ಕೈಗೆತ್ತಿಕೊಳ್ಳುವುದು ಸಂಪುಟಕ್ಕೆ ಬಿಟ್ಟಿದ್ದು ಎಂದು ನಿರ್ಮಲಾ ಸೀತಾರಾಮನ್ ಹೇಳಿದ್ದಾರೆ. “ನಾವು ಅದರ ಮೇಲೆ ಸಾಕಷ್ಟು ಕೆಲಸ ಮಾಡಿದ್ದೇವೆ. ನಾವು ಸಂಬಂಧಪಟ್ಟವರಿಂದ ಮಾಹಿತಿಗಳನ್ನು ಪಡೆದುಕೊಂಡಿದ್ದೇವೆ. ಸಂಪುಟ ಟಿಪ್ಪಣಿ ಸಿದ್ಧವಾಗಿದೆ. ಕೇಂದ್ರ ಸಂಪುಟವು ಅದನ್ನು ಯಾವಾಗ ತೆಗೆದುಕೊಳ್ಳಬಹುದು ಮತ್ತು ಪರಿಗಣಿಸಬಹು ಎಂದು ನಾವು ನೋಡಬೇಕಾಗಿದೆ. ಅಲ್ಲಿಂದ ಮುಂದಕ್ಕೆ ನಾವು ತೆಗೆದುಕೊಂಡು ಹೋಗಬಹುದು,” ಎಂದು ಅವರು ಕಳೆದ ವಾರ ದಿ ಹಿಂದೂಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

ಮುಂದುವರಿದು ಮಾತನಾಡಿದ ಸಚಿವೆ ನಿರ್ಮಲಾ ಸೀತಾರಾಮನ್, “ನಮ್ಮ ಕಡೆಯಿಂದ ನೀಡಿದ ಒಂದು ಅಥವಾ ಎರಡು ಸೂಚನೆಗಳೆಂದರೆ, ಕನಿಷ್ಠ ಫಿನ್​ಟೆಕ್​ಗಾಗಿ, ಪ್ರಯೋಗ ಮತ್ತು ಪ್ರಾಯೋಗಿಕವಾಗಿ ಯೋಜನೆಗಳಿಗೆ ಒಂದು ವಿಂಡೋ (ಗವಾಕ್ಷಿ) ಲಭ್ಯವಿರುತ್ತದೆ,” ಎಂದವರು, ಅಂತಿಮವಾಗಿ ಸಂಪುಟವೇ ನಿರ್ಧಾರ ತೆಗೆದುಕೊಳ್ಳಬೇಕಾಗುತ್ತದೆ ಎಂದಿದ್ದಾರೆ. ಯಾವುದೇ ಸ್ಪಷ್ಟತೆ ಇಲ್ಲವಾದರೂ ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ ಮಸೂದೆಯನ್ನು ಚರ್ಚೆಗೆ ತೆಗೆದುಕೊಳ್ಳಬಹುದು. ಈ ಮಸೂದೆಯನ್ನು ಸಂಸತ್ತಿನ ಬಜೆಟ್ ಅಧಿವೇಶನಕ್ಕೆ ಪಟ್ಟಿ ಮಾಡಲಾಗಿದೆ ಎಂದು ನಮೂದಿಸಬೇಕು. ಆದರೆ ಅಂತಿಮವಾಗಿ ಅದನ್ನು ಮಂಡಿಸಲಾಗಿಲ್ಲ. ಬಜೆಟ್ ಅಧಿವೇಶನವನ್ನು ಕೊವಿಡ್ ಎರಡನೇ ಅಲೆಯ ಕಾರಣಕ್ಕೆ ಮೊಟಕುಗೊಳಿಸಲಾಯಿತು.

ಡಿಜಿಟಲ್ ಕರೆನ್ಸಿಗಳ ಬಗ್ಗೆ ಸರ್ಕಾರ ತನ್ನ ನಿಲುವನ್ನು ಇನ್ನೂ ಸ್ಪಷ್ಟಪಡಿಸಿಲ್ಲ. ಕ್ರಿಪ್ಟೋಕರೆನ್ಸಿ ಸೇವೆಗಳಲ್ಲಿ ತೊಡಗಿಕೊಳ್ಳಬೇಡಿ ಎಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾವು 2018ರಲ್ಲಿ ಬ್ಯಾಂಕುಗಳಿಗೆ ಸುತ್ತೋಲೆ ಹೊರಡಿಸಿತ್ತು. ಆರ್‌ಬಿಐ, ಮೇ 31ರಂದು ತನ್ನ 2018ರ ಸುತ್ತೋಲೆ ಇನ್ನು ಮುಂದೆ ಮಾನ್ಯವಾಗಲ್ಲ ಮತ್ತು ಬ್ಯಾಂಕುಗಳು ಅದನ್ನು ಉಲ್ಲೇಖಿಸುವುದನ್ನು ನಿರ್ಬಂಧಿಸಿದೆ ಎಂದು ಹೇಳಿತ್ತು. “ಮೇಲಿನ ಸುತ್ತೋಲೆಗೆ ಬ್ಯಾಂಕುಗಳು ಅಥವಾ ನಿಯಂತ್ರಿತ (ರೆಗ್ಯುಲೇಟೆಡ್) ಯೂನಿಟ್​ಗಳು ಇಂತಹ ಉಲ್ಲೇಖಗಳನ್ನು ಹೊಂದಿಲ್ಲ, ಏಕೆಂದರೆ ಈ ಸುತ್ತೋಲೆಯನ್ನು ಸುಪ್ರೀಂ ಕೋರ್ಟ್ ಮಾರ್ಚ್ 04, 2020ರಂದು ಪಕ್ಕಕ್ಕೆ ಸರಿಸಿತ್ತು,” ಎಂದು ಅದು ಹೇಳಿದೆ. ಗುರುವಾರದಂದು ಒಂದು ಬಿಟ್​ ಕಾಯಿನ್ ಬೆಲೆ ಭಾರತದ ರೂಪಾಯಿ ಲೆಕ್ಕದಲ್ಲಿ 24,34,360.78 ಇದೆ.

(Cryptocurrency and digital currency bill will be passed soon hint by union finance minister Nirmala Sitharaman)

Published On - 3:06 pm, Thu, 8 July 21