Trump: ಸ್ನೇಹಿತನಿಗೆ ಕಾನೂನು ತೊಂದರೆ; ಇಡೀ ದೇಶಕ್ಕೆ ಟ್ಯಾರಿಫ್ ಕಟ್ಟಳೆ ಹಾಕಿದ ಡೊನಾಲ್ಡ್ ಟ್ರಂಪ್
Donald Trump announces tariff to defend Bolsonaro: ಡೊನಾಲ್ಡ್ ಟ್ರಂಪ್ ಮೊನ್ನೆ 14 ದೇಶಗಳ ಮೇಲೆ ಆಮದು ಸುಂಕ ಹಾಕಿದ್ದಾರೆ. ಈಗ ಬ್ರೆಜಿಲ್ ಮೇಲೂ ಶೇ. 50ರಷ್ಟು ಟ್ಯಾರಿಫ್ ಹಾಕಿದ್ದಾರೆ. ಬ್ರೆಜಿಲ್ನ ಅಧ್ಯಕ್ಷೀಯ ಚುನಾವಣೆಯಲ್ಲಿ ಮೋಸವಾಗಿದೆ, ಅದರ ಮಾಜಿ ಅಧ್ಯಕ್ಷರನ್ನು ರಾಜಕೀಯವಾಗಿ ಹತ್ತಿಕ್ಕಲಾಗುತ್ತಿದೆ ಎಂಬುದು ಟ್ರಂಪ್ ಆರೋಪ. ಈ ಕಾರಣಕ್ಕೆ ಬ್ರೆಜಿಲ್ ಮೇಲೆ ಅವರು ಟ್ಯಾರಿಫ್ ಹೇರಿಕೆ ಮಾಡಿದ್ದಾರೆ.
Updated on: Jul 10, 2025 | 4:17 PM
ವಾಷಿಂಗ್ಟನ್, ಜುಲೈ 10: ಡೊನಾಲ್ಡ್ ಟ್ರಂಪ್ (Donald Trump) ಅವರಂತೂ ಇತ್ತೀಚಿನ ವಾರಗಳಿಂದ ಟ್ಯಾರಿಫ್ ಮೇಲೆ ಟ್ಯಾರಿಫ್ಗಳನ್ನು ಹಾಕುವ ಮಾತುಗಳನ್ನಾಡುತ್ತಿದ್ದಾರೆ. ಹಲವು ದೇಶಗಳಿಗೆ ಟ್ಯಾರಿಫ್ ಪ್ರಕಟಿಸಿಯೂ ಇದ್ದಾರೆ. ಜಪಾನ್ನಂತಹ ಮಿತ್ರರಾಷ್ಟ್ರಗಳನ್ನೂ ಒಳಗೊಂಡಂತೆ 14 ದೇಶಗಳ ಮೇಲೆ ಅವರು ಆಮದು ಸುಂಕ ಹಾಕಿದ್ದಾರೆ. ಇದೀಗ ಅಮೆರಿಕ ಅಧ್ಯಕ್ಷರು ಬ್ರೆಜಿಲ್ ಮೇಲೆ ಶೇ. 50ರಷ್ಟು ಆಮದು ಸುಂಕ ಹೇರಿದ್ದಾರೆ. ಅದಕ್ಕೆ ಕಾರಣ, ಬ್ರೆಜಿಲ್ನ ಆಡಳಿತವು ಮಾಜಿ ಅಧ್ಯಕ್ಷ ಜೇರ್ ಬೊಲ್ಸೋನಾರೋ (Jair Bolsonaro) ಅವರನ್ನು ಹತ್ತಿಕ್ಕಲು ಯತ್ನಿಸುತ್ತಿದೆ ಎನ್ನುವುದು.
ಡೊನಾಲ್ಡ್ ಟ್ರಂಪ್ ಅಮೆರಿಕದಲ್ಲಿ ಬಲಪಂಥೀಯ ವಿಚಾರಧಾರೆ ಪರ ಇರುವ ಮುಖಂಡ. ಬ್ರೆಜಿಲ್ನ ಮಾಜಿ ಅಧ್ಯಕ್ಷ ಜೇರ್ ಬೊಲ್ಸೋನಾರೋ ಕೂಡ ಅಲ್ಲಿಯ ಬಲಪಂಥೀಯ ನಾಯಕ. ಟ್ರಂಪ್ ಮತ್ತು ಬೊಲ್ಸೋನಾರೋ ಮಧ್ಯೆ ಸಹಜ ಗೆಳೆತನ ಮತ್ತು ಸಂವಾದ ಇದೆ. ಅವರ ರಕ್ಷಣೆಗೆ ಟ್ರಂಪ್ ಪ್ರಯತ್ನಿಸುತ್ತಿದ್ದಾರೆ.
ಬೊಲ್ಸೊನಾರೋ ವಿರುದ್ಧ ಪಿತೂರಿ ಆರೋಪ
2022ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಜೇರ್ ಬೊಲ್ಸಾನಾರೋ ಸ್ಪರ್ಧಿಸಿದ್ದರು. ಇದರಲ್ಲಿ ಲೂಯಿಜ್ ಇನಾಷಿಯೊ ಲುಲಾ ಡಾ ಸಿಲ್ವಾ (Luiz Inacio Lula Da Silva) ಅವರು ಬಹಳ ಅಲ್ಪ ಮತಗಳ ಅಂತರದಿಂದ ಗೆದ್ದಿದ್ದಾರೆ. ಅಂದಿನ ಹಾಲಿ ಅಧ್ಯಕ್ಷರಾಗಿದ್ದ ಬೊಲ್ಸಾನಾರೋ ಅವರು ಈ ಚುನಾವಣೆಯಲ್ಲಿ ಗೋಲ್ಮಾಲ್ ಆಗಿದೆ ಎಂದು ಹೇಳಿ ಫಲಿತಾಂಶವನ್ನು ಒಪ್ಪಲು ಸಿದ್ಧರಿರಲಿಲ್ಲ. ಹಾಗೆಯೇ ಅಧಿಕಾರ ಬಿಟ್ಟುಕೊಡಲೂ ಸಿದ್ಧರಿರಲಿಲ್ಲ. ಇದು ಅವರ ವಿರುದ್ಧ ಇರುವ ಆರೋಪ. ಪ್ರಕರಣದ ವಿಚಾರಣೆಯೂ ನಡೆದಿದೆ.
ಬೊಲ್ಸೊನಾರೋ ಅವರನ್ನು ರಾಜಕೀಯವಾಗಿ ಹತ್ತಿಕ್ಕಲಾಗುತ್ತಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬಾರಿ ಬಾರಿ ಹೇಳುತ್ತಿದ್ದಾರೆ. ಈಗ ಬ್ರೆಜಿಲ್ ಮೇಲೆ ಶೇ. 50 ಟ್ಯಾರಿಫ್ ಹಾಕುತ್ತಿರುವುದಾಗಿ ಹೇಳಿದ್ಧಾರೆ.
ಇದನ್ನೂ ಓದಿ: ಟ್ರಂಪ್ ಟ್ಯಾರಿಫ್ನಿಂದ ಸದ್ಯ ಬಚಾವಾದ ಭಾರತ; ಅಮೆರಿಕದಿಂದ 14 ದೇಶಗಳ ಮೇಲೆ ಆಮದು ಸುಂಕ ಹೇರಿಕೆ
‘ಮುಕ್ತ ಚುನಾವಣೆಯನ್ನು ಬ್ರೆಜಿಲ್ ಹತ್ತಿಕ್ಕುತ್ತಿದೆ’ ಎಂದು ಆರೋಪಿಸಿರುವ ಟ್ರಂಪ್ ಅವರು, ತಾನು ಹಾಕಿರುವ ತೆರಿಗೆಗೆ ಬ್ರೆಜಿಲ್ ಪ್ರತಿಸುಂಕ ಹಾಕಿದರೆ ತಾನು ಇನ್ನೂ ಹೆಚ್ಚಿನ ಸುಂಕ ಹಾಕುವುದಾಗಿ ಬೆದರಿಕೆ ಹಾಕಿದ್ದಾರೆ. ಸದ್ಯ ಶೇ. 50ರಷ್ಟು ಆಮದು ಸುಂಕವು ಆಗಸ್ಟ್ 1ರಿಂದ ಜಾರಿಗೆ ಬರುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
