Enforcement Directorate: ಜಾರಿ ನಿರ್ದೇಶನಾಲಯದಿಂದ ಶಿಯೋಮಿ ಇಂಡಿಯಾದ 5,551 ಕೋಟಿ ರೂಪಾಯಿ ವಶಕ್ಕೆ

ಜಾರಿ ನಿರ್ದೇಶನಾಲಯವು (Enforcement Directorate) ಏಪ್ರಿಲ್ 30ರ ಶನಿವಾರದಂದು ಚೀನಾದ ಗ್ಯಾಜೆಟ್ ದೈತ್ಯ ಕಂಪೆನಿಯ ಸ್ಥಳೀಯ ಅಂಗ ಸಂಸ್ಥೆಯಾದ ಶಿಯೋಮಿ (Xiaomi) ಇಂಡಿಯಾದಿಂದ 5,551.27 ಕೋಟಿ ರೂಪಾಯಿಗಳನ್ನು ವಶಪಡಿಸಿಕೊಂಡಿದೆ ಎಂದು ಹೇಳಿದ್ದು, “ಕಂಪೆನಿಯಿಂದ ಕಾನೂನುಬಾಹಿರವಾಗಿ ಮಾಡಿದ ಬಾಹ್ಯ ಹಣ ರವಾನೆ”ಗೆ ಸಂಬಂಧಿಸಿದಂತೆ ಈ ಕ್ರಮ ಕೈಗೊಳ್ಳಲಾಗಿದೆ. ಫೆಮಾ (FEMA) ನಿಬಂಧನೆಗಳ ಅಡಿಯಲ್ಲಿ ಕಂಪೆನಿ ಬ್ಯಾಂಕ್ ಖಾತೆಗಳಿಂದ ಹಣ ವಶಪಡಿಸಿಕೊಳ್ಳಲಾಗಿದೆ ಎಂದು ಕೇಂದ್ರ ತನಿಖಾ ಸಂಸ್ಥೆಯು ಹೇಳಿಕೆಯಲ್ಲಿ ತಿಳಿಸಿದೆ. ಆರೋಪಿಸಲಾದ ಅಕ್ರಮ ಹಣ ರವಾನೆಯ ತನಿಖೆಯನ್ನು ಈ ವರ್ಷದ ಫೆಬ್ರವರಿಯಲ್ಲಿ ಪ್ರಾರಂಭಿಸಲಾಯಿತು, “ಕಂಪೆನಿಯು 5551.27 ಕೋಟಿ ರೂಪಾಯಿಗಳಿಗೆ ಸಮಾನವಾದ ವಿದೇಶಿ ಕರೆನ್ಸಿಯನ್ನು ಮೂರು ವಿದೇಶಿ ಮೂಲದ ಸಂಸ್ಥೆಗಳಿಗೆ ರವಾನೆ ಮಾಡಿದೆ, ಇದರಲ್ಲಿ ಒಂದು ಶಿಯೋಮಿ ಸಮೂಹದ ರಾಯಲ್ಟಿಯ ಸೋಗಿನಲ್ಲಿದೆ.”

“ರಾಯಲ್ಟಿ ಹೆಸರಿನಲ್ಲಿ ಅಂತಹ ದೊಡ್ಡ ಮೊತ್ತವನ್ನು ಅದರ ಚೀನೀ ಮಾತೃಸಂಸ್ಥೆಯ ಗುಂಪು ಘಟಕಗಳ ಸೂಚನೆ ಮೇರೆಗೆ ರವಾನೆ ಮಾಡಲಾಗಿದೆ,” ಎಂದು ಅದು ಹೇಳಿದೆ. “ಅಮೆರಿಕ ಮೂಲದ ಸಂಬಂಧ ಇರದ ಇತರ ಎರಡು ಘಟಕಗಳಿಗೆ” ರವಾನೆಯಾದ ಮೊತ್ತವು “ಶಿಯೋಮಿ ಗುಂಪಿನ ಘಟಕಗಳ ಅಂತಿಮ ಅನುಕೂಲಕ್ಕಾಗಿ” ಎಂದು ಇಡಿ ಗಮನಿಸಿದೆ. ಎಂಐ (MI) ಬ್ರ್ಯಾಂಡ್‌ನ ಅಡಿಯಲ್ಲಿ ಭಾರತದಲ್ಲಿ ಮೊಬೈಲ್ ಫೋನ್‌ಗಳ ವಿತರಕರಾಗಿರುವ ಶಿಯೋಮಿ ಇಂಡಿಯಾ 2014ರಲ್ಲಿ ದೇಶದಲ್ಲಿ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು ಮತ್ತು 2015ರಿಂದ ಬಾಹ್ಯ ಹಣ ರವಾನೆ ಮಾಡುತ್ತಿದೆ ಎಂದು ಇಡಿ ಹೇಳಿದೆ.

“ಶಿಯೋಮಿ ಇಂಡಿಯಾ ಅಂತಹ ಮೊತ್ತವನ್ನು ವರ್ಗಾಯಿಸಿದ ಮೂರು ವಿದೇಶಿ ಮೂಲದ ಘಟಕಗಳಿಂದ ಯಾವುದೇ ಸೇವೆಯನ್ನು ಪಡೆದಿಲ್ಲ,” ಇದು “ಗುಂಪು ಘಟಕಗಳ ನಡುವೆ ರಚಿಸಲಾದ ವಿವಿಧ ಸಂಬಂಧವಿಲ್ಲದ ದಾಖಲಾತಿಗಳ ಅಡಿಯಲ್ಲಿ”, ಕಂಪೆನಿಯು ಸೋಗಿನಲ್ಲಿ ಈ ಮೊತ್ತವನ್ನು ರವಾನಿಸಿದೆ ಎಂದು ಹೇಳಿದೆ. ವಿದೇಶಕ್ಕೆ ರಾಯಲ್ಟಿ ರೂಪದಲ್ಲಿ ಹಣ ಕಳುಹಿಸಿರುವುದು ಫೆಮಾದ ಸೆಕ್ಷನ್ 4ರ ಉಲ್ಲಂಘನೆಯಾಗುತ್ತದೆ. ವಿದೇಶಕ್ಕೆ ಹಣವನ್ನು ರವಾನೆ ಮಾಡುವಾಗ ಕಂಪೆನಿಯು ಬ್ಯಾಂಕ್‌ಗಳಿಗೆ ದಾರಿ ತಪ್ಪಿಸುವ ಮಾಹಿತಿಯನ್ನು ಸಹ ನೀಡಿದೆ ಎಂದು ಇಡಿ ಸೇರಿಸಿದೆ.

ಈ ವರದಿಯನ್ನು ಸಿದ್ಧಪಡಿಸುವ ಸಮಯದಲ್ಲಿ ಇಡಿ ಕ್ರಮದ ಕುರಿತು ಶಿಯೋಮಿ ಇಂಡಿಯಾ ಇನ್ನೂ ಹೇಳಿಕೆಯನ್ನು ನೀಡಿರಲಿಲ್ಲ ಎಂದು ಮನಿಕಂಟ್ರೋಲ್ ವರದಿ ಮಾಡಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂ ಓದಿ: Tax evasion: ತೆರಿಗೆ ಕಳವಿನ ಆರೋಪದಲ್ಲಿ ಶಿಯೋಮಿ, ಒನ್​ಪ್ಲಸ್, ಒಪ್ಪೋ ಕಚೇರಿ ಮೇಲೆ ಆದಾಯ ತೆರಿಗೆ ಇಲಾಖೆ ದಾಳಿ