ಹೂಡಿಕೆದಾರರಿಗೆ ಅಮೆರಿಕ ಬಿಟ್ಟರೆ ಭಾರತವೇ ಮೊದಲ ಆದ್ಯತೆ: ಸಿಟಿ ಗ್ರೂಪ್ ವೈಸ್ ಛೇರ್ಮನ್ ವಿಶ್ವಾಸ್ ರಾಘವನ್
Citigroup vice-chairman Viswas Raghavan: ಡೊನಾಲ್ಡ್ ಟ್ರಂಪ್ ಅಮೆರಿಕ ಅಧ್ಯಕ್ಷರಾಗಿರುವುದು ಭಾರತಕ್ಕೆ ಅನುಕೂಲವಾಗುತ್ತದೆ ಎಂದು ಸಿಟಿಗ್ರೂಪ್ನ ಬ್ಯಾಂಕಿಂಗ್ ಮುಖ್ಯಸ್ಥ ವಿಶ್ವಾಸ್ ರಾಘವನ್ ಅಭಿಪ್ರಾಯಪಟ್ಟಿದ್ದಾರೆ. ಜಾಗತಿಕ ಹೂಡಿಕೆಗಳ ಒಳಹರಿವಿಗೆ ಅಮೆರಿಕ ಬಿಟ್ಟರೆ ಭಾರತವೇ ಅತಿದೊಡ್ಡ ಮಾರುಕಟ್ಟೆಯಾಗಿದೆ. ಭಾರತದಲ್ಲಿ ನೀವು ಏನೇ ತಯಾರಿಸಿದರೂ ಅದನ್ನು ಅಲ್ಲೇ ಬಳಕೆ ಮಾಡಬಹುದು. ಇದು ಭಾರತಕ್ಕಿರುವ ಅನುಕೂಲ ಎನ್ನುತ್ತಾರೆ ವಿ ರಾಘವನ್.
ಮುಂಬೈ, ನವೆಂಬರ್ 18: ಅಮೆರಿಕದಲ್ಲಿ ಡೊನಾಲ್ಡ್ ಟ್ರಂಪ್ ಸರ್ಕಾರ ಅಸ್ತಿತ್ವದಲ್ಲಿರುವ ವೇಳೆ ಭಾರತಕ್ಕೂ ಸಾಕಷ್ಟು ಲಾಭವಾಗಲಿದೆ. ಜಾಗತಿಕ ಹೂಡಿಕೆಗಳಿಗೆ ಅಮೆರಿಕ ಅತಿದೊಡ್ಡ ಮಾರುಕಟ್ಟೆಯಾದರೆ, ನಂತರದ ಆದ್ಯತೆ ಭಾರತಕ್ಕೆ ಸಿಗುತ್ತದೆ ಎಂದು ಸಿಟಿಗ್ರೂಪ್ ಸಂಸ್ಥೆಯ ಎಕ್ಸಿಕ್ಯೂಟಿವ್ ವೈಸ್ ಛೇರ್ಮನ್ ಆಗಿರುವ ವಿಶ್ವಾಸ್ ರಾಘವನ್ (Viswas Raghavan) ಹೇಳಿದ್ದಾರೆ. ರಾಘವನ್ ಪ್ರಕಾರ, ಕೈಯಲ್ಲಿ ಮೂರು ಟ್ರಿಲಿಯನ್ ಡಾಲರ್ ಹಣ ಹಿಡಿದು ಕೂತಿರುವ ಹೂಡಿಕೆದಾರರು ಎಲ್ಲಿಗೆ ಹಣ ಚೆಲ್ಲುವುದು ಎಂದು ಆಲೋಚಿಸುತ್ತಿದ್ದಾರೆ. ಯಾವ ಸ್ಥಳದಿಂದ ಹೆಚ್ಚು ರಿಟರ್ನ್ ಸಿಗುತ್ತದೆ ಎಂದು ಅವಲೋಕಿಸಿ ಎಚ್ಚರಿಕೆಯ ಹೆಜ್ಜೆಗಳನ್ನು ಇರಿಸುವ ನಿರೀಕ್ಷೆ ಇದೆ.
‘ಹೂಡಿಕೆಗಳು ಎತ್ತ ಹರಿದುಹೋಗಬಹುದು ಎಂದು ಸಾಕಷ್ಟು ಸಮಯದಿಂದ ಅವಲೋಕಿಸಿದ್ದೇವೆ. ಹೂಡಿಕೆ ಒಳಹರಿವಿಗೆ ಅಮೆರಿಕವೇ ಅತಿದೊಡ್ಡ ಮಾರುಕಟ್ಟೆಯಾಗಿದೆ. ನಂತರದ್ದು ಭಾರತವೇ,’ ಎಂದು ಸಿಟಿ ಗ್ರೂಪ್ ಎಕ್ಸಿಕ್ಯೂಟಿವ್ ವೈಸ್ಛೇರ್ಮನ್ ಹೇಳಿದ್ದಾರೆ.
ಅಮೆರಿಕಕ್ಕೆ ಹೆಚ್ಚು ಹೂಡಿಕೆಗಳು ಹರಿದುಹೋಗುವುದು ಯಾಕೆ?
ಡೊನಾಲ್ಡ್ ಟ್ರಂಪ್ ಅವರು ಅಮೆರಿಕವನ್ನು ಮತ್ತೊಮ್ಮೆ ಉತ್ಪಾದಕ ರಾಷ್ಟ್ರವಾಗಿ ಮಾಡುವ ಗುರಿ ಹೊಂದಿದ್ದಾರೆ. ಅಮೆರಿಕದಲ್ಲಿ ಉತ್ಪನ್ನಗಳ ತಯಾರಿಕೆ ಆಗಲು ಉತ್ತೇಜಿಸುವಂತಹ ನೀತಿಗಳನ್ನು ಅವರು ರೂಪಿಸಲಿದ್ದಾರೆ. ಇದರಿಂದ ಬಹುರಾಷ್ಟ್ರೀಯ ಕಂಪನಿಗಳು ತಮ್ಮ ಹೂಡಿಕೆ ಪ್ಲಾನ್ಗಳನ್ನು ಮರುಯೋಜಿಸುತ್ತಿವೆ. ಇದರಿಂದ ಅಮೆರಿಕದಲ್ಲಿ ಉದ್ಯೋಗಸೃಷ್ಟಿ ಹೆಚ್ಚಲಿದೆ ಎಂದು ವಿಶ್ವಾಸ್ ರಾಘವನ್ ಅಭಿಪ್ರಾಯಪಟ್ಟಿದ್ದಾರೆ.
ಬೇರೆ ದೇಶಗಳಿಗಿಲ್ಲದ ಅನುಕೂಲ ಭಾರತಕ್ಕಿದೆ…
ಡೊನಾಲ್ಡ್ ಟ್ರಂಪ್ ಭಾರತದ ಬಗ್ಗೆ ಸಕಾರಾತ್ಮಕ ಧೋರಣೆ ಹೊಂದಿದ್ದಾರೆ. ಭಾರತದ ಮಾರುಕಟ್ಟೆಯೂ ಪೂರಕ ರೀತಿಯಲ್ಲಿ ಇದೆ. ಇದು ಭಾರತಕ್ಕೆ ಅನುಕೂಲ ತರುವ ಸಂಗತಿ ಎಂಬುದು ರಾಘವನ್ ಅನಿಸಿಕೆ.
ಹಾಗೆಯೇ, ಭಾರತದಲ್ಲಿ ನೀವು ಏನೇ ತಯಾರಿಸಿದರೂ ಅದನ್ನು ಭಾರತದಲ್ಲೇ ಬಳಸಬಹುದು. ಇದು ಭಾರತದ ಮಾರುಕಟ್ಟೆಯ ವೈಶಿಷ್ಟ್ಯ. ಅದೇ ನೀವು ಯುಕೆ ಅಥವಾ ಬೇರೆ ದೇಶವನ್ನು ತೆಗೆದುಕೊಳ್ಳಿ, ಅಲ್ಲಿ ತಯಾರಾಗುವ ಸರಕನ್ನು ಬೇರೆಡೆಗೆ ಸಾಗಿಸಬೇಕಾಗುತ್ತದೆ. ಭಾರತದಲ್ಲಿ ಹೆಚ್ಚುತ್ತಿರುವ ಆದಾಯ ಮತ್ತು ಜನರ ಬೇಡಿಕೆಯು ಇಲ್ಲಿ ಸರಕು ಮತ್ತು ಸೇವೆಗಳಿಗೆ ಅತ್ಯುತ್ತಮ ಮಾರುಕಟ್ಟೆಯನ್ನು ನಿರ್ಮಿಸಿದೆ ಎಂದು ಸಿಟಿಗ್ರೂಪ್ ಸಂಸ್ಥೆಯ ಉಪಾಧ್ಯಕ್ಷರಾಗಿರುವ ವಿಶ್ವಾಸ್ ರಾಘವನ್ ತಿಳಿಸಿದ್ದಾರೆ.
ವಿಶ್ವದ ಅಗ್ರಮಾನ್ಯ ಬ್ಯಾಂಕುಗಳಲ್ಲಿ ಒಂದಾದ ಸಿಟಿಗ್ರೂಪ್ನಲ್ಲಿ ವೈಸ್ಛೇರ್ಮನ್ನಂತಹ ಪ್ರಮುಖ ಹುದ್ದೆ ಹೊಂದಿರುವ ವಿಶ್ವಾಸ್ ರಾಘವನ್ ಭಾರತ ಮೂಲದವರು. ಮುಂಬೈನಲ್ಲೇ ಓದಿ ಬೆಳೆದು ಬಳಿಕ ಯುಕೆಯಲ್ಲಿ ಉನ್ನತ ವ್ಯಾಸಂಗ ಮಾಡಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ