Layoffs: 3,000 ಉದ್ಯೋಗಿಗಳ ವಜಾಗೊಳಿಸಲಿದೆ ಗೋಲ್ಡ್​ಮನ್ ಸ್ಯಾಕ್ಸ್; ವರದಿ

ನವದೆಹಲಿ: ಐಟಿ ಕಂಪನಿಗಳ ಉದ್ಯೋಗ ಕಡಿತದ ಸುದ್ದಿಗಳ ನಡುವೆಯೇ ಇದೀಗ ಗೋಲ್ಡ್​ಮನ್ ಸ್ಯಾಕ್ಸ್ ಸಮೂಹ (Goldman Sachs Group) ವಿವಿಧ ಅಂಗಸಂಸ್ಥೆಗಳಿಂದ ಈ ವಾರ ಸಾವಿರಾರು ಸಂಖ್ಯೆಯಲ್ಲಿ ಉದ್ಯೋಗ ಕಡಿತ ಮಾಡಲಿದೆ ಎಂದು ಮೂಲಗಳು ತಿಳಿಸಿವೆ. ಕಂಪನಿಯು ಕಠಿಣ ಆರ್ಥಿಕ ಪರಿಸ್ಥಿತಿ ಎದುರಿಸುತ್ತಿದ್ದು, ಈ ಕ್ರಮ ಕೈಗೊಳ್ಳಲಾಗುತ್ತಿದೆ ಎನ್ನಲಾಗಿದೆ. ಸುಮಾರು 3,000 ಉದ್ಯೋಗಿಗಳನ್ನು ಈ ವಾರ ಕಂಪನಿ ವಜಾಗೊಳಿಸಲಿದೆ ಎಂದು ಅಂದಾಜಿಸಲಾಗಿದೆ. ಆದರೆ, ಅಂತಿಮ ಲೆಕ್ಕಾಚಾರ ಇನ್ನಷ್ಟೇ ಗೊತ್ತಾಗಬೇಕಿದೆ ಎಂದು ಅಧಿಕೃತ ಮೂಲಗಳನ್ನು ಉಲ್ಲೇಖಿಸಿ ‘ರಾಯಿಟರ್ಸ್’ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಈ ವಿಚಾರವಾಗಿ ತಕ್ಷಣಕ್ಕೆ ಪ್ರತಿಕ್ರಿಯಿಸಲು ಗೋಲ್ಡ್​ಮನ್ ಸ್ಯಾಕ್ಸ್ ಸಮೂಹ ನಿರಾಕರಿಸಿದೆ.

ಒಟ್ಟಾರೆ 49,100 ಉದ್ಯೋಗಿಗಳ ಪೈಕಿ 3,200 ಮಂದಿಯನ್ನು ಮೂರನೇ ತ್ರೈಮಾಸಿಕ ಅವಧಿಯ ಒಳಗೆ ಗೋಲ್ಡ್​ಮನ್ ಸ್ಯಾಕ್ಸ್ ವಜಾಗೊಳಿಸಲಿದೆ ಎಂದು ಇತ್ತೀಚೆಗೆ ವರದಿಯಾಗಿತ್ತು. ಕೊವಿಡ್​ ಸಾಂಕ್ರಾಮಿಕದ ಸಂದರ್ಭದಲ್ಲಿ ಹೆಚ್ಚಾಗಿ ನೇಮಕಾತಿ ಮಾಡಿಕೊಂಡಿದ್ದರ ಪರಿಣಾಮವಿದು ಎಂದು ಮೂಲಗಳು ಹೇಳಿವೆ.

ಗೋಲ್ಡ್​ಮನ್ ಸ್ಯಾಕ್ಸ್ ಸಮೂಹದ ಹೂಡಿಕೆ ಬ್ಯಾಂಕಿಂಗ್ ವಿಭಾಗದಿಂದಲೇ ಹೆಚ್ಚಿನ ಉದ್ಯೋಗ ಕಡಿತವಾಗಲಿದೆ. ಇತರ ವಿಭಾಗಗಳಲ್ಲಿಯೂ ಉದ್ಯೋಗ ಕಡಿತ ಮಾಡುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.

ಇದನ್ನು ಓದಿ: layoffs 2022 – 2023: ಕೆಲಸ ಕೆಲಸ… 2022ಕ್ಕಿಂತಲೂ ಈ ವರ್ಷ ಮಹಾಸಂಕಷ್ಟ?

ಹೂಡಿಕೆ ಬ್ಯಾಂಕಿಂಗ್ ಶುಲ್ಕದಲ್ಲಿ ಭಾರೀ ಇಳಿಕೆಯಾಗಿರುವುದು ಕಂಪನಿಯ ಆದಾಯಕ್ಕೆ ಹೊಡೆತ ನೀಡಿದೆ. 2022ರಲ್ಲಿ ಹೂಡಿಕೆ ಬ್ಯಾಂಕಿಂಗ್ ಶುಲ್ಕ 132.3 ಶತಕೋಟಿ ಡಾಲರ್​ನಿಂದ 77 ಶತಕೋಟಿ ಡಾಲರ್​ಗೆ ಕುಸಿದಿತ್ತು. ವಿಲೀನ ಮತ್ತು ಸ್ವಾಧೀನದ ಮೌಲ್ಯದಲ್ಲಿ 2020ರ ಡಿಸೆಂಬರ್​ ವೇಳೆಗೇ 3.66 ಟ್ರಿಲಿಯನ್ ಡಾಲರ್​ಗೆ, ಅಂದರೆ ಶೇಕಡಾ 37ರಷ್ಟು ಕುಸಿತವಾಗಿತ್ತು ಎಂದು ವರದಿ ತಿಳಿಸಿದೆ.

ಮೆಕ್​ಡೊನಾಲ್ಡ್, ವಿಮಿಯೊ, ಸೇಲ್ಸ್​ಫೋರ್ಸ್, ಮೆಟಾ, ಟ್ವಿಟರ್, ಅಮೆಜಾನ್​ ಮತ್ತಿತರ ಕಂಪನಿಗಳ ಉದ್ಯೋಗ ಕಡಿತದ ನಡುವೆಯೇ ಗೋಲ್ಡ್​ಮನ್ ಸ್ಯಾಕ್ಸ್ ಕೂಡ ಉದ್ಯೋಗ ಕಡಿತದ ಮೊರೆ ಹೋಗಲು ಮುಂದಾಗಿದೆ. ಅಮೆಜಾನ್ ಮತ್ತು ಸೇಲ್ಸ್​ಫೋರ್ಸ್ ಕಂಪನಿಗಳು 2023ರಲ್ಲಿ ತಲಾ 8 ಸಾವಿರ ಸಿಬ್ಬಂದಿ ಕಡಿತ ಮಾಡುತ್ತಿರುವ ಬಗ್ಗೆ ಕೆಲವು ದಿನಗಳ ಹಿಂದೆ ವರದಿಯಾಗಿತ್ತು. ಈ ವರ್ಷ ಜನವರಿ 1ರಿಂದ 5ರವರೆಗೆ ಜಾಗತಿಕವಾಗಿ ಟೆಕ್ ಕಂಪನಿಗಳ 28 ಸಾವಿರಕ್ಕೂ ಹೆಚ್ಚು ಉದ್ಯೋಗಿಗಳು ಕೆಲಸ ಕಳೆದಕೊಂಡಿದ್ದಾರೆ ಎಂದು ಲೇ ಆಫ್ಸ್ ಎನ್ನುವ ಸ್ಟಾರ್ಟಪ್ ಕಂಪನಿಯ ವೆಬ್​ಸೈಟ್ ಟ್ರ್ಯಾಕರ್ ಅಂಕಿಅಂಶಗಳಿಂದ ತಿಳಿದುಬಂದಿತ್ತು.

ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 10:27 am, Mon, 9 January 23