HDFC Bank: ಸಾಲದ ಮೇಲಿನ ಎಂಸಿಎಲ್​ಆರ್ ಏರಿಸಿದ ಎಚ್​ಡಿಎಫ್​ಸಿ ಬ್ಯಾಂಕ್; ಎಷ್ಟು ಹೆಚ್ಚಾಗಲಿದೆ ಇಎಂಐ?

ಇದೇ ಜೂನ್ 7ನೇ ತಾರೀಕಿನಿಂದ ಅನ್ವಯ ಆಗುವಂತೆ ಎಚ್​ಡಿಎಫ್​ಸಿ ಬ್ಯಾಂಕ್​ನಿಂದ (HDFC Bank) ಎಲ್ಲ ಅವಧಿಯ ಮಾರ್ಜಿನಲ್ ಕಾಸ್ಟ್ ಆಫ್ ಲೆಂಡಿಂಗ್ ರೇಟ್ (MCLR) 35 ಬೇಸಿಸ್ ಪಾಯಿಂಟ್ಸ್ (100 ಬೇಸಿಸ್​ ಪಾಯಿಂಟ್ಸ್ ಅಂದರೆ ಶೇ 1) ಹೆಚ್ಚಿಸಲಾಗಿದೆ. ಈ ಹಿಂದೆ ಎಚ್​ಡಿಎಫ್​ಸಿ ಬ್ಯಾಂಕ್​ನಿಂದ ಮೇ 7ನೇ ತಾರೀಕಿನಂದು 25 ಬೇಸಿಸ್​ ಪಾಯಿಂಟ್ಸ್ ಹೆಚ್ಚಿಸಲಾಗಿತ್ತು. ಗೃಹ, ವಾಹನ, ವೈಯಕ್ತಿಕ ಸಾಲ ಸೇರಿದಂತೆ ಇತರ ಸಾಲಗಳು ಈ ಏರಿಕೆ ಮೂಲಕವಾಗಿ ಹೆಚ್ಚಳ ಆಗಲಿದೆ. ವಿವಿಧ ಸಾಲಗಳಿಗೆ ಬ್ಯಾಂಕ್ ಗ್ರಾಹಕರು ಹೆಚ್ಚಿನ ಇಎಂಐ ಪಾವತಿಸಬೇಕಾಗುತ್ತದೆ. ಎಚ್​ಡಿಎಫ್​ಸಿ ಬ್ಯಾಂಕ್​ನ ವೆಬ್​ಸೈಟ್​ ಪ್ರಕಾರ, ಈ ಹಿಂದೆ 7.15 ಇದ್ದ ಓವರ್​ನೈಟ್ ಎಂಸಿಎಲ್​ಆರ್ ಈಗ 7.50 ಆಗಿದೆ. ಒಂದು ತಿಂಗಳ ಅವಧಿಗೆ ಎಂಸಿಎಲ್​ಆರ್​ ಶೇ 7.55 ಆಗಿದೆ. ಮೂರು ತಿಂಗಳಿಗೆ ಮತ್ತು ಆರು ತಿಂಗಳಿಗೆ ಶೇ 7.60 ಹಾಗೂ ಶೇ 7.70 ಆಗಿದೆ.

ಒಂದು ವರ್ಷದ ಎಂಸಿಎಲ್​ಆರ್​ ಹಲವು ಗ್ರಾಹಕ ಸಾಲಗಳಿಗೆ ಜೋಡಣೆ ಆಗಿದೆ. ಅದೀಗ ಶೇ 7.85 ಆಗಿದ್ದು, ಎರಡು ವರ್ಷದ ಎಂಸಿಎಲ್​ಆರ್ ಶೇ 7.95 ಮತ್ತು ಮೂರು ವರ್ಷದ ಎಂಸಿಎಲ್​ಆರ್ ಶೇ 8.05 ಆಗಲಿದೆ. ಗೃಹ ಸಾಲ ಪಡೆದವರಿಗೆ ಇದು ಬಹಳ ಮುಖ್ಯವಾದ ವಿಷಯ. ಸಾಲದ ರೀಸೆಟ್ ದಿನಾಂಕ ಬಂದಾಗ ಮಾತ್ರ ಇದರ ಪರಿಣಾಮ ಆಗುತ್ತದೆ. ಆ ರೀಸೆಟ್ ದಿನಾಂಕದಂದು ಬ್ಯಾಂಕ್​ನಿಂದ ಮೇಲ್ಕಂಡ ಎಂಸಿಎಲ್​ಆರ್ ಪ್ರಕಾರ ಬಡ್ಡಿ ದರ ವಿಧಿಸಲಾಗುತ್ತದೆ. ಸಾಮಾನ್ಯವಾಗಿ ಎಂಸಿಎಲ್​ಆರ್ ಆಧಾರಿತ ಗೃಹ ಸಾಲವು ಒಂದು ವರ್ಷದ ಎಂಸಿಎಲ್​ಆರ್​ ದರವನ್ನು ಅವಲಂಬಿಸಿರುತ್ತದೆ.

ಆದ್ದರಿಂದ ಒಂದು ಉದಾಹರಣೆಗೆ ಹೇಳುವುದಾದರೆ, ನಿಮ್ಮ ಎಂಸಿಎಲ್​ಆರ್​ಗೆ ಜೋಡಣೆಯಾದ ಗೃಹ ಸಾಲದ ದಿನಾಂಕ ಆಗಸ್ಟ್​ನಲ್ಲಿ ಇದ್ದರೆ ಬಡ್ಡಿ ದರ ಏರಿಕೆ ಆಗಸ್ಟ್​ನಲ್ಲಿ ಆಗುತ್ತದೆ. ಅಲ್ಲಿಯ ತನಕ ಈಗಿನ ಇಎಂಐ ಅನ್ವಯ ಆಗುತ್ತದೆ. ಇದು ಎಕ್ಸ್​ಟರ್ನಲ್ ಬೆಂಚ್​ಮಾರ್ಕ್​ ಲಿಂಕ್ಡ್ ರೇಟ್​ನಂತೆ (EBLR) ಅಲ್ಲ. ಇದರಲ್ಲಿ ಕನಿಷ್ಠ ಪ್ರತಿ ಮೂರು ತಿಂಗಳಿಗೆ ಒಮ್ಮೆ ಬಡ್ಡಿ ಪರಿಶೀಲನೆ ಮಾಡಿ, ಪರಿಷ್ಕರಿಸಲಾಗುತ್ತದೆ. ಆದ್ದರಿಂದ ಇಬಿಎಲ್​ಆರ್​ (ರೆಪೋ ದರ ಮುಂತಾದವು) ಬದಲಾವಣೆಯು ನಿಮ್ಮ ಇಎಂಐ ಪಾವತಿಯಲ್ಲೂ ಬದಲಾವಣೆ ತರುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂ ಓದಿ:HDFC Bank: ನಿಮ್ಮ ಖಾತೆಗೆ 13 ಕೋಟಿ ಜಮೆ ಆಗಿದೆ; ಎಚ್​ಡಿಎಫ್​ಸಿ ಬ್ಯಾಂಕ್​​ನಿಂದ 100 ಖಾತೆಗೆ ತಪ್ಪಾಗಿ ಹೋಗಿದ್ದು 1300 ಕೋಟಿ ರೂ.