Elon Musk Twitter Deal: ಟ್ವಿಟ್ಟರ್​ ಜತೆ ಒಪ್ಪಂದ ಕೊನೆಗೊಳಿಸುವ ಬಗ್ಗೆ ಎಲಾನ್ ಮಸ್ಕ್ ಪತ್ರ ಹೇಳುವುದೇನು?

ಬಿಲಿಯನೇರ್ ಎಲಾನ್ ಮಸ್ಕ್ (Elon Musk) ಜೂನ್ 6ರಂದು ಹೇಳಿರುವಂತೆ, ಟ್ವಿಟ್ಟರ್ ಅನ್ನು ಸ್ವಾಧೀನಪಡಿಸಿಕೊಳ್ಳಲು ಒಪ್ಪಂದವನ್ನು ಅಂತ್ಯಗೊಳಿಸಲು “ಹಕ್ಕನ್ನು ಕಾಯ್ದಿರಿಸಿದ್ದಾರೆ”. ಏಕೆಂದರೆ ಅವರು ಸ್ಪ್ಯಾಮ್ ಖಾತೆಗಳಿಗೆ ಸಂಬಂಧಿಸಿದ ಡೇಟಾಗಾಗಿ ಟ್ವಿಟ್ಟರ್ “ಪ್ರತಿರೋಧಿಸುತ್ತದೆ ಮತ್ತು ತಡೆಯುತ್ತದೆ” ಎಂದು ಆರೋಪಿಸಿದ್ದಾರೆ. ಟೆಸ್ಲಾ ಮುಖ್ಯ ಕಾರ್ಯನಿರ್ವಾಹಕ ಕಳೆದ ತಿಂಗಳು ಮಾಡಿದ ಪ್ರಕಟಣೆಯಲ್ಲಿ, ಮೈಕ್ರೋಬ್ಲಾಗಿಂಗ್ ಸೈಟ್‌ ಟ್ವಿಟ್ಟರ್​ನಲ್ಲಿ ನಕಲಿ ಬಳಕೆದಾರರು ಒಟ್ಟು ಬಳಕೆದಾರರ ಸಂಖ್ಯೆಯಲ್ಲಿ ಶೇ 5ಕ್ಕಿಂತ ಕಡಿಮೆಯಿದ್ದಾರೆಯೇ ಎಂದು ಖಚಿತಪಡಿಸಿಕೊಳ್ಳುವವರೆಗೆ 44 ಶತಕೋಟಿ ಯುಎಸ್​ಡಿ ಸ್ವಾಧೀನ ಒಪ್ಪಂದವನ್ನು “ತಾತ್ಕಾಲಿಕ ತಡೆ”ಯಲ್ಲಿ ಇರಿಸುವುದಾಗಿ ಹೇಳಿದ್ದಾರೆ. . ಟ್ವಿಟ್ಟರ್ ತನ್ನ ಪ್ಲಾಟ್‌ಫಾರ್ಮ್‌ನಲ್ಲಿನ ಸ್ಪ್ಯಾಮ್ ಖಾತೆಗಳು ಅಂದಾಜು ಶೇ 5 ಎಂದು ಹೇಳಿಕೊಂಡಿದ್ದರೂ ಮಸ್ಕ್ ಅವರು ಆ ವಾದವನ್ನು ಪರಿಶೀಲಿಸಲು ಸ್ವತಂತ್ರ ವಿಶ್ಲೇಷಣೆಯನ್ನು ಕೋರಿದ್ದಾರೆ.

ಪ್ಲಾಟ್‌ಫಾರ್ಮ್‌ನಲ್ಲಿ ಸ್ಪ್ಯಾಮ್ ಮತ್ತು ನಕಲಿ ಖಾತೆಗಳ ಸ್ವತಂತ್ರ ಮೌಲ್ಯಮಾಪನಕ್ಕೆ ಅಗತ್ಯವಿರುವ “ಮಾಹಿತಿ ನೀಡಲು ಟ್ವಿಟ್ಟರ್ ನಿರಾಕರಿಸಿದೆ,” ಎಂದು ಮಸ್ಕ್ ಹೇಳಿದ್ದಾರೆ. “ಕಂಪೆನಿಯ ಸಡಿಲ ಪರೀಕ್ಷಾ ವಿಧಾನಗಳು ಸಮರ್ಪಕವಾಗಿವೆ ಎಂದು ಅವರು ನಂಬುವುದಿಲ್ಲ. ಆದ್ದರಿಂದ ತನ್ನದೇ ಆದ ವಿಶ್ಲೇಷಣೆಯನ್ನು ನಡೆಸಬೇಕು,” ಎಂದಿದ್ದಾರೆ. ಅವರು ಕೋರಿದ ಡೇಟಾವನ್ನು ತಡೆಹಿಡಿಯುವ ಮೂಲಕ ಕಂಪೆನಿಯು ವಿಲೀನ ಒಪ್ಪಂದದ ಅಡಿಯಲ್ಲಿ ಅವರ “ಮಾಹಿತಿ ಹಕ್ಕುಗಳನ್ನು” ಉಲ್ಲಂಘಿಸುತ್ತಿದೆ ಎಂದು ಮಸ್ಕ್ ಹೇಳಿದ್ದಾರೆ. “ಇದು ವಿಲೀನ ಒಪ್ಪಂದದ ಅಡಿಯಲ್ಲಿ ಟ್ವಿಟ್ಟರ್‌ನ ಕಟ್ಟುಪಾಡುಗಳ ಸ್ಪಷ್ಟವಾದ ಉಲ್ಲಂಘನೆಯಾಗಿದೆ ಮತ್ತು ವಹಿವಾಟನ್ನು ಪೂರ್ಣಗೊಳಿಸದಿರುವ ಅವರ ಹಕ್ಕು ಮತ್ತು ವಿಲೀನ ಒಪ್ಪಂದವನ್ನು ಅಂತ್ಯಗೊಳಿಸುವ ಅವರ ಹಕ್ಕು ಸೇರಿದಂತೆ ಎಲ್ಲ ಹಕ್ಕುಗಳನ್ನು ಮಸ್ಕ್ ಕಾಯ್ದಿರಿಸಿದ್ದಾರೆ,” ಎಂದು ಟೆಸ್ಲಾ ಮುಖ್ಯಸ್ಥರು ಹೊರಡಿಸಿದ ಪತ್ರದಲ್ಲಿ ಕಾನೂನು ಸಲಹೆಗಾರ ಗಮನಿಸಿದ್ದಾರೆ.

ಟ್ವಿಟ್ಟರ್‌ನ “ನಿರೀಕ್ಷಿತ ಮಾಲೀಕರು” ಆಗಿರುವ ಮಸ್ಕ್ ಅವರು ಕಂಪೆನಿಯ ವ್ಯವಹಾರವನ್ನು ತನ್ನ ಮಾಲೀಕತ್ವಕ್ಕೆ ಪರಿವರ್ತಿಸಲು ಮತ್ತು ಅವರ ವಹಿವಾಟಿನ ಹಣಕಾಸು ಸುಗಮಗೊಳಿಸಲು ತಯಾರಿ ಮಾಡಲು ವಿನಂತಿಸಿದ ಡೇಟಾಗೆ ಅರ್ಹರಾಗಿದ್ದಾರೆ ಎಂದು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ. “ಎರಡನ್ನೂ ಮಾಡಲು, ಅವರು ಟ್ವಿಟ್ಟರ್‌ನ ವ್ಯವಹಾರ ಮಾದರಿ ಮುಖ್ಯವಾದ ಅದರ ಸಕ್ರಿಯ ಬಳಕೆದಾರ ನೆಲೆಯ ಸಂಪೂರ್ಣ ಮತ್ತು ನಿಖರವಾದ ತಿಳಿವಳಿಕೆಯನ್ನು ಹೊಂದಿರಬೇಕು” ಎಂದು ಅದು ಹೇಳಿದೆ. ಈ ವರದಿ ಸಿದ್ಧವಾಗುವ ಹೊತ್ತಿಗೂ ಮಸ್ಕ್ ಹೇಳಿಕೆಗೆ ಟ್ವಿಟ್ಟರ್ ಇನ್ನೂ ಪ್ರತಿಕ್ರಿಯಿಸಿರಲಿಲ್ಲ.

ಟ್ವಿಟ್ಟರ್ ಸ್ವಾಧೀನಕ್ಕಾಗಿ ಎಚ್‌ಎಸ್‌ಆರ್ ಕಾಯ್ದೆಯಡಿ ಕಾಯುವ ಅವಧಿ ಮುಗಿದಿದೆ ಎಂದು ಕಂಪೆನಿ ಹೇಳಿದ ಸುಮಾರು ಒಂದು ವಾರದ ನಂತರ ಟೆಸ್ಲಾ ಸಿಇಒ ಈ ಪತ್ರವನ್ನು ನೀಡಿದ್ದಾರೆ. ಒಪ್ಪಂದದ ಪೂರ್ಣಗೊಳಿಸುವಿಕೆಯು ಈಗ ಟ್ವಿಟ್ಟರ್ ಷೇರುದಾರರ ಅನುಮೋದನೆ ಮತ್ತು ಅನ್ವಯವಾಗುವ ನಿಯಂತ್ರಕ ಅನುಮೋದನೆಗಳ ಸ್ವೀಕೃತಿ ಸೇರಿದಂತೆ ಉಳಿದಿರುವ ಸಾಂಪ್ರದಾಯಿಕ ಮುಕ್ತಾಯದ ಷರತ್ತುಗಳಿಗೆ ಒಳಪಟ್ಟಿರುತ್ತದೆ ಎಂದು ಕಂಪೆನಿಯು ಜೂನ್ 3ರಂದು ತಿಳಿಸಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂ ಓದಿ: ಎಲಾನ್ ಮಸ್ಕ್ ಅಧೀನದಲ್ಲಿ ಟ್ವಿಟ್ಟರ್ ಭವಿಷ್ಯ ಅಸ್ಪಷ್ಟ: ಸಿಇಒ ಪರಾಗ್ ಅಗರ್​ವಾಲ್ ಮಾತಿಗೆ ಹಲವು ಅರ್ಥ