IDFC First Bank Vaidyanathan: ಮನೆ ಖರೀದಿಸಲೆಂದು 2.43 ಕೋಟಿ ರೂ. ಮೌಲ್ಯದ ಷೇರು ಉಡುಗೊರೆ ನೀಡಿದ ವೈದ್ಯನಾಥನ್

ಮುಂಬೈ: ಐಡಿಎಫ್​ಸಿ ಬ್ಯಾಂಕ್​ನ ಕಾರ್ಯನಿರ್ವಾಹಕ ನಿರ್ದೇಶಕ ಮತ್ತು ಸಿಇಒ ಆದ ವಿ.ವೈದ್ಯನಾಥನ್ ಮತ್ತೆ ಸುದ್ದಿಯಲ್ಲಿದ್ದಾರೆ. ಅಂದಹಾಗೆ ಇವರು ಈ ಹಿಂದೆ ಯಾವಾಗ ಸುದ್ದಿಯಲ್ಲಿದ್ದರು ಅಂತ ಕೇಳ್ತೀರಾ? ತಮ್ಮ ಗಣಿತದ ಮೇಷ್ಟ್ರಿಗೆ 1 ಲಕ್ಷ ಷೇರುಗಳನ್ನು ಕೊಟ್ಟು ಭಾರೀ ಮೆಚ್ಚುಗೆಗೆ ಪಡೆದಿದ್ದ ವ್ಯಕ್ತಿ ಇವರೇ. ಈಗ ಕೂಡ ಮೂರು ಜನರಿಗೆ ತಲಾ 1.5 ಲಕ್ಷ ಐಡಿಎಫ್​ಸಿ ಫಸ್ಟ್​ ಬ್ಯಾಂಕ್​ ಷೇರುಗಳನ್ನು ಉಡುಗೊರೆಯಾಗಿ ಕೊಟ್ಟಿದ್ದಾರೆ. ಅಲ್ಲಿಗೆ ಒಟ್ಟು 4.5 ಲಕ್ಷ ಷೇರುಗಳಾದವು. ವೈದ್ಯನಾಥನ್ ಅವರಿಗೆ ಸೇರಿದ್ದ ಈ ಷೇರುಗಳನ್ನು ಎಂ.ಸೆಲ್ವರಾಜ್, ಅಲೆಕ್ಸಿಯಾ ಸೆಲ್ವರಾಜ್ ಮತ್ತು ಉತ್ಕರ್ಷ ತೋಡಂಕರ್ ಅವರಿಗೆ ಮನೆ ಖರೀದಿ ಮಾಡುವುದಕ್ಕಾಗಿ ಉಡುಗೊರೆಯಾಗಿ ನೀಡಿದ್ದಾರೆ ಎಂದು ಬ್ಯಾಂಕ್​ನಿಂದ ಸ್ಟಾಕ್​ ಎಕ್ಸ್​ಚೇಂಜ್​ಗಳಿಗೆ ಮಾಹಿತಿ ನೀಡಲಾಗಿದೆ. ಅಂದ ಹಾಗೆ, ಶುಕ್ರವಾರದ ದಿನದ ಕೊನೆಗೆ ಐಡಿಎಫ್​ಸಿ ಫಸ್ಟ್ ಬ್ಯಾಂಕ್ ಷೇರಿನ ಬೆಲೆ ಒಂದಕ್ಕೆ 54.15 ಇತ್ತು. ಅಂದರೆ 4.5 ಲಕ್ಷ ಷೇರಿನ ಬೆಲೆ 2.43 ಕೋಟಿ ರೂಪಾಯಿ ಆಯಿತು.

ಕಂಪೆನಿ ಕಾಯ್ದೆ ಅಥವಾ ಸೆಬಿ ನಿಯಮಾವಳಿ ಪ್ರಕಾರ, ಈ ಷೇರುಗಳನ್ನು ಪಡೆದವರು ವೈದ್ಯನಾಥನ್​ಗೆ ಹೇಗೂ ಸಂಬಂಧಪಟ್ಟವರಲ್ಲ. ಈ ಮೇಲ್ಕಂಡ ವಹಿವಾಟಿನಲ್ಲಿ ಯಾವುದೇ ಹಣಕಾಸು ಒಳಗೊಂಡಿಲ್ಲ ಎಂದು ಕಂಪೆನಿಯಿಂದ ಎಕ್ಸ್​ಚೇಂಜ್​ಗೆ ನೋಟಿಸ್​ ಮೂಲಕ ತಿಳಿಸಲಾಗಿದೆ. ಅಂದಹಾಗೆ ಮಾರ್ಚ್ ಕೊನೆ ಹೊತ್ತಿಗೆ ವೈದ್ಯನಾಥನ್​ ಅವರ ಬಳಿ ಇದ್ದ ಐಡಿಎಫ್​ಸಿ ಷೇರುಗಳು ಎಷ್ಟು ಗೊತ್ತಾ? 2,48,60,000 ಅಥವಾ 2.49 ಕೋಟಿ ಷೇರುಗಳು. ಐಇಎಫ್​ಸಿ ಫಸ್ಟ್ ಬ್ಯಾಂಕ್​ನಲ್ಲಿ ಶೇ 0.44ರಷ್ಟು ಪಾಲು ಇವರ ಬಳಿ ಇತ್ತು.

ಮೊದಲೇ ಹೇಳಿದ ಹಾಗೆ ವೈದ್ಯನಾಥನ್ ಷೇರನ್ನು ನೀಡುತ್ತಿರುವುದು ಇದು ಮೊದಲ ಸಲ ಏನಲ್ಲ. 2020ರ ಅಕ್ಟೋಬರ್​ನಲ್ಲಿ 30 ಲಕ್ಷ ಮೌಲ್ಯದ 1 ಲಕ್ಷ ಷೇರನ್ನು ತಮಗೆ ಗಣಿತ ಮೇಷ್ಟ್ರಾಗಿದ್ದ ಗುರುದಿಯಾಲ್ ಸೈನಿ ಅವರಿಗೆ ನೀಡಿದ್ದರು. ಅದಕ್ಕೆ ಕಾರಣ ಏನು ಗೊತ್ತಾ? ಬಿರ್ಲಾ ಇನ್​ಸ್ಟಿಟ್ಯೂಟ್ ಆಫ್​ ಟೆಕ್ನಾಲಜಿ (ಮೆಸ್ರಾ) ಪ್ರವೇಶ ಸಿಕ್ಕಿದ್ದ ವೈದ್ಯನಾಥನ್​ಗೆ ಸಂದರ್ಶನದಲ್ಲಿ ಭಾಗವಹಿಸಲು ಅಲ್ಲಿಗೆ ಹೋಗಬೇಕಿತ್ತು. ಆದರೆ ಆ ಕೌನ್ಸೆಲಿಂಗ್ ನಿಯಮಾವಳಿಗಳನ್ನು ಪೂರೈಸುವುದಕ್ಕೆ ಹಣವೇ ಇರಲಿಲ್ಲ. ಅಂಥ ಸಂದರ್ಭದಲ್ಲಿ ಸಂದರ್ಶನಕ್ಕೆ ಹೋಗಲು ಸೈನಿ 500 ರೂಪಾಯಿ ನೀಡಿದ್ದರಂತೆ.

2018ರ ನವೆಂಬರ್​ನಲ್ಲಿ ವೈದ್ಯನಾಥನ್ ಕ್ಯಾಪಿಟಲ್ ಫಸ್ಟ್ ಲಿಮಿಟೆಡ್ ಅಧ್ಯಕ್ಷರಾಗಿದ್ದಾಗ 20 ಕೋಟಿ ಮೌಲ್ಯದ 4.3 ಲಕ್ಷ ಷೇರುಗಳನ್ನು ಇಬ್ಬರು ಚಾಲಕಕರು, ಮೂವರು ಮನೆಕೆಲಸದವರು, ಕೆಲವು ಸಹೋದ್ಯೋಗಿಗಳು ಮತ್ತು ಕುಟುಂಬ ಸದಸ್ಯರಿಗೆ ನೀಡಿದ್ದರು. ಇದು ಐಡಿಎಫ್​ಸಿ ಬ್ಯಾಂಕ್​ ಜತೆ ಕ್ಯಾಪಿಟಲ್ ಫಸ್ಟ್ ವಿಲೀನ ಆಗುವ ಮುಂಚಿನ ಸಂಗತಿ.

ಇದನ್ನೂ ಓದಿ: ಮನೆ ಕೆಲಸದಾಕೆಗೆ ಹೊಸ ಮನೆಯೊಂದನ್ನು ಉಡುಗೊರೆಯಾಗಿ ನೀಡಿದ ನಟಿ ರೊಮಾನಾ

(IDFC First bank CEO V Vaidyanathan gifted 1.5 lakh each shares, total worth of Rs 2.43 crore to 3 people to buy house)