ಭಾರತ-ನ್ಯೂಜಿಲ್ಯಾಂಡ್ ವ್ಯಾಪಾರ ಒಪ್ಪಂದ ಜಾರಿ; ಭಾರತದ ಸರಕುಗಳಿಗೆ ಸುಂಕರಹಿತ ಪ್ರವೇಶ

ನವದೆಹಲಿ, ಅಕ್ಟೋಬರ್ 19: ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಮುಕ್ತ ವ್ಯಾಪಾರ ಒಪ್ಪಂದ (ಎಫ್​ಟಿಎ) ನಿನ್ನೆ ರಾತ್ರಿಯಿಂದಲೇ ಜಾರಿಗೆ ಬಂದಿದೆ. ಉಭಯ ರಾಷ್ಟ್ರಗಳಿಗೂ ವಿನ್ ವಿನ್ ಎನ್ನುವಂತಿರುವ ಈ ಒಪ್ಪಂದವು ದ್ವಿಪಕ್ಷೀಯ ವ್ಯಾಪಾರವನ್ನು 2-3 ಪಟ್ಟು ಹೆಚ್ಚಿಸುವ ನಿರೀಕ್ಷೆ ಇದೆ. ಭಾರತದ ಹೆಚ್ಚಿನ ಸರಕುಗಳ ಆಮದಿಗೆ ನ್ಯೂಜಿಲೆಂಡ್ ಮಾರುಕಟ್ಟೆಯಲ್ಲಿ ಶೂನ್ಯ ಸುಂಕ ಇರುತ್ತದೆ. ಭಾರತಕ್ಕೆ ಬರುವ ನ್ಯೂಜಿಲೆಂಡ್​ನ ಬಹಳಷ್ಟು ಸರಕುಗಳಿಗೆ ಸುಂಕ ರಿಯಾಯಿತಿ ಸಿಗುತ್ತದೆ.

ಈ ಒಪ್ಪಂದವು ಭಾರತದಲ್ಲಿ ನ್ಯೂಜಿಲೆಂಡ್​ನಿಂದ 20 ಬಿಲಿಯನ್ ಡಾಲರ್​ನಷ್ಟು ಹೂಡಿಕೆಗೆ ಎಡೆ ಮಾಡಿಕೊಡಲಿದೆ.

ಭಾರತ ಮತ್ತು ನ್ಯೂಜಿಲೆಂಡ್ ನಡುವೆ ಸರಕು ಮತ್ತು ಸೇವೆಗಳಿಂದ ಸೇರಿ ಒಟ್ಟು ವ್ಯಾಪಾರವು 2.4 ಬಿಲಿಯನ್ ಡಾಲರ್ನಷ್ಟು ಇದೆ. ಎಫ್​ಟಿಎಯಿಂದಾಗಿ ಈ ವ್ಯಾಪಾರವು 2030ರಷ್ಟರೊಳಗೆ 7 ಬಿಲಿಯನ್ ಡಾಲರ್ ಅಥವಾ 35,000 ಕೋಟಿ ರೂ ಆಗುವ ಗುರಿ ಇದೆ. ಇದು ಎರಡೂ ದೇಶಗಳ ಆರ್ಥಿಕತೆಗೆ ಉತ್ತಮ ಟಾನಿಕ್ ಆಗಬಹುದು.

ಇದನ್ನೂ ಓದಿ: ಜಿಯೋ ಪ್ಲಾಟ್​ಫಾರ್ಮ್ಸ್ ಐಪಿಒ; 8,100 ಕೋಟಿ ರೂ ಆಂಕರ್ ಬುಕ್​ಗೆ 2.5 ಲಕ್ಷ ಕೋಟಿ ರೂ ಬಿಡ್ಡಿಂಗ್

ನ್ಯೂಜಿಲೆಂಡ್​ನೊಂದಿಗಿನ ಎಫ್​ಟಿಎಯಿಂದ ಭಾರತಕ್ಕೆ ಭರಪೂರ ಲಾಭ

ನ್ಯೂಜಿಲೆಂಡ್ ಜೊತೆಗಿನ ಈಗಿನ ವ್ಯಾಪಾರದಲ್ಲಿ ಭಾರತ ಹೆಚ್ಚಿನ ಪಾಲು ಹೊಂದಿದೆ. ಭಾರತದಿಂದಲೇ ಹೆಚ್ಚು ಸರಕುಗಳು ನ್ಯೂಜಿಲೆಂಡ್​ಗೆ ರಫ್ತಾಗುತ್ತವೆ. ಆದರೆ, ನ್ಯೂಜಿಲೆಂಡ್​ನಿಂದ ಭಾರತ ಆಮದು ಮಾಡಿಕೊಳ್ಳುತ್ತಿರುವುದು ಕಡಿಮೆಯೇ. ಈಗ ಎಫ್​ಟಿಎ ಬಂದ ಬಳಿಕ ಭಾರತದ ಸರಕುಗಳಿಗೆ ಸುಂಕರಹಿತ ಪ್ರವೇಶ ಸಿಗುವುದರಿಂದ ರಫ್ತು ಇನ್ನಷ್ಟು ಹೆಚ್ಚಲಿದೆ.

ಜವಳಿ, ಉಡುಪು, ಲೆದರ್, ಪಾದರಕ್ಷೆ, ಕಾರ್ಪೆಟ್ ಉತ್ಪಾದನೆಯಂತಹ ಕಾರ್ಮಿಕ ಅಗತ್ಯತೆಯ ಸೆಕ್ಟರ್​ಗಳಿಗೆ ಹೆಚ್ಚಿನ ಅನುಕೂಲವಾಗಲಿದೆ. ಫಾರ್ಮಾ, ಪ್ಲಾಸ್ಟಿಕ್, ಎಂಜಿನಿಯರಿಂಗ್ ಸರಕು, ರಬ್ಬರ್, ಎಲೆಕ್ಟ್ರಿಕಲ್, ಕೆಮಿಕಲ್ಸ್, ಆಹಾರ ಸಂಸ್ಕರಣೆ ಇತ್ಯಾದಿ ಸರಕುಗಳಿಗೂ ಮಾರುಕಟ್ಟೆ ಅವಕಾಶ ಸುಲಭಗೊಳ್ಳಲಿದೆ.

ಇದನ್ನೂ ಓದಿ: ಪಿಎಂ ಕಿಸಾನ್ ಸ್ಕೀಮ್; 24ನೇ ಕಂತಿನ ಹಣ ನವೆಂಬರ್ ಮೊದಲ ವಾರದಲ್ಲಿ ಬಿಡುಗಡೆ ಸಾಧ್ಯತೆ

ನ್ಯೂಜಿಲೆಂಡ್​ನಿಂದ ಮರದ ದಿಮ್ಮಿಗಳು, ಕೋಕಿಂಗ್ ಕೋಲ್, ಮೆಟಲ್ ಸ್ಕ್ರಾಪ್​ಗಳು ಕಡಿಮೆ ಬೆಲೆಗೆ ಭಾರತಕ್ಕೆ ಪೂರೈಕೆಯಾಗಲಿವೆ. ಇದರಿಂದ ಭಾರತದ ಮ್ಯಾನುಫ್ಯಾಕ್ಚರಿಂಗ್ ಉದ್ಯಮಕ್ಕೆ ಅನುಕೂಲವಾಗುತ್ತದೆ.

ಇನ್ನು, ಸರ್ವಿಸ್ ಸೆಕ್ಟರ್​ಗಳಲ್ಲೂ ಭಾರತಕ್ಕೆ ಬಹಳಷ್ಟು ಲಾಭಗಳಿವೆ. 118 ಸರ್ವಿಸ್ ಸೆಕ್ಟರ್​ಗಳಲ್ಲಿ ನ್ಯೂಜಿಲೆಂಡ್​ನ ಮಾರುಕಟ್ಟೆಯೊಳಗೆ ಪ್ರವೇಶ ಸುಲಭಗೊಳ್ಳಲಿದೆ. 2024ರಲ್ಲಿ ಭಾರತದಿಂದ ನ್ಯೂಜಿಲೆಂಡ್​ಗೆ ಸರ್ವಿಸ್ ರಫ್ತು 634 ಮಿಲಿಯನ್ ಡಾಲರ್. ಎಫ್​ಟಿಎ ಬಂದ ಬಳಿಕ ಇದು ಬಹಳಷ್ಟು ಹೆಚ್ಚಾಗುವ ನಿರೀಕ್ಷೆ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ