ಮಾರಕ 31 ಪ್ರಿಡೇಟರ್ ಡ್ರೋನ್ ಖರೀದಿಗೆ ಅಮೆರಿಕದೊಂದಿಗೆ ಭಾರತ ಒಪ್ಪಂದ; ಅಲ್ಖೈದಾ ನಾಯಕನನ್ನು ಸಂಹರಿಸಿದ್ದು ಇದೇ ಡ್ರೋನ್
US manufactured MQ predator drones for India: ಅಮೆರಿಕದ ಜನರಲ್ ಅಟಾಮಿಕ್ಸ್ ತಯಾರಿಸುವ ಎಂಕ್ಯೂ ರೀಪರ್ ಡ್ರೋನ್ಗಳನ್ನು ಭಾರತ ಪಡೆಯಲಿದೆ. 3.5 ಬಿಲಿಯನ್ ಡಾಲರ್ ಮೊತ್ತಕ್ಕೆ ಭಾರತ ಮತ್ತು ಅಮೆರಿಕ ನಡುವೆ ಒಪ್ಪಂದವಾಗಿದೆ. 31 ಎಂಕ್ಯೂ-9ಬಿ ಪ್ರಿಡೇಟರ್ ಡ್ರೋನ್ಗಳನ್ನು ಜನರಲ್ ಅಟಾಮಿಕ್ಸ್ ತಯಾರಿಸಿ ಕೊಡಲಿದೆ. ಚೆನ್ನೈನಲ್ಲಿ ಎಂಆರ್ಒ ಸೌಲಭ್ಯವನ್ನೂ ಸ್ಥಾಪಿಸಲಿದೆ. ಟೆಕ್ನಾಲಜಿ ಟ್ರಾನ್ಸ್ಫರ್ ಮಾಡಲೂ ಮಾತುಕತೆ ನಡೆಯುತ್ತಿದೆ.
Updated on: Oct 16, 2024 | 12:12 PM
ನವದೆಹಲಿ, ಅಕ್ಟೋಬರ್ 16: ಅಮೆರಿಕದ ಶಕ್ತಿಶಾಲಿ ಎಂಕ್ಯು-9ಬಿ ಪ್ರಿಡೇಟರ್ ಡ್ರೋನ್ಗಳನ್ನು ಭಾರತ ಪಡೆಯಲಿದೆ. 31 ಪ್ರಿಡೇಟರ್ ಡ್ರೋನ್ಗಳಿಗೆ ಭಾರತದ ಮಿಲಿಟರಿ ಆರ್ಡರ್ ನೀಡಿದೆ. ಭಾರತ ಮತ್ತು ಅಮೆರಿಕ ನಡುವೆ ಈ ಒಪ್ಪಂದ ಅಂತಿಮಗೊಂಡಿದೆ. ಅಮೆರಿಕದ ಜನರಲ್ ಅಟಾಮಿಕ್ಸ್ ಸಂಸ್ಥೆ ಈ ಮಾರಕ ಡ್ರೋನ್ಗಳನ್ನು ತಯಾರಿಸಲಿದೆ. ಭಾರತದಲ್ಲಿ ಈ ಡ್ರೋನ್ಗಳಿಗಾಗಿ ಎಂಆರ್ಒ ಕೇಂದ್ರವನ್ನು ನಿರ್ಮಿಸಲಾಗುತ್ತದೆ. ಒಪ್ಪಂದದಲ್ಲಿ ಇದನ್ನೂ ಒಳಗೊಳ್ಳಲಾಗಿದೆ. ವರದಿ ಪ್ರಕಾರ, 3.5 ಬಿಲಿಯನ್ ಡಾಲರ್ ಅಥವಾ 32,000 ಕೋಟಿ ರೂ ಮೊತ್ತದ ಒಪ್ಪಂದವಾಗಿದೆ.
ಜನರಲ್ ಅಟಾಮಿಕ್ಸ್ ಸಂಸ್ಥೆ ಈ ಡ್ರೋನ್ಗಳನ್ನು ತಯಾರಿಸುವುದಷ್ಟೇ ಅಲ್ಲದೇ, ಚೆನ್ನೈನಲ್ಲಿ ಎಂಆರ್ಒ ಕೇಂದ್ರದ ಸ್ಥಾಪನೆಗೂ ನೆರವಾಗಲಿದೆ. ಇದೇ ವೇಳೆ, ಈ ಡ್ರೋನ್ ತಂತ್ರಜ್ಞಾನದ ವರ್ಗಾವಣೆಯೂ ಆಗಬೇಕೆಂದು ಭಾರತ ಕೇಳಿಕೊಂಡಿದೆ. ಈ ಸಂಬಂಧ ಮಾತುಕತೆ ನಡೆಯುತ್ತಿದ್ದು, ಅದರ ಒಪ್ಪಂದವೂ ಆಗುವ ಸಾಧ್ಯತೆ ಇದೆ.
ಇದನ್ನೂ ಓದಿ: ಭಾರತ ವಿಶ್ವದ 5G ಪವರ್ಹೌಸ್ ಆಗಿ ಹೊರಹೊಮ್ಮಿದೆ; ಐಎಂಸಿಯಲ್ಲಿ ಪ್ರಧಾನಿ ಮೋದಿ
ಅಲ್ಖೈದಾ ನಾಯಕನನ್ನು ಕೊಲ್ಲಲು ನೆರವಾಗಿದ್ದ ಡ್ರೋನ್
ಜನರಲ್ ಅಟಾಮಿಕ್ಸ್ ಸಂಸ್ಥೆ ಎಂಕ್ಯೂ ‘ರೀಪರ್’ ಡ್ರೋನ್ ಬಹಳ ಶಕ್ತಿಶಾಲಿಯಾಗಿದೆ. ಭಾರತಕ್ಕೆ ಸಿಗಲಿರುವ ಎಂಕ್ಯೂ-9ಬಿ ಪ್ರಿಡೇಟರ್ ಡ್ರೋನ್ ಈ ರೀಪರ್ ಡ್ರೋನ್ನ ವೇರಿಯೆಂಟ್ ಆಗಿದೆ. 2022ರ ಜುಲೈನಲ್ಲಿ ಅಫ್ಘಾನಿಸ್ತಾನದ ಕಾಬೂಲ್ನಲ್ಲಿ ಅಲ್-ಖೈದಾ ನಾಯಕ ಆಯ್ಮನ್ ಅಲ್ ಜವಾಹಿರಿ ಎಂಬಾತನನ್ನು ಕೊಲ್ಲಲು ಈ ಡ್ರೋನ್ ಅನ್ನು ಬಳಸಲಾಗಿತ್ತು. ಈ ಡ್ರೋನ್ನಲ್ಲಿ ಇದ್ದ ಹೆಲ್ಫೈರ್ ಮಿಸೈಲ್ನಿಂದ ಹೊಡೆದು ಜವಾಹಿರಿಯನ್ನು ಕೊಲ್ಲಲಾಗಿತ್ತು.
ಎಂಕ್ಯೂ-9ಬಿ ಪ್ರಿಡೇಟರ್ ಡ್ರೋನ್ಗಳಲ್ಲಿ ಎರಡು ವೇರಿಯೆಂಟ್ಗಳಿಗೆ ಭಾರತ ಆರ್ಡರ್ ಕೊಟ್ಟಿದೆ. ಸೀಗಾರ್ಡಿಯನ್ ವೇರಿಯೆಂಟ್ನ 15 ಪ್ರಿಡೇಟರ್ ಡ್ರೋನ್ಗಳು ಭಾರತೀಯ ನೌಕಾಪಡೆಗೆ ನಿಯೋಜನೆಯಾಗಲಿವೆ. ಎಂಟೆಂಟು ಸ್ಕೈಗಾರ್ಡಿಯನ್ ಡ್ರೋನ್ಗಳು ಭಾರತೀಯ ಸೇನೆ ಮತ್ತು ವಾಯುಪಡೆಗೆ ಹೋಗಲಿವೆ.
ಇದನ್ನೂ ಓದಿ: ಕರುನಾಡ ಹೆಮ್ಮೆ; ಭಾರತದ ಮೊದಲ ಬುಲೆಟ್ ಟ್ರೈನು ನಿರ್ಮಾಣ ಬೆಂಗಳೂರಿನಲ್ಲಿ; ಬೆಮೆಲ್ ಸಂಸ್ಥೆಗೆ ಗುತ್ತಿಗೆ
ಈ ಪ್ರಿಡೇಟರ್ ಡ್ರೋನ್ಗಳ ವೈಶಿಷ್ಟ್ಯವೇನು?
ಎಂಕ್ಯು-9ಬಿ ಪ್ರಿಡೇಟರ್ ಡ್ರೋನ್ಗಳು ಬಹಳ ಎತ್ತರದಲ್ಲಿ, ಹೆಚ್ಚ ಅವಧಿ ಓಡಬಲ್ಲ ಶಕ್ತಿ ಹೊಂದಿರುತ್ತವೆ. 2,155 ಕಿಲೋ ಪೇಲೋಡ್ ಅಥವಾ ಬಾಹ್ಯವಸ್ತುಗಳ ತೂಕ ಹೊತ್ತು ಇದು 40,000 ಅಡಿ ಎತ್ತರದಲ್ಲಿ 40 ಗಂಟೆ ಕಾಲ ನಿರಂತರವಾಗಿ ಓಡಬಲ್ಲುದು. ಈ ಡ್ರೋನ್ನಲ್ಲಿ ನಾಲ್ಕು ಹೆಲ್ಫೈರ್ ಕ್ಷಿಪಣಿಗಳು ಮತ್ತು 450 ಕಿಲೋ ಬಾಂಬ್ಗಳನ್ನು ಇರಿಸಬಹುದು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
