ಚಿಪ್ ಡಿಸೈನ್​ನಲ್ಲಿ ಕರ್ನಾಟಕ ಹಾಗೂ ದಕ್ಷಿಣ ರಾಜ್ಯಗಳೇ ಮುಂದು; ಸಿಲಿಕಾನ್ ಸಿಟಿ ಮಾತ್ರವಲ್ಲ, ಸೆಮಿಕಂಡಕ್ಟರ್ ಹಬ್ ಕೂಡ ಆದ ಬೆಂಗಳೂರು

ನವದೆಹಲಿ, ಸೆಪ್ಟೆಂಬರ್ 7: ಚಿಪ್​ಇನ್ ಸೆಂಟರ್ ಬೆಂಬಲಿತ ಸೆಮಿಕಂಡಕ್ಟರ್ ಡಿಸೈನ್ ಮತ್ತು ಅಭಿವೃದ್ಧಿಯಲ್ಲಿ ಕರ್ನಾಟಕ ದೇಶದಲ್ಲೇ ನಂಬರ್ ಒನ್ ಎನಿಸಿದೆ. ದೇಶದ ಟಾಪ್-3ಯಲ್ಲಿ ಮೂರೂ ರಾಜ್ಯಗಳು ದಕ್ಷಿಣ ಭಾರತದವೇ ಆಗಿರುವುದು ಗಮನಾರ್ಹ. ತಮಿಳುನಾಡು ಮತ್ತು ತೆಲಂಗಾಣ ಈ ಟಾಪ್-3ಯಲ್ಲಿ ಇವೆ. ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ (MeitY) ‘ಡಿಜಿಟಲ್ ಇಂಡಿಯಾ’ ಹಾಗೂ ‘ಚಿಪ್ಸ್ ಟು ಸ್ಟಾರ್ಟ್‌ಅಪ್ (C2S)’ ಯೋಜನೆಯಡಿಯಲ್ಲಿ ಸ್ಥಾಪಿಸಲಾದ ChipIN ಸೆಂಟರ್​ನ ಬೆಂಬಲದಲ್ಲಿ ನಡೆಯುತ್ತಿರುವ ಸೆಮಿಕಂಡಕ್ಟರ್ ವಿನ್ಯಾಸ ಹಾಗೂ ಅಭಿವೃದ್ಧಿಯಲ್ಲಿ ಯಾವ ರಾಜ್ಯಗಳು ಹೆಚ್ಚು ಸಮರ್ಥವಾಗಿ ಕೆಲಸ ಮಾಡಿವೆ ಎನ್ನುವ ದತ್ತಾಂಶವನ್ನು ಎಲೆಕ್ಟ್ರಾನಿಕ್ಸ್ ಸಚಿವಾಲಯ ಪ್ರಕಟಿಸಿದೆ.

ಕೇಂದ್ರ ಸರ್ಕಾರ ಪ್ರಕಟಿಸಿರುವ ಅಧಿಕೃತ ದತ್ತಾಂಶದ ಪ್ರಕಾರ, ಚಿಪ್ ವಿನ್ಯಾಸ ಸಂಸ್ಥೆಗಳ ಬೆಂಬಲ, ಟೇಪ್-ಔಟ್‌ಗಳು (Tape-outs) ಹಾಗೂ EDA ಟೂಲ್ ಬಳಕೆ – ಹೀಗೆ ಎಲ್ಲಾ ಪ್ರಮುಖ ಸೂಚ್ಯಂಕಗಳಲ್ಲಿ ಕರ್ನಾಟಕವು ಅಗ್ರಸ್ಥಾನದಲ್ಲಿದೆ.

ಚಿಪ್ ಡಿಸೈನ್​ನಲ್ಲಿ ಪ್ರಮುಖ ರಾಜ್ಯಗಳ ಸಾಧನೆಯ ವಿವರ

ಕರ್ನಾಟಕ (ಪ್ರಥಮ ಸ್ಥಾನ): ಇಲ್ಲಿ ಚಿಪ್​ಇನ್ ಸೆಂಟರ್​ನ ಬೆಂಬಲ ಪಡೆದ ಸಂಸ್ಥೆಗಳ ಸಂಖ್ಯೆ 81 ಇದೆ. ಇವುಗಳಲ್ಲಿ ಟೇಪ್​ಔಟ್​ಗಳನ್ನು ಬಳಸಿರುವ ಸಂಸ್ಥೆಗಳು 73 ಇವೆ. ಇಡಿಎ ಟೂಲ್​ಗಳು 88 ಲಕ್ಷ ಗಂಟೆಗಳಷ್ಟಾಗಿದೆ (Lakh hours). ಟೇಪ್​ಔಟ್​ಗಳ ವಿಚಾರದಲ್ಲಂತೂ ಬೇರಾವ ರಾಜ್ಯಗಳು ಕರ್ನಾಟಕದ ಅರ್ಧಕ್ಕೂ ಬಂದಿಲ್ಲ.

ಇದನ್ನೂ ಓದಿ: ‘ಭಾರತದಲ್ಲಿ ಹೂಡಿಕೆ ಮಾಡಿ’: ಕನ್ನಡಿಗರು ಮತ್ತು ಭಾರತೀಯರಿಗೆ ಹೆಚ್​ಡಿ ಕುಮಾರಸ್ವಾಮಿ ಕರೆ

ಎರಡನೇ ಸ್ಥಾನದಲ್ಲಿರುವ ತಮಿಳುನಾಡಿನಲ್ಲಿ 79 ಸಂಸ್ಥೆಗಳು ಚಿಪ್​ಇನ್ ಸೆಂಟರ್​ನ ಬೆಂಬಲ ಪಡೆದಿವೆ. ಟೇಪೌಟ್​ಗಳ ಹಂತಕ್ಕೆ ಬಂದಿರುವುದು 33. ಇಡಿಎ ಟೂಲ್ ಬಳಕೆ 49 ಲಕ್ಷ ಗಂಟೆಗಳಷ್ಟಿದೆ.

ಟಾಪ್-10 ಪಟ್ಟಿಯಲ್ಲಿರುವ ರಾಜ್ಯಗಳಿವು

1. ಕರ್ನಾಟಕ
2. ತಮಿಳುನಾಡು
3. ತೆಲಂಗಾಣ
4. ಮಹಾರಾಷ್ಟ್ರ
5. ಉತ್ತರಪ್ರದೇಶ
6. ಮಧ್ಯಪ್ರದೇಶ
7. ಕೇರಳ
8. ಪಶ್ಚಿಮ ಬಂಗಾಳ
9. ಒಡಿಶಾ
10. ಪಂಜಾಬ್

ದೇಶದ ಒಟ್ಟು ಸೆಮಿಕಂಡಕ್ಟರ್ ವಿನ್ಯಾಸ ಮತ್ತು ಇಡಿಎ (EDA – Electronic Design Automation) ಉಪಕರಣಗಳ ಬಳಕೆಯಲ್ಲಿ ಸಿಲಿಕಾನ್ ಸಿಟಿ ಬೆಂಗಳೂರು ಹಾಗೂ ಕರ್ನಾಟಕದ ಪಾಲು ಸಿಂಹಪಾಲಾಗಿದೆ.

ಪಿಐಬಿ ಬೆಂಗಳೂರಿನ ಎಕ್ಸ್ ಪೋಸ್ಟ್

ಇದನ್ನೂ ಓದಿ: ‘ಗುರಿ’ ಮುಟ್ಟಲು ಒಂದು ಸಂಘಟನೆಗೆ ಅಸಾಧ್ಯ, ಖಾಸಗಿ ಉದ್ಯಮವೂ ಬೇಕು: ಇಸ್ರೋ ಉದ್ಯೋಗಿಗಳ ಅಸಮಾಧಾನಕ್ಕೆ ಪವನ್ ಗೋಯೆಂಕಾ ಉತ್ತರ

ಟೇಪ್-ಔಟ್ ಎಂದರೇನು?: ಐಸಿ, ಅಥವಾ ಇಂಟಿಗ್ರೇಟೆಡ್ ಸರ್ಕ್ಯೂಟ್​ಗಳ ಡಿಸೈನ್ ಪ್ರಕ್ರಿಯೆಯ ಕೊನೆಯ ಹಂತವೇ ಟೇಪ್​ಔಟ್. ಪೂರ್ಣಗೊಂಡ ಲೇಔಟ್ ಫೈಲ್​ಗಳನ್ನು ಫೌಂಡ್ರಿಗೆ ಕಳುಹಿಸಲಾಗುತ್ತದೆ. ಫೌಂಡ್ರಿಯಲ್ಲಿ ಈ ಅಂತಿಮ ಡಿಸೈನ್ ಅನ್ನು ಬಳಸಿ ಚಿಪ್ ತಯಾರಿಸಲಾಗುತ್ತದೆ.

ಚಿಪ್​ಇನ್​ನ ಪಾತ್ರವೇನು?: ‘ChipIN’ ಕೇಂದ್ರವು ದೇಶದ ಸ್ಟಾರ್ಟ್‌ಅಪ್‌ಗಳು, ಎಂಎಸ್‌ಎಂಇ ಹಾಗೂ ಸಂಶೋಧನಾ ಸಂಸ್ಥೆಗಳಿಗೆ ಕ್ಲೌಡ್ ಆಧಾರಿತ ಅತ್ಯಾಧುನಿಕ ಚಿಪ್ ಡಿಸೈನ್ ಪರಿಕರಗಳನ್ನು ಒದಗಿಸುತ್ತಿದ್ದು, ಭಾರತವನ್ನು ಜಾಗತಿಕ ಚಿಪ್ ಡಿಸೈನ್ ರಂಗದಲ್ಲಿ ಮುಂಚೂಣಿಗೆ ತರಲು ಶ್ರಮಿಸುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ