Aadhaar: ಆಧಾರ್ ಕಾರ್ಡ್ನಲ್ಲಿ ನಿಮ್ಮ ಫೋಟೋ ಬದಲಿಸಬೇಕಾ? ಇಲ್ಲಿದೆ ವಿಧಾನ
How To Change Pic In Aadhaar Card?: ಆಧಾರ್ ಕಾರ್ಡ್ನಲ್ಲಿ 12 ಅಂಕಿಗಳ ಗುರುತಿನ ಸಂಖ್ಯೆ ಜೊತೆಗೆ ವ್ಯಕ್ತಿಯ ಹೆಸರು, ವಿಳಾಸ, ವಯಸ್ಸು, ಬಯೋಮೆಟ್ರಿಕ್ ಇತ್ಯಾದಿ ಮಾಹಿತಿ ಇರುತ್ತದೆ. ಕೆಲವನ್ನು ನಾವು ಬದಲಿಸುವ ಅವಕಾಶ ಇರುತ್ತದೆ.
ಆಧಾರ್ ಕಾರ್ಡ್ ಭಾರತದಲ್ಲಿ ಈಗ ಬಹಳ ಅಗತ್ಯ ಇರುವ ದಾಖಲೆಯಾಗಿದೆ. ಇದು ವಿಶ್ವದ ಅತಿದೊಡ್ಡ ಬಯೊಮೆಟ್ರಿಕ್ ಆಧಾರಿತ ಐಡಿ (Biometric based ID System) ವ್ಯವಸ್ಥೆಯಾಗಿದೆ. ಭಾರತೀಯ ನಾಗರಿಕರಿಗೆ ನೀಡಲಾಗುವ ಆಧಾರ್ ಕಾರ್ಡ್ನಲ್ಲಿ (Aadhaar Card) 12 ಅಂಕಿಗಳ ವಿಶೇಷ ಗುರುತಿನ ಸಂಖ್ಯೆ ಇರುತ್ತದೆ. ಈ ಆಧಾರ್ನಲ್ಲಿ ವ್ಯಕ್ತಿಯ ಫಿಂಗರ್ ಪ್ರಿಂಟ್, ಐರಿಸ್ ಸ್ಕ್ಯಾನ್ ಇತ್ಯಾದಿ ಬಯೋಮೆಟ್ರಿಕ್ ಮಾಹಿತಿ (Biometric Data) ಇರುತ್ತದೆ. ಹೀಗಾಗಿ, ಆಧಾರ್ ಅನ್ನು ಸುಲಭಕ್ಕೆ ನಕಲಿ ಮಾಡಲು ಸಾಧ್ಯವಿಲ್ಲ ಎನ್ನಲಾಗುತ್ತದೆ. ಈ ಆಧಾರ್ ಕಾರ್ಡ್ ಬಹಳ ಕಡೆ ಉಪಯೋಗಕ್ಕೆ ಬರುತ್ತದೆ. ವ್ಯಕ್ತಿಯ ಗುರುತು, ಅಡ್ರೆಸ್ ಪ್ರೂಫ್ ಇತ್ಯಾದಿಗೆ ಇದು ಅಧಿಕೃತ ದಾಖಲೆಯಾಗಿದೆ. ಸರ್ಕಾರದ ಸಬ್ಸಿಡಿ ಇತ್ಯಾದಿ ಯೋಜನೆಗಳಿಗೆ ಆಧಾರ್ ಅತ್ಯಗತ್ಯದ ದಾಖಲೆಯಾಗಿದೆ. ಬ್ಯಾಂಕ್ ಖಾತೆ ಮಾಡಿಸಲು, ಹೊಸ ಸಿಮ್ ಪಡೆಯಲು, ಹೀಗೆ ನಾನಾ ಕಾರ್ಯಗಳಿಗೆ ಕೆವೈಸಿಯಲ್ಲಿ ಆಧಾರ್ ಕಾರ್ಡ್ ಮಾಹಿತಿ ಪಡೆಯಲಾಗುತ್ತದೆ.
ಆಧಾರ್ ಕಾರ್ಡ್ನಲ್ಲಿ ವ್ಯಕ್ತಿಯ ಫೋಟೋದಿಂದ ಹಿಡಿದು ಆತನ ಹೆಸರು, ಜನ್ಮದಿನಾಂಕ, ತಂದೆ ಹೆಸರು, ಮನೆ ವಿಳಾಸದ ಮಾಹಿತಿ ಒಳಗೊಳ್ಳಲಾಗಿರುತ್ತದೆ. ಆಧಾರ್ ಕಾರ್ಡ್ ಜೊತೆ ವ್ಯಕ್ತಿಯ ಮೊಬೈಲ್ ನಂಬರ್ ಅನ್ನೂ ಲಿಂಕ್ ಮಾಡುವ ಆಯ್ಕೆಯೂ ಇರುತ್ತದೆ.
ಇದನ್ನೂ ಓದಿ: SBI vs Post Office FD: ಪೋಸ್ಟ್ ಆಫೀಸ್ಗಿಂತ ಉತ್ತಮವಾಗಿದೆಯಾ ಎಸ್ಬಿಐ ಎಫ್ಡಿ ಯೋಜನೆ? ಇಲ್ಲಿದೆ ಒಂದು ಹೋಲಿಕೆ
ಕೆಲವೊಮ್ಮೆ ನಾವು ವಾಸಸ್ಥಳ ಬದಲಿಸಿದಾಗ ಆಧಾರ್ನಲ್ಲಿಯೂ ವಿಳಾಸ ಬದಲಾಯಿಸಬಯಸುತ್ತೇವೆ. ಹಲವು ವರ್ಷಗಳ ಹಿಂದೆ ತೆಗೆಸಿಕೊಳ್ಳಲಾದ ಫೋಟೋ ಈಗ ನೋಡಲು ಮುಜುಗರವಾಗಬಹುದಾದ್ದರಿಂದ ಫೋಟೋ ಬದಲಿಸಲು ಸಾಧ್ಯವಾ? ಆಧಾರ್ನಲ್ಲಿರುವ ನಮ್ಮ ಕೆಲ ಮಾಹಿತಿಯನ್ನು ಬದಲಾಯಿಸಲು ಸಾಧ್ಯ.
ಆಧಾರ್ ಕಾರ್ಡ್ನಲ್ಲಿ ನಿಮ್ಮ ಫೋಟೋ ಬದಲಾಯಿಸುವುದು ಹೇಗೆ?
ಯಾವುದಾದರೂ ಆಧಾರ್ ಎನ್ರೋಲ್ಮೆಂಟ್ ಸೆಂಟರ್ಗೆ ಹೋದರೆ ಅಲ್ಲಿ ಆಧಾರ್ ಕಾರ್ಡ್ನಲ್ಲಿರುವ ನಿಮ್ಮ ಫೋಟೋ ಬದಲಾಯಿಸಲು ಸಾಧ್ಯ. ನಿಮ್ಮ ಮನೆ ಸಮೀಪ ಆಧಾರ್ ಸೆಂಟರ್ ಎಲ್ಲಿದೆ, ಅದರ ವಿಳಾಸ ಏನು ಎಂಬುದನ್ನು ಆನ್ಲೈನ್ನಲ್ಲಿ ಈ ವೆಬ್ಸೈಟ್ ಮೂಲಕ ತಿಳಿದುಕೊಳ್ಳಬಹುದು.
- ಆಧಾರ್ ಎನ್ರೋಲ್ಮೆಂಟ್ ಸೆಂಟರ್ನಲ್ಲಿ ಈ ಕಾರ್ಯಕ್ಕೆ ಒಂದು ಅರ್ಜಿ ಸಿಗುತ್ತದೆ. ಅದನ್ನು ಭರ್ತಿ ಮಾಡಿ ಅಲ್ಲಿ ಸಲ್ಲಿಸಬೇಕು.
- ಅಲ್ಲಿರುವ ಆಪರೇಟರ್ ನಿಮ್ಮ ಬಯೋಮೆಟ್ರಿಕ್ ಮಾಹಿತಿ ಪರಿಶೀಲಿಸುತ್ತಾರೆ.
- ನಂತರ ನಿಮ್ಮ ಫೋಟೋವನ್ನು ಅಲ್ಲಿಯೇ ಪಡೆದು ಆಧಾರ್ಗೆ ಸೇರಿಸಲಾಗುತ್ತದೆ.
- ಇದಾದ ಬಳಿಕ ಯುಆರ್ಎನ್ ಸಂಖ್ಯೆ ಹೊಂದಿರುವ ಅಕ್ನಾಲಜ್ಮೆಂಟ್ ಸ್ಲಿಪ್ ಕೊಡಲಾಗುತ್ತದೆ.
ಇದನ್ನೂ ಓದಿ: Aadhaar Update: ಸರ್ಕಾರೇತರ ಸಂಘ ಸಂಸ್ಥೆಗಳಿಗೂ ಆಧಾರ್ ದೃಢೀಕರಣ ಅವಕಾಶ: ಸರ್ಕಾರ ಪ್ರಸ್ತಾವ
ಈಗ ನೀವು ಯುಐಡಿಎಐನ ವೆಬ್ಸೈಟ್ನಲ್ಲಿ ನಿಮ್ಮ ಆಧಾರ್ ಕಾರ್ಡ್ನ ಡಿಜಿಟಲ್ ಪ್ರತಿಯನ್ನು ಡೌನ್ಲೋಡ್ ಮಾಡಿಕೊಳ್ಳಬಹುದು. ಅದರಲ್ಲಿ ನಿಮ್ಮ ಅಪ್ಡೇಟೆಡ್ ಫೋಟೋ ಇರುವುದನ್ನು ಖಾತ್ರಿಪಡಿಸಿಕೊಳ್ಳಿ.
ಆಧಾರ್ ಕಾರ್ಡ್ನಲ್ಲಿ ಮಾಹಿತಿ ಅಪ್ಡೇಟ್ ಮಾಡುವ ಇತರ ವಿಧಾನಗಳು:
ಆಧಾರ್ ಕಾರ್ಡ್ನಲ್ಲಿ ನೀವು ಫೋಟೋ ಅಪ್ಡೇಟ್ ಮಾಡಲು ಆಧಾರ್ ಎನ್ರೋಲ್ಮೆಂಟ್ ಸೆಂಟರ್ಗೆ ಹೋಗಬೇಕಾಗುತ್ತದೆ. ಈ ಆಧಾರ್ ಕೇಂದ್ರದಲ್ಲಿ ಹೆಸರು, ವಿಳಾಸ ಇತ್ಯಾದಿಗಳ ಬದಲಾವಣೆಗಳನ್ನೂ ಮಾಡಿಸಬಹುದು.
ಹಾಗೆಯೆ, ಮೈ ಆಧಾರ್ ಅ್ಯಪ್ ಮೂಲಕ ಆನ್ಲೈನ್ನಲ್ಲೂ ಕೆಲ ಮಾಹಿತಿ ಅಪ್ಡೇಟ್ ಮಾಡುವ ಅವಕಾಶ ಇರುತ್ತದೆ.
ಇನ್ನಷ್ಟು ವ್ಯವಹಾರ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 1:44 pm, Tue, 25 April 23
