ITR Verification: ಅಸೆಸ್​ಮೆಂಟ್ ವರ್ಷ 2020-21ಕ್ಕೆ ಐಟಿಆರ್ ದೃಢೀಕರಿಸಲು ಕೊನೆ ದಿನಾಂಕ ಪರಿಶೀಲಿಸಿ

ಈ ಹಿಂದಿನ ಅಸೆಸ್​ಮೆಂಟ್​ ವರ್ಷ, ಅಂದರೆ AY 2020-21 ಆದಾಯ ತೆರಿಗೆ ರಿಟರ್ನ್ಸ್ (ITR) ಇನ್ನೂ ದೃಢೀಕರಣ ಮಾಡಿಲ್ಲ ಅಂತಾದಲ್ಲಿ ಅದಕ್ಕೆ ಕೊನೆ ಅವಕಾಶವೊಂದಿದೆ. ಅಸೆಸ್​ಮೆಂಟ್​ ವರ್ಷ 2020-21ಕ್ಕೆ ಆದಾಯ ತೆರಿಗೆ ರಿಟರ್ನ್ ದೃಢೀಕರಣಕ್ಕೆ 2022ರ ಫೆಬ್ರವರಿ 28ನೇ ತಾರೀಕು ಕೊನೆ ದಿನವಾಗಿದೆ. ಕಳೆದ ವರ್ಷ ಫೈಲ್​ ಮಾಡಿದ್ದರಲ್ಲಿ ದೃಢೀಕರಣಕ್ಕೆ ಬಾಕಿಯಿರುವ ಎಲ್ಲ ಆದಾಯ ತೆರಿಗೆ ರಿಟರ್ನ್ಸ್, ಒಂದು ಐಟಿಆರ್-V ಸಲ್ಲಿಸಿಲ್ಲ ಎಂಬ ಕಾರಣಕ್ಕೋ ಅಥವಾ ಇ- ವೆರಿಫಿಕೇಷನ್ ಆಗಿಲ್ಲ ಅಂತಲೋ ಹಾಗೇ ಉಳಿದುಕೊಂಡಿದ್ದಲ್ಲಿ ಫೆಬ್ರವರಿ 28, 2022ರೊಳಗೆ ಮಾಡಬಹುದು. ಡಿಸೆಂಬರ್ 28, 2021ರಂದು ಹೊರಡಿಸಿದ ಸುತ್ತೋಲೆಯಿಂದ ಇದು ಗೊತ್ತಾಗಿದೆ. ಇನ್ನೂ ಮುಂದುವರಿದು, ಒಂದು ಸಲ ಐಟಿಆರ್ ಖಚಿತಗೊಂಡಲ್ಲಿ ಆದಾಯ ತೆರಿಗೆ ಇಲಾಖೆಯು ಈ ತೆರಿಗೆ ರಿಟರ್ನ್ಸ್ ಅನ್ನು ಜೂನ್ 30, 2022ರೊಳಗೆ ಪೂರ್ಣಗೊಳಿಸುತ್ತದೆ.

ವೈಯಕ್ತಿಕ ತೆರಿಗೆ ಪಾವತಿದಾರರು ಫೈಲ್​ ಮಾಡಿದ 120 ದಿನದೊಳಗೆ ಐಟಿಆರ್ ವ್ಯಾಲಿಡೇಟ್ ಮಾಡಬೇಕು ಎಂಬುದು ಆದಾಯ ತೆರಿಗೆ ನಿಯಮ. ಒಂದು ವೇಳೆ ವೇಳೆ ಐಟಿಆರ್​ ದೃಢೀಕರಣ ಸಾಧ್ಯವಿಲ್ಲ ಅಂತಾದಲ್ಲಿ, ಅವು “ದೋಷಪೂರಿತ ರಿಟರ್ನ್” ಎಂದಾಗುತ್ತದೆ. ಅಂಥ ಐಟಿಆರ್​ ದೃಢೀಕರಣ ಆಗುವ ತನಕ ತೆರಿಗೆ ಇಲಾಖೆಯು ಸ್ವೀಕರಿಸುವುದಿಲ್ಲ. ಆ ವರ್ಷ ತೆರಿಗೆ ರಿಟರ್ನ್ ಫೈಲ್ ಮಾಡಿಲ್ಲ ಅಂತಲೇ ಭಾವಿಸಲಾಗುತ್ತದೆ. ಆದಾಯ ತೆರಿಗೆ ಇತ್ತೀಚಿನ ಟ್ವೀಟ್​ನಲ್ಲಿ, ಅಸೆಸ್​ಮೆಂಟ್ ವರ್ಷ 2020-21 ವರ್ಷಕ್ಕೆ ಐಟಿಆರ್​ ದೃಢೀಕರಣಕ್ಕೆ ಇರುವ ಕೊನೆ ಅವಕಾಶವನ್ನು ತಪ್ಪಿಸಿಕೊಳ್ಳಬೇಡಿ. ಒಂದು ವೇಳೆ ದೃಢೀಕರಣ ಆಗಲಿಲ್ಲ ಅಂದರೆ ಐಟಿಆರ್​ ಫೈಲಿಂಗ್ ಅಪೂರ್ಣ. ಅಸೆಸ್​ಮೆಂಟ್​ ವರ್ಷ 2020-21 ದೃಢೀಕರಣಕ್ಕೆ ಫೆಬ್ರವರಿ 28, 2022 ಕೊನೆ ದಿನ ಎಂದು ಹೇಳಲಾಗಿದೆ.

ಐಟಿಆರ್​ ದೃಢೀಕರಣ ಮಾಡುವುದು ಹೇಗೆ?

ಐಟಿಆರ್​ ದೃಢೀಕರಣಕ್ಕೆ ಆರು ವಿವಿಧ ವಿಧಾನಗಳಿವೆ. ಅವುಗಳೆಂದರೆ:

– ಆಧಾರ್ ಒಟಿಪಿ ಬಳಸಿ,

– ನೆಟ್​ ಬ್ಯಾಂಕಿಂಗ್​ ಬಳಸಿ ಇ-ಫೈಲಿಂಗ್ ಖಾತೆಗೆ ಲಾಗ್​ ಇನ್ ಆಗುವ ಮೂಲಕ,

– ಇವಿಸಿ ಆಧಾರಿತ ಬ್ಯಾಂಕ್​ ಖಾತೆ ಸಂಖ್ಯೆಯನ್ನು ಬಳಸಿ,

– ಡಿಮ್ಯಾಟ್​ ಖಾತೆ ಸಂಖ್ಯೆ ಆಧಾರಿತ ಇವಿಸಿಯನ್ನು ಬಳಸಿ,

– ಬ್ಯಾಂಕ್ ಎಟಿಎಂ ಆಧಾರಿತ ಇವಿಸಿ ಬಳಸಿ, ಮತ್ತು

– ಐಟಿಆರ್​- V ಭೌತಿಕ ನಕಲಿಗೆ ಸಹಿ ಮಾಡಿ, ಬೆಂಗಳೂರಿನ ಸಿಪಿಸಿಗೆ ಕಳುಹಿಸಬಹುದು.

ಇದನ್ನೂ ಓದಿ: Income Tax Returns: ಆದಾಯ ತೆರಿಗೆ ಬಾರದಿದ್ದರೂ ಐಟಿಆರ್ ಫೈಲ್ ಮಾಡುವುದರಿಂದ ಸಿಗುವ 6 ಅನುಕೂಲಗಳಿವು