ಅಪೋಲೋ ಹಿಂದಿಕ್ಕಿ ಭಾರತದ ಅತಿದೊಡ್ಡ ಹಾಸ್ಪಿಟಲ್ ಚೈನ್ ಆಗುವತ್ತ ಮಣಿಪಾಲ್ ಹಾಸ್ಪಿಟಲ್ಸ್

ಬೆಂಗಳೂರು, ಏಪ್ರಿಲ್ 9: ದಕ್ಷಿಣ ಕನ್ನಡ ಜಿಲ್ಲೆಯ ಮಣಿಪಾಲ ಜಾಗತಿಕವಾಗಿ ಖ್ಯಾತವಾಗಿರುವ ಬ್ರ್ಯಾಂಡ್. ಶಿಕ್ಷಣ ಕೇಂದ್ರವಾಗಿ ಹೆಸರುವಾಸಿಯಾಗಿದೆ. ಭಾರತದ ಮೊದಲ ಬ್ಯಾಂಕುಗಳೂ ಕೂಡ ಇಲ್ಲಿಯೇ ಶುರುವಾಗಿದ್ದು. ಇಲ್ಲಿಯ ಆಸ್ಪತ್ರೆ ಇವತ್ತು ಭಾರತದ ಅತಿದೊಡ್ಡ ಹಾಸ್ಪಿಟಲ್ ಚೈನ್ ಎನಿಸುವ ಮಟ್ಟಕ್ಕೆ ಬೆಳೆಯುತ್ತಿದೆ. ಮಣಿಪಾಲ ಹೆಲ್ತ್ ಎಂಟರ್ಪ್ರೈಸಸ್ (Manipal Health Enterprises) ಮತ್ತು ಮೆಡಿಕಾ ಸಿನರ್ಜೀ ಸಂಸ್ಥೆಗಳು ವಿಲೀನಗೊಳ್ಳುವ ಪ್ರಕ್ರಿಯೆ ಬಹುತೇಕ ಮುಕ್ತಾಯಗೊಂಡಿದೆ. ವಿಲೀನವಾದ ಬಳಿಕ ಮಣಿಪಾಲ್ ಹಾಸ್ಪಿಟಲ್ಸ್ ದೇಶಾದ್ಯಂತ 10,700 ಬೆಡ್​ಗಳನ್ನು ಹೊಂದಿರಲಿದೆ. ಇದೊಂದಿಗೆ ದೇಶದ ಅತಿದೊಡ್ಡ ಹಾಸ್ಪಿಟಲ್ ಚೈನ್ ಎನಿಸಲಿದೆ.

ಸದ್ಯ ಅಪೋಲೋ ಹಾಸ್ಪಿಟಲ್ಸ್ ಸದ್ಯ ದೇಶದ ಅತಿದೊಡ್ಡ ಹಾಸ್ಪಿಟಲ್ ಚೈನ್ ಆಗಿದೆ. ಇದು ಹೊಂದಿರುವ ಬೆಡ್​ಗಳ ಸಂಖ್ಯೆ 10,103 ಇದೆ. ಮಣಿಪಾಲ್ ಹಾಸ್ಪಿಟಲ್ಸ್ ಬಳಿ ಸದ್ಯ 33 ಆಸ್ಪತ್ರೆಗಳಿಂದ 9,500 ಬೆಡ್​ಗಳಿವೆ. ಈಗ ಮೆಡಿಕಾ ಬಳಿ 1,200 ಬೆಡ್​ಗಳಿವೆ. ಇದರೊಂದಿಗೆ ಮಣಿಪಾಲ್ ಆಸ್ಪತ್ರೆ ಹೊಂದಿರುವ ಬೆಡ್ ಸಂಖ್ಯೆ 10,700 ಆಗಲಿದೆ. ಮೆಡಿಕಾ ಸಿನರ್ಜಿ ಸಂಸ್ಥೆ ಕೋಲ್ಕತಾ, ಸಿಲಿಗುರಿ ಮತ್ತು ರಾಂಚಿಯಲ್ಲಿ ಆಸ್ಪತ್ರೆಗಳನ್ನು ಹೊಂದಿದೆ. ಕೋಲ್ಕತಾದಲ್ಲಿ 600 ಬೆಡ್​ಗಳಿರುವ ಆಸ್ಪತ್ರೆ ಇದೆ. ಪಶ್ಚಿಮ ಬಂಗಾಳದ ಅಸಾನ್ಸೋಲ್​ನಲ್ಲಿ ಕ್ಯಾನ್ಸರ್ ಆಸ್ಪತ್ರೆ ನಿರ್ಮಿಸುತ್ತಿದೆ.

ಇದನ್ನೂ ಓದಿ: ಡಾಲರ್​ಗೂ ಚಿನ್ನಕ್ಕೂ ಎಣ್ಣೆ ಶೀಗೆಕಾಯಿ ಸಂಬಂಧ; ಆದರೂ ಡಾಲರ್ ಜೊತೆಜೊತೆಗೆ ಚಿನ್ನದ ಬೆಲೆಯೂ ಏರುತ್ತಿರೋದ್ಯಾಕೆ?

ಸಿಂಗಾಪುರದ ಟೆಮಾಸೆಕ್ ಕಂಪನಿ ಈ ಎರಡೂ ಸಂಸ್ಥೆಗಳ ಹೆಚ್ಚಿನ ಪಾಲು ಹೊಂದಿದೆ. ಹೀಗಾಗಿ, ಮಣಿಪಾಲ್ ಮತ್ತು ಮೆಡಿಕಾ ವಿಲೀನ ಪ್ರಕ್ರಿಯೆ ಸುಗಮವಾಗಿದೆ. ಟೆಮಾಸೆಕ್ ಒಂದು ವರ್ಷದ ಹಿಂದೆ ಮಣಿಪಾಲ್ ಹಾಸ್ಪಿಟಲ್​ನಲ್ಲಿ ಬಹುಪಾಲು ಷೇರನ್ನು ಖರೀದಿಸಿತ್ತು. ಶೇ. 18ರಷ್ಟಿದ್ದ ಅದರ ಷೇರುಪಾಲು ಶೇ. 59ಕ್ಕೆ ಏರಿತು. ಇದಾದ ಬಳಿಕ ಬೆಂಗಳೂರಿನ ವಿಕ್ರಮ್ ಹಾಸ್ಟಿಟಲ್, ಇಮಾಮಿ ಗ್ರೂಪ್ ಮಾಲಿಕತ್ವದ ಎಎಂಆರ್​ಐ ಹಾಸ್ಪಿಟಲ್ಸ್ ಅನ್ನು ಮಣಿಪಾಲ್ ಆಸ್ಪತ್ರೆ ಖರೀದಿಸಿತ್ತು. ಎಎಂಆರ್​ಐ ಹಾಸ್ಪಿಟಲ್ಸ್ 1,200 ಬೆಡ್​ಗಳನ್ನು ಹೊಂದಿದ್ದು, 2,300 ಕೋಟಿ ರೂಗೆ ಖರೀದಿಸಲಾಯಿತು. 2021ರಲ್ಲಿ ಕೊಲಂಬಿಯಾ ಏಷ್ಯಾದ 11 ಆಸ್ಪತ್ರೆಗಳನ್ನು ಖರೀದಿಸಿತ್ತು.

ಮಣಿಪಾಲ್ ಹಾಸ್ಪಿಟಲ್ಸ್ ಬೆಂಗಳೂರಿನಲ್ಲಿ ಮೂರು ಆಸ್ಪತ್ರೆಗಳನ್ನು ನಿರ್ಮಿಸುತ್ತಿದ್ದು ಒಟ್ಟು ಬೆಡ್ ಸಂಖ್ಯೆ 750 ಇರಲಿದೆ. ಛತ್ತೀಸ್​ಗಡದ ರಾಯಪುರ್​ನಲ್ಲಿ 350 ಹಾಸಿಗೆಗಳ ಒಂದು ಆಸ್ಪತ್ರೆ ನಿರ್ಮಿಸುತ್ತಿದೆ.

ಇದನ್ನೂ ಓದಿ: ಚೀನಾ, ವಿಯೆಟ್ನಾಂದಲ್ಲಿಯಂತೆ ಭಾರತದಲ್ಲೂ ಉದ್ಯೋಗಿಗಳಿಗೆ ಮನೆ ಕಟ್ಟಿಕೊಡಲಿದೆ ಆ್ಯಪಲ್

ಏಳು ದಶಕಗಳ ಇತಿಹಾಸ ಇರುವ ಮಣಿಪಾಲ್ ಹಾಸ್ಟಿಟಲ್ಸ್

ಮಣಪಾಲ್ ಆಸ್ಪತ್ರೆ ಶುರುವಾಗಿದ್ದು 1953ರಲ್ಲಿ. ವೈದ್ಯರಾಗಿದ್ದ ತೋನ್ಸೆ ಮಾಧವ ಅನಂತ ಪೈ ಅಥವಾ ಟಿಎಂಎ ಪೈ ಈ ಆಸ್ಪತ್ರೆ ಸಂಸ್ಥಾಪಕರು. ಇದು ಮೂಲತಃ ಕಸ್ತೂರಬಾ ಮೆಡಿಕಲ್ ಕಾಲೇಜಾಗಿತ್ತು. ಇವತ್ತು ಮಣಿಪಾಲ ಹಾಸ್ಪಿಟಲ್ಸ್ ಸಂಸ್ಥೆ ಅಗಾಧವಾಗಿ ಬೆಳೆಯಲು ಕಾರಣವಾಗಿರುವುದು ರಂಜನ್ ಪೈ. ಇವರು ಮಣಿಪಾಲ್ ಗ್ರೂಪ್ ಛೇರ್ಮನ್ ಆಗಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ