2023ರ ವರ್ಷದಲ್ಲಿ ಭಾರತದ ಮೊದಲ ಯೂನಿಕಾರ್ನ್ ಸಂಸ್ಥೆ ಎನಿಸಿದ ಝೆಪ್ಟೋ; ಯೂನಿಕಾರ್ನ್ ಅಂದರೇನು?
Unicorn Company Zepto: ಆನ್ಲೈನ್ ಗ್ರಾಸರಿ ಡೆಲಿವರಿ ಪ್ಲಾಟ್ಫಾರ್ಮ್ ಝೆಪ್ಟೋ ಇದೀಗ 1.4 ಬಿಲಿಯನ್ ಡಾಲರ್ ಮೌಲ್ಯದೊಂದಿಗೆ ಯೂನಿಕಾರ್ನ್ ಕಂಪನಿಗಳ ಪಟ್ಟಿ ಸೇರಿದೆ. ಈ ವರ್ಷ ಸಾಕಷ್ಟು ಫಂಡಿಂಗ್ ಕಡಿಮೆಯಾಗಿದ್ದರೂ ಝೆಪ್ಟೋ ಸಾಕಷ್ಟು ಹೂಡಿಕೆಗಳನ್ನು ಆಕರ್ಷಿಸಿದೆ.
Updated on: Aug 25, 2023 | 5:50 PM
ನವದೆಹಲಿ, ಆಗಸ್ಟ್ 25: ಭಾರತದ ಆನ್ಲೈನ್ ದಿನಸಿ ಮಾರಾಟ (Grocery sales) ಕಂಪನಿಯಾದ ಝೆಪ್ಟೋ ಈಗ ಯೂನಿಕಾರ್ನ್ ಸಂಸ್ಥೆಗಳ ಪಟ್ಟಿಗೆ ಸೇರಿದೆ. ಸ್ಟೆಪ್ಸ್ಟೋನ್ ಗ್ರೂಪ್ ಸೇರಿದಂತೆ ವಿವಿಧ ಕಂಪನಿಗಳ ಮೂಲಕ ಝೆಪ್ಟೋ (Zepto) 200 ಮಿಲಿಯನ್ ಡಾಲರ್ (ಸುಮಾರು 1,650 ಕೋಟಿ ರೂ) ಫಂಡಿಂಗ್ ಪಡೆದಿದೆ. ಇದರೊಂದಿಗೆ ಝೆಪ್ಟೋ ಕಂಪನಿಯ ಮೌಲ್ಯ 1.4 ಬಿಲಿಯನ್ ಡಾಲರ್ಗೆ ಏರಿದೆ. ಅಂದರೆ, 11,500 ಕೋಟಿ ರೂಗೂ ಹೆಚ್ಚು ಮೌಲ್ಯದ ಕಂಪನಿಯಾಗಿದೆ ಝೆಪ್ಟೋ.
ಇತ್ತೀಚಿನ ಕೆಲ ತಿಂಗಳುಗಳಿಂದ ಭಾರತೀಯ ಸ್ಟಾರ್ಟಪ್ಗಳಿಗೆ ಫಂಡಿಂಗ್ ಸಿಗುವುದೇ ಕಷ್ಟ ಎನ್ನುವ ವಾತಾವರಣದಲ್ಲೂ ಝೆಪ್ಟೋ ಉತ್ತಮ ಎನಿಸುವಷ್ಟು ಪ್ರಮಾಣದಲ್ಲಿ ಹೂಡಿಕೆ ಪಡೆದಿದೆ. ಕುತೂಹಲ ಎಂದರೆ 2023ರ ವರ್ಷದಲ್ಲಿ ಯೂನಿಕಾರ್ನ್ ಮಟ್ಟ ತಲುಪಿದ ಮೊದಲ ಭಾರತೀಯ ಕಂಪನಿ ಝೆಪ್ಟೋ.
2021ರಲ್ಲಿ ಸ್ಥಾಪನೆಯಾದ ಝೆಪ್ಟೋ ಮುಂದಿನ 2-3 ವರ್ಷದಲ್ಲಿ ಷೇರು ಮಾರುಕಟ್ಟೆಗೆ ಲಿಸ್ಟ್ ಆಗುವ ಇರಾದೆಯಲ್ಲಿದೆ.
ಯೂನಿಕಾರ್ನ್ ಕಂಪನಿ ಎಂದರೇನು?
ಪಬ್ಲಿಕ್ ಲಿಸ್ಟೆಡ್ ಆಗಿಲ್ಲದ, ಇನ್ನೂ ಖಾಸಗಿ ಒಡೆತನದಲ್ಲಿರುವ ಹಾಗೂ 1 ಬಿಲಿಯನ್ ಡಾಲರ್ ಮೌಲ್ಯ ಹೊಂದಿರುವ ಸ್ಟಾರ್ಟಪ್ ಕಂಪನಿಯನ್ನು ಯೂನಿಕಾರ್ನ್ ಎಂದು ಕರೆಯಲಾಗುತ್ತದೆ. ಇದೇ ಕಂಪನಿ ಐಪಿಒಗೆ ತೆರೆದು ಷೇರುಮಾರುಕಟ್ಟೆಯಲ್ಲಿ ಲಿಸ್ಟ್ ಆದರೆ ಅದನ್ನು ಯೂನಿಕಾರ್ನ್ ಎಂದು ಪರಿಣಿಸಲಾಗುವುದಿಲ್ಲ.
ಭಾರತದಲ್ಲಿ ಸದ್ಯ 100ಕ್ಕೂ ಸ್ಟಾರ್ಟಪ್ಗಳಿವೆ. ಈಗ ಬಹಳಷ್ಟು ಸ್ಟಾರ್ಟಪ್ಗಳು ಬಹಳ ದೊಡ್ಡ ಬಂಡವಾಳ ಪಡೆದು ಅವಸಾನಗೊಳ್ಳುತ್ತಿರುವ ಪ್ರಕರಣಗಳು ಹೆಚ್ಚಿವೆ. ಹೀಗಾಗಿ, ಫಂಡಿಂಗ್ ವಿಚಾರದಲ್ಲಿ ಹೆಚ್ಚಿನ ಇನ್ವೆಸ್ಟರ್ಗಳು ಹಿಂದೆ ಮುಂದೆ ನೋಡುವ ಪರಿಸ್ಥಿತಿ ಇದೆ. 2023ರಲ್ಲಿ ಝೆಪ್ಟೋ ಮಾತ್ರವೇ ಯೂನಿಕಾರ್ನ್ ಎನಿಸಿರುವುದು ಇದಕ್ಕೆ ಸಾಕ್ಷಿ. 2023ರ ಮೊದಲ ಆರು ತಿಂಗಳಲ್ಲಿ ಭಾರತದ ಸ್ಟಾರ್ಟಪ್ಗಳಿಗೆ ಸಿಕ್ಕ ಬಂಡವಾಳ ಕೇವಲ 5.48 ಡಾಲರ್ ಮಾತ್ರ. ಅದೇ ಹಿಂದಿನ ವರ್ಷದಲ್ಲಿ ಇದೇ ಅವಧಿಯಲ್ಲಿ 19.5 ಬಿಲಿಯನ್ ಡಾಲರ್ ಬಂಡವಾಳ ಸಿಕ್ಕಿತ್ತು.
ಇದನ್ನೂ ಓದಿ: ಬೆಟ್ಟಿಂಗ್ ಜಾಹೀರಾತು ನೇರವಾಗಿಯಾಗಲೀ, ಪರೋಕ್ಷವಾಗಿಯಾಗಲೀ ಪ್ರಸಾರ ಮಾಡದಂತೆ ಮಾಧ್ಯಮ ಸಂಸ್ಥೆಗಳಿಗೆ ಕೇಂದ್ರದಿಂದ ಸೂಚನೆ
ಮುಂಬೈನಲ್ಲಿ ಮುಖ್ಯಕಚೇರಿ ಹೊಂದಿರುವ ಝೆಪ್ಟೋ 6,000 ದಿನಸಿ ವಸ್ತುಗಳನ್ನು ಆನ್ಲೈನ್ನಲ್ಲಿ ಬುಕ್ ಮಾಡಿಕೊಂಡು ಗ್ರಾಹಕರಿಗೆ 10 ನಿಮಿಷದಲ್ಲಿ ತಲುಪಿಸುತ್ತದೆ. ದೇಶಾದ್ಯಂತ ಝೆಪ್ಟೋದ ಡೆಲಿವರಿ ಹಬ್ಗಳಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
