Home Loan Interest Rates: ಗೃಹ ಸಾಲ ಪಡೆಯಲಿದ್ದೀರಾ? ಈ 5 ಬ್ಯಾಂಕ್​ಗಳಲ್ಲಿ ಬಡ್ಡಿ ದರ ಕಡಿಮೆ

ಹಣದುಬ್ಬರ ಏರಿಕೆ ತಡೆಯುವ ನಿಟ್ಟಿನಲ್ಲಿ ರಿಸರ್ವ್ ಬ್ಯಾಂಕ್ ಆಫ್​ ಇಂಡಿಯಾ (RBI) ಮೇ ತಿಂಗಳ ನಂತರ ಸೆಪ್ಟೆಂಬರ್ 30ರ ಅವಧಿಯಲ್ಲಿ ರೆಪೊ ದರವನ್ನು (Repo Rate) 190 ಮೂಲಾಂಶದಷ್ಟು ಹೆಚ್ಚಿಸಿದೆ. ಪರಿಣಾಮವಾಗಿ ವಿವಿಧ ಬ್ಯಾಂಕ್​ಗಳು ಸಾಲದ ಮೇಲಿನ ಬಡ್ಡಿ ದರವನ್ನೂ (Interest Rate) ಹೆಚ್ಚಿಸಿವೆ. ಇದರಿಂದಾಗಿ ಗೃಹ ಸಾಲದ ಮೇಲಿನ ಎಂಸಿಎಲ್‌ಆರ್ ಅಥವಾ ಕನಿಷ್ಠ ಬಡ್ಡಿ ದರಗಳೂ ಹೆಚ್ಚಾಗಿವೆ. ರೆಪೊ ದರದೊಂದಿಗೆ ಸಂಯೋಜನೆಗೊಂಡಿರುವ ಸಾಲದ ದರವೂ (Repo Rate Linked Lending Rate) ಹೆಚ್ಚಾಗಿದೆ. ಈ ಮಾದರಿಯ ಸಾಲದ ದರವು ಆರ್​ಬಿಐ ರೆಪೊ ದರಕ್ಕೆ ಅನುಗುಣವಾಗಿ ವ್ಯತ್ಯಾಸವಾಗುತ್ತದೆ. ಆರ್​ಆರ್​ಎಲ್​ಎಲ್​ಆರ್​​ನಲ್ಲಿ ರೆಪೊ ದರ, ಬ್ಯಾಂಕ್ ವಿಧಿಸುವ ಮಾರ್ಜಿನ್ ಶುಲ್ಕ ಸೇರಿಸಿ ಬಡ್ಡಿ ದರ ಲೆಕ್ಕ ಹಾಕಲಾಗುತ್ತದೆ. ಇಂಥ ಬಡ್ಡಿದರಗಳಲ್ಲಿ ಸಾಲಗಾರರಿಗೆ ಹೆಚ್ಚು ಏಕರೂಪತೆ ಮತ್ತು ಪಾರದರ್ಶಕತೆ ದೊರೆಯುತ್ತದೆ.

ಗೃಹ ಸಾಲದ ಅಸಲು ಮೊತ್ತವನ್ನು ಬಳಸಿಕೊಂಡದ್ದಕ್ಕೆ ಸಾಲಗಾರನಿಗೆ ಬ್ಯಾಂಕ್​ಗಳು ವಿಧಿಸುವ ಶುಲ್ಕವೇ ಬಡ್ಡಿ ದರ. ಗೃಹ ಸಾಲದ ಬಡ್ಡಿ ದರಕ್ಕೆ ಅನುಗುಣವಾಗಿ ತಿಂಗಳ ಇಎಂಐ ಮೊತ್ತವೂ ನಿರ್ಧರಿಸಲ್ಪಡುತ್ತದೆ.

ಈ ಐದು ಬ್ಯಾಂಕ್​ಗಳಲ್ಲಿ ಗೃಹ ಸಾಲಕ್ಕೆ ಕಡಿಮೆ ಬಡ್ಡಿ

• ಕರೂರ್ ವೈಶ್ಯ ಬ್ಯಾಂಕ್​ನಲ್ಲಿ ಗೃಹ ಸಾಲಕ್ಕೆ ಆರ್​ಎಲ್​ಎಲ್​ಆರ್ ಅಥವಾ ರೆಪೊ ದರದೊಂದಿಗೆ ಸಂಯೋಜನೆಗೊಂಡಿರುವ ಬಡ್ಡಿ ದರ ಶೇಕಡಾ 9ರಷ್ಟಿದೆ. ಕನಿಷ್ಠ ಬಡ್ಡಿ ದರ ಶೇಕಡಾ 8.05 ಇದ್ದರೆ ಗರಿಷ್ಠ ಬಡ್ಡಿ ದರ ಶೇಕಡಾ 10.25 ಇದೆ.
• ಎಚ್​ಡಿಎಫ್​ಸಿ ಬ್ಯಾಂಕ್​ನಲ್ಲಿ ಗೃಹ ಸಾಲಕ್ಕೆ ಆರ್​ಎಲ್​ಎಲ್​ಆರ್ ಬಡ್ಡಿ ದರ ಶೇಕಡಾ 8.1ರಷ್ಟಿದೆ. ಕನಿಷ್ಠ ಬಡ್ಡಿ ದರ ಶೇಕಡಾ 8.1 ಇದ್ದರೆ ಗರಿಷ್ಠ ಬಡ್ಡಿ ದರ ಶೇಕಡಾ 8.9 ಇದೆ.
• ಕರ್ಣಾಟಕ ಬ್ಯಾಂಕ್​ನಲ್ಲಿ ಗೃಹ ಸಾಲಕ್ಕೆ ಆರ್​ಎಲ್​ಎಲ್​ಆರ್ ಬಡ್ಡಿ ದರ ಶೇಕಡಾ 7.95ರಷ್ಟಿದೆ. ಕನಿಷ್ಠ ಬಡ್ಡಿ ದರ ಶೇಕಡಾ 8.24 ಇದ್ದರೆ ಗರಿಷ್ಠ ಬಡ್ಡಿ ದರ ಶೇಕಡಾ 9.59 ಇದೆ.
• ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾದಲ್ಲಿ ಗೃಹ ಸಾಲಕ್ಕೆ ಆರ್​ಎಲ್​ಎಲ್​ಆರ್ ಬಡ್ಡಿ ದರ ಶೇಕಡಾ 8.7ರಷ್ಟಿದೆ. ಕನಿಷ್ಠ ಬಡ್ಡಿ ದರ ಶೇಕಡಾ 8.25 ಇದ್ದರೆ ಗರಿಷ್ಠ ಬಡ್ಡಿ ದರ ಶೇಕಡಾ 10.1 ಇದೆ.
• ಬ್ಯಾಂಕ್ ಆಫ್ ಮಹಾರಾಷ್ಟ್ರದಲ್ಲಿ ಗೃಹ ಸಾಲಕ್ಕೆ ಆರ್​ಎಲ್​ಎಲ್​ಆರ್ ಬಡ್ಡಿ ದರ ಶೇಕಡಾ 8.7ರಷ್ಟಿದೆ. ಕನಿಷ್ಠ ಬಡ್ಡಿ ದರ ಶೇಕಡಾ 8.3 ಇದ್ದರೆ ಗರಿಷ್ಠ ಬಡ್ಡಿ ದರ ಶೇಕಡಾ 9.7 ಇದೆ.

ಇದನ್ನೂ ಓದಿ: ITR Refund Status: ಐಟಿಆರ್ ರಿಫಂಡ್ ಸ್ಥಿತಿಗತಿ ಆನ್​ಲೈನ್​ನಲ್ಲಿ ಪರಿಶೀಲಿಸಲು ಹೀಗೆ ಮಾಡಿ

ಬಡ್ಡಿ ದರದ ಮೇಲೆ ಪರಿಣಾಮ ಬೀರುವ ಅಂಶಗಳು…

ಗೃಹ ಸಾಲದ ಬಡ್ಡಿ ದರ ನಿರ್ಧರಿಸುವಲ್ಲಿ ಹಲವು ಅಂಶಗಳು ಪರಿಣಾಮ ಬೀರುತ್ತವೆ. ಎಚ್​ಡಿಎಫ್​ಸಿ ಬ್ಯಾಂಕ್​ ವೆಬ್​ಸೈಟ್​ನಲ್ಲಿ ನೀಡಿರುವ ಮಾಹಿತಿ ಪ್ರಕಾರ ಬಡ್ಡಿ ದರದ ವಿಧಾನ, ಬೆಂಚ್​ಮಾರ್ಕ್ ಲೆಂಡಿಂಗ್ ರೇಟ್, ಸಾಲದ ಮೌಲ್ಯದ ಅನುಪಾತ, ಸಾಲಗಾರನ ಹಣಕಾಸಿನ ವಿವರ, ಮರುಪಾವತಿ ಅವಧಿ, ಆಸ್ತಿ ಇರುವ ಸ್ಥಳ ಹಾಗೂ ಸಾಲ ನೀಡುವ ಬ್ಯಾಂಕ್​​ ಈ ಎಲ್ಲ ಅಂಶಗಳು ಬಡ್ಡಿ ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ