ಡಾಲರ್ ಎದುರು ಪುಟಿದೆದ್ದ ಭಾರತೀಯ ಕರೆನ್ಸಿ; ಒಮ್ಮೆಗೇ 47 ಪೈಸೆ ಜಂಪ್; 3 ತಿಂಗಳ ಗರಿಷ್ಠ ಮೌಲ್ಯ

ಮುಂಬೈ, ಸೆಪ್ಟೆಂಬರ್ 3: ಭಾರತದ ರುಪಾಯಿ ಕರೆನ್ಸಿ ಉತ್ತಮ ಕಂಬ್ಯಾಕ್ ಮಾಡಿದೆ. ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ಡಾಲರ್ ಎದುರು ರುಪಾಯಿ 47 ಪೈಸೆಯಷ್ಟು ಏರಿಕೆ ಕಂಡಿದೆ. ಒಂದು ಡಾಲರ್​ಗೆ 94.26 ರೂಪಾಯಿ ಮೌಲ್ಯದಲ್ಲಿ ಫಾರೆಕ್ಸ್​ನಲ್ಲಿ (Forex Market) ವಹಿವಾಟು ನಡೆಯುತ್ತಿದೆ. ಕಳೆದ ಎರಡು ತಿಂಗಳಲ್ಲೇ ರುಪಾಯಿಯ ಗರಿಷ್ಠ ಮೌಲ್ಯ ಇದಾಗಿದೆ. ಜಪಾನ್ ಕ್ರೆಡಿಟ್ ರೇಟಿಂಗ್ ಏಜೆನ್ಸಿ (JCR) ಭಾರತದ ಕ್ರೆಡಿಟ್ ರೇಟಿಂಗ್ ಅನ್ನು ಮೇಲ್ದರ್ಜೆಗೆ ಏರಿಸಿದ್ದು, ಹಾಗೂ ಮೊದಲ ಕ್ವಾರ್ಟರ್​ನಲ್ಲಿ ಜಿಡಿಪಿ ನಿರೀಕ್ಷೆಮೀರಿದ ಪ್ರಮಾಣದಲ್ಲಿ ಹಿಗ್ಗಿದ್ದು, ರುಪಾಯಿ ಚೇತರಿಕೆಗೆ ಪೂರಕ ವಾತಾವರಣ ಸೃಷ್ಟಿಸಿರಬಹುದು.

ಡಾಲರ್ ಎದುರು ರುಪಾಯಿ ಚೇತರಿಕೆಗೆ ಪ್ರಮುಖ ಕಾರಣಗಳು

• ಬಲವಾದ ಆರ್ಥಿಕ ದತ್ತಾಂಶ: ಏಪ್ರಿಲ್​ನಿಂದ ಜೂನ್​ವರೆಗಿನ ಮೊದಲ ಕ್ವಾರ್ಟರ್​ನಲ್ಲಿ (Q1) ಜಿಡಿಪಿ ಬೆಳವಣಿಗೆ ದರ 7.8% ತಲುಪಿರುವುದು ಮತ್ತು ಜಾಗತಿಕ ರೇಟಿಂಗ್ ಏಜೆನ್ಸಿ ಜೆಸಿಆರ್ (JCR) ಭಾರತದ ಕ್ರೆಡಿಟ್ ರೇಟಿಂಗ್ ಅನ್ನು ‘BBB+’ ನಿಂದ ‘A-‘ ಗೆ ಹೆಚ್ಚಿಸಿರುವುದು ಹೂಡಿಕೆದಾರರಲ್ಲಿ ಹೊಸ ವಿಶ್ವಾಸ ಮೂಡಿಸಿದೆ.
• ಕಚ್ಚಾ ತೈಲ ದರದಲ್ಲಿ ಸ್ಥಿರತೆ: ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ (Crude Oil) ಬೆಲೆ ತುಸು ತಣ್ಣಗಾಗಿರುವುದು ರೂಪಾಯಿಯ ಚೇತರಿಕೆಗೆ ನೆರವಾಗಿದೆ.
• ವಿದೇಶಿ ಹೂಡಿಕೆ ಹರಿವು: ಭಾರತೀಯ ಆರ್ಥಿಕತೆಯ ಉತ್ತಮ ಮುನ್ನೋಟದಿಂದಾಗಿ ದೇಶೀಯ ಸಾಲ ಮತ್ತು ಷೇರು ಮಾರುಕಟ್ಟೆಗೆ ವಿದೇಶಿ ಬಂಡವಾಳ ಹರಿವು ಹೆಚ್ಚಿರುವುದು ಮೌಲ್ಯ ವರ್ಧನೆಗೆ ಅನುಕೂಲ ಮಾಡಿಕೊಟ್ಟಿದೆ.

ಇದನ್ನೂ ಓದಿ: ಎಸ್​ಬಿಐ ಗ್ರಾಹಕರ ಗಮನಕ್ಕೆ; ಉಚಿತ ಎಟಿಎಂ ಟ್ರಾನ್ಸಾಕ್ಷನ್ ಮಿತಿ ಅರ್ಧದಷ್ಟು ಇಳಿಕೆ; ಅಕ್ಟೋಬರ್​ನಿಂದ ಹೊಸ ನಿಯಮ ಜಾರಿ

ಭಾರತೀಯ ಬ್ಯಾಂಕುಗಳಿಗೆ ಎನ್​ಆರ್​ಐಗಳಿಂದ ವಿದೇಶೀ ಕರೆನ್ಸಿ ಠೇವಣಿಗಳು (FCNR) 136.38 ಬಿಲಿಯನ್ ಡಾಲರ್​ನಷ್ಟು ಹರಿದುಬಂದಿವೆ. ಇಷ್ಟು ಡೆಪಾಸಿಟ್ ಸಿಗುತ್ತದೆ ಎಂದು ಆರ್​ಬಿಐ ಕೂಡ ನಿರೀಕ್ಷಿಸಿರಲಿಲ್ಲ. ಮಾರುಕಟ್ಟೆ ತಜ್ಞರ ಪ್ರಕಾರ, ಮುಂಬರುವ ದಿನಗಳಲ್ಲಿ ಜಾಗತಿಕ ಸಂಘರ್ಷಗಳ ತೀವ್ರತೆ ತಗ್ಗಿದರೆ ರೂಪಾಯಿ ಮೌಲ್ಯ ಮತ್ತಷ್ಟು ಸ್ಥಿರತೆ ಕಾಣುವ ಸಾಧ್ಯತೆಯಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ