25,000 ರೂಗಿಂತ ಹೆಚ್ಚಿನ ಮೊತ್ತದ ಆನ್​ಲೈನ್ ಟ್ರಾನ್ಸ್ಫರ್; ಈ ಬ್ಯಾಂಕ್ ವಿಧಿಸುತ್ತೆ ಶುಲ್ಕ

ಬೆಂಗಳೂರು, ಆಗಸ್ಟ್ 14: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಐಎಂಪಿಎಸ್ ಮೂಲಕ ಮಾಡಲಾಗುವ ಫಂಡ್ ಟ್ರಾನ್ಸ್​ಫರ್​ಗಳಿಗೆ (Online Transfer) ಆಗಸ್ಟ್ 15ರಿಂದ ಶುಲ್ಕ ವಿಧಿಸಲಿದೆ. ಇದು ಆನ್​ಲೈನ್​ನಲ್ಲಿ ಐಎಂಪಿಎಸ್ ಮೂಲಕ ಮಾಡಲಾಗುವ ಪೇಮೆಂಟ್​​ಗಳಿಗೆ ಅನ್ವಯ ಆಗುತ್ತದೆ. ಬ್ಯಾಂಕ್​ಗೆ ಹೋಗಿ ಅಲ್ಲಿಂದ ಐಎಂಪಿಎಸ್ ಮೂಲಕ ಮಾಡುವ ಹಣ ವರ್ಗಾವಣೆಗೆ ಈ ಹೊಸ ಶುಲ್ಕ ಅನ್ವಯ ಆಗುವುದಿಲ್ಲ. ಆನ್​ಲೈನ್ ಮೂಲಕ 25,000 ರೂವರೆಗಿನ ಫಂಡ್ ಟ್ರಾನ್ಸ್​ಫರ್​ಗೆ ಯಾವ ಶುಲ್ಕ ಇರುವುದಿಲ್ಲ.

ಐಎಂಪಿಎಸ್​ಗೆ ಶುಲ್ಕ ಎಷ್ಟು?

ಆನ್​ಲೈನ್ ಚಾಲನ್ಸ್ ಮೂಲಕ ಐಎಂಪಿಎಸ್ ಬಳಸಿ 25,000 ರೂಗಿಂತ ಹೆಚ್ಚಿನ ಫಂಡ್ ಟ್ರಾನ್ಸ್​ಫರ್ ಮಾಡಿದರೆ 2ರಿಂದ 10 ರೂ ಶುಲ್ಕ, ಜೊತೆಗೆ ಜಿಎಸ್​ಟಿಯನ್ನೂ ಹಾಕಲಾಗುತ್ತದೆ.

ಇದನ್ನೂ ಓದಿ: ಆರ್​ಬಿಐ ಹೊಸ ವ್ಯವಸ್ಥೆ: ಚೆಕ್ ಡೆಪಾಸಿಟ್ ಆಗಲು 2 ದಿನ ಕಾಯಬೇಕಿಲ್ಲ; ಕೆಲವೇ ಗಂಟೆಯಲ್ಲಿ ಹಣ ಬರುತ್ತೆ

• 25,000 ರೂಗಿಂತ ಹೆಚ್ಚಿನ ಮತ್ತು ಒಂದು ಲಕ್ಷ ರೂಗಿಂತ ಕಡಿಮೆ ಮೊತ್ತದ ಹಣ ವರ್ಗಾವಣೆಗೆ ಸರ್ವಿಸ್ ಚಾರ್ಜ್ ಎರಡು ರೂ ಇದೆ.
• ಒಂದು ಲಕ್ಷ ರೂನಿಂದ ಎರಡು ಲಕ್ಷ ರೂ ಹಣ ವರ್ಗಾವಣೆಗೆ ಆರು ರೂ ಶುಲ್ಕ ಹಾಕುತ್ತದೆ ಎಸ್​ಬಿಐ.
• ಹಾಗೆಯೇ, ಎರಡರಿಂದ ಐದು ಲಕ್ಷ ರೂವರೆಗಿನ ಹಣ ವರ್ಗಾವಣೆಗೆ 10 ರೂ ಸರ್ವಿಸ್ ಚಾರ್ಜ್ ಹಾಕಲಾಗುತ್ತದೆ.

ಈ ಸರ್ವಿಸ್ ಚಾರ್ಜ್​ನ ಹಣದ ಮೇಲೆ ಜಿಎಸ್​ಟಿಯನ್ನೂ ಸೇರಿಸಲಾಗುತ್ತದೆ. ಎಸ್​ಬಿಐನ ಕಾರ್ಪೊರೇಟ್ ಗ್ರಾಹಕರಿಗೆ ಈ ಪರಿಷ್ಕೃತ ಸರ್ವಿಸ್ ಚಾರ್ಜ್​ಗಳು ಸೆಪ್ಟೆಂಬರ್ 8ರಿಂದ ಜಾರಿಗೆ ಬರುತ್ತವೆ. ಇತರರಿಗೆ ಆಗಸ್ಟ್ 15ರಿಂದಲೇ ಜಾರಿಗೆ ಬರುತ್ತವೆ.

ಎಸ್​ಬಿಐನಲ್ಲಿ ಸ್ಯಾಲರಿ ಅಕೌಂಟ್ ಹೊಂದಿರುವವರಿಗೆ ಈ ಶುಲ್ಕ ಇರುವುದಿಲ್ಲ. ಗೋಲ್ಡ್, ಡೈಮಂಡ್, ಪ್ಲಾಟಿನಂ, ರೋಡಿಯಂ, ಸರ್ಕಾರಿ ಇಲಾಖೆಗಳು, ಸ್ವಾಯತ್ತ ಸಂಸ್ಥೆಗಳು ಇತ್ಯಾದಿ ಕರೆಂಟ್ ಅಕೌಂಟ್​ಗಳಿಗೂ ಐಎಂಪಿಎಸ್ ಟ್ರಾನ್ಸಾಕ್ಷನ್ ಶುಲ್ಕದಿಂದ ವಿನಾಯಿತಿ ನೀಡಲಾಗಿದೆ.

ಇದನ್ನೂ ಓದಿ: ಐಸಿಐಸಿಐ ಬ್ಯಾಂಕ್​ನಲ್ಲಿ ಮಿನಿಮಮ್ ಅಕೌಂಟ್ ಬ್ಯಾಲನ್ಸ್ 50,000 ರೂ ಅಲ್ಲ, 15,000 ರೂ

ಇನ್ನು, ಯುಪಿಐ ಕೂಡ ಐಎಂಪಿಎಸ್ ನೆಟ್ವರ್ಕ್ ಮೇಲೆಯೇ ರೂಪಿತವಾಗಿದೆಯಾದರೂ, ಯುಪಿಐ ಪೇಮೆಂಟ್​​ಗಳಿಗೆ ಈ ಸರ್ವಿಸ್ ಚಾರ್ಜ್ ಅನ್ವಯ ಆಗುವುದಿಲ್ಲ ಎನ್ನಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 4:19 pm, Thu, 14 August 25