LIC IPO: ಎಲ್​ಐಸಿ ಐಪಿಒಗೆ ನೀವು ಸಬ್​ಸ್ಕ್ರೈಬ್ ಆಗಬೇಕೋ ಬೇಡವೋ? ರಿಯಾಯಿತಿ, ಗ್ರೇ ಮಾರ್ಕೆಟ್ ಪ್ರೀಮಿಯಂ, ತಜ್ಞರ ಸಲಹೆ ಇಲ್ಲಿದೆ

ಎಲ್​ಐಸಿ ಐಪಿಒ (LIC IPO)ದ ಮೊದಲ ದಿನವಾದ ಮೇ 4ನೇ ತಾರೀಕಿನ ಬುಧವಾರದಂದು ನಿರೀಕ್ಷೆ ಮಾಡಿದಂತೆಯೇ ಅದ್ಭುತವಾದ ಪ್ರತಿಕ್ರಿಯೆ ಬಂದಿದೆ. ಆರಂಭದ ಮೊದಲ ದಿನ ಐಪಿಒ ಗಾತ್ರದ ಶೇ 67ರಷ್ಟು ಸಬ್​ಸ್ಕ್ರೈಬ್ ಆಗಿದೆ ಎಂದು ಎನ್​ಎಸ್​ಇ ಡೇಟಾ ತಿಳಿಸಿದೆ. ಎಲ್​ಐಸಿ ಐಪಿಒ ಆಫರ್ ಫಾರ್ ಸೇಲ್ ಮೂಲಕವಾಗಿ 22,13,74,920 ಈಕ್ವಿಟಿ ಷೇರುಗಳ ತನಕ ಮಾರಾಟ ಮಾಡಲಾಗುತ್ತಿದೆ. ಆ ಮೂಲಕ ಕೇಂದ್ರ ಸರ್ಕಾರಕ್ಕೆ 21,000 ಕೋಟಿ ರೂಪಾಯಿ ಸಂಗ್ರಹ ಆಗಲಿದ್ದು, ಪ್ರಸಕ್ತ ಹಣಕಾಸು ವರ್ಷದಲ್ಲಿ ಬಂಡವಾಳ ಹಿಂತೆಗೆತ ಗುರಿ ತಲುಪುವುದಕ್ಕೆ ಇದರಿಂದ ಸಹಾಯ ಆಗುತ್ತದೆ. ಎಲ್​ಐಸಿ ಐಪಿಒ ಸಬ್​ಸ್ಕ್ರಿಪ್ಷನ್ ಐಪಿಒ ಬಿಡ್ ಮೇ 4ರಿಂದ 9ರ ತನಕ ಮುಕ್ತವಾಗಿರುತ್ತದೆ. ಇದರಲ್ಲಿ ಸರ್ಕಾರವು ಶೇ 3.5ರಷ್ಟು ಎಲ್​ಐಸಿಯ ಷೇರಿನ ಪಾಲನ್ನು ಮಾರಾಟ ಮಾಡುತ್ತಿದೆ. ಎಲ್​ಐಸಿ ಐಪಿಒ ಶನಿವಾರದಂದು (ಮೇ 7, 2022) ಬೆಳಗ್ಗೆ 10ರಿಂದ ರಾತ್ರಿ 7ರ ತನಕ ಇರುತ್ತದೆ ಎಂದು ಎನ್​ಎಸ್​ಇಯಿಂದ ಬುಧವಾರ ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ. ಎಲ್​ಐಸಿ ದರದ ಬ್ಯಾಂಡ್ ಪ್ರತಿ ಷೇರಿಗೆ 902 ರೂಪಾಯಿಯಿಂದ 949 ನಿಗದಿಯಾಗಿದ್ದು, ಕೆಲವು ವರ್ಗಗಳಿಗೆ ರಿಯಾಯಿತಿ ಇದೆ.

ಎಲ್​ಐಸಿ ಸಬ್​ಸ್ಕ್ರಿಪ್ಷನ್ ಸ್ಥಿತಿ ಎನ್​ಎಸ್​ಇ ಡೇಟಾದ ಪ್ರಕಾರ, ಪಾಲಿಸಿದಾರರಿಗೆ ಮೀಸಲಾದ ಭಾಗದಲ್ಲಿ ಮೊದಲ ದಿನ 2,21,37,492 ಷೇರುಗಳಲ್ಲಿ 1.99ರಷ್ಟು ಅಥವಾ 4,40,31,225 ಷೇರುಗಳಿಗೆ ಸಬ್​ಸ್ಕ್ರೈಬ್ ಆಗಿದ್ದಾರೆ. ಉದ್ಯೋಗಿಗಳ ಕೋಟಾದ ಅಡಿಯಲ್ಲಿ 1.17 ಪಟ್ಟು ಸಬ್​ಸ್ಕ್ರೈಬ್ ಆಗಿದ್ದಾರೆ. ಇನ್ನು ರೀಟೇಲ್ ಹೂಡಿಕೆದಾರರಿಗೆ ಮೀಸಲಾದ ಭಾಗದಲ್ಲಿ ಶೇ 60ರಷ್ಟು ಷೇರುಗಳಿಗೆ ಅಪ್ಲೈ ಮಾಡಿದ್ದಾರೆ. ನಾನ್ ರೀಟೇಲ್ ಹೂಡಿಕೆದಾರರು ಒಟ್ಟು ಮೀಸಲಾಗಿದ್ದರಲ್ಲಿ ಶೇ 27ರಷ್ಟು, ಕ್ವಾಲಿಫೈಡ್ ಇನ್​ಸ್ಟಿಟ್ಯೂಷನಲ್ ಬಿಡ್ಡರ್ಸ್ ಶೇ 33ರಷ್ಟು ಅಪ್ಲೈ ಮಾಡಿದ್ದಾರೆ. 16,20,78,067 ಷೇರುಗಳ ಪೈಕಿ 10,86,91,770 ಷೇರುಗಳಿಗೆ ಬೇಡಿಕೆ ಬಂದಿದೆ.

ಎಲ್​ಐಸಿ ಐಪಿಒ ಗ್ರೇ ಮಾರ್ಕೆಟ್ ಪ್ರೀಮಿಯಂ ಮೇ 4ನೇ ತಾರೀಕಿನ ಪ್ರಕಾರ, ಪ್ರತಿ ಅನ್​ಲಿಸ್ಟೆಡ್​ ಎಲ್​ಐಸಿ ಈಕ್ವಿಟಿ ಷೇರಿಗೆ 85 ರೂಪಾಯಿ ಪ್ರೀಮಿಯಂ ಇತ್ತು, ಎಂದು ತಜ್ಞರು ಹೇಳಿದ್ದಾರೆ. ಎಲ್​ಐಸಿ ಐಪಿಒ ಜಿಎಂಪಿ ಶೇ 9ರಷ್ಟು ನಿಗದಿಯಾಗಿದೆ. ಅದರ ಅರ್ಥ, ದರದ ಬ್ಯಾಂಡ್​ನ ಮೇಲ್​ಸ್ತರವಾದ 949ಕ್ಕಿಂತ 85 ರೂಪಾಯಿ ಹೆಚ್ಚೆಂದರೆ, (949+85) 1034 ರೂಪಾಯಿ ಆಗುತ್ತದೆ.

ಎಲ್​ಐಸಿ ಪಾಲಿಸಿದಾರರ ಕೋಟಾ ಏನು? ಎಲ್​ಐಸಿ ಪಾಲಿಸಿದಾರರಿಗೆ ಅಂತ ಮೀಸಲಿಟ್ಟು, ಸರ್ಕಾರದಿಂದ ಹೊಸ ಕೋಟಾವನ್ನು ಎಲ್​ಐಸಿ ಐಪಿಒ ಮೂಲಕ ತಂದಿದೆ. ವಿತರಣೆ ಬೆಲೆಯ ಮೇಲೆ ಪಾಲಿಸಿದಾರರಿಗೆ ರಿಯಾಯಿತಿ ಸಿಗುತ್ತದೆ. “ಪಾಲಿಸಿದಾರರು ಸಹ ಈ ಕಂಪೆನಿಯನ್ನು ಮಾಡಿದ್ದಾರೆ. ಅವರೂ ಷೇರುದಾರರಾಗಲು ಆಹ್ವಾನಿಸುತ್ತಿದ್ದೇವೆ. ಈ ಪ್ರಕ್ರಿಯೆಯಲ್ಲಿ ಹತ್ತಾರು ಲಕ್ಷ ಭಾರತೀಯರು ಪಾಲ್ಗೊಳ್ಳಲಿ, ಎಲ್ಐಸಿ ತನ್ನ ಮೌಲ್ಯ ತಿಳಿಸಲಿದೆ,” ಎಂದು DIPAM ಕಾರ್ಯದರ್ಶಿ ತುಹೀನ್ ಕಾಂತ್ ಪಾಂಡೆ ಹೇಳಿದ್ದಾರೆ.

ಎಲ್​ಐಸಿ ಐಪಿಒ ಪಾಲಿಸಿದಾರರ ರಿಯಾಯಿತಿ ರೀಟೇಲ್ ಹೂಡಿಕೆದಾರರಿಗೆ ಒಂದು ಷೇರಿಗೆ 45 ರೂಪಾಯಿ, ಅರ್ಹ ಪಾಲಿಸಿದಾರರಿಗೆ ಪ್ರತಿ ಷೇರಿಗೆ 60 ರೂಪಾಯಿ ರಿಯಾಯಿತಿ ಸಿಗುತ್ತದೆ. ಆದರೆ ಈ ರಿಯಾಯಿತಿ ಅರ್ಹ ಪಾಲಿಸಿದಾರರಿಗೆ ಅನ್ವಯಿಸುತ್ತದೆ. ಯಾರು ಫೆಬ್ರವರಿ 28ರೊಳಗೆ ಪ್ಯಾನ್ ಜೋಡಣೆ ಮಾಡಿರುವವರು ಅರ್ಹರು.

ಪಾಲಿಸಿದಾರರು ಅಪ್ಲೈ ಮಾಡುವುದು ಹೇಗೆ? ಎಲ್​ಐಸಿ ಪಾಲಿಸಿದಾರರು ಗರಿಷ್ಠ ಮೊತ್ತ 2 ಲಕ್ಷ ರೂಪಾಯಿ ತನಕ ಬಿಡ್ ಮಾಡಬಹುದು. ಯಾರಿಗೆ ಗುಂಪು ಪಾಲಿಸಿ ಇರುತ್ತದೋ ಅಂಥವರು ಈ ಕೋಟಾದ ಅಡಿಯಲ್ಲಿ ಬಿಡ್ ಮಾಡುವುದಕ್ಕೆ ಅರ್ಹರಲ್ಲ. ಎಲ್​ಐಸಿ ಪಾಲಿಸಿ ಜತೆಗೆ ಪ್ಯಾನ್ ಜೋಡಣೆ ಮಾಡುವುದರ ಹೊರತಾಗಿ ಅರ್ಹ ಹೂಡಿಕೆದಾರರಿಗೆ ಡಿಮ್ಯಾಟ್ ಖಾತೆ ಸಹ ಇರಬೇಕು.

ಈ ಷೇರುಗಳು ಖರೀದಿಸಲೇಬೇಕಾ? ಈಗಿನ ಮೇಲ್​ಸ್ತರದ ದರವಾದ 949 ರೂಪಾಯಿಯಲ್ಲಿ ಬೆಲೆ ಆಕರ್ಷಕವಾಗಿದೆ. ಖಾಸಗಿ ಇನ್ಷೂರೆನ್ಸ್​ ಕಂಪೆನಿಗಳಿಗೆ ಹೋಲಿಸಿದಲ್ಲಿ ಎಲ್​ಐಸಿ ಉತ್ತಮ ಸ್ಥಿತಿಯಲ್ಲಿದೆ ಎಂದು ವಿಶ್ಲೇಷಕರು ಅಭಿಪ್ರಾಯ ಪಟ್ಟಿದ್ದು, ಅಲ್ಪಾವಧಿಯಿಂದ ಮಧ್ಯಮಾವಧಿಗೆ “ಸಬ್​ಸ್ಕ್ರೈಬ್” ರೇಟಿಂಗ್ ನೀಡಲಾಗಿದೆ. ಎಲ್​ಐಸಿ ಐಪಿಒ ಮೇ 17ರಂದು ಲಿಸ್ಟಿಂಗ್ ಆಗಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂ ಓದಿ: LIC IPO: ಎಲ್​ಐಸಿ ಐಪಿಒ ಗ್ರೇ ಮಾರ್ಕೆಟ್​ನಲ್ಲಿ ಎಂಥ ಬೇಡಿಕೆ ಪಡೆದಿದೆ? ಏನಿದು ಗ್ರೇ ಮಾರ್ಕೆಟ್ ಗೊತ್ತಿದೆಯಾ?

Published On - 2:23 pm, Thu, 5 May 22