TCS salary: ಟಿಸಿಎಸ್​ ಸಿಇಒ ರಾಜೇಶ್ ವಾರ್ಷಿಕ ವೇತನ ಶೇ 52ರಷ್ಟು, ಸಿಒಒ ಸುಬ್ರಮಣಿಯಮ್​ಗೆ ಶೇ 60ರಷ್ಟು ಹೆಚ್ಚಳ

ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್​ನ ಸಿಇಒ ಆದ ರಾಜೇಶ್ ಗೋಪಿನಾಥನ್ ಅವರ ವಾರ್ಷಿಕ ವೇತನ ಕಳೆದ ವರ್ಷಕ್ಕಿಂತ (2019-20) ಶೇ 52ರಷ್ಟು ಹೆಚ್ಚಳವಾಗಿದೆ. ಅಂದರೆ 20 ಕೋಟಿ ರೂಪಾಯಿಗೂ ಹೆಚ್ಚಾಗಿದೆ ಎಂಬ ಅಂಶವನ್ನು ಕಂಪೆನಿಯ 2020-21ರ ವರದಿಯಲ್ಲಿ ತಿಳಿಸಲಾಗಿದೆ. ಹಣಕಾಸು ವರ್ಷ 2020ರಲ್ಲಿ ರಾಜೇಶ್ ಗೋಪಿನಾಥನ್ 13.3 ಕೋಟಿ ರೂಪಾಯಿ ಗಳಿಸಿದ್ದರು. ಅವರು ನಿರ್ವಹಣಾ ವೇತನದ ಸರಾಸರಿಯು ಕಳೆದ ಹಣಕಾಸು ವರ್ಷದಲ್ಲಿ ಶೇ 55.22ರಷ್ಟು ಹೆಚ್ಚಾಗಿದೆ ಎಂದು ವರದಿ ತಿಳಿಸಿದೆ. ಅಂದ ಹಾಗೆ, ಟಿಸಿಎಸ್​ನಿಂದ ಕಾರ್ಯನಿರ್ವಹಣಾ ನಿರ್ದೇಶಕರಿಗೆ ಹಾಗೂ ಕಾರ್ಯ ನಿರ್ವಾಹಕ ನಿರ್ದೇಶಕರಿಗೆ ಪಾವತಿಸುತ್ತಿರುವ ವೇತನ ಅಂದರೆ, ಅದರಲ್ಲಿ ಸಂಬಳ, ಅನುಕೂಲಗಳು, ಸೌಲಭ್ಯಗಳು ಮತ್ತು ಭತ್ಯೆಗಳು (ಸ್ಥಿರವಾದವು) ಹಾಗೂ ಕಮಿಷನ್ (ಬದಲಾಗುವಂಥದ್ದು) ಎಲ್ಲವೂ ಒಳಗೊಂಡಿರುತ್ತವೆ ಎಂದು ಕಂಪೆನಿ ಹೇಳಿದೆ.

ಹಣಕಾಸು ವರ್ಷ 2021ರಲ್ಲಿ ರಾಜೇಶ್ ಗೋಪಿನಾಥನ್ ಸಂಬಳ ರೂ. 1.27 ಕೋಟಿ ರೂಪಾಯಿ. ನಿಮಗೆ ಆಶ್ಚರ್ಯ ಆಗಬಹುದು, ಅದಕ್ಕೆ ಒಂದು ವರ್ಷದ ಹಿಂದೆ 1.30 ಕೋಟಿ ರೂಪಾಯಿ ಇತ್ತು. ಅನುಕೂಲಗಳು, ಸೌಲಭ್ಯಗಳು ಮತ್ತು ಭತ್ಯೆಗಳು ಸೇರಿ ರೂ. 2.09 ಕೋಟಿ ಇತ್ತು. ಅದರ ಹಿಂದಿನ ವರ್ಷ 1.30 ಕೋಟಿ ರೂಪಾಯಿ ಇತ್ತು. ಕಳೆದ ಹಣಕಾಸು ವರ್ಷದಲ್ಲಿ ಕಮಿಷನ್ 17 ಕೋಟಿ ಬಂದಿದೆ. ಅದರ ಹಿಂದಿನ ವರ್ಷ 10 ಕೋಟಿ ಇತ್ತು. ಟಿಸಿಎಸ್​ನಲ್ಲಿ ಸಿಇಒ ಸಂಬಳವು ಉದ್ಯೋಗಿ ಸಂಬಳದ ಮೀಡಿಯನ್​ನ 326.8:1 ಇದ್ದು, ವರ್ಷದ ಹಿಂದೆ ಈ ಪ್ರಮಾಣ 214.6:1 ಇತ್ತು.

ಇನ್ನು ಸಿಒಒ ಎನ್​.ಜಿ. ಸುಬ್ರಮಣಿಯಮ್ ಸಂಬಳ ಕಳೆದ ಹಣಕಾಸು ವರ್ಷಕ್ಕಿಂತ ಶೇ 60ರಷ್ಟು ಏರಿಕೆಯಾಗಿದೆ. ಅದರಲ್ಲಿ 1.215 ಕೋಟಿ ರೂಪಾಯಿ ಸಂಬಳ, ರೂ. 1.88 ಕೋಟಿ ಅನುಕೂಲ ಮತ್ತು ಭತ್ಯೆಗಳು ಹಾಗೂ ರೂ. 13 ಕೋಟಿ ರೂಪಾಯಿ ಪರಿಹಾರ ಎಂದು ವಾರ್ಷಿಕ ವರದಿಯಲ್ಲಿ ತಿಳಿಸಲಾಗಿದೆ. ಭಾರತದ ಅತಿದೊಡ್ಡ ಸಾಫ್ಟ್​ವೇರ್ ರಫ್ತುದಾರ ಕಂಪೆನಿ ಟಿಸಿಎಸ್​​ನಲ್ಲಿ ಮಾರ್ಚ್ 31, 2021ಕ್ಕೆ ಒಟ್ಟು 4,88,650 ಸಿಬ್ಬಂದಿ ಇದ್ದಾರೆ. ಕಂಪೆನಿಯಿಂದ FY21ರಲ್ಲಿ ಸರಾಸರಿ ವೇತನ ಹೆಚ್ಚಳ ಶೇ 5.2ರಷ್ಟು ಮಾಡಲಾಗಿದೆ. ಭಾರತದ ಹೊರಗೆ ಇರುವ ಟಿಸಿಎಸ್ ಸಿಬ್ಬಂದಿಗೆ ಶೇ 2ರಿಂದ ಶೇ 6ರಷ್ಟು ವೇತನ ಹೆಚ್ಚಳ ಮಾಡಲಾಗಿದೆ ಎಂದು ವರದಿಯಾಗಿದೆ.

ಇದನ್ನೂ ಓದಿ: TCS employees salary hike: FY22ಕ್ಕೆ ಉದ್ಯೋಗಿಗಳ ವೇತನ ಹೆಚ್ಚಳ ಘೋಷಿಸಿದ ಮೊದಲ ಕಂಪೆನಿ ಟಿಸಿಎಸ್

(TCS CEO Rajesh Gopinathan salary increased by 52% in 2020- 21 and COO Subramaniyam salary by 60%)