Tech Utility: ಫೋನ್‌ನಲ್ಲಿ ಡಿಲೀಟ್ ಮಾಡಿದ ಫೋಟೊ ನಿಜವಾಗಿಯೂ ಅಳಿಸಿಹೋಗುತ್ತದೆಯೇ?

ಸ್ಮಾರ್ಟ್‌ಫೋನ್‌ನಲ್ಲಿ ಪ್ರತಿದಿನ ನೂರಾರು ಫೋಟೊಗಳನ್ನು ತೆಗೆಯುತ್ತೇವೆ. ಅಗತ್ಯವಿಲ್ಲದ ಫೋಟೊಗಳನ್ನು ಗ್ಯಾಲರಿಯಿಂದ ಡಿಲೀಟ್ ಮಾಡುತ್ತೇವೆ. ಕೆಲವೊಮ್ಮೆ ವೈಯಕ್ತಿಕ ಫೋಟೊಗಳು ಅಥವಾ ವಿಡಿಯೊಗಳನ್ನು ಬೇರೆಯವರು ನೋಡಬಾರದು ಎಂಬ ಕಾರಣಕ್ಕೂ ಅಳಿಸಬಹುದು. ಆದರೆ ಫೋನ್‌ನಲ್ಲಿ ಡಿಲೀಟ್ ಮಾಡಿದ ಫೋಟೊ ನಿಜವಾಗಿಯೂ ಸಂಪೂರ್ಣವಾಗಿ ಅಳಿಸಿಹೋಗುತ್ತದೆಯೇ? ಅಥವಾ ಅದರ ಪ್ರತಿ ಫೋನ್‌ನಲ್ಲೇ ಎಲ್ಲಾದರೂ ಉಳಿದಿರುತ್ತದೆಯೇ?.

ನಾವು ಮೊಬೈಲ್‌ನಲ್ಲಿ ಫೋಟೊ ತೆಗೆದಾಗ ಅದರ ಡಿಜಿಟಲ್ ಮಾಹಿತಿಯು ಫೋನ್‌ನ ಆಂತರಿಕ ಸಂಗ್ರಹಣೆಯಲ್ಲಿ ಉಳಿಯುತ್ತದೆ. ಫೋಟೊದ ಬಣ್ಣ, ಗಾತ್ರ, ಸ್ಪಷ್ಟತೆ ಸೇರಿದಂತೆ ಪ್ರತಿಯೊಂದು ಮಾಹಿತಿಯೂ ಡಿಜಿಟಲ್ ಡೇಟಾ ರೂಪದಲ್ಲಿ ಸಂಗ್ರಹವಾಗಿರುತ್ತದೆ. ಆದರೆ ಫೋಟೊವನ್ನು ಡಿಲೀಟ್ ಮಾಡಿದ ತಕ್ಷಣವೇ ಅದರ ಎಲ್ಲ ಮಾಹಿತಿಯೂ ಅಳಿಸಿಹೋಗುತ್ತದೆ ಎಂದರ್ಥವಲ್ಲ.

ಡಿಲೀಟ್ ಮಾಡಿದಾಗ ಏನಾಗುತ್ತದೆ?

ಫೋನ್‌ನ ಗ್ಯಾಲರಿಯಲ್ಲಿ ಫೋಟೊವನ್ನು ಡಿಲೀಟ್ ಮಾಡಿದಾಗ, ಸಾಮಾನ್ಯವಾಗಿ ಆ ಫೈಲ್‌ಗೆ ಸಂಬಂಧಿಸಿದ ಮಾಹಿತಿಯನ್ನು ಫೋನ್‌ನ ವ್ಯವಸ್ಥೆ ತೆಗೆದುಹಾಕುತ್ತದೆ. ಆ ಮೂಲಕ ಫೋಟೊ ಇರುವ ಸಂಗ್ರಹಣಾ ಜಾಗವನ್ನು ಹೊಸ ಡೇಟಾ ಉಳಿಸಲು ಲಭ್ಯವಿದೆ ಎಂದು ಗುರುತಿಸುತ್ತದೆ. ಆದರೆ ಆ ಜಾಗದಲ್ಲಿ ಹಿಂದೆ ಇದ್ದ ಫೋಟೊದ ಡೇಟಾ ತಕ್ಷಣವೇ ಸಂಪೂರ್ಣವಾಗಿ ನಾಶವಾಗುವುದಿಲ್ಲ.

Recently Deleted ಫೋಲ್ಡರ್‌ನ ಉದ್ದೇಶವೇನು?

ಬಹುತೇಕ ಸ್ಮಾರ್ಟ್‌ಫೋನ್‌ಗಳಲ್ಲಿ ಫೋಟೊ ಡಿಲೀಟ್ ಮಾಡಿದ ತಕ್ಷಣವೇ ಅದು ಶಾಶ್ವತವಾಗಿ ಅಳಿಸಿಹೋಗುವುದಿಲ್ಲ. ಬದಲಿಗೆ Recently Deleted ಅಥವಾ Trash ಎಂಬ ಪ್ರತ್ಯೇಕ ಫೋಲ್ಡರ್‌ಗೆ ವರ್ಗಾವಣೆಯಾಗುತ್ತದೆ. ಆ ಫೋಲ್ಡರ್‌ನಲ್ಲಿ ಫೋಟೊಗಳು ನಿರ್ದಿಷ್ಟ ಅವಧಿಯವರೆಗೆ ಉಳಿಯುತ್ತವೆ. ಈ ಅವಧಿಯಲ್ಲಿ ಬಳಕೆದಾರರು ತಪ್ಪಾಗಿ ಅಳಿಸಿದ ಫೋಟೊಗಳನ್ನು ಮರಳಿ ಪಡೆಯಬಹುದು.

ಐಫೋನ್‌ನಲ್ಲಿ ಡಿಲೀಟ್ ಮಾಡಿದ ಫೋಟೊಗಳು ಸಾಮಾನ್ಯವಾಗಿ 30 ದಿನಗಳವರೆಗೆ Recently Deleted ಫೋಲ್ಡರ್‌ನಲ್ಲಿ ಉಳಿಯುತ್ತವೆ. ಆಂಡ್ರಾಯ್ಡ್ ಫೋನ್‌ಗಳಲ್ಲಿಯೂ ಇಂತಹ ವ್ಯವಸ್ಥೆ ಲಭ್ಯವಿದೆ. ಆದರೆ ಫೋಟೊಗಳು ಎಷ್ಟು ದಿನ ಉಳಿಯುತ್ತವೆ ಎಂಬುದು ಫೋನ್‌ನ ಮಾದರಿ ಮತ್ತು ಗ್ಯಾಲರಿ ಆ್ಯಪ್‌ ಅನ್ನು ಅವಲಂಬಿಸಿರುತ್ತದೆ. ಈ ಅವಧಿ ಮುಗಿದ ಬಳಿಕ ಅಥವಾ ಬಳಕೆದಾರರು ಶಾಶ್ವತವಾಗಿ ಅಳಿಸಿದ ಬಳಿಕ ಅವುಗಳನ್ನು ಸಾಮಾನ್ಯವಾಗಿ ಮರುಪಡೆಯಲು ಸಾಧ್ಯವಾಗುವುದಿಲ್ಲ.

ಗೂಗಲ್ ಫೋಟೊಸ್‌ನಲ್ಲೂ ಉಳಿದಿರಬಹುದೇ?

ಫೋನ್‌ನ ಗ್ಯಾಲರಿಯಿಂದ ಫೋಟೊ ಡಿಲೀಟ್ ಮಾಡಿದರೂ ಅದರ ಪ್ರತಿ ಬೇರೆಡೆ ಉಳಿದಿರುವ ಸಾಧ್ಯತೆಯಿದೆ. ಇದಕ್ಕೆ ಪ್ರಮುಖ ಉದಾಹರಣೆ ಗೂಗಲ್ ಫೋಟೊಸ್. ಈ ಆ್ಯಪ್‌ನಲ್ಲಿ ಬ್ಯಾಕಪ್ ವ್ಯವಸ್ಥೆಯನ್ನು ಸಕ್ರಿಯಗೊಳಿಸಿದ್ದರೆ, ಫೋನ್‌ನಲ್ಲಿ ತೆಗೆದ ಫೋಟೊಗಳು ಇಂಟರ್ನೆಟ್ ಮೂಲಕ ಗೂಗಲ್ ಖಾತೆಯ ಕ್ಲೌಡ್ ಸಂಗ್ರಹಣೆಗೆ ಅಪ್‌ಲೋಡ್ ಆಗುತ್ತವೆ. ಗೂಗಲ್ ಫೋಟೊಸ್‌ನಲ್ಲಿ Delete from device ಆಯ್ಕೆಯನ್ನು ಬಳಸಿದರೆ ಫೋನ್‌ನಲ್ಲಿರುವ ಪ್ರತಿಯನ್ನು ಮಾತ್ರ ತೆಗೆದುಹಾಕಿ, ಬ್ಯಾಕಪ್ ಆಗಿರುವ ಪ್ರತಿಯನ್ನು ಉಳಿಸಬಹುದು.

ಡಿಲೀಟ್ ಮಾಡಿದ ಫೋಟೊವನ್ನು ಮರಳಿ ಪಡೆಯಲು ಸಾಧ್ಯವೇ?

ಆಧುನಿಕ ಸ್ಮಾರ್ಟ್‌ಫೋನ್‌ಗಳಲ್ಲಿ ಡೇಟಾ ಎನ್‌ಕ್ರಿಪ್ಷನ್ ಸೇರಿದಂತೆ ಹಲವು ಸುರಕ್ಷತಾ ತಂತ್ರಜ್ಞಾನಗಳನ್ನು ಬಳಸಲಾಗುತ್ತದೆ. ಇವುಗಳ ಕಾರಣದಿಂದ ಶಾಶ್ವತವಾಗಿ ಅಳಿಸಲಾದ ಫೋಟೊಗಳನ್ನು ಮರುಪಡೆಯುವುದು ಸುಲಭದ ಕೆಲಸವಲ್ಲ.

ಫೋನ್ ಮಾರಾಟ ಮಾಡುವಾಗ ಎಚ್ಚರಿಕೆ ಅಗತ್ಯ

ಹಳೆಯ ಫೋನ್ ಅನ್ನು ಬೇರೆಯವರಿಗೆ ನೀಡುವ ಅಥವಾ ಮಾರಾಟ ಮಾಡುವಾಗ ಕೇವಲ ಫೋಟೊಗಳನ್ನು ಡಿಲೀಟ್ ಮಾಡುವುದು ಸಾಕಾಗುವುದಿಲ್ಲ. ಮೊದಲು ಅಗತ್ಯವಿರುವ ಮಾಹಿತಿಯನ್ನು ಬ್ಯಾಕಪ್ ಮಾಡಿಕೊಂಡು, ಫೋನ್‌ನ ಅಧಿಕೃತ Factory Reset ಆಯ್ಕೆಯನ್ನು ಬಳಸಬೇಕು. ಆಧುನಿಕ ಎನ್‌ಕ್ರಿಪ್ಟ್ ಆಗಿರುವ ಫೋನ್‌ಗಳಲ್ಲಿ ಈ ಪ್ರಕ್ರಿಯೆಯು ವೈಯಕ್ತಿಕ ಡೇಟಾವನ್ನು ಸುರಕ್ಷಿತವಾಗಿ ತೆಗೆದುಹಾಕಲು ನೆರವಾಗುತ್ತದೆ.