Crime News: ಮುದುಕರಿಗೆ ಬೆತ್ತಲೆ ವಿಡಿಯೋ ಕರೆ ಮಾಡಿ 3 ಲಕ್ಷ ರೂ. ಪೀಕಿದ ಖತರ್ನಾಕ್ ಲೇಡಿ..!
Crime News In Kannada: ಇದಾದ ಬಳಿಕ ಅದೇ ಏರಿಯಾದ ಮತ್ತೊರ್ವ ಮುದಕನನ್ನು ಟಾರ್ಗೆಟ್ ಮಾಡಿದ ಖತರ್ನಾಕ್ ಮಹಿಳೆ ಎರಡು ಬಾರಿ ಬೆತ್ತಲೆ ವಿಡಿಯೋ ಕರೆ ಮಾಡಿದ್ದಳು.
Updated on: Aug 03, 2022 | 6:23 PM
Crime News In Kannada: ಮೋಸ ಹೋಗುವವರು ಇರುವವರೆಗೂ ಮೋಸ ಮಾಡುವವರು ಇದ್ದೇ ಇರುತ್ತೆ ಎಂಬ ಮಾತಿದೆ. ಈ ಮಾತು ಈ ವೃದ್ಧರ ಪ್ರಕರಣದಲ್ಲಿ ಅಕ್ಷರಶಃ ನಿಜವಾಗಿದೆ. ಏಕೆಂದರೆ ಮುಂಬೈನ ಮಹಿಳೆಯೊಬ್ಬರು ಬೆತ್ತಲೆ ವಿಡಿಯೋ ಕರೆ ಮೂಲಕವೇ ಇಬ್ಬರನ್ನು ಯಾಮಾರಿಸಿ ಬರೋಬ್ಬರಿ 3.63 ಲಕ್ಷ ರೂ. ವಸೂಲಿ ಮಾಡಿದ್ದಾಳೆ. ಇಲ್ಲಿ ಇವರು ಮಾಡಿದ ತಪ್ಪೇನೆಂದರೆ ಅಪರಿಚಿತ ಕರೆ ಸ್ವೀಕರಿಸಿ ಮೈಮರೆತಿದ್ದು…ಅದನ್ನೇ ಐನಾತಿ ಲೇಡಿ ಬಂಡವಾಳ ಮಾಡಿಕೊಂಡು ಲಕ್ಷ ರೂ. ಪೀಕಿದ್ದಾಳೆ.
ಹೌದು, ಇಂತಹದೊಂದು ಪ್ರಕರಣ ದಾಖಲಾಗಿದ್ದು ಮುಂಬೈನ ಅಂಧೇರಿಯಲ್ಲಿ. ಅಪರಿಚಿತ ಮಹಿಳೆಯೊಬ್ಬಳು ವೃದ್ಧರನ್ನು ಗುರಿಯಾಗಿಸಿ ಬೆತ್ತಲೆ ವಿಡಿಯೋ ಕರೆ ಮಾಡಿದ್ದಾಳೆ. ಇದನ್ನು ಸ್ವೀಕರಿಸಿದ ಅಂಧೇರಿಯ 86 ವರ್ಷ ಮುದುಕರೊಬ್ಬರು ಮಹಿಳೆಯ ಬಲೆಗೆ ಬಿದ್ದಿದ್ದಾರೆ. ಅಷ್ಟೇ ಅಲ್ಲದೆ ವಿಡಿಯೋದಲ್ಲಿ ಮಹಿಳೆಯ ಜೊತೆ ಚೆಲ್ಲಾಟವಾಡಿದ್ದಾರೆ.
ಆದರೆ ಖತರ್ನಾಕ್ ಮಹಿಳೆಯು ವಿಡಿಯೋವನ್ನು ರೆಕಾರ್ಡ್ ಮಾಡಿಕೊಂಡಿದ್ದಳು. ಅದನ್ನೇ ಮುಂದಿಟ್ಟುಕೊಂಡು ಹಣ ನೀಡುವಂತೆ ಬ್ಲ್ಯಾಕ್ ಮೇಲ್ ಮಾಡಿದ್ದಾಳೆ. ಅಷ್ಟೇ ಅಲ್ಲದೆ ಹಣ ನೀಡದಿದ್ದರೆ ವಿಡಿಯೋವನ್ನು ಸೋಷಿಯಲ್ ಮೀಡಿಯಾ ಮೂಲಕ ವೈರಲ್ ಮಾಡುವುದಾಗಿ ಬೆದರಿಸಿದ್ದಾಳೆ.
ಇದನ್ನು ಕೇಳಿ ಭಯಗೊಂಡ ಹಿರಿಯ ವ್ಯಕ್ತಿಯು ಬರೋಬ್ಬರಿ 2.99 ಲಕ್ಷ ರೂ.ಗಳನ್ನು ಆಕೆಯ ಬ್ಯಾಂಕ್ ಖಾತೆಗೆ ಹಾಕಿದ್ದಾರೆ. ಇದಾದ ಬಳಿಕ ಕೂಡ ಮಹಿಳೆಯು ಹೆಚ್ಚಿನ ಹಣಕ್ಕೆ ಬೇಡಿಕೆ ಇಟ್ಟಿದ್ದಳು. ಇದರಿಂದ ಹೈರಾಣರಾದ ವ್ಯಕ್ತಿಯು ಅಂಬೋಲಿ ಪೊಲೀಸ್ ಠಾಣೆಗೆ ತೆರಳಿ ದೂರು ದಾಖಲಿಸಿದ್ದರು.
ಅಚ್ಚರಿ ಎಂದರೆ ಇದಾದ ಬಳಿಕ ಅದೇ ಏರಿಯಾದ ಮತ್ತೊರ್ವ ಮುದಕನನ್ನು ಟಾರ್ಗೆಟ್ ಮಾಡಿದ ಖತರ್ನಾಕ್ ಮಹಿಳೆ ಎರಡು ಬಾರಿ ಬೆತ್ತಲೆ ವಿಡಿಯೋ ಕರೆ ಮಾಡಿದ್ದಳು. ಈ ಕರೆಗಳನ್ನು ಸ್ವೀಕರಿಸಿ ಅವರು ಕೂಡ ಐನಾತಿಯ ಲೇಡಿಯ ಬಲೆಗೆ ಬಿದ್ದಿದ್ದರು. ಆ ಬಳಿಕ ರೆಕಾರ್ಡ್ ವಿಡಿಯೋ ತೋರಿಸುವ ಮೂಲಕ ಅವರನ್ನೂ ಕೂಡ ಬ್ಲ್ಯಾಕ್ ಮೇಲ್ ಮಾಡಲು ಮುಂದಾಗಿದ್ದಾಳೆ. ಇದರಿಂದ ಹೆದರಿದ ಆ ವ್ಯಕ್ತಿಯು ಬರೋಬ್ಬರಿ 64 ಸಾವಿರ ರೂ. ನೀಡಿದ್ದಾರೆ.
ಈ ಬಗ್ಗೆ ಐಪಿಸಿ ಮತ್ತು ಐಟಿ ಕಾಯ್ದೆಯ ವಿವಿಧ ಸೆಕ್ಷನ್ ಅಡಿಯಲ್ಲಿ ಎಫ್ಐಆರ್ ದಾಖಲಿಸಲಾಗಿದ್ದು, ಇಲ್ಲಿ ಎರಡೂ ಪ್ರಕರಣಗಳಲ್ಲಿ ಸಾಮ್ಯತೆ ಕಂಡು ಬಂದ ಹಿನ್ನೆಲೆಯಲ್ಲಿ ಬೆತ್ತಲೆ ವಿಡಿಯೋ ಹಿಂದಿರುವ ಖತರ್ನಾಕ್ ಲೇಡಿಯು ಒಬ್ಬಳೇನಾ ಎಂಬುದರ ಬಗ್ಗೆ ತನಿಖೆಯನ್ನು ಆರಂಭಿಸಿರುವುದಾಗಿ ಅಂಬೋಲಿ ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ.
ಒಟ್ಟಿನಲ್ಲಿ ಮೋಸ ಹೋಗುವವರು ಇರುವವರೆಗೂ ಮೋಸ ಮಾಡುವವರು ಇದ್ದೇ ಇರುತ್ತೆ ಎಂಬ ಮಾತು ಸದ್ಯದ ಮಟ್ಟಿಗೆ ಈ ಇಬ್ಬರು ಹಿರಿಯ ನಾಗರಿಕರಿಗೆ ಅನ್ವಯಿಸುತ್ತದೆ. ಹೀಗಾಗಿ ಅಪರಿಚಿತ ಕರೆಗಳು ಬಂದಾಗ ಯಾಮಾರದಂತೆ ಎಚ್ಚರವಹಿಸಿ. ಇಂತಹ ಮೋಸದ ಬಲೆಗೆ ಬೀಳದಿರಿ.
