7 ರಾಜ್ಯಗಳಲ್ಲಿ 14 ಮದುವೆಯಾಗಿದ್ದ ಅಸಾಮಿ ಕೊನೆಗೂ ಸಿಕ್ಕಿ ಬಿದ್ದಿದ್ದಾದರೂ ಹೇಗೆ?

ಯಾರಿಗೆ ಆಗಲಿ ಕಂಕಣ ಭಾಗ್ಯ ಕೂಡಿ ಬಂದರೆ ಅದು ಅದೃಷ್ಟ ಎಂದು ಪರಿಗಣಿಸಲಾಗುತ್ತದೆ. ಅದರಲ್ಲೂ ಕಂಕಣ ಭಾಗ್ಯ ಕೂಡಿ ಬರಲು ಅನೇಕರು ಪೂಜೆ, ವೃತಗಳ ಮೊರೆ ಹೋಗುತ್ತಾರೆ. ಇನ್ನು ಕೆಲವರಿಗೆ ಮದುವೆ ವಯಸ್ಸು ದಾಟಿದರೂ ಕಂಕಣ ಭಾಗ್ಯ ಮಾತ್ರ ಕೂಡಿ ಬಂದಿರಲ್ಲ. ಆದರೆ ಇಲ್ಲೊಬ್ಬರಿದ್ದಾರೆ. ಇವರಿಗೆ ಕಂಕಣ ಭಾಗ್ಯ 7 ರಾಜ್ಯಗಳಲ್ಲಿ ಕೂಡಿ ಬಂದಿದೆ. ಅದು ಕೂಡ 14 ಬಾರಿ ಎಂದರೆ ನಂಬಲೇಬೇಕು. ಹೌದು, ಈ ಅಸಾಮಿಯ ಹೆಸರು ರಮೇಶ್ ಸ್ವೇನ್. ಒಡಿಶಾ ಮೂಲದ ರಮೇಶ್ ಅವರು ಇದೀಗ 7 ರಾಜ್ಯಗಳಲ್ಲಿ ವಿವಾಹವಾಗಿ ಪೊಲೀಸರ ಅತಿಥಿಯಾಗಿದ್ದಾನೆ.

ಒಡಿಶಾದ ಕೇಂದ್ರಪಾರ ಜಿಲ್ಲೆಯ ಪಟ್ಕುರಾ ಗ್ರಾಮದ ನಿವಾಸಿಯಾಗಿರುವ ರಮೇಶ್, ಮದುವೆಯಾದ ನಂತರ ಹೆಂಡತಿ ಒಡವೆ ಮತ್ತು ಹಣವನ್ನು ದೋಚಿ ಪರಾರಿಯಾಗುತ್ತಿದ್ದನು. ಹೀಗೆ 7 ರಾಜ್ಯಗಳಲ್ಲಿ ಒಟ್ಟು 14 ಮದುವೆಯಾಗಿರುವ ರಮೇಶ್ ಕೊನೆಗೂ ಪೊಲೀಸರಿಗೆ ಸಿಕ್ಕಿ ಬಿದ್ದಿದ್ದಾನೆ. 60 ವರ್ಷದ ರಮೇಶ್ ಮೊದಲು 1982 ರಲ್ಲಿ ವಿವಾಹವಾಗಿದ್ದರು. ಇದರ ನಂತರ, ಅವರು 2002 ರಲ್ಲಿ ಎರಡನೇ ಬಾರಿಗೆ ಮದುವೆಯಾದರು. ಈ ವಿವಾಹಗಳಿಂದ ಇವರಿಗೆ ಸುಮಾರು 5 ಮಕ್ಕಳಿದ್ದಾರೆ. ನಂತರ 2002 ರಿಂದ 2020 ರವರೆಗೆ ಮ್ಯಾಟ್ರಿಮೋನಿಯಲ್ ಸೈಟ್‌ಗಳ ಮೂಲಕ ಮಹಿಳೆಯರೊಂದಿಗೆ ಸ್ನೇಹ ಬೆಳೆಸಿ ಖತರ್ನಾಕ್ ಕೆಲಸಕ್ಕೆ ಮುಂದಾಗಿದ್ದಾನೆ.

ಅದರಂತೆ ಮ್ಯಾಟ್ರಿಮೋನಿಯಲ್ ಸೈಟ್‌ ಮೂಲಕ ಮಹಿಳೆಯರನ್ನು ಪುಸಲಾಯಿಸಿ ನಕಲಿ ದಾಖಲೆಯೊಂದಿಗೆ ವಿವಾಹವಾಗುತ್ತಿದ್ದನು. ಆ ಬಳಿಕ ಕೆಲ ದಿನಗಳ ಕಾಲ ಜೊತೆಗಿದ್ದು ಹಣ, ಒಡವೆ ದೋಚಿ ಪರಾರಿಯಾಗುತ್ತಿದ್ದ. ಹೀಗೆ ದೆಹಲಿಯಲ್ಲಿ ಶಾಲಾ ಶಿಕ್ಷಕಿಯಾಗಿದ್ದ ತನ್ನ 14 ನೇ ಪತ್ನಿಯೊಂದಿಗೆ ಭುವನೇಶ್ವರದಲ್ಲಿ ವಾಸಿಸುತ್ತಿದ್ದ. ಇದೇ ವೇಳೆ ಈತನ ನಕಲಿ ಪತ್ರಗಳು ಹಾಗೂ ಇತರೆ ಮಾಹಿತಿಗಳು ಆಕೆಗೆ ಸಿಕ್ಕಿದೆ. ಇದರಿಂದ ಸಂಶಯಗೊಂಡ ಮಹಿಳೆಯು ಕೂಡಲೇ ಪೊಲೀಸರಿಗೆ ದೂರು ನೀಡಿದ್ದಾಳೆ. ಅದರಂತೆ ಬಂಧಿಸಿದ ಭುವನೇಶ್ವರ ಪೊಲೀಸರು ವಿಚಾರಣೆಗೊಳಪಡಿಸಿದಾಗ ದೆಹಲಿ, ಪಂಜಾಬ್, ಅಸ್ಸಾಂ, ಜಾರ್ಖಂಡ್ ರಾಜ್ಯಗಲ್ಲೂ ಕೂಡ ಮದುವೆ ಆಗಿರುವುದಾಗಿ ಬಾಯಿ ಬಿಟ್ಟಿದ್ದಾನೆ. ಅಷ್ಟೇ ಅಲ್ಲದೆ ಹೀಗೆ ಮದುವೆಯಾಗಲು 4 ನಕಲಿ ಆಧಾರ್ ಕಾರ್ಡ್‌ಗಳು ಮತ್ತು ಇತರ ಕೆಲವು ನಕಲಿ ದಾಖಲೆಗಳನ್ನು ಸೃಷ್ಟಿಸಿಕೊಂಡಿದ್ದ. ಇದೀಗ 14 ಹೆಂಡ್ತಿರ ಮುದ್ದಿನ ಗಂಡ ರಮೇಶ್ ಸ್ವೇನ್ ಪೊಲೀಸರ ಅತಿಥಿಯಾಗಿದ್ದಾನೆ.

ಇದನ್ನೂ ಓದಿ: IPL 2022 ನಲ್ಲಿ ಕೋಟಿ ಸಿಗುತ್ತಿದ್ದಂತೆ ಪಾಕಿಸ್ತಾನ ಸೂಪರ್ ಲೀಗ್ ತೊರೆದ ಸ್ಟಾರ್ ಆಟಗಾರ

ಇದನ್ನೂ ಓದಿ: IPL 2022: RCB ತಂಡ ಕಟ್ಟಿದೆ…ಆದರೆ ಆರಂಭಿಕ ಯಾರು ಎಂಬುದೇ ಈಗ ಪ್ರಶ್ನೆ..?

ಇದನ್ನೂ ಓದಿ: IPL 2022: RCB ತಂಡದಲ್ಲಿ ಇಬ್ಬರು ಕನ್ನಡಿಗರು..! 

(Man Who Married 14 Women In 7 States Arrested In Odisha)