ಪಠ್ಯ ಪರಿಷ್ಕರಣೆಗೆ ರಾಜ್ಯ ಸರ್ಕಾರ ನಿರ್ಧಾರ ಮಾಡಿದ್ದೇಕೆ? ತಜ್ಞರು ಕೊಟ್ಟ ಕಾರಣವೇನು? ಇಲ್ಲಿದೆ ವಿವರ
ಪಠ್ಯ ಪರಿಷ್ಕರಣೆಗೆ ರಾಜ್ಯ ಸರ್ಕಾರ ನಿರ್ಧಾರ ಮಾಡಿದ್ದೇಕೆ? ಯಾವ ಕಾರಣಕ್ಕೆ ಪಠ್ಯ ಬದಲಿಸಲು ಸಮಿತಿಯ ನಿರ್ಧಾರ? ಪಠ್ಯ ಪರಿಷ್ಕರಣೆ ಸಮಿತಿಯ ತಜ್ಞರು ಕೊಟ್ಟ ಸ್ಪಷ್ಟನೆ ಏನು? ಈ ಎಲ್ಲಾ ವಿವರ ಇಲ್ಲಿದೆ.
ಬೆಂಗಳೂರು: ಬಿಜೆಪಿ(BJP) ಜಾರಿಗೆ ತಂದ ಎಲ್ಲಾ ಜನ ವಿರೋಧಿ ಕಾನೂನುಗಳನ್ನ ಒಂದು ವರ್ಷದೊಳಗೆ ರದ್ದು ಮಾಡುವುದಾಗಿ ಪ್ರಣಾಳಿಕೆಯಲೇ ಹೇಳಿದ್ದ ಕಾಂಗ್ರೆಸ್(Congress), ಇದೀಗ ಆ ನಿಟ್ಟಿನಲ್ಲಿ ಹೆಜ್ಜೆ ಮುಂದಿಟ್ಟಿದೆ. ಐದು ಗ್ಯಾರಂಟಿ ಜಾರಿಯ ಜೊತೆ ಜೊತೆಗೆ ಬಿಜೆಪಿ ಕಾಲದಲ್ಲಿ ತರಲಾಗಿದ್ದ ಕಾಯ್ದೆಗಳಿಗೆ ಸರ್ಕಾರ ಆಪರೇಷನ್ ಶುರು ಮಾಡಿದೆ. ನಿನ್ನೆ(ಜೂನ್ 15) ಸಚಿವ ಸಂಪುಟ ಸಭೆಯಲ್ಲಿ ಬಿಜೆಪಿ ಕಾಲದಲ್ಲಿ ತರಲಾಗಿದ್ದ ಎರಡು ಕಾಯ್ದೆಗಳನ್ನ ರದ್ದು ಮಾಡುವ ವಿಚಾರವಾಗಿ ಹಾಗೂ ಪಠ್ಯ ಪರಿಷ್ಕರಣೆ(textbook revised )ಮತ್ತು ಬಿಜೆಪಿ ಕಾಲದ ಅಕ್ರಮಗಳ ತನಿಖೆ ಮಾಡುವ ಬಗ್ಗೆ ಮಹತ್ವದ ತೀರ್ಮಾನ ಕೈಗೊಳ್ಳಲಾಗಿದೆ. ಅದರಲ್ಲೂ ಪ್ರಮುಖವಾಗಿ ಪಠ್ಯ ಪರಿಷ್ಕರಣೆಗೆ ಸಂಬಂಧಿಸಿದಂತೆ ಕಾಂಗ್ರೆಸ್ ಹಾಗೂ ಬಿಜೆಪಿ ನಾಯಕರ ನಡುವಿನ ಮಾತಿನ ಸಂಘರ್ಷ ತಾರಕಕ್ಕೇರಿದೆ. ಪಠ್ಯ ಪರಿಷ್ಕರಣೆಗೆ ರಾಜ್ಯ ಸರ್ಕಾರ ನಿರ್ಧಾರ ಮಾಡಿದ್ದೇಕೆ? ಎನ್ನುವ ಪ್ರಶ್ನೆಗೆ ಪಠ್ಯ ಪುಸ್ತಕ ಪರಿಷ್ಕರಣಾ ಸಮಿತಿಯಿಂದಲೇ ಸಮರ್ಥನೆ ನೀಡಿದೆ. ಪಠ್ಯ ಬದಲಾಯಿಸಲು ಲಿಖಿತ ರೂಪದಲ್ಲಿ ಸಮರ್ಥನೆ ನೀಡಿರುವ ಶಿಕ್ಷಣ ತಜ್ಞರು, ಯಾವೆಲ್ಲ ಕಾರಣಕ್ಕೆ ಪಠ್ಯ ಬದಲಾಯಿಸ ಬೇಕಿದೆ ಎಂದು ಕಾರಣವನ್ನು ಸಹ ಕೊಟ್ಟಿದ್ದಾರೆ. ತಜ್ಞರು ನೀಡಿರುವ ಕಾರಣ ಮತ್ತು ಸಮರ್ಥನೆ ನೀಡಿರುವ ಮಾಹಿತಿ ಟಿವಿ9ಗೆ ಲಭ್ಯವಾಗಿದ್ದು, ಅದು ಈ ಕೆಳಗಿನಂತಿದೆ ನೋಡಿ.
ಪಠ್ಯ ಪುಸ್ತಕ ಪರಿಷ್ಕರಣಾ ಸಮಿತಿಯಿಂದಲೇ ಸಮರ್ಥನೆ
ಕೆಲವೊಂದು ಪಠ್ಯಗಳಲ್ಲಿ ಏಕವಚನಗಳನ್ನ ಅತಿಯಾಗಿ ಬಳಸಲಾಗಿದ್ದು, ಕೆಲ ವಾಖ್ಯಗಳು ಸಹ ವಿದ್ಯಾರ್ಥಿಗಳು ಓದಲು ಸಹಕಾರಿಯಾಗಿಲ್ಲ. ಈ ಚಿಕ್ಕವಯಸ್ಸಿನಲ್ಲಿ ಅಥವಾ ಈ ಪರಿಸ್ಥಿತಿಯಲ್ಲಿ ವಿದ್ಯಾರ್ಥಿಗಳು ಓದುವ ಅವಶ್ಯಕತೆ ಇಲ್ಲ ಎಂದು ಹೆಗ್ಡೆವಾರ್ ಹಾಗೂ ಸಾವರ್ಕರ್ ಪಾಠಕ್ಕೆ ಕೊಕ್ ನೀಡಿದ್ದಕ್ಕೆ ಸಮರ್ಥನೆ ನೀಡಲಾಗಿದೆ.
ಚಕ್ರವರ್ತಿ ಸೂಲಿಬೆಲೆ ಬರೆದಿರುವ ಭಗತ್ ಸಿಂಗ್ ಪಠ್ಯಕ್ಕೂ ಕತ್ತರಿ ಹಾಕುವುದಕ್ಕೆ ಕಾರಣ ಕೊಟ್ಟಿದ್ದು, ಈಗಾಗಲೇ ಭಗತ್ ಸಿಂಗ್ ಗೆ ಸಂಬಂಧಿಸಿದ ಸಾಕಷ್ಟು ಪಾಠಗಳಿವೆ. ಭಗತ್ ಸಿಂಗ್ ಬಗ್ಗೆ ಬರೆದಿರುವ ಲೇಖಕ ಚಕ್ರವರ್ತಿ ಸೂಲಿಬೇಲೆಯ ಬಗ್ಗೆ ಸಮಿತಿ ತಕರಾರು ಮಾಡಿದ್ದಾರೆ. ಚಕ್ರವರ್ತಿ ಸೂಲಿಬೇಲೆ ದ್ವೇಷಮಯ ವ್ಯಕ್ತಿತ್ವ ಇರುವ ಲೇಖಕ ಎಂದು ಸಮಿತಿ ಹೇಳಿದೆ. ಈ ಹಿನ್ನಲೆಯಲ್ಲಿ ಸೂಲಿಬೇಲೆ ಬರೆದಿರುವ ಪಠ್ಯವನ್ನು ಪರಿಷ್ಕರಣೆ ಮಾಡಲು ಸಮಿತಿ ನಿರ್ಧರಿಸಿದೆ ಎಂದು ಶಿಕ್ಷಣ ಇಲಾಖೆ ಉನ್ನತ ಮೂಲಗಳಿಂದ ತಿಳಿದುಬಂದಿದೆ.
ಪಠ್ಯದಿಂದ ಯಾವೆಲ್ಲ ಪಾಠ ಔಟ್? ಯಾವುದು ಇನ್?
ಹಿಂದಿನ ಸರ್ಕಾರ ಅವಧಿಯಲ್ಲಿ ಸೇರ್ಪಡೆಯಾಗಿದ್ದ ಆರ್’ಎಸ್ಎಸ್ ಸಂಸ್ಥಾಪಕ ಕೇಶವಬಲಿರಾಮ್ ಹೆಡಗೇವಾರ್, ಬರಹಗಾರ ಚಕ್ರವರ್ತಿ ಸೂಲಿಬೆಲೆ ಬರೆದಿರುವ ಗದ್ಯ, ಸಾವರ್ಕರ್ ಕುರಿತ ಪಠ್ಯ ಹಾಗೂ ಲೇಖಕ ಬನ್ನಂಜೆ ಗೋವಿಂದಾಚಾರ್ಯ ಅವರ ಪಠ್ಯಗಳನ್ನು ಕೈಬಿಡಲು ತೀರ್ಮಾನಿಸಲಾಗಿದೆ. ಇನ್ನು ಹಿಂದಿನ ಸರ್ಕಾರ ಕೈಬಿಟ್ಟಿದ್ದ ಸಾವಿತ್ರಿಬಾಯಿ ಪುಲೆ, ಅಂಬೇಡ್ಕರ್ ಅವರ ಕುರಿತ ನೀ ಹೋದ ಮರು ದಿನ ಲೇಖನ, ನೆಹರು ಅವರು ಮಗಳಿಗೆ ಬರೆದ ಪತ್ರ, ಟಿಪ್ಪು ಸುಲ್ತಾನ್ ಕುರಿತ ಪಠ್ಯ ಸೇರಿದಂತೆ ಹಲವು ವಿಚಾರಗಳನ್ನು ಸೇರ್ಪಡೆ ಮಾಡೆಗೆ ಮುಂದಾಗಿದೆ.
ಬಿಜೆಪಿ ಸರ್ಕಾರದ ಅವಧಿಯಲ್ಲಿ ವಿವಾದ ಹುಟ್ಟುಹಾಕಿದ್ದ ನಿರ್ಣಯಗಳಿಗೆ ಕೊಕ್ ಕೊಡುವ ಮೂಲಕ ಕಾಂಗ್ರೆಸ್ ಸರ್ಕಾರ ಬಿಜೆಪಿಗೆ ಶಾಕ್ ಕೊಟ್ಟಿದೆ. ಬಿಜೆಪಿ ಜಾರಿಗೆ ತಂದಿದ್ದ ಕಾಯ್ದೆಗಳನ್ನು ರದ್ದು ಪಡಿಸುವ ನಿರ್ಣಯಗಳನ್ನು ಸಿಎಂ ಸಿದ್ದರಾಮಯ್ಯ ನೇತೃತ್ವದ ಕ್ಯಾಬಿನೆಟ್ ತೆಗೆದುಕೊಂಡಿದೆ. ಈ ಮೂಲಕ ಬಿಜೆಪಿ ಹಾಗೂ ಕಾಂಗ್ರೆಸ್ ನಡುವಿನ ಸಮರ ತಾರಕಕ್ಕೇರಿದ್ದು ಕಾಂಗ್ರೆಸ್ ಮಹತ್ವದ ಹೆಜ್ಜೆ ಇಟ್ಟಂತಾಗಿದೆ.
