DJ Martin: ಡಿಜೆ ಜೊತೆ ಹೆಜ್ಜೆ ಹಾಕಿದ ಅಲ್ಲು ಅರ್ಜುನ್: ಯಾರೀ ಸೆಲೆಬ್ರಿಟಿ ಡಿಜೆ ಮಾರ್ಟಿನ್?
ಪುಷ್ಪ 2 ಚಿತ್ರೀಕರಣ ಶುರುವಾದ ಬಳಿಕ ಹೊರಗೆಲ್ಲೂ ಕಾಣಿಸಿಕೊಳ್ಳದ ಅಲ್ಲು ಅರ್ಜುನ್ ಡಿಜೆ ಮಾರ್ಟಿನ್ನ ಕಾನ್ಸರ್ಟ್ ನಲ್ಲಿ ಭಾಗವಹಿಸಿದ್ದಾರೆ. ಯಾರು ಈ ಡಿಜೆ ಮಾರ್ಟಿನ್ ಗ್ಯಾರಿಕ್ಸ್
Updated on: Mar 05, 2023 | 9:11 PM
‘ಪುಷ್ಪ‘ (Pushpa) ಸಿನಿಮಾದ ಭರ್ಜರಿ ಯಶಸ್ಸಿನ ಬಳಿಕ ಅಲ್ಲು ಅರ್ಜುನ್ (Allu Arjun) ರೇಂಜ್ ಬದಲಾಗಿದೆ. ಈಗ ‘ಪುಷ್ಪ 2’ ಸಿನಿಮಾದ ಚಿತ್ರೀಕರಣ ಪ್ರಾರಂಭವಾದ ಬಳಿಕವಂತೂ ಯಾವುದೇ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುತ್ತಿಲ್ಲ. ಶಾರುಖ್ ಖಾನ್ರ ಹೊಸ ಸಿನಿಮಾದಲ್ಲಿ ನಟಿಸುವ ಅವಕಾಶವನ್ನೂ ನಿರಾಕರಿಸಿದ್ದಾರೆ. ಆದರೆ ಹಠಾತ್ತನೇ ವಿದೇಶಿ ಡಿಜೆ ಒಬ್ಬರ ಕಾನ್ಸರ್ಟ್ನಲ್ಲಿ ಪಾಲ್ಗೊಂಡಿದ್ದು ಮಾತ್ರವಲ್ಲ ಅವರೊಟ್ಟಿಗೆ ಹೆಜ್ಜೆ ಸಹ ಹಾಕಿದ್ದಾರೆ.
ಡಿಕೆ ಮಾರ್ಟಿನ್ ಗಾರಿಕ್ಸ್ (DJ Martin Garrix) ಹೈದರಾಬಾದ್ನಲ್ಲಿ ಅದ್ಧೂರಿ ಕಾನ್ಸರ್ಟ್ ನಡೆಸಿದ್ದರು. ಶೋಗೆ ಕಿಕ್ಕಿರಿದು ಜನ ಸೇರಿ ಸಂಗೀತವನ್ನು ಎಂಜಾಯ್ ಮಾಡಿದ್ದಾರೆ. ಶೋ ನಡೆಯುವಾಗ ಧುತ್ತನೆ ವೇದಿಕೆ ಏರಿದ ನಟ ಅಲ್ಲು ಅರ್ಜುನ್ ತಮ್ಮದೇ ‘ಪುಷ್ಪ’ ಸಿನಿಮಾದ ‘ಊ ಅಂಟಾವ ಊ ಹು ಅಂಟಾವ’ ಹಾಡಿಗೆ ಲಘುವಾಗಿ ಹೆಜ್ಜೆ ಹಾಕಿದರು. ಅದನ್ನು ಡಿಜೆ ಮಾರ್ಟಿನ್ ಮೊಬೈಲ್ನಲ್ಲಿ ವಿಡಿಯೋ ಮಾಡಿದರು. ಬಳಿಕ ಇಬ್ಬರೂ ಫೋಟೊಕ್ಕೆ ಫೋಸು ಸಹ ನೀಡಿದರು.
ಇತ್ತೀಚೆಗೆ ಯಾವುದೇ ಸಿನಿಮಾ ಕಾರ್ಯಕ್ರಮಗಳಲ್ಲಿಯೂ ಪಾಲ್ಗೊಳ್ಳದ ಅಲ್ಲು ಅರ್ಜುನ್ ಡಿಜೆಯ ಸಂಗೀತ ಕಾರ್ಯಕ್ರಮದ ವೇದಿಕೆ ಏರಿದ್ದು ಏಕೆ? ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ. ಅಲ್ಲು ಅರ್ಜುನ್ ವೇದಿಕೆ ಹಂಚಿಕೊಂಡ ಡಿಜೆ ಮಾರ್ಟಿನ್ ಸಾಮಾನ್ಯ ಡಿಜೆಯಲ್ಲ. ವಿಶ್ವದ ಟಾಪ್ ಡಿಜೆಗಳಲ್ಲಿ ಒಬ್ಬರು.
ಡಿಜೆ ಮಾರ್ಟಿನ್ ಗಾರಿಕ್ಸ್ ವಿಶ್ವದ ಟಾಪ್ ಡಿಜೆ ಆಗಿರುವ ಜೊತೆಗೆ ಒಳ್ಳೆಯ ಸಂಗೀತಗಾರರೂ ಹೌದು. ಭಾರತ ಸೇರಿದಂತೆ ವಿಶ್ವದೆಲ್ಲೆಡೆ ಅಭಿಮಾನಿಗಳನ್ನು ಮಾರ್ಟಿನ್ ಹೊಂದಿದ್ದಾರೆ. ಇದೀಗ ಭಾರತದಲ್ಲಿ ಟೂರ್ ಮಾಡುತ್ತಿದ್ದಾರೆ.
ಅನಿಮಲ್ ಹಾಡಿನ ಮೂಲಕ ಜನಪ್ರಿಯತೆ ಗಳಿಸಿದ ಡಿಜೆ ಮಾರ್ಟಿನ್ 100 ಟಾಪ್ ಡಿಜೆಗಳ ಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದ್ದ ಅತ್ಯಂತ ಯುವ ಡಿಜೆ ಎಂಬ ಖ್ಯಾತಿ ಗಳಿಸಿದವರು. ಚಳಿಗಾಲದ ಒಲಿಂಪಿಕ್ಸ್ ಸೇರಿದಂತೆ ಇನ್ನೂ ಹಲವು ವಿಶ್ವ ಪ್ರಮುಖ ಸಮಾರಂಭಗಳಲ್ಲಿ ಇವರು ಕಾರ್ಯಕ್ರಮ ನೀಡಿದ್ದಾರೆ.
ಅತಿ ಹೆಚ್ಚು ಸಂಭಾವನೆ ಪಡೆವ ಹಾಗೂ ಸಂಪಾದನೆ ಮಾಡುವ ಡಿಜೆಗಳಲ್ಲಿ ಪ್ರಮುಖರು ಮಾರ್ಟಿನ್ ಗಾರೆಕ್ಸ್. ಇವರ ನೆಟ್ವರ್ತ್ ಬಾಲಿವುಡ್ನ ಸಲ್ಮಾನ್ ಖಾನ್ಗಿಂತಲೂ ಹೆಚ್ಚಿದೆ. ವಿದೇಶಿ ಟಾಪ್ ಡಿಜೆ ಆಗಿರುವ ಕಾರಣಕ್ಕೆ ನಟ ಅಲ್ಲು ಅರ್ಜುನ್ ಅವರೊಟ್ಟಿಗೆ ವೇದಿಕೆ ಹಂಚಿಕೊಂಡಿದ್ದಾರೆ. ಹೈದರಾಬಾದ್ನ ಕಾರ್ಯಕ್ರಮದಲ್ಲಿ ಡಿಜೆ ಮಾರ್ಟಿನ್ ತೆಲುಗಿನ ಕೆಲವು ಹಾಡುಗಳನ್ನು ಸಹ ರೀಮಿಕ್ಸ್ ಮಾಡಿದ್ದಾರೆ. ಅದರಲ್ಲಿ ಪುಷ್ಪ ಸಿನಿಮಾದ ಊ ಅಂಟಾವ ಹಾಡು ಸಹ ಒಂದು.
