‘ಟಾಕ್ಸಿಕ್’ ಟೀಕಿಸಿದವರಿಗೆ ಬಾಲಿವುಡ್​ ನಟನ ಖಡಕ್ ಉತ್ತರ

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾ ಜಾಗತಿಕ ಮಟ್ಟದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಈ ಬಹುನಿರೀಕ್ಷಿತ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಬಾಲಿವುಡ್ ನಟ ಅಕ್ಷಯ್ ಒಬೆರಾಯ್ ಚಿತ್ರದ ಬಗ್ಗೆ ಹರ್ಷ ವ್ಯಕ್ತಪಡಿಸಿದ್ದಾರೆ. ಭಾರತೀಯ ಚಿತ್ರರಂಗ ಹೆಮ್ಮೆಪಡುವಂತಹ ಅದ್ಭುತ ದೃಶ್ಯ ವೈಭವವನ್ನು ನಾವು ಸೃಷ್ಟಿಸಿದ್ದೇವೆ ಎಂದು ಅವರು ಹೇಳಿದ್ದಾರೆ. ತಮ್ಮ ಮೂರು ದಶಕಗಳ ಬಣ್ಣದ ಪಯಣದ ಕುರಿತು ಅವರು ನೆನಪುಗಳನ್ನು ಹಂಚಿಕೊಂಡಿದ್ದಾರೆ.

‘ಟಾಕ್ಸಿಕ್ ಚಿತ್ರದ ಭಾಗವಾಗಿರುವುದು ನನಗೆ ಅತ್ಯಂತ ಹೆಮ್ಮೆಯ ವಿಷಯ. ಬಾಕ್ಸ್ ಆಫೀಸ್‌ನಲ್ಲಿ ಈ ಚಿತ್ರ ಗಳಿಸುತ್ತಿರುವ ದಾಖಲೆಯ ಮೊತ್ತ ನಿಜಕ್ಕೂ ನಂಬಲಾಗದಂತಿದೆ. ಪ್ರೇಕ್ಷಕರಿಂದ ಸಿಗುತ್ತಿರುವ ಅದ್ಭುತ ಬೆಂಬಲ ಮತ್ತು ಪ್ರೀತಿ ಕಂಡು ನನ್ನ ಮನಸ್ಸು ತುಂಬಿ ಬಂದಿದೆ. ಈ ಸಿನಿಮಾ ನನ್ನ ವೃತ್ತಿಜೀವನದಲ್ಲಿ ಅತ್ಯಂತ ವಿಶೇಷ ಸ್ಥಾನವನ್ನು ಪಡೆದುಕೊಂಡಿದೆ’ ಎಂದು ನಟ ಅಕ್ಷಯ್ ಸ್ಪಷ್ಟಪಡಿಸಿದ್ದಾರೆ.

ಯಶ್ ಅವರಿಂದ ಪ್ರೇರಣೆ ಪಡೆದು ತಾವು ಕೂಡ ಶೀಘ್ರದಲ್ಲೇ ಬರವಣಿಗೆ ಕ್ಷೇತ್ರಕ್ಕೆ ಇಳಿಯುವುದಾಗಿ ಅಕ್ಷಯ್ ಒಬೆರಾಯ್ ತಿಳಿಸಿದ್ದಾರೆ. ‘ಯಶ್ ಅವರು ಸ್ವತಃ ಕಥೆಗಳನ್ನು ಆಯ್ಕೆ ಮಾಡಿ ಸೃಷ್ಟಿಸುವ ರೀತಿ ನನಗೆ ತುಂಬಾ ಇಷ್ಟವಾಯಿತು. ಇದರ ಜೊತೆಗೆ ಪ್ರಸಿದ್ಧ ನಿರ್ದೇಶಕ ನೀರಜ್ ಪಾಂಡೆ ಹಾಗೂ ಹಿರಿಯ ನಟ ಮನೋಜ್ ಬಾಜಪೇಯಿ ಅವರೊಂದಿಗಿನ ಹೊಸ ಪ್ರಾಜೆಕ್ಟ್‌ನಲ್ಲಿಯೂ ನಾನು ಭಾಗಿಯಾಗುತ್ತಿದ್ದೇನೆ. ಜಿಎಸ್‌ಟಿ ಹಾಗೂ ಆಶ್ರಮ್ ಸರಣಿಗಳಲ್ಲಿ ನಟಿಸಿದ್ದು ನನಗೆ ಹೊಸ ಅನುಭವ ತಂದಿದೆ’ ಎಂದು ಹೆಮ್ಮೆಯಿಂದ ಹೇಳಿದ್ದಾರೆ.

ತಮ್ಮ ಹಳೆಯ ‘ಗುರ್‌ಗಾಂವ್’ ಸಿನಿಮಾವನ್ನು ನಟ ಈ ವೇಳೆ ನೆನಪಿಸಿಕೊಂಡಿದ್ದಾರೆ. ‘ಆ ಸಿನಿಮಾ ಬಿಡುಗಡೆಯಾದಾಗ ಸರಿಯಾದ ವೇದಿಕೆ ಸಿಗದೆ ನಾನು ತುಂಬಾ ಬೇಸರಗೊಂಡಿದ್ದೆ. ಆದರೆ ಇಂದು ಫೈಟರ್ ನಂತಹ ಬಿಗ್ ಬಜೆಟ್ ಸಿನಿಮಾದ ಜೊತೆಗೆ ಜನರು ಗುರ್‌ಗಾಂವ್ ಚಿತ್ರವನ್ನೂ ನೆನಪಿಸಿಕೊಳ್ಳುತ್ತಾರೆ. ಸಣ್ಣ ಬಜೆಟ್‌ನ ಆ ಸಿನಿಮಾ ನನ್ನ ಜೀವನಕ್ಕೆ ಮತ್ತು ವೃತ್ತಿಜೀವನಕ್ಕೆ ಅತ್ಯಂತ ಪ್ರಮುಖ ತಿರುವು ನೀಡಿತು’ ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ: ‘ಟಾಕ್ಸಿಕ್ ಸಿನಿಮಾದಿಂದ ಅರ್ಧಕ್ಕೆ ಹೊರಬಂದೆ’; ಬಿಗ್ ಬಾಸ್ ಮಾಜಿ ಸ್ಪರ್ಧಿಯ ಶಾಕಿಂಗ್ ಹೇಳಿಕೆ

‘ಚಿತ್ರರಂಗದಲ್ಲಿ ಯಶಸ್ಸು ಸಿಗುವ ಮುನ್ನ ನಟಿಸುವ ಪ್ರತಿಯೊಬ್ಬ ಕಲಾವಿದನೂ ಪಡುವ ಕಷ್ಟ ಯಾರಿಗೂ ತಿಳಿಯುವುದಿಲ್ಲ. ನಿರಂತರ ಶ್ರಮ ಹಾಗೂ ವೃತ್ತಿಯ ಮೇಲಿನ ಪ್ರೀತಿ ಮಾತ್ರ ನಮ್ಮನ್ನು ಈ ಕ್ಷೇತ್ರದಲ್ಲಿ ಉಳಿಸುತ್ತದೆ. ನಟನೆ ನನಗೆ ಸಾಕಷ್ಟು ನೋವು ಮತ್ತು ಸಂತೋಷ ಎರಡನ್ನೂ ನೀಡಿದೆ. ನನ್ನ ನೆಚ್ಚಿನ ಕೆಲಸವನ್ನು ಮಾಡಲು ನಾನು ಯಾವುದೇ ರೀತಿಯ ಕಷ್ಟಕ್ಕೂ ಸಿದ್ಧನಾಗಿದ್ದೇನೆ’ ಎಂದು ಅಕ್ಷಯ್ ಒಬೆರಾಯ್ ತಮ್ಮ ಮನದಾಳ ಹಂಚಿಕೊಂಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.