ಗದರ್ 2: ಮತ್ತೆ ಲಾಹೋರ್ಗೆ ನುಗ್ಗಿದ ತಾರಾ ಸಿಂಗ್, ಈ ಬಾರಿ ಏನು ಕಿತ್ತೊಗೆಯುತ್ತಾನೆ?
Gadar 2: 2001 ರಲ್ಲಿ ಬಿಡುಗಡೆ ಆಗಿ ಸೂಪರ್-ಡೂಪರ್ ಹಿಟ್ ಆಗಿದ್ದ ಗದರ್ ಸಿನಿಮಾದ ಎರಡನೇ ಭಾಗ ಇದೀಗ 22 ವರ್ಷಗಳ ಬಳಿಕ ಬಿಡುಗಡೆ ಆಗುತ್ತಿದೆ.
Updated on: Jun 12, 2023 | 5:57 PM
ಬಾಲಿವುಡ್ನ (Bollywood) 2000 ರ ದಶಕದ ಕಲ್ಟ್ ಕ್ಲಾಸಿಕ್ ಸಿನಿಮಾಗಳ ಪಟ್ಟಿಯಲ್ಲಿ ಗದರ್ (Gadar) ಸಹ ಒಂದು. ದಿಲ್ ವಾಲೆ ದುಲ್ಹನಿಯಾ ಲೇ ಜಾಯೆಂಗೆ, ಕುಚ್ ಕುಚ್ ಹೋತಾ ಹೇ, ಹಮ್ ಆಪ್ಕೆ ಹೈ ಕೋನ್ ಸಿನಿಮಾಗಳ ಜೊತೆಗೆ ಗದರ್ ಸಹ ನಿಲ್ಲುತ್ತದೆ. ಸನ್ನಿ ಡಿಯೋಲ್, ಅಮೀಶಾ ಪಟೇಲ್ ನಟಿಸಿದ್ದ ಈ ಸಿಖ್-ಮುಸ್ಲಿಂ ಪ್ರೇಮಕತೆ ಸಿನಿಮಾ ಆಗಿನ ಕಾಲಕ್ಕೆ ಭಾರತ ಹಾಗೂ ಪಾಕಿಸ್ತಾನ ಎರಡೂ ದೇಶಗಳಲ್ಲಿ ಸೂಪರ್ ಡೂಪರ್ ಹಿಟ್ ಆಗಿತ್ತು. ಇದೀಗ ಈ ಸಿನಿಮಾದ ಏರಡನೇ ಭಾಗ ಬರುತ್ತಿದೆ ಅದೂ 22 ವರ್ಷಗಳ ಬಳಿಕ.
ಗದರ್ ಸಿನಿಮಾದ ಎರಡನೇ ಭಾಗ ಗದರ್ 2 ಸಿನಿಮಾದ ಚಿತ್ರೀಕರಣ ಈಗಾಗಲೇ ಮುಗಿದಿದ್ದು ಸಿನಿಮಾದ ಟೀಸರ್ ಇದೀಗ ಬಿಡುಗಡೆ ಆಗಿದೆ. ಗದರ್ ಮೊದಲ ಭಾಗದಲ್ಲಿ ತಾರಾ ಸಿಂಗ್ ಪಾತ್ರಧಾರಿ ತಾರಾ ಸಿಂಗ್ ಲಾಹೋರ್ಗೆ ನುಗ್ಗಿ ಅಬ್ಬರ ಎಬ್ಬಿಸಿದ್ದ. ಇದೀಗ ಗದರ್ 2 ಟೀಸರ್ ಪ್ರಕಾರ ತಾರಾ ಸಿಂಗ್ ಮತ್ತೆ ಲಾಹೋರ್ಗೆ ನುಗ್ಗಿದ್ದಾರೆ. ಕಳೆದ ಬಾರಿ ಹ್ಯಾಂಡ್ಪಂಪ್ ಕಿತ್ತು ಕೈಗೆತ್ತಿಕೊಂಡಿದ್ದ ತಾರಾ ಸಿಂಗ್ ಈ ಬಾರಿ ಬಂಡಿಯ ಚಕ್ರವನ್ನು ಕಿತ್ತು ಎಸೆದಿದ್ದಾರೆ. ಒಟ್ಟಿನಲ್ಲಿ ತಾರಾ ಸಿಂಗ್ರ ಭಿನ್ನ ಮಾದರಿಯ ಫೈಟ್ ಗದರ್ 2 ನಲ್ಲೂ ಮುಂದುವರೆದಿದೆ.
22 ವರ್ಷದ ಬಳಿಕ ಬಿಡುಗಡೆ ಆಗುತ್ತಿದ್ದರೂ ಸಹ ಗದರ್ 2 ಸಿನಿಮಾದ ಕತೆ ನಡೆಯುವುದು 1971ರ ಅವಧಿಯಲ್ಲಿ. ಟೀಸರ್ನಲ್ಲಿ ಮಹಿಳೆಯೊಬ್ಬರ ಹಿನ್ನೆಲೆ ಧ್ವನಿ ಇದ್ದು ತಾರಾ ಸಿಂಗ್ ಪಾಕಿಸ್ತಾನದ ಅಳಿಯ, ಈ ಬಾರಿ ವರದಕ್ಷಿಣೆ ಹೆಸರಲ್ಲಿ ಪೂರ್ತಿ ಲಾಹೋರ್ ಅನ್ನೇ ತೆಗೆದುಕೊಂಡು ಹೋಗುತ್ತಾನೆ ಎಂಬ ಸಂಭಾಷಣೆ ಕೇಳುತ್ತದೆ. ಅಲ್ಲಿಗೆ ಗದರ್ 2 ಸಿನಿಮಾ ಸಹ ಭಾರತ-ಪಾಕಿಸ್ತಾನದ ಕುರಿತಾದ ಕತೆಯನ್ನು ಹೊಂದಿರುವುದು ಪಕ್ಕಾ ಆಗಿದೆ. ಮೊದಲ ಭಾಗದ ಕತೆ ನಡೆದಿದ್ದ ಲಾಹೋರ್ನಲ್ಲಿಯೇ ಎರಡನೇ ಭಾಗದ ಕತೆಯೂ ನಡೆಯಲಿದೆ. ಮೊದಲ ಭಾಗದಲ್ಲಿ ತಾರಾ ಸಿಂಗ್ ಹಾಗೂ ಶಕೀನ್ಗೆ ಮಗನೊಬ್ಬ ಜನಿಸಿದ್ದ ಅವನ ಪ್ರೇಮಕತೆಯನ್ನು ಗದರ್ 2 ಸಿನಿಮಾ ಒಳಗೊಂಡಿರುವ ಸಾಧ್ಯತೆ ಇದೆ. ಆದರೆ ಟೀಸರ್ನಲ್ಲಿ ಈ ಬಗ್ಗೆ ಯಾವುದೇ ಸುಳಿವಿಲ್ಲ.
ಗದರ್ 2 ಸಿನಿಮಾ ಆಗಸ್ಟ್ 11 ರಂದು ತೆರೆಗೆ ಬರಲಿದೆ. ಗದರ್ ಸಿನಿಮಾದಲ್ಲಿ ನಟಿಸಿದ್ದ ಸನ್ನಿ ಡಿಯೋಲ್, ಅಮೀಷಾ ಪಟೇಲ್ ಅವರುಗಳೇ ಈ ಸಿನಿಮಾದಲ್ಲಿಯೂ ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಇವರ ಜೊತೆಗೆ ಯುವನಟರಾದ ಉತ್ಕರ್ಷ್ ಶರ್ಮಾ ಹಾಗೂ ಸಿಮ್ರತ್ ಕೌರ್ ನಟಿಸಿದ್ದಾರೆ. ವಿಲನ್ ಪಾತ್ರದಲ್ಲಿ ಮನೀಷ್ ವಾಡಾ ಹಾಗೂ ಮೀರ್ ಸರ್ವಾರ್ ಇದ್ದಾರೆ.
ಗದರ್ 2 ಸಿನಿಮಾ ಬಿಡುಗಡೆ ಆಗುವ ಕಾರಣ ಕಳೆದ ವಾರವಷ್ಟೆ ಗದರ್ ಸಿನಿಮಾದ ಮೊದಲ ಭಾಗ ಬಿಡುಗಡೆ ಆಗಿತ್ತು. ಮರುಬಿಡುಗಡೆ ಆದ ಮೊದಲ ವೀಕೆಂಡ್ನಲ್ಲಿ ಈ ಸಿನಿಮಾ 1.50 ಕೋಟಿ ಹಣ ಗಳಿಕೆ ಮಾಡಿದೆ. ಗದರ್ ಏಕ್ ಪ್ರೇಮ್ ಕಥಾ ಸಿನಿಮಾ 2001 ರಲ್ಲಿ ಬಿಡುಗಡೆ ಆಗಿತ್ತು. ಆಗ ಈ ಸಿನಿಮಾವನ್ನು ಅನಿಲ್ ಶರ್ಮಾ ನಿರ್ದೇಶನ ಮಾಡಿದ್ದರು. ಆಗಿನ ಕಾಲಕ್ಕೆ ಈ ಸಿನಿಮಾದ ಸುಮಾರು 5 ಕೋಟಿ ಟಿಕೆಟ್ಗಳು ಮಾರಾಟವಾಗಿದ್ದವು. ಇದು ಆಗಿನ ಕಾಲಕ್ಕೆ ಬಹುದೊಡ್ಡ ದಾಖಲೆ. ಈ ಸಿನಿಮಾ ಭಾರತ ಮಾತ್ರವೇ ಅಲ್ಲದೆ ಪಾಕಿಸ್ತಾನದಲ್ಲಿಯೂ ಸೂಪರ್ ಹಿಟ್. ಕೆನಡಾ, ಯುಎಸ್ಎ, ಬ್ರಿಟನ್ಗಳಲ್ಲಿಯೂ ಸೂಪರ್ ಹಿಟ್ ಆಗಿತ್ತು. ಇದೀಗ ಗದರ್ 2 ಸಿನಿಮಾವನ್ನು ಸಹ ಅನಿಲ್ ಶರ್ಮಾ ಅವರೇ ನಿರ್ದೇಶನ ಮಾಡುತ್ತಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
