Shah Rukh Khan: ಶಾರುಖ್ ಖಾನ್ ಹೆಸರನ್ನು ಅಭಿನವ್ ಎಂದು ಬದಲಾಯಿಸಿದ್ದ ಪತ್ನಿ ಗೌರಿ ಖಾನ್; ಕಾರಣ ಏನು?
Shah Rukh Khan Birthday: ಮದುವೆಯಾಗಿ ಹಲವು ವರ್ಷಗಳು ಕಳೆದ ಬಳಿಕ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಗೌರಿ ಖಾನ್ ಈ ಬಗ್ಗೆ ಮಾತಾಡಿದ್ದರು. ‘ಈಗ ಆ ದಿನಗಳನ್ನು ನೆನಪಿಸಿಕೊಂಡರೆ ಬಹಳ ಹುಡುಗಾಟಿಕೆ ಅನಿಸುತ್ತದೆ’ ಎಂದು ಅವರು ಹೇಳಿದ್ದರು. ಮದುವೆ ನಂತರ ಹಿಂದೂ ಮತ್ತು ಮುಸ್ಲಿಂ ಎರಡೂ ಧರ್ಮವನ್ನು ಈ ದಂಪತಿ ಪಾಲಿಸುತ್ತಿದ್ದಾರೆ.
ಭಾರತೀಯ ಚಿತ್ರರಂಗದಲ್ಲಿ ನಟ ಶಾರುಖ್ ಖಾನ್ (Shah Rukh Khan) ಅವರು ಮಾಡಿರುವ ಸಾಧನೆ ಅಪಾರ. ಯಾವುದೇ ಗಾಢ್ ಫಾದರ್ ಇಲ್ಲದೇ ಬಂದ ಅವರು ನಂತರ ದೊಡ್ಡ ಮಟ್ಟದ ಖ್ಯಾತಿ ಗಳಿಸಿದರು. ಈಗ ಶಾರುಖ್ ಖಾನ್ ಅವರಿಗೆ ಹೊಸದಾಗಿ ಯಾವುದೇ ಪರಿಚಯ ಬೇಕಿಲ್ಲ. ಭಾರತದಲ್ಲಿ ಮಾತ್ರವಲ್ಲದೇ ವಿಶ್ವದ ಬೇರೆ ಬೇರೆ ದೇಶಗಳಲ್ಲಿ ಅವರಿಗೆ ಫ್ಯಾನ್ಸ್ ಇದ್ದಾರೆ. ಬಾಲಿವುಡ್ನಲ್ಲಿ ಬಹುಬೇಡಿಕೆಯ ಹೀರೋ ಆಗಿ ಅವರು ನೆಲೆ ಕಂಡುಕೊಂಡಿದ್ದಾರೆ. ಇಂದು (ನವೆಂಬರ್ 2) ಅವರಿಗೆ ಜನ್ಮದಿನದ (Shah Rukh Khan Birthday) ಸಂಭ್ರಮ. ಆ ಪ್ರಯುಕ್ತ ಒಂದಷ್ಟು ಹಳೇ ಘಟನೆಗಳನ್ನು ಅಭಿಮಾನಿಗಳು ಮೆಲುಕು ಹಾಕುತ್ತಿದ್ದಾರೆ. ಆಸಕ್ತಿಕರ ವಿಚಾರವೇನೆಂದರೆ ಶಾರುಖ್ ಖಾನ್ಗೆ ಅಭಿನವ್ ಎಂಬ ಮತ್ತೊಂದು ಹೆಸರು ಸಹ ಇದೆ. ಅವರಿಗೆ ಅಭಿನವ್ ಎಂದು ನಾಮಕರಣ ಮಾಡಿದ್ದು ಅವರ ಹೆಂಡತಿ ಗೌರಿ ಖಾನ್ (Gauri Khan)!
ಶಾರುಖ್ ಖಾನ್ಗೆ ಅಭಿನವ್ ಎಂದು ಹೆಸರು ಇಟ್ಟಿದ್ದಕ್ಕೆ ಕಾರಣ ಏನು? ಇದಕ್ಕೆ ಉತ್ತರ ಬೇಕು ಎಂದರೆ 32 ವರ್ಷ ಹಿಂದಿನ ಘಟನೆ ಕೆದಕಬೇಕು. ಗೌರಿ ಮತ್ತು ಶಾರುಖ್ ಅವರದ್ದು ಪ್ರೇಮ ವಿವಾಹ. 1991ರಲ್ಲಿ ಅವರಿಬ್ಬರು ಮದುವೆಯಾದರು. ಆಗ ಶಾರುಖ್ ಖಾನ್ ಇನ್ನೂ ಫೇಮಸ್ ಆಗಿರಲಿಲ್ಲ. ಗೌರಿ ಮತ್ತು ಶಾರುಖ್ ಖಾನ್ ಅವರದ್ದು ಅಂತರ್ ಧರ್ಮೀಯ ವಿವಾಹ. ಆ ಕಾರಣದಿಂದ ಈ ಮದುವೆಗೆ ಗೌರಿ ಮನೆಯವರು ಒಪ್ಪಿಕೊಳ್ಳುವುದು ಕಷ್ಟವಾಗಿತ್ತು. ಹೇಗೋ ಕಷ್ಟಪಟ್ಟು ಫ್ಯಾಮಿಲಿಯವರನ್ನು ಒಪ್ಪಿಸಿದ ಬಳಿಕ ಗೌರಿ ಮತ್ತು ಶಾರುಖ್ ಮದುವೆ ನಡೆಯಿತು. ಆಗಲೇ ಹೆಸರು ಬದಲಾಯಿಸುವ ಪ್ರಸಂಗ ನಡೆಯಿತು.
ಇದನ್ನೂ ಓದಿ: ಮಾಸ್ ಬಿಟ್ಟು ಕ್ಲಾಸ್ ಆದ ಶಾರುಖ್ ಖಾನ್; ಬರ್ತ್ಡೇಗೆ ‘ಡಂಕಿ’ ಸಿನಿಮಾ ಟೀಸರ್ ರಿಲೀಸ್
ಗೌರಿ ಖಾನ್ ಕುಟುಂಬದ ಸದಸ್ಯರಿಗೆ ಶಾರುಖ್ ಕೂಡ ಹಿಂದೂ ಧರ್ಮದವರು ಎಂಬ ಫೀಲಿಂಗ್ ಬರಬೇಕು ಎನ್ನುವ ಕಾರಣಕ್ಕೆ ಅಭಿನವ್ ಎಂದು ಹೆಸರು ಇಡಲು ಗೌರಿ ಖಾನ್ ಅವರು ನಿರ್ಧರಿಸಿದ್ದರು. ಮದುವೆಯಾಗಿ ಹಲವು ವರ್ಷಗಳು ಕಳೆದ ಬಳಿಕ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಗೌರಿ ಖಾನ್ ಅವರು ಈ ಬಗ್ಗೆ ಮಾತನಾಡಿದ್ದರು. ‘ಈಗ ಆ ದಿನಗಳನ್ನು ನೆನಪಿಸಿಕೊಂಡರೆ ಬಹಳ ಹುಡುಗಾಟಿಕೆ ಅನಿಸುತ್ತದೆ’ ಎಂದು ಅವರು ಹೇಳಿದ್ದರು. ಮದುವೆ ಬಳಿಕ ಹಿಂದೂ ಮತ್ತು ಮುಸ್ಲಿಂ ಎರಡೂ ಧರ್ಮವನ್ನು ಈ ದಂಪತಿ ಪಾಲಿಸುತ್ತಿದ್ದಾರೆ.
ಇದನ್ನೂ ಓದಿ: ಶಾರುಖ್ ಖಾನ್ ಜನ್ಮದಿನ: 6,300 ಕೋಟಿ ರೂಪಾಯಿ ಒಡೆಯನಿಗೆ ಹಣ ಹೇಗೆಲ್ಲ ಬರುತ್ತೆ ಗೊತ್ತಾ?
ಗೌರಿ ಖಾನ್ ಅವರು ಅಭಿನವ್ ಎಂದು ನಾಮಕರಣ ಮಾಡಿದ್ದೇನೋ ನಿಜ. ಆದರೆ ಚಿತ್ರರಂಗದಲ್ಲಿ ಶಾರುಖ್ ಖಾನ್ ಎಂಬ ಹೆಸರಿನಿಂದಲೇ ಅವರು ಗುರುತಿಸಿಕೊಂಡರು. ಹಾಗಾಗಿ ಅಭಿನವ್ ಎಂಬ ಹೆಸರು ಹೆಚ್ಚು ಬಳಕೆಗೆ ಬರಲಿಲ್ಲ. ಬಾಲಿವುಡ್ನಲ್ಲಿ ಅನೇಕ ಸೂಪರ್ ಹಿಟ್ ಸಿನಿಮಾಗಳನ್ನು ಶಾರುಖ್ ಖಾನ್ ನೀಡಿದರು. ವಿಶ್ವಾದ್ಯಂತ ಅವರಿಗೆ ಖ್ಯಾತಿ ಸಿಕ್ಕಿತು. ಈಗ ಅವರಿಗೆ 58 ವರ್ಷ ವಯಸ್ಸು. ಈ ಪ್ರಾಯದಲ್ಲೂ ಅವರು ಸಖತ್ ಬೇಡಿಕೆ ಉಳಿಸಿಕೊಂಡಿದ್ದಾರೆ. 2023ರಲ್ಲಿ ಅವರು ನಟಿಸಿದ ‘ಪಠಾಣ್’ ಮತ್ತು ‘ಜವಾನ್’ ಸಿನಿಮಾಗಳು ಸೂಪರ್ ಹಿಟ್ ಆಗಿವೆ. ‘ಡಂಕಿ’ ಚಿತ್ರ ಬಿಡುಗಡೆಗೆ ಸಜ್ಜಾಗುತ್ತಿದೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.