ಭಾರತೀಯ ಮಿಲಿಟರಿ ಆಪರೇಷನ್ ಬಗ್ಗೆ ಬಂದಿರುವ ಸಿನಿಮಾಗಳಿವು

ಭಾರತೀಯ ಸೇನೆ, ಪಾಕ್ ಆಕ್ರಮಿತ ಕಾಶ್ಮೀರದ ಉಗ್ರರ ನೆಲೆಗಳ ಮೇಲೆ ದಾಳಿ ನಡೆಸಿದ್ದು ಹಲವು ಭಯೋತ್ಪಾದಕರನ್ನು ಹೊಡೆದುರಿಳಿಸಿದ್ದಾರೆ. ಆಪರೇಷನ್ ಸಿಂಧೂರ ಹೆಸರಿನಲ್ಲಿ ಈ ದಾಳಿಗಳನ್ನು ಮಾಡಲಾಗಿದ್ದು, ಉಗ್ರರಿಗೆ ತಕ್ಕ ಪಾಠವನ್ನು ಭಾರತೀಯ ಸೇನೆ ಕಲಿಸಿದೆ. ಭಾರತೀಯ ಸೇನೆಯ ಈ ಶೌರ್ಯಮಯ ಆಪರೇಷನ್​ಗೆ ಭಾರತೀಯರಿಂದ ಮೆಚ್ಚುಗೆ ವ್ಯಕ್ತವಾಗಿದೆ. ರಾಜಕಾರಣಿಗಳು, ಸಿನಿಮಾ ಸೆಲೆಬ್ರಿಟಿಗಳು ಸಹ ಸೇನೆಯ ಸಾಹಸವನ್ನು ಕೊಂಡಾಡುತ್ತಿದ್ದಾರೆ. ಭಾರತೀಯ ಸೇನೆಗೆ ಈ ರೀತಿಯ ದಾಳಿಗಳು ಹೊಸದೇನು ಅಲ್ಲ. ಈ ಹಿಂದೆಯೂ ಅನೇಕ ದಾಳಿಗಳನ್ನು ಮಾಡಿವೆ, ಅದರ ಬಗ್ಗೆ ಬಾಲಿವುಡ್ ಈಗಾಗಲೇ ಅನೇಕ ಸಿನಿಮಾಗಳು ಸಹ ಬಂದಿವೆ. ಅವಲ್ಲಿ ಮುಖ್ಯವಾದ ಕೆಲವು ಸಿನಿಮಾಗಳ ಮಾಹಿತಿ ಇಲ್ಲಿದೆ…

1971

‘1971’ ನಿಜ ಘಟನೆ ಆಧರಿತ ಸಿನಿಮಾ. ಭಾರತದ ಆರು ಮಂದಿ ಸೈನಿಕರು, ಪಾಕಿಸ್ತಾನಿ ಸೈನಿಕರಿಂದ ತಪ್ಪಿಸಿಕೊಂಡು ಭಾರತಕ್ಕೆ ಮರಳುವ ಪಯಣದ ಕತೆ. 1971 ರ ಭಾರತ-ಪಾಕಿಸ್ತಾನ ಯುದ್ಧದಲ್ಲಿ ಪಾಕಿಸ್ತಾನಿ ಸೈನಿಕರಿಗೆ ಸೆರೆ ಸಿಕ್ಕ ಆರು ಮಂದಿ ಸೈನಿಕರು ಆ ಬಳಿಕ ಸೈನಿಕರ ಕಪಿಮುಷ್ಠಿಯಿಂದ ತಪ್ಪಿಸಿಕೊಂಡು ಬಂದ ಕತೆಯನ್ನು ಈ ಸಿನಿಮಾ ಒಳಗೊಂಡಿದೆ. 2017ರಲ್ಲಿ ಈ ಸಿನಿಮಾ ಬಿಡುಗಡೆ ಆಗಿತ್ತು.

ಶೇರ್ಷಾ

ಸಿದ್ಧಾರ್ಥ್ ಮಲ್ಹೋತ್ರಾ ನಟಿಸಿರುವ ‘ಶೇರ್ಷಾ’ 1999 ರ ಕಾರ್ಗಿಲ್ ಯುದ್ಧದ ಘಟನೆ ಆಧರಿಸಿದೆ. ಕ್ಯಾಪ್ಟನ್ ವಿಕ್ರಂ ಭಾತ್ರಾ ತೋರಿಸಿದ ಕೆಚ್ಚೆದೆಯ ಹೋರಾಟದ ಕತೆಯನ್ನು ‘ಶೇರ್ಷಾ’ ಸಿನಿಮಾ ಒಳಗೊಂಡಿದೆ. ಈ ಸಿನಿಮಾ ಅಮೆಜಾನ್ ಪ್ರೈಂನಲ್ಲಿ ವೀಕ್ಷಣೆಗೆ ಲಭ್ಯವಿದೆ.

ಎಲ್​ಓಸಿ

ಸಂಜಯ್ ದತ್, ಅಜಯ್ ದೇವಗನ್, ಸೈಫ್ ಅಲಿ ಖಾನ್ ಇನ್ನೂ ಕೆಲವು ಪ್ರಮುಖ ನಟರು ನಟಿಸಿರುವ ‘ಎಲ್​ಓಸಿ: ಲೈನ್ ಆಫ್ ಕಂಟ್ರೋಲ್’ ಸಿನಿಮಾ 2003 ರಲ್ಲಿ ಬಿಡುಗಡೆ ಆಗಿತ್ತು. ಈ ಸಿನಿಮಾ 1999ರ ಆಪರೇಷನ್ ವಿಜಯ್ ಮೇಲೆ ಆಧಾರಿತವಾಗಿದೆ. ಸಿನಿಮಾ ದೊಡ್ಡ ಯಶಸ್ಸು ಗಳಿಸಿತ್ತು.

ದಿ ಗಾಜಿ ಅಟ್ಯಾಕ್

ರಾಣಾ ದಗ್ಗುಬಾಟಿ ಸೇರಿದಂತೆ ಹಲವು ಪ್ರಮುಖ ನಟರು ನಟಿಸಿದ್ದ ‘ಗಾಜಿ’ ಸಿನಿಮಾ ಸಹ ನಿಜ ಘಟನೆ ಆಧರಿತ ಸಿನಿಮಾ. 1971 ರಲ್ಲಿ ಭಾರತದ ಐಎನ್​ಎಸ್ ವಿಕ್ರಾಂತ್ ಅನ್ನು ನಾಶ ಮಾಡುವ ಉದ್ದೇಶದಿಂದ ಭಾರತ ಸಮುದ್ರ ಭಾಗಕ್ಕೆ ಬಂದಿದ್ದ ಪಾಕಿಸ್ತಾನದ ಸಬ್​ ಮರೀನ್ ಗಾಜಿಯನ್ನು ನಾಶ ಮಾಡಿದ ಕತೆಯನ್ನು ಇದು ಒಳಗೊಂಡಿದೆ.

ಹಿಂದೂಸ್ತಾನ್​ ಕಿ ಕಸಮ್

1971 ರ ಇಂಡೊ-ಪಾಕಿಸ್ತಾನ ಯುದ್ಧದ ಸಮಯದಲ್ಲಿ ನಡೆಸಿದ ‘ಆಪರೇಷನ್ ಕ್ಯಾಕ್ಟಸ್ ಲಿಲ್ಲಿ’ ಆಪರೇಷನ್​ನ ಆಧರಿಸಿ ನಿರ್ಮಾಣವಾದ ಸಿನಿಮಾ ಇದು. ಅತ್ಯಂತ ಕ್ಲಿಷ್ಟಕರವಾದ ಮೆಘನಾ ನದಿಯನ್ನು ದಾಟಿ ಹೋಗಿ ಪಾಕ್ ಸೈನ್ಯದ ಮೇಲೆ ದಾಳಿ ಮಾಡಿದ್ದರು. ಮೂರು ದಿನದಲ್ಲಿ ಈ ಆಪರೇಷನ್ ನಡೆದಿತ್ತು. ಇದರ ಕತೆಯನ್ನು ಸಿನಿಮಾ ಒಳಗೊಂಡಿದೆ.

ಪಲ್ಟನ್

1967ರ ಇಂಡೊ-ಚೈನೀಸ್ ಯುದ್ಧದ ಕತೆಯನ್ನು ಒಳಗೊಂಡ ‘ಪಲ್ಟನ್’ ಸಿನಿಮಾ 2018 ರಲ್ಲಿ ಬಿಡುಗಡೆ ಆಗಿತ್ತು. ನಾತು ಲಾ, ಚೋ ಲಾ ಗಲಭೆಗಳ ಕತೆಯನ್ನು ಈ ಸಿನಿಮಾ ಒಳಗೊಂಡಿದೆ.

ಉರಿ

ಉರಿ ದಾಳಿಗೆ ಪ್ರತಿಕಾರವಾಗಿ ಭಾರತ ಮಾಡಿದ ಸರ್ಜಿಕಲ್ ಸ್ಟ್ರೈಕ್​ನ ಕತೆಯನ್ನು ‘ಉರಿ’ ಸಿನಿಮಾ ಒಳಗೊಂಡಿದೆ. ಸಿನಿಮಾದಲ್ಲಿ ವಿಕ್ಕಿ ಕೌಶಲ್ ನಾಯಕನ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಭಾರಿ ದೊಡ್ಡ ಹಿಟ್ ಆಗಿತ್ತು. ಸಿನಿಮಾದ ‘ಹೌ ಈಸ್​ ದ ಜೋಶ್’ ಡೈಲಾಗ್ ಸಹ ದೊಡ್ಡ ಹಿಟ್ ಆಗಿತ್ತು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ