ಕತ್ರಿನಾ-ವಿಕ್ಕಿ ಲವ್ಸ್ಟೋರಿ ಶುರು ಆಗಲು ಕಾರಣ ಆದ ವ್ಯಕ್ತಿ ಯಾರು ಗೊತ್ತಾ? ಇಲ್ಲಿದೆ ಫುಲ್ ವಿವರ
Katrina Kaif Vicky Kaushal Love Story: ಒಂದೇ ಸಿನಿಮಾದಲ್ಲಿ ಜೊತೆಯಾಗಿ ಅಭಿನಯಿಸಿದ ನಟ-ನಟಿಯರ ನಡುವೆ ಪ್ರೀತಿ ಶುರುವಾಗುವುದು ಸಹಜ. ಆದರೆ ಕತ್ರಿನಾ ಕೈಫ್ ಮತ್ತು ವಿಕ್ಕಿ ಕೌಶಲ್ ಯಾವ ಸಿನಿಮಾದಲ್ಲಿಯೂ ಒಟ್ಟಿಗೆ ಅಭಿನಯಿಸಿಲ್ಲ.
ಯಾರಿಗೆ, ಯಾವಾಗ, ಯಾರ ಮೇಲೆ, ಹೇಗೆ ಪ್ರೀತಿ ಚಿಗುರುತ್ತದೆ ಅಂತ ಹೇಳೋದು ಕಷ್ಟ. ಹಣ, ಆಸ್ತಿ, ಪ್ರತಿಷ್ಠೆ, ಭಾಷೆ, ದೇಶ, ಬಣ್ಣ ಎಲ್ಲವನ್ನೂ ಮೀರಿ ಇಬ್ಬರ ನಡುವೆ ಪ್ರೇಮ್ ಕಹಾನಿ ಶುರು ಆಗಬಹುದು. ಈಗ ಕತ್ರಿನಾ ಕೈಫ್ (Katrina Kaif ) ಮತ್ತು ವಿಕ್ಕಿ ಕೌಶಲ್ (Vicky Kaushal) ಲವ್ಸ್ಟೋರಿ ಬಗ್ಗೆ ಚರ್ಚೆ ಆಗುತ್ತಿದೆ. ಇಬ್ಬರ ನಡುವೆ ಪ್ರೀತಿ ಹುಟ್ಟಿದ್ದು ಹೇಗೆ ಎಂದು ಅಭಿಮಾನಿಗಳೆಲ್ಲ ಪ್ರಶ್ನಿಸುತ್ತಿದ್ದಾರೆ. ಕತ್ರಿನಾ ಮೂಲತಃ ಬ್ರಿಟನ್ನವರು. ಆದರೆ ಈಗ ಅವರು ಮದುವೆ ಆಗುತ್ತಿರುವುದು ಪಂಜಾಬಿ ಕುಟುಂಬದ ವಿಕ್ಕಿ ಕೌಶಲ್ ಅವರನ್ನು. ರಾಜಸ್ಥಾನದ ಸಿಕ್ಸ್ ಸೆನ್ಸಸ್ ಫೋರ್ಟ್ ಹೋಟೆಲ್ನಲ್ಲಿ ಮದುವೆ ನಡೆಯಲಿದೆ. ತುಂಬ ಸೀಕ್ರೆಟ್ ಆಗಿ ಈ ವಿವಾಹ ನೆರವೇರುತ್ತಿದೆ. ಇವರಿಬ್ಬರು ಡೇಟಿಂಗ್ ಶುರುಮಾಡಲು ಕಾರಣವಾದ ಎರಡು ಪ್ರಸಂಗಗಳ ಬಗ್ಗೆ ಇಲ್ಲಿದೆ ಮಾಹಿತಿ..
ಒಂದೇ ಸಿನಿಮಾದಲ್ಲಿ ಜೊತೆಯಾಗಿ ಅಭಿನಯಿಸಿದ ನಟ-ನಟಿಯರ ನಡುವೆ ಪ್ರೀತಿ ಶುರುವಾಗುವುದು ಸಹಜ. ಆದರೆ ಕತ್ರಿನಾ ಕೈಫ್ ಮತ್ತು ವಿಕ್ಕಿ ಕೌಶಲ್ ಯಾವ ಸಿನಿಮಾದಲ್ಲಿಯೂ ಒಟ್ಟಿಗೆ ಅಭಿನಯಿಸಿಲ್ಲ. ಆದರೂ ಅವರ ನಡುವೆ ಪ್ರೇಮಾಂಕುರವಾಗಲು ಕಾರಣವಾಗಿದ್ದು ‘ಕಾಫಿ ವಿಥ್ ಕರಣ್’ ಶೋ ಎಂಬುದು ಅಚ್ಚರಿಯ ವಿಚಾರ.
2019ರ ವೇಳೆಗೆ ಕರಣ್ ಜೋಹರ್ ಅವರ ಕಾಫಿ ವಿಥ್ ಕರಣ್ ಕಾರ್ಯಕ್ರಮದಲ್ಲಿ ಕತ್ರಿನಾ ಕೈಫ್ ಅತಿಥಿಯಾಗಿ ಭಾಗವಹಿಸಿದ್ದರು. ಮುಂದಿನ ಸಿನಿಮಾದಲ್ಲಿ ನೀವು ಯಾರ ಜೊತೆ ಅಭಿನಯಿಸಲು ಬಯಸುತ್ತೀರಿ ಎಂದು ಕರಣ್ ಕೇಳಿದ ಪ್ರಶ್ನೆಗೆ ಉತ್ತರವಾಗಿ ವಿಕ್ಕಿ ಕೌಶಲ್ ಹೆಸರನ್ನು ಕತ್ರಿನಾ ಹೇಳಿದ್ದರು. ‘ನಾವಿಬ್ಬರು ಜೋಡಿಯಾಗಿ ಚೆನ್ನಾಗಿ ಕಾಣಿಸುತ್ತೇವೆ’ ಎಂದು ಅವರು ಕಾರಣ ನೀಡಿದ್ದರು.
ಹಲವು ದಿನಗಳ ನಂತರ ವಿಕ್ಕಿ ಕೌಶಲ್ ಅವರು ಇದೇ ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಆಗಮಿಸಿದ್ದರು. ಕತ್ರಿನಾ ಹೇಳಿದ್ದ ಮಾತನ್ನು ಕರಣ್ ಅವರು ವಿಕ್ಕಿಗೆ ತಿಳಿಸಿದರು. ಅದನ್ನು ಕೇಳಿ ವಿಕ್ಕಿಗೆ ಶಾಕ್ ಆಗಿತ್ತು. ಖುಷಿಯಿಂದ ತಲೆ ತಿರುಗಿ ಬಿದ್ದವರಂತೆ ಅವರು ನಟಿಸಿದ್ದರು! ‘ನಾನು ಕೂಡ ಕತ್ರಿನಾ ಜೊತೆ ನಟಿಸಲು ಇಷ್ಟಪಡುತ್ತೇನೆ’ ಎಂದು ವಿಕ್ಕಿ ಹೇಳಿದ್ದರು.
ಮತ್ತೊಂದು ಚಾಟ್ ಶೋನಲ್ಲಿ ಕತ್ರಿನಾ ಮತ್ತು ವಿಕ್ಕಿ ಕೌಶಲ್ ಜೊತೆಯಾಗಿ ಭಾಗವಹಿಸಿದ್ದರು. ಆ ವೇಳೆ ತಮ್ಮಿಬ್ಬರ ವೈಯಕ್ತಿಕ ಜೀವನ, ಇಷ್ಟ-ಕಷ್ಟಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದರು. ಅಲ್ಲಿಂದ ಅವರಿಬ್ಬರ ಕನೆಕ್ಷನ್ ಬಿಗಿ ಆಯಿತು. ಆ ಬಳಿಕ ಅವರಿಬ್ಬರು ಡೇಟಿಂಗ್ ಮಾಡಲು ಆರಂಭಿಸಿದರು. ಸ್ನೇಹಿತರೊಬ್ಬರು ಏರ್ಪಡಿಸಿದ್ದ ಪಾರ್ಟಿಯಲ್ಲಿ ವಿಕ್ಕಿ ಮತ್ತು ಕತ್ರಿನಾ ಮೊದಲ ಬಾರಿಗೆ ಸಾರ್ವಜನಿಕವಾಗಿ ಒಟ್ಟಾಗಿ ಕಾಣಿಸಿಕೊಂಡರು. ಬಳಿಕ ಇಬ್ಬರೂ ಸೇರಿ ಮುಂಬೈನಲ್ಲಿ ಮನೆ ಹುಡುಕುತ್ತಿರುವುದು ಎಲ್ಲರ ಕಣ್ಣಿಗೆ ಬಿದ್ದಿತ್ತು. ಸಿದ್ದಾರ್ಥ್ ಮಲ್ಹೋತ್ರಾ ನಟನೆಯ ‘ಶೇರ್ಷಾ’ ಚಿತ್ರದ ಪ್ರೀಮಿಯರ್ ಶೋಗೆ ವಿಕ್ಕಿ-ಕತ್ರಿನಾ ಜೋಡಿಯಾಗಿ ಬಂದಿದ್ದರು. ಈಗ ಅವರಿಬ್ಬರ ಸಂಬಂಧಕ್ಕೆ ಮದುವೆಯ ಮುದ್ರೆ ಬೀಳುತ್ತಿದೆ.
ಇದನ್ನೂ ಓದಿ:
ಕತ್ರಿನಾ ಕೈಫ್-ವಿಕ್ಕಿ ಕೌಶಲ್ ಮದುವೆ ಬಗ್ಗೆ ಮೊದಲ ಬಾರಿ ಮೌನ ಮುರಿದ ಕುಟುಂಬದವರು; ಹೇಳಿದ್ದು ಒಂದೇ ಮಾತು
ಕತ್ರಿನಾ ಮದುವೆಗೆ ಗಾಜಿನ ಮಂಟಪ; 7 ಕುದುರೆಗಳ ಜತೆ ಎಂಟ್ರಿ ನೀಡಲಿರುವ ಮದುಮಗ ವಿಕ್ಕಿ ಕೌಶಲ್
Published On - 8:54 pm, Tue, 7 December 21
