War 2 shooting: ಕಂಡು ಕೇಳರಿಯದ ಆ್ಯಕ್ಷನ್ಗೆ ಹೃತಿಕ್ ರೋಷನ್ ಸಜ್ಜು
ಫೆ.23ರಿಂದ ‘ವಾರ್ 2’ ಸಿನಿಮಾದ ಚಿತ್ರೀಕರಣ ಆರಂಭ ಆಗಲಿದೆ ಎಂದು ವರದಿ ಆಗಿದೆ. ಈ ಚಿತ್ರದಲ್ಲಿ ಹೃತಿಕ್ ರೋಷನ್ ಅವರ ಇಂಟ್ರಡಕ್ಷನ್ ದೃಶ್ಯವೇ ಭರ್ಜರಿ ಆ್ಯಕ್ಷನ್ನಿಂದ ಕೂಡಿರಲಿದೆ. 2 ವಾರಗಳ ಕಾಲ ಒಂದೇ ಆ್ಯಕ್ಷನ್ ದೃಶ್ಯದ ಚಿತ್ರೀಕರಣ ನಡೆಯಲಿದೆ ಎಂಬ ಸುದ್ದಿ ಕೇಳಿ ಫ್ಯಾನ್ಸ್ ಖುಷಿಯಾಗಿದೆ. ಅದ್ದೂರಿ ಬಜೆಟ್ನಲ್ಲಿ ಈ ಸಿನಿಮಾ ಮೂಡಿಬರಲಿದೆ.
Updated on: Feb 15, 2024 | 6:14 PM
ಬಾಲಿವುಡ್ ನಟ ಹೃತಿಕ್ ರೋಷನ್ (Hrithik Roshan) ಅವರ ಸಿನಿಮಾಗಳಲ್ಲಿ ಅಭಿಮಾನಿಗಳು ಭರ್ಜರಿ ಆ್ಯಕ್ಷನ್ ಬಯಸುತ್ತಾರೆ. ಫ್ಯಾನ್ಸ್ ನಿರೀಕ್ಷೆಗೆ ತಕ್ಕಂತೆಯೇ ‘ವಾರ್ 2’ ಸಿನಿಮಾ (War 2 Movie) ಮೂಡಿಬರಲಿದೆ. ಈ ಸಿನಿಮಾದಲ್ಲಿ ಹೃತಿಕ್ ರೋಷನ್ ಜೊತೆ ಜೂನಿಯರ್ ಎನ್ಟಿಆರ್ ಕೂಡ ನಟಿಸಲಿರುವುದರಿಂದ ಅಭಿಮಾನಿಗಳ ಕಾತರ ಇನ್ನಷ್ಟು ಹೆಚ್ಚಾಗಿದೆ. ಈಗ ಈ ಸಿನಿಮಾದ ಶೂಟಿಂಗ್ ಬಗ್ಗೆ ಒಂದು ಮಾಹಿತಿ ಸಿಕ್ಕಿದೆ. ವರದಿಗಳ ಪ್ರಕಾರ, ಹೃತಿಕ್ ರೋಷನ್ ಅವರು ಮುಂದಿನ ವಾರದಿಂದ ‘ವಾರ್ 2’ ಸಿನಿಮಾಗೆ ಚಿತ್ರೀಕರಣ (War 2 Shooting) ಆರಂಭಿಸಲಿದ್ದಾರೆ. ವಿಶೇಷ ಏನೆಂದರೆ, ಆ್ಯಕ್ಷನ್ ದೃಶ್ಯಗಳ ಮೂಲಕವೇ ಶೂಟಿಂಗ್ ಪ್ರಾರಂಭಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ.
ಆ್ಯಕ್ಷನ್ ಸಿನಿಮಾಗಳ ಮೂಲ ಅಯಾನ್ ಮುಖರ್ಜಿ ಫೇಮಸ್ ಆಗಿದ್ದಾರೆ. ಈಗ ಅವರು ‘ವಾರ್ 2’ ಸಿನಿಮಾಗೆ ಆ್ಯಕ್ಷನ್-ಕಟ್ ಹೇಳಲು ಸಜ್ಜಾಗಿದ್ದಾರೆ. ಈ ಸಿನಿಮಾದಲ್ಲಿ ಮಾಸ್ ಅಭಿಮಾನಿಗಳಿಗೆ ಭರ್ಜರಿ ಮನರಂಜನೆ ನೀಡಲು ಚಿತ್ರತಂಡ ನಿರ್ಧರಿಸಿದಂತಿದೆ. ಹಾಗಾಗಿ ಶುರುವಿನಲ್ಲೇ ಸಾಹಸ ದೃಶ್ಯಗಳ ಚಿತ್ರೀಕರಣ ಮಾಡಲು ನಿರ್ಧರಿಸಲಾಗಿದೆ. ಅದಕ್ಕಾಗಿ ಹೃತಿಕ್ ರೋಷನ್ ಅವರು ಈಗಾಗಲೇ ಸಕಲ ತಯಾರಿ ಮಾಡಿಕೊಂಡಿದ್ದಾರೆ.
ಫೆಬ್ರವರಿ 23ರಿಂದ ‘ವಾರ್ 2’ ಶೂಟಿಂಗ್ ಶುರುವಾಗಲಿದೆ. ಈ ಸಿನಿಮಾದಲ್ಲಿನ ಹೀರೋ ಇಂಟ್ರಡಕ್ಷನ್ ದೃಶ್ಯವೇ ಆ್ಯಕ್ಷನ್ಮಯವಾಗಿ ಇರಲಿದೆ. ಎರಡು ವಾರಗಳ ಕಾಲ ಒಂದೇ ಫೈಟಿಂಗ್ ದೃಶ್ಯದ ಶೂಟಿಂಗ್ ನಡೆಯಲಿದೆ. ಅಂದರೆ, ಈ ಸಿನಿಮಾದಲ್ಲಿ ಕಂಡು ಕೇಳರಿಯದಂತಹ ಸಾಹಸ ಸನ್ನಿವೇಶಗಳನ್ನು ಪ್ರೇಕ್ಷಕರಿಗೆ ತೋರಿಸಲು ಚಿತ್ರತಂಡ ಪ್ಲ್ಯಾನ್ ಮಾಡಿಕೊಂಡಿದೆ.
ಇದನ್ನೂ ಓದಿ: ‘ವಾರ್ 2’ ಚಿತ್ರಕ್ಕಾಗಿ ಬಾಲಿವುಡ್ ಹೀರೋಗಳಿಗಿಂತಲೂ ಹೆಚ್ಚು ಸಂಭಾವನೆ ಪಡೆದ ಜೂನಿಯರ್ ಎನ್ಟಿಆರ್
‘ವಾರ್ 2’ ಸಿನಿಮಾಗಾಗಿ ಹೃತಿಕ್ ರೋಷನ್ ಅವರು ತಮ್ಮ ದೇಹಕ್ಕೆ ನಿರ್ದಿಷ್ಟ ಶೇಪ್ ನೀಡುತ್ತಿದ್ದಾರೆ. ಅದರ ಸಲುವಾಗಿ ಜಿಮ್ನಲ್ಲಿ ಕಸರತ್ತು ನಡೆಯುವಾಗ ಇತ್ತೀಚೆಗೆ ಅವರಿಗೆ ಪೆಟ್ಟಾಗಿತ್ತು. ಆದರೆ ಅದು ಗಂಭೀರವಾಗಿ ಗಾಯ ಅಲ್ಲದ ಕಾರಣ ಅವರು ಬಹಳ ಬೇಗ ಸುಧಾರಿಸಿಕೊಂಡಿದ್ದಾರೆ. ಸಖತ್ ವರ್ಕೌಟ್ ಮಾಡಿ ‘ವಾರ್ 2’ ಸಿನಿಮಾದ ಶೂಟಿಂಗ್ಗೆ ಅವರು ಸಜ್ಜಾಗಿದ್ದಾರೆ.
ಈವರೆಗೂ ಯಶ್ರಾಜ್ ಫಿಲ್ಮ್ಸ್ ಸ್ಪೈ ಯೂನಿವರ್ಸ್ನಲ್ಲಿ ಮೂಡಿಬಂದ ಸಿನಿಮಾಗಳಿಗಿಂತಲೂ ಸಂಪೂರ್ಣ ಭಿನ್ನವಾಗಿ ‘ವಾರ್ 2’ ಸಿನಿಮಾ ಮೂಡಿಬರಬೇಕು ಎಂಬುದು ನಿರ್ದೇಶಕ ಅಯಾನ್ ಮುಖರ್ಜಿ ಮತ್ತು ನಿರ್ಮಾಪಕ ಆದಿತ್ಯ ಚೋಪ್ರಾ ಅವರ ಉದ್ದೇಶ. ಅದಕ್ಕಾಗಿ ಅವರು ಸ್ಕ್ರಿಪ್ಟ್ ಬಗ್ಗೆ ಸಾಕಷ್ಟು ಕಾಳಜಿ ವಹಿಸಿದ್ದಾರೆ. 2025ರ ಆಗಸ್ಟ್ 14ರಂದು ಈ ಸಿನಿಮಾ ಬಿಡುಗಡೆ ಆಗಲಿದೆ. ಹೃತಿಕ್ ರೋಷನ್ ಮತ್ತು ಜೂನಿಯರ್ ಎನ್ಟಿಆರ್ ಅವರು ಇದೇ ಮೊದಲ ಬಾರಿಗೆ ತೆರೆಹಂಚಿಕೊಳ್ಳುತ್ತಿರುವುದರಿಂದ ನಿರೀಕ್ಷೆ ಮುಗಿಲು ಮುಟ್ಟಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
