Katrina Kaif: ತೆರೆ ಹಿಂದಿನ ಫೋಟೋ ಹಂಚಿಕೊಂಡ ಕತ್ರಿನಾ ಕೈಫ್; ವಿಜಯ್ ಸೇತುಪತಿ ಜತೆ ಕೆಲಸ ಕೆಲಸ ಕೆಲಸ
Merry Christmas | Vijay Sethupathi: ‘ಮೇರಿ ಕ್ರಿಸ್ಮಸ್’ ಚಿತ್ರದ ಬಗ್ಗೆ ಕತ್ರಿನಾ ಕೈಫ್ ಅವರು ಹೆಚ್ಚು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಅವರ ಜತೆ ವಿಜಯ್ ಸೇತುಪತಿ ಕೂಡ ನಟಿಸುತ್ತಿದ್ದಾರೆ.
Updated on: Sep 19, 2022 | 12:20 PM
ನಟಿ ಕತ್ರಿನಾ ಕೈಫ್ (Katrina Kaif) ಅವರು ಹಲವು ಸಿನಿಮಾದ ಕೆಲಸಗಳಲ್ಲಿ ಬ್ಯುಸಿ ಆಗಿದ್ದಾರೆ. ಬಾಲಿವುಡ್ನಲ್ಲಿ ಅವರಿಗೆ ಸಖತ್ ಡಿಮ್ಯಾಂಡ್ ಇದೆ. ವಿಕ್ಕಿ ಕೌಶಲ್ ಜೊತೆ ಮದುವೆ ಆದ ಬಳಿಕವೂ ಅವರು ಅನೇಕ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ‘ಮೇರಿ ಕ್ರಿಸ್ಮಸ್’, ‘ಫೋನ್ ಭೂತ್’, ‘ಟೈಗರ್ 3’ ಸೇರಿದಂತೆ ಹಲವು ಚಿತ್ರಗಳು ಅವರ ಕೈಯಲ್ಲಿವೆ. ಸದ್ಯ ಅವರು ‘ಮೇರಿ ಕ್ರಿಸ್ಮಸ್’ (Merry Christmas) ಚಿತ್ರದ ಶೂಟಿಂಗ್ನಲ್ಲಿ ಭಾಗಿ ಆಗಿದ್ದಾರೆ. ಈ ಸಿನಿಮಾದ ಚಿತ್ರೀಕರಣದ ಸೆಟ್ನಿಂದಲೇ ಕೆಲವು ಫೋಟೋಗಳನ್ನು ಕತ್ರಿನಾ ಕೈಫ್ ಹಂಚಿಕೊಂಡಿದ್ದಾರೆ. ‘ಕೆಲಸ ಕೆಲಸ ಕೆಲಸ’ ಎಂದು ಅವರು ಕ್ಯಾಪ್ಷನ್ ನೀಡಿದ್ದಾರೆ. ಈ ಚಿತ್ರದಲ್ಲಿ ಅವರು ಖ್ಯಾತ ನಟ ವಿಜಯ್ ಸೇತುಪತಿ (Vijay Sethupathi) ಜತೆ ನಟಿಸುತ್ತಿದ್ದಾರೆ.
‘ಮೇರಿ ಕ್ರಿಸ್ಮಸ್’ ಚಿತ್ರಕ್ಕೆ ಶ್ರೀರಾಮ್ ರಾಘವನ್ ನಿರ್ದೇಶನ ಮಾಡುತ್ತಿದ್ದಾರೆ. ಕ್ಲ್ಯಾಪ್ ಬೋರ್ಡ್ ಫೋಟೋವನ್ನು ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಕತ್ರಿನಾ ಕೈಫ್ ಹಂಚಿಕೊಂಡಿದ್ದಾರೆ. ಅದರ ಜೊತೆಗೆ ಶ್ರೀರಾಮ್ ರಾಘವನ್ ಮತ್ತು ವಿಜಯ್ ಸೇತುಪತಿ ಅವರ ಫೋಟೋಗಳನ್ನು ಸ್ವತಃ ತಾವೇ ಕ್ಲಿಕ್ಕಿಸಿರುವ ಅವರು ಈ ಬಗ್ಗೆ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
ಈ ಚಿತ್ರದ ಬಗ್ಗೆ ಕತ್ರಿನಾ ಕೈಫ್ ಅವರು ಹೆಚ್ಚು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. 2021ರಲ್ಲಿ ಅವರು ಈ ಚಿತ್ರದ ಬಗ್ಗೆ ಸಖತ್ ಖುಷಿಯಿಂದ ಘೋಷಣೆ ಮಾಡಿದ್ದರು. ‘ಇದು ಹೊಸ ಆರಂಭ. ಶ್ರೀರಾಮ್ ರಾಘವನ್ ಅವರ ಜೊತೆ ಕೆಲಸ ಮಾಡಬೇಕು ಅಂತ ನಾನು ಯಾವಾಗಲೂ ಅಂದುಕೊಳ್ಳುತ್ತಿದ್ದೆ. ಥ್ರಿಲ್ಲರ್ ಸಿನಿಮಾಗಳನ್ನು ಕಟ್ಟಿಕೊಡುವುದರಲ್ಲಿ ಅವರು ಮಾಸ್ಟರ್. ಅವರ ನಿರ್ದೇಶನದಲ್ಲಿ ನಟಿಸಲು ಹೆಮ್ಮೆ ಎನಿಸುತ್ತದೆ. ವಿಜಯ್ ಸೇತುಪತಿ ಜತೆ ನಟಿಸಲು ಸೂಪರ್ ಎಗ್ಸೈಟ್ ಆಗಿದ್ದೇನೆ’ ಎಂದು ಕತ್ರಿನಾ ಕೈಫ್ ಪೋಸ್ಟ್ ಮಾಡಿಕೊಂಡಿದ್ದರು.
ಇದಲ್ಲದೇ, ಕತ್ರಿನಾ ಕೈಫ್ ನಟನೆಯ ‘ಫೋನ್ ಭೂತ್’ ಸಿನಿಮಾ ಕೂಡ ನಿರೀಕ್ಷೆ ಹುಟ್ಟುಹಾಕಿದೆ. ಈ ಚಿತ್ರದಲ್ಲಿ ಅವರು ಇಶಾನ್ ಖಟ್ಟರ್ ಮತ್ತು ಸಿದ್ಧಾಂತ್ ಚತುರ್ವೇದಿ ಜತೆ ನಟಿಸುತ್ತಿದ್ದಾರೆ. ಇದೇ ವರ್ಷ ನವೆಂಬರ್ 4ರಂದು ಈ ಸಿನಿಮಾ ರಿಲೀಸ್ ಆಗಲಿದೆ. ಸಲ್ಮಾನ್ ಖಾನ್ ಜೊತೆಗೆ ಕತ್ರಿನಾ ನಟಿಸುತ್ತಿರುವ ‘ಟೈಗರ್ 3’ ಚಿತ್ರದ ಮೇಲೆ ಅಭಿಮಾನಿಗಳಿಗೆ ಭಾರಿ ನಿರೀಕ್ಷೆ ಇದೆ. 2023ರ ಏಪ್ರಿಲ್ 23ರಂದು ಆ ಚಿತ್ರ ಬಿಡುಗಡೆ ಆಗಲಿದೆ. ಒಟ್ಟಿನಲ್ಲಿ ಕತ್ರಿನಾ ಕೈಫ್ ಅವರು ಬಹುಬೇಡಿಕೆಯ ನಟಿಯಾಗಿ ಬಾಲಿವುಡ್ನಲ್ಲಿ ಮಿಂಚುತ್ತಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
