ವಿದೇಶದಲ್ಲಿ ಮ್ಯಾಜಿಕ್ ಮಾಡಿದ ಪಠಾಣ್, ಅವತಾರ್ 2 ದಾಖಲೆ ಉಡೀಸ್
Pathaan: ಭಾರತೀಯ ಸಿನಿಮಾಗಳನ್ನು ನಿಷೇಧಿಸಿದ್ದ ದೇಶದಲ್ಲಿ ಬಿಡುಗಡೆ ಆಗಿ ಅವತಾರ್ 2 ಸಿನಿಮಾದ ದಾಖಲೆಯನ್ನೇ ಚಿಂದಿ ಉಡಾಯಿಸಿದೆ ಪಠಾಣ್ ಸಿನಿಮಾ.
Updated on: Jun 23, 2023 | 8:37 AM
ಶಾರುಖ್ ಖಾನ್ (Shah Rukh Khan) ನಟನೆಯ ಪಠಾಣ್ (Pathaan) ಸಿನಿಮಾ ಬಳಲಿದ್ದ ಬಾಲಿವುಡ್ಗೆ ಮರುಜೀವ ನೀಡಿದ ಸಿನಿಮಾ. ಜನವರಿ 25 ರಂದು ಬಿಡುಗಡೆ ಆಗಿದ್ದ ಈ ಸಿನಿಮಾ ಈ ವರ್ಷದ ಈವರೆಗಿನ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಸಿನಿಮಾ ಸಹ ಹೌದು. ಭಾರತದಲ್ಲಿ ಮಾತ್ರವೇ ಅಲ್ಲದೆ ವಿದೇಶಗಳಲ್ಲಿಯೂ ಈ ಸಿನಿಮಾ ಸೂಪರ್-ಡೂಪರ್ ಹಿಟ್ ಆಗಿದೆ. ಕೆಲ ನೆಗೆಟಿವ್ ವಿಮರ್ಶೆಗಳ ನಡುವೆಯೂ ಈ ಸಿನಿಮಾ ದೊಡ್ಡ ಯಶಸ್ಸನ್ನು ಗಳಿಸಿದ್ದು ಕೆಲ ದೇಶಗಳಲ್ಲಿಯಂತೂ ಹಾಲಿವುಡ್ (Hollywood) ಸಿನಿಮಾಗಳನ್ನು ಸಹ ಹಿಂದಿಕ್ಕಿದೆ.
ಬಾಂಗ್ಲಾದೇಶದಲ್ಲಿ ಭಾರತೀಯ ಸಿನಿಮಾಗಳ ಬಿಡುಗಡೆಯನ್ನು ನಿಷೇಧಿಸಲಾಗಿತ್ತು. ಆದರೆ ಇತ್ತೀಚೆಗಷ್ಟೆ ಆ ನಿಷೇಧವನ್ನು ತೆರವು ಮಾಡಲಾಗಿದ್ದು ಕಳೆದ ತಿಂಗಳಷ್ಟೆ ಶಾರುಖ್ ಖಾನ್ರ ಪಠಾಣ್ ಸಿನಿಮಾವನ್ನು ಬಾಂಗ್ಲಾದೇಶದಲ್ಲಿ ಬಿಡುಗಡೆ ಮಾಡಲಾಗಿದೆ. ವಿಶೇಷವೆಂದರೆ ನಿಷೇಧ ತೆರವಾದ ಮೇಲೆ ಬಾಂಗ್ಲಾದಲ್ಲಿ ಬಿಡುಗಡೆ ಆಗುತ್ತಿರುವ ಮೊದಲ ಸಿನಿಮಾ ಸಹ ಪಠಾಣ್ ಆಗಿದ್ದು ಈ ಸಿನಿಮಾವನ್ನು ಬಾಂಗ್ಲಾದೇಶಿಯವರು ಮುಗಿಬಿದ್ದು ವೀಕ್ಷಿಸುತ್ತಿದ್ದಾರೆ.
ಕೇವಲ 40 ಚಿತ್ರಮಂದಿರಗಳಲ್ಲಿ ಈ ಸಿನಿಮಾ ಬಿಡುಗಡೆ ಆಗಿತ್ತಾದರೂ ದೊಡ್ಡ ಸಂಖ್ಯೆಯ ಜನ ಮೊದಲ ದಿನವೇ ಪಠಾಣ್ ಸಿನಿಮಾವನ್ನು ವೀಕ್ಷಿಸಿದ್ದರು. ದಶಕಗಳ ಬಳಿಕ ಬಿಡುಗಡೆ ಆದ ಭಾರತೀಯ ಸಿನಿಮಾಕ್ಕೆ ಅಪರಿಮಿತ ಪ್ರೀತಿಯನ್ನು ಬಾಂಗ್ಲಾ ಜನ ತೋರಿಸುತ್ತಿದ್ದಾರೆ. ಪಠಾಣ್ ಸಿನಿಮಾವು ಬಾಂಗ್ಲಾದ ಹಳೆಯ ದಾಖಲೆಗಳನ್ನೆಲ್ಲ ಮುರಿದು ಈವರೆಗೆ ಬಾಂಗ್ಲಾನಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿದ ವಿದೇಶಿ ಸಿನಿಮಾ ಎಂಬ ಖ್ಯಾತಿಯನ್ನು ಗಳಿಸಿಕೊಂಡಿದೆ. ಅವತಾರ್ 2 ಸಿನಿಮಾದ ದಾಖಲೆಯನ್ನು ಸಹ ಪಠಾಣ್ ಮುರಿದು ಹಾಕಿದೆ. ವಿಶೇಷವೆಂದರೆ ಬಾಂಗ್ಲಾನಲ್ಲಿ ಪಠಾಣ್ ಸಿನಿಮಾ ಬಿಡುಗಡೆ ಆಗುವ ವೇಳೆಗೆ ಈ ಸಿನಿಮಾ ಒಟಿಟಿಯಲ್ಲಿ ಬಿಡುಗಡೆ ಆಗಿಬಿಟ್ಟಿತ್ತು. ಹಾಗಿದ್ದರೂ ಸಹ ಬಾಂಗ್ಲಾದ ಜನ ಮುಗಿಬಿದ್ದು ಪಠಾಣ್ ಸಿನಿಮಾ ವೀಕ್ಷಿಸಿದ್ದಾರೆ.
ಹಾಗೆಂದ ಪಾತ್ರಕ್ಕೆ ಭಾರಿ ದೊಡ್ಡ ಮೊತ್ತವನ್ನು ಪಠಾಣ್ ಸಿನಿಮಾ ಬಾಂಗ್ಲಾನಲ್ಲಿ ಕಲೆ ಹಾಕಿದೆ ಎಂದೇನೂ ಇಲ್ಲ. ಪಠಾಣ್ ಸಿನಿಮಾ ಬಾಂಗ್ಲಾನಲ್ಲಿ ಈವರೆಗೆ ಗಳಿಸಿರುವುದು 1.85 ಕೋಟಿ ಮಾತ್ರ. ಆದರೆ ಇದು ಬಾಂಗ್ಲಾದ ಮನೊರಂಜನಾ ಮಾರುಕಟ್ಟೆಯನ್ನು ಗಮನದಲ್ಲಿಟ್ಟು ನೋಡಿದರೆ ಬಹಳ ದೊಡ್ಡ ಮೊತ್ತ. ಸುಮಾರು 17 ಕೋಟಿ ಜನಸಂಖ್ಯೆ ಇರುವ ಬಾಂಗ್ಲಾದೇಶದಲ್ಲಿ ಇರುವುದು ಕೆಲವು ನೂರು ಚಿತ್ರಮಂದಿರಗಳಷ್ಟೆ. ಆದರೆ ಅಷ್ಟು ಕಡಿಮೆ ಚಿತ್ರಮಂದಿರಗಳು ಹಾಗೂ ಫಾಸ್ಟ್ ಆಂಡ್ ಫ್ಯೂರಿಯಸ್ 10, ಟ್ರಾನ್ಸ್ಫಾರ್ಮರ್ಸ್, ಸ್ಪೈಡರ್ ವರ್ಸ್ 2 ಅಂಥಹಾ ಹಾಲಿವುಡ್ ಸಿನಿಮಾಗಳು ಎದುರಿದ್ದೂ ಸಹ ಭಾರತೀಯ ಸಿನಿಮಾ ಒಂದು ಈ ಮಟ್ಟಿಗಿನ ಕಲೆಕ್ಷನ್ ಮಾಡಿರುವುದು ಕಡಿಮೆ ಸಾಧನೆಯಲ್ಲ. ಅದೂ ದಶಕಗಳ ಕಾಲ ಭಾರತೀಯ ಸಿನಿಮಾಗಳೇ ಬಿಡುಗಡೆ ಆಗದಿದ್ದ ನೆಲದಲ್ಲಿ ಬಿಡುಗಡೆ ಆಗಿ ಇಷ್ಟು ಪ್ರೀತಿ ಗಳಿಸಿರುವುದು ಮುಂದೆ ಬಾಂಗ್ಲಾನಲ್ಲಿ ಬಿಡುಗಡೆ ಆಗುವ ಭಾರತೀಯ ಸಿನಿಮಾಗಳಿಗೆ ಉತ್ತಮ ಅವಕಾಶಗಳಿರುವುದನ್ನು ಸ್ಪಷ್ಟಗೊಳಿಸಿದೆ.
ಪಠಾಣ್ ಸಿನಿಮಾವು ಸ್ಪೈ ಆಕ್ಷನ್ ಥ್ರಿಲ್ಲರ್ ಸಿನಿಮಾ ಆಗಿದ್ದು, ಶಾರುಖ್ ಖಾನ್ ಜೊತೆಗೆ ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ ಸಹ ಸಿನಿಮಾದಲ್ಲಿದ್ದಾರೆ. ಸಿನಿಮಾವನ್ನು ಸಿದ್ಧಾರ್ಥ್ ಆನಂದ್ ನಿರ್ದೇಶನ ಮಾಡಿದ್ದು ನಿರ್ಮಾಣ ಮಾಡಿರುವುದು ಯಶ್ ರಾಜ್ ಫಿಲಮ್ಸ್.
