‘ಬೈಕಾಟ್’ ಎನ್ನುವವರಿಗೆ ಶಾರುಖ್ ಖಾನ್ ನಟನೆಯ ‘ಪಠಾಣ್’ ಸಿನಿಮಾ ಒಂದೊಳ್ಳೆಯ ಪಾಠ
ಸಿನಿಮಾ ರಿಲೀಸ್ಗೂ ಮುನ್ನ ಚಿತ್ರದ ಪೋಸ್ಟರ್, ಟೀಸರ್, ಟ್ರೇಲರ್ ರಿಲೀಸ್ ಮಾಡಲಾಗುತ್ತದೆ. ಇದರಲ್ಲಿ ಯಾವುದಾದರೂ ಅಂಶ ಇಷ್ಟವಾಗದೇ ಇದ್ದರೆ ಅದನ್ನು ಇಟ್ಟುಕೊಂಡು ಬೈಕಾಟ್ ಮಾಡಬೇಕು ಎನ್ನುವ ಅಭಿಯಾನ ಪ್ರಾರಂಭಿಸಲಾಗುತ್ತದೆ.
Updated on: Jan 30, 2023 | 3:03 PM
ಇತ್ತೀಚೆಗೆ ಬಾಲಿವುಡ್ನಲ್ಲಿ ಬೈಕಾಟ್ ಟ್ರೆಂಡ್ (Boycott ) ಜೋರಾಗಿದೆ. ದೊಡ್ಡ ಸಿನಿಮಾಗಳು ತೆರೆಗೆ ಬರುತ್ತವೆ ಎಂದರೆ ಒಂದು ವರ್ಗದ ಜನರು ರೊಚ್ಚಿಗೇಳುತ್ತಾರೆ. ಸೋಶಿಯಲ್ ಮೀಡಿಯಾದಲ್ಲಿ ಬೈಕಾಟ್ ಎಂದು ಹ್ಯಾಶ್ಟ್ಯಾಗ್ ಹಾಕಿ ಟ್ವೀಟ್ ಮಾಡುತ್ತಾರೆ. ಕೆಲವೇ ಕೆಲವು ಮಂದಿ ಬೀದಿಗೆ ಇಳಿದು ಪ್ರತಿಭಟನೆ ಮಾಡುತ್ತಾರೆ. ಸುಖಾಸುಮ್ಮನೆ ಬೈಕಾಟ್ ಎಂದು ಕೂಗುವವರಿಗೆ ‘ಪಠಾಣ್’ (Pathaan Movie Collection) ಸಿನಿಮಾದ ಕಲೆಕ್ಷನ್ ಒಂದೊಳ್ಳೆಯ ಪಾಠ.
ಸಿನಿಮಾ ರಿಲೀಸ್ಗೂ ಮುನ್ನ ಚಿತ್ರದ ಪೋಸ್ಟರ್, ಟೀಸರ್, ಟ್ರೇಲರ್ ರಿಲೀಸ್ ಮಾಡಲಾಗುತ್ತದೆ. ಇದರಲ್ಲಿ ಯಾವುದಾದರೂ ಅಂಶ ಇಷ್ಟವಾಗದೇ ಇದ್ದರೆ ಅದನ್ನು ಇಟ್ಟುಕೊಂಡು ಸಿನಿಮಾನ ಬೈಕಾಟ್ ಮಾಡಬೇಕು ಎನ್ನುವ ಅಭಿಯಾನ ಪ್ರಾರಂಭಿಸಲಾಗುತ್ತದೆ. ಈ ಸಂದರ್ಭಗಳಲ್ಲಿ ಧರ್ಮದ ವಿಚಾರವೇ ಮುಖ್ಯ ಆಗುತ್ತದೆ. ‘ಪಠಾಣ್’ ಚಿತ್ರಕ್ಕೂ ಹಾಗೆಯೇ ಆಗಿತ್ತು. ಆದರೆ, ಈ ಟ್ರೆಂಡ್ ಚಿತ್ರದ ಕಲೆಕ್ಷನ್ ಮೇಲೆ ಯಾವುದೇ ಪ್ರಭಾವ ಬೀರಿಲ್ಲ.
ಕಳೆದ ವರ್ಷ ಆಮಿರ್ ಖಾನ್ ನಟನೆಯ ‘ಲಾಲ್ ಸಿಂಗ್ ಚಡ್ಡಾ’ ತೆರೆಗೆ ಬಂತು. ಹಲವು ವರ್ಷಗಳ ಹಿಂದೆ ಆಮಿರ್ ಖಾನ್ ನೀಡಿದ್ದ ಅಸಹಿಷ್ಣುತೆ ಹೇಳಿಕೆಯನ್ನು ಇಟ್ಟುಕೊಂಡು ‘ಲಾಲ್ ಸಿಂಗ್ ಚಡ್ಡಾ’ಗೆ ಬಹಿಷ್ಕಾರ ಹಾಕುವ ನಿರ್ಧಾರವನ್ನು ಒಂದಷ್ಟು ಮಂದಿ ತೆಗೆದುಕೊಂಡರು. ಸೋಶಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಪೋಸ್ಟ್ ಮಾಡಿದರು. ಕಾಕತಾಳೀಯ ಎಂಬಂತೆ ಸಿನಿಮಾ ಸೋತಿತು. ಜನರಿಗೆ ಚಿತ್ರ ಇಷ್ಟವಾಗಿಲ್ಲ. ಹೀಗಾಗಿ, ಬೈಕಾಟ್ ಟ್ರೆಂಡ್ ಕೆಲಸ ಮಾಡಿದೆ ಎಂದು ಒಂದಷ್ಟು ಮಂದಿ ಬೀಗಿದರು. ಆದರೆ, ಅಸಲಿಯತ್ತು ಆ ರೀತಿ ಇಲ್ಲ.
ಕಳೆದ ವರ್ಷ ರಿಲೀಸ್ ಆದ ‘ಬ್ರಹ್ಮಾಸ್ತ್ರ’ ಚಿತ್ರಕ್ಕೂ ಬಹಿಷ್ಕಾರ ಕರೆ ನೀಡಲಾಗಿತ್ತು. ಚಿಕ್ಕ ವಿಚಾರ ಇಟ್ಟುಕೊಂಡು ಇದನ್ನು ಬಹಿಷ್ಕಾರ ಮಾಡಬೇಕು ಎಂದು ಒಂದಷ್ಟು ಮಂದಿ ಕರೆ ನೀಡಿದರು. ಆದರೆ, ಸಿನಿಮಾ ಒಳ್ಳೆಯ ಗಳಿಕೆ ಮಾಡಿತು. ಈಗ ‘ಪಠಾಣ್’ ಚಿತ್ರ ದಾಖಲೆಯ ಮೇಲೆ ದಾಖಲೆ ಬರೆಯುತ್ತಿದೆ.
ಇದನ್ನೂ ಓದಿ: ‘ಪಠಾಣ್’ ನಿರ್ದೇಶಕನಿಂದ ಮತ್ತೊಂದು ಮಲ್ಟಿ ಸ್ಟಾರರ್ ಪ್ಲ್ಯಾನ್; ಪ್ರಭಾಸ್ ಜತೆ ಹಿಂದಿ ಹೀರೋ
‘ಪಠಾಣ್’ ಸಿನಿಮಾದ ‘ಬೇಷರಂ ರಂಗ್..’ ಹಾಡಿನಲ್ಲಿ ದೀಪಿಕಾ ಪಡುಕೋಣೆ ಧರಿಸಿದ ಕೇಸರಿ ಬಣ್ಣದ ಬಿಕಿನಿಯನ್ನು ಇಟ್ಟುಕೊಂಡು ವಿವಾದ ಮಾಡಲಾಯಿತು. ಸಿನಿಮಾ ಬಹಿಷ್ಕಾರಕ್ಕೆ ಕರೆ ನೀಡಲಾಯಿತು. ಆದರೆ, ಚಿತ್ರ ಬೈಕಾಟ್ನ ಮೆಟ್ಟಿ ನಿಂತಿದೆ. ಐದು ದಿನಕ್ಕೆ ವಿಶ್ವಾದ್ಯಂತ 500 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಭಾರತದಲ್ಲಿ ಈ ಚಿತ್ರ 271 ಕೋಟಿ ರೂಪಾಯಿ ಗಳಿಕೆ ಮಾಡಿ ಮುನ್ನುಗ್ಗುತ್ತಿದೆ. ಅನಾವಶ್ಯಕವಾಗಿ ಬೈಕಾಟ್ ಎಂದು ಕೂಗುವವರಿಗೆ ‘ಪಠಾಣ್’ ಚಿತ್ರ ಒಂದೊಳ್ಳೆಯ ಪಾಠ ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
